Pianciilna 22
22
Isaac A piak natu in Pathian in Abraham Thupia
1Hun khat zawkciang Pathian in Abraham ze et a; “Abraham awng!” ci in sam hi. Tuasia ciang Abraham in, “Hi khi hi, keima hi sungah om ing,” ci in zo hi.
2Pathian in, “Na it mama, tapa khat bek na nei Isaac sia Moriah ngam ah paipui in. Tualai kong lak tu mual khat tungah keima biakpiakna in ama nong pia tu hi,” ci hi. #2 Khang 3:1
3A zing ciang zingsang tuungin Abraham in biakpiak natu in thing pawlkhat tan a, a laa tungah suanh in a tapa Isaac le a naseamte nii taw, Pathian ii sawlna munah pai tu in ding uh hi. 4A ni thum ni ciangin Abraham in tua mun ngalmu hi. 5Tuaciang ama in a naseamte tungah, “Hi lai ah laa taw na om vun. Kei le ka tapa sia zialai ah Pathian ka bia tu uh a, tua zawkciang kong cia kik tu uh hi,” ci hi.
6Abraham in biakpiak natu thing teng Isaac in puasak a, ama in nam khat le meitaw natu meikam keng hi. Amate a pata a paikhop kawkawm in 7Isaac in, “Pa awng!” ci hi.
A pa in, “Bang ziam ka ta awng,” ci in zo hi.
Isaac in, “Mei le thing na ken ka mu a, ahizong biakpiak natu tuuno koisungah om ziam?” ci in dongh hi.
8Abraham in, “Pathian in hong sik tu hi,” ci in zo hi. Tuaciang amate pata pai khawkhawm uh hi.
9Pathian ii a sonkholna mun a thet ciang, Abraham in biaknatau khat vawt a, a tungah thing koi hi. Ama in a tapa heencip in biaknatau tung thing tungah koi hi. #Jas 2:21 10Tuaciang ama in a tapa thatlum tu in a nam dok hi. 11Ahizong Topa vantunglalang in vantung pan, “Abraham awng, Abraham awng!” ci in sam hi.
Ama in, keima hi sungah om ing,” ci in zo hi.
12Vantunglalang in, “Patangpa sia liamsua heak in, ama bangma law heak in. Pathian thu na nitna le na zatakna, tu in ka he hi, banghang ziam cile tapa khat bek na nei kei atu in na haza bua hi,” ci hi.
13Abraham khuadak kawkoai a, sawlpaang sungah a kii pan a awk tuutal khat mu hi. Ama pai in tua tuutal man a, a tapa taangin meihal biakpiakna khatin pia hi. #Heb 11:17-19 14Abraham in tua mun sia, Topa in hong sik hi “Jehovah Jireh” ci in min phuak hi. Tuni dong ciang mihingte in “Topa ii mual tungah ama in hong sik hi,” ci uh hi.
15 Topa vantunglalang in vantung pan Abraham a nii veina sam a, 16“Topa cina ah — Keima min taw kiciamna khat ka vawt hi — thupha tam tatak kong pia tu hi. Banghang ziam cile hisia na vawt zo a, na tapa khat bek na nei kei atu in na haza bua hi, #Heb 6:13-14 17na suan na paalte van ah aksi za, tuipivaal senvui za in tam mama ka phasak tu hi, ci in kamciam kong pia hi. Na suan na paalte in a ngalte zo tu uh hi. #Heb 11:12 18Nangma suan le paalte tungah thupha ka piak bangin minam theampo in thupha ka piak tu hong ngen tu uh hi — tu teng sia nangma in ka thupiak na nit hang ahi hi,” ci hi. #Sawl 3:25 19Abraham sia a naseamte kungah cia kikin, Abraham teenna mun ahi, Beersheba ah amate taw ciakhawm tek uh hi.
Nahor ii Suan le Paalte
20Hun khat zawkciang Abraham in, a suapuipa Nahor in a zi Milcah taw ta liat a neina thu he hi. 21Uz sia a piang phit hi a, a suapuite sia Buz, Aram ii pa Kemuel, 22Chesed, Hazo, Pildash, Jidlaph le Bethuel ahi hi, 23Bethuel sia Rebecca ii pa ahi hi. Milcah in Abraham suapuipa Nahor taw hi tapa liat teng nei hi. 24Nahor zino Reumah in ta, Tebah, Gaham, Tahash le Maacah te nei hi.
Aktuálne označené:
Pianciilna 22: SCB2
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Siyin Chin Bible © Bible Society of Myanmar, 2016