Epacerero 2
2
1Hiiho yaamalihiwa opattuxiwa erimu ni etthaya ni sootheene siri mwemmo. 2Vanihukuni nanaathannameeli, hapo Muluku aamalihalaawe ovara mutekwaawe, nihuku nne aahiitthuuwa. 3Muluku aareeliha nihuku nanaathannameeli ni aatteeliha, niwoko nihuku nne aahiitthuuwa mwa miteko aavanraawe moopattuxanimwawe.
Ompacereroni wa omutthu
4Ola ori mwaha wa ephattuwelo ya erimu ni etthaya mweehuhuni sipattuxiwaaya: Yave aapankaawe erimu ni etthaya, 5nlelo neera nihinaaye ophuwa naari niphuwa nimoha na ntuphini, hata mwiri mmoha weera ohinaaye omela, niwoko Yave eera ahinaaye orupiha epula vatthayani nitho khaakhanle mutthu eera alimeke. 6Wa soothesene, yaakhuma etthabwe vatthayani ni yaahelela etthaya yootheene. 7Vano Yave Muluku aamoopa mulopwana avarelaka muteko ntthupi na etthaya ni aamwiiseelela mphulanimwawe ngwiya wa okumi ni mulopwana aathatuwa okhala ni okumi. 8Moone, Yave Muluku aahaala mmatta wEdeni wa mpatta ninkhuma nsuwa ni aamwiikaathimo mulopwana aamoompaawe. 9Vano, vatthayani Yave Muluku aameliha moota wootheene wa nyiri soosiveleya mmaithoni ni sooreera oca. Eriyari ya ematta waakhala mwiri wa okumi ni mwiri wa woosuweliha yooreera ni yoonanara. 10wEdeni waaphattuwa mooloko waahelela ematta. Vahoolowaya waakawanyeya mipatta mixexe. 11Nsina na woopacera ti Pixoni. Vano owo onrukureera elapo yootheene ya Havila, eraayawo eyuuma yoorikaxa. 12Eyuuma yoorikaxa ya elapo ele ti yooreera. Iwe yaakhalatho ebwanyaasi yoowunkhelaxa eniitthaniwa budeliyo* ni makina aniitthaniwa onikisi*. 13Wanaaveeli ti Giyomi omvira elapo yootheene ya oKuxe. 14Wanaararu omvira mpatta ninkhuma nsuwa wa wAsiriya, nsinanawe Tigere ni mooloko wanaaxexe ti Efratesi. 15Vano, Yave Elohim aamukhaliha mulopwana mmatta ya wEdeni weera alimeke ni alamuleke. 16Yave Muluku aamulamulela mulopwana, amweerelaka: “Muceeke soowiima sa wakhalaru mwiri wEdeni, 17vaheera muhiceru sa mwiri onsuweliha yooreera ni yoonanara, niwoko nihuku muneeraanyu muce sa yoowo, vekhaikhai mmwikhwe.” 18Yave Muluku aaheera: “Khoohiyono wooreera mulopwana okhala meekhaawe; kinoompaka mukina weera amukhavihereke ni akhaleke mukhwaawe. 19Oopiyeene vatthayani inama sootheene sa ntuphini ni ipalame sootheene sa wiirimu. Yave Muluku aamuruuhela mulopwana ole weera oone moota heeni eeraawe attehe masinaaya. Ni khula nsina eeraawe attehe ikhalelo sootheene sa okumi sootheene – nno naarowa okhala nsinanaya. 20Hiiho mulopwana aatteha masinaaya mihuwo sootheene; ipalame sa wiirimu ni inama sootheene sa ntuphini. Wa soothesene, khaaphwanyaneya wa mulopwana ole mukina eera amukhavihereke weera akhaleke mukhwaawe. 21Vano Yave Muluku aamuruuhela mulopwana ikhove weera akonaxe vancipale, ni akonaka hiihaale, aamvenxa niparari nimoha awalaka nipuro nne ni ethai ya erutthwaawe. 22Yave Muluku aampaka muthiyana ni niparari aavenxalaawe mweerutthuni ya mulopwana ni aamuroihela ole. 23Vanonto, mulopwana aaheera: “Aani, ola ti nikhuva na makhuvaaka ni erutthu ntoko erutthwaaka! Ola aniitthaniwe “muthiyana,” niwoko okhumihiwe mweerutthuni ya mulopwana.” 24Tivawo, mulopwana anaahiye atithawe ni amayawe ni anaathukumane ni mwaariye ni awo eniithatuwe erutthu emoha paahi. 25Mulopwana ni mwaariye yaakhala woohiwara, mene khaayuuliwaru muru.
Aktuálne označené:
Epacerero 2: VMK2021
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Makhua Shirima Bible © Christelike Lektuurmaatskappy NPC, 2021.