Epacerero 1
1
Ompacereroni
1Ompacereroni Muluku aapattuxa erimu ni vathi. 2Vano, khayaakhanle ekhalelo vathi va. Epiphi yaasareya vasulu wa maahi ootheene ni Munepa wa Muluku waakhuneela maahi. 3Muluku aaheera: “Okhale waara” ni waakhala. 4Muluku aahoona oreera waara, ni aamwalamwaliha waara ni epiphi. 5Muluku aahiitthana waara “othana,” ni epiphi “ohiyu.” Waahiila ni onaxa, ni nne naari nihuku noopacera. 6Vahoolowaya Muluku aaheera: “Ekhale erimu emwalamwaxaka maahi a vathi ni a osulu.” 7Vano Muluku aapaka erimu ni aamwalamwaliha maahi vathi ni osulu. Ni hiiho yaaheereya. 8Muluku aahiitthana yeeyo emwalamwalinghe “erimu.” Vano waahiila ni onaxa, ni nne naari nihuku nanaaveeli. 9Muluku aaheera: “Ethukumane vanipuroni nimoha maahi ari vathi wa erimu ni wooneye mpatta wa etthaya yoowuuma.” Ni hiiho yaaheereya. 10Mpatta woowuuma Muluku aahiitthana “etthaya” ni aahiitthana maahi yaathukumanne “ephareiya.” Vano vamaithoni wa Muluku waari wooreera. 11Muluku aaheera: “Etthaya eruwere malaxi ni nyiri simvaha mmiso, ni nyiri siniima soowiimasaya, sootheene siimeke mootaaya. Ni hiiho yaaheereya. 12Vano vatthayani yaamela malaxi, yaawo aniima mmiswaaya, ni nyiri siniima soowiimasaya simvaha mmiswaaya. Vamaithoni wa Muluku waari wooreera. 13Waahiila ni onaxa, ni nne naari nihuku nanaararu. 14Muluku aaheera: “Sikhale soomwaleela wiirimu weera omwalamwalihiwe othana ni ohiyu. Iyo nsivarele muteko ntoko ethoonyero ya okawanyeya wa mahuku, ihuhu ni iyaakha. 15Okhale waara wa wiirimu weera omwaleeleke elapo ya vathi. Ni hiiho yaaheereya. 16Muluku aapattuxa soomwaleela piili: Etokweene weera elamuleke othana ni ekhaani elamuleke ohiyu. Aapattuxatho ithenyeeri. 17Muluku aakhaliha seiyo wiirimu weera simwaleele elapo ya vathi. 18Aakhalihatho seiyo weera silamule othana ni ohiyu ni weera simwalamwalihe waara ni epiphi. Vano vamaithoni wa Muluku waari wooreera. 19Waahiila ni onaxa, ni nne naari nihuku nanaaxexe. 20Muluku aaheeratho: “Sisareye mmaahini ikhalelo sootheene siri ni okumi ni sivave ipalame osulu.” 21Hiiho Muluku aapattuxa inama sitokotoko sa mphareiyani ni ikhalelo sootheene sinkhala mmaahini, nitho ikhalelo sootheene sa ipalame. Vamaithoni wa Muluku waari wooreera. 22Muluku aareeliha, eeraka: “Mwaandyeereraneke. Musareyeke mmaahini. Ni saandyeereraneke ipalame sa elapo ya vathi.” 23Waahiila ni onaxa, ni nne naari nihuku nanaathanu. 24Vano Muluku aaheera: “Eruwere etthaya ikhalelo sootheene siri ni okumi: Inama soohuwiwa, sa ntuphini ni siniipurula – khula muxovo ni ekhalelowaaya. Hiiho waaheereya. 25Muluku aapattuxa ikhalelo sootheene sa inama sa ntuphini, soohuwiwa nitho siniipurula. Vamaithoni wa Muluku waari wooreera.” 26Vano Muluku aahiixeerela: “Nimpattuxeke mulopwana niilikanxaka moota wooweera akhalaneke ekhalelowaahu. Alamuleke ihopa sootheene siri mphareiyani; ipalame sootheene sa wiirimu; inama soohuwiwa sootheene ni seiye sootheene siniipurula.” 27Muluku aampattuxa mulopwana akhalanaka ekhalelowaawe; aani, aampattuxa akhalanaka ekhalelo ya Muluku – aampattuxa mulopwana ni muthiyana. 28Muluku aahaareeliha ni aaweerela: “Mwaandyeereraneke. Musareyeke ni mulamuleke elapo ya vathi yootheene. Mulamuleke ihopa mphareiyani; ipalame sa wiirimu ni inama sootheene sa mweelaponi ya vathi.” 29Muluku aaheera: “Moone, kinoovahani nyiri sootheene simvaha mmiso ni nyiri sootheene siniima soowiimasaya ni inukusaya. Iyo nsikhale soocasanyu. 30Miyo kinoovahani soomela sootheene wa seiyo sirino okumi weera muceeke – wa inama sitokotoko sootheene sa vathi; ipalame sootheene sa wiirimu ni soopattuxiwa sootheene siniipurula.” Ni waaheereya hiiho. 31Muluku aahoona sootheene aapankaawe ni sootheene saari sooreeraxa. Vano waahiila ni onaxa, ni nne naari nihuku nanaathannamosa.
Aktuálne označené:
Epacerero 1: VMK2021
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Makhua Shirima Bible © Christelike Lektuurmaatskappy NPC, 2021.