San Juan 12
12
Marí ulo ta uxeꞌe xoꞌo Jesús
(Mt. 26:6-13; Mr. 14:3-9)
1Sxoꞌop wizh nsob gal ujest Pascua wa, leꞌa Jesús utoꞌo nchaꞌagal Betania, ta lid Lázaro xa mxiste Jesús ndoꞌ gealgut. 2Leꞌa sa wa mbindeꞌe bexa dub ta gawno bexa Jesús. Leꞌa Mart nkego ta gaw bexa. Leꞌa Lázaro nsob ndoꞌ mes no Jesús. 3Weꞌe leꞌa Marí usen tol litr sbeꞌen nardo ta uxeꞌe, dub ta uzhebpa uyap nsak. Cha mtob xa‑yá tsoꞌo xoꞌo Jesús, cha mkwiꞌid xa xoꞌo Jesús no gichgek xa. Leꞌa len niꞌi wa gast idub lita uxeꞌe mlaꞌa. 4Leꞌa dub xmen Jesús no nsob sa wa xa na leꞌa yun cuent Jesús, xa na nsaleaꞌ Judas Iscariot xin Simón. Leꞌa xa wa cha ndab:
5—¿Xtaꞌan lid ndi udoꞌo xa ta uxeꞌe baꞌ zha, cha utseꞌa xa med wa ndoꞌ be men uban nak? Leꞌa ta baꞌ nsak pa chon gayoꞌo denario.
6Parea leꞌa Judas naꞌanpa nyuꞌno ladna bexa uban nak. Ndi li ndab xa geal leꞌa xa nlaꞌach med ten be xmen Jesús, no ncho zha ngowaꞌanga xa med noꞌo xa. 7Weꞌe leꞌa Jesús cha ndab ndoꞌ Judas:
—Blaꞌa xagots baꞌ, leꞌa xa ulochaꞌaw ta baꞌ gast gal zha na igaꞌach naꞌ. 8Leꞌa bexa uban nak wa guniꞌi polga nchoka lat bega, parea leꞌa naꞌ ndee naꞌanpa kwenta nchoꞌono bega.
Be uleꞌay nibeꞌe dubtsa mbidiꞌizh gut Lázaro
9Leꞌa kwaꞌadpa bexa judio mbiꞌín leꞌa Jesús nchogal gezh Betania, cha nchaꞌbe bexa sa wa. Leꞌa bexa naꞌanpa nabtsa Jesús nchaꞌbewiꞌi, leꞌa bexa nlad iniꞌí no Lázaro xa mbangal ndoꞌ gealgut. 10Weꞌe leꞌa be uleꞌay nibeꞌe wa dubtsa mbidiꞌizh gut no Lázaro, 11geal mbangal Lázaro leꞌa kwaꞌad bexa judio nsaulaꞌa be uleꞌay nibeꞌe wa, cha ndi Jesús ndangea ladna bexa.
Jesús uyote Jerusalén
(Mt. 21:1-11; Mr. 11:1-11; Lc. 19:28-40)
12Ngol stub wizh wa leꞌa uzhebpa kwaꞌad be men ndencho ujest Pascua gezh Jerusalén. Leꞌa zha mbiꞌín bexa leꞌa Jesús no nchaꞌa Jerusalén, 13cha ulobtoꞌog bexa be xos ya gin, cha utoꞌo bexa nchaꞌikanes bexa Jesús. No ugeꞌ ndab bexa:
—¡Siꞌil nak xa baꞌ! ¡Dios uzhebpa nlaꞌach xa baꞌ, xa na mtuꞌub Dios Xa Nibeꞌe! ¡Leꞌa xa baꞌ leꞌa nibeꞌe beuna xa Israel!
14Leꞌa Jesús mzheal dub burr tuzh, cha usob xa tsoꞌo ma. Leꞌa ta wa lak nkeaniꞌi diꞌizh ten Dios, ndab‑a:
15Lá izheb bego, men gezh Sion.
Bwiꞌi bego, leꞌa xa leꞌa nibeꞌe bega
nsea nsob tsoꞌo dub burr tuzh.
16Leꞌa zha wa leꞌa be xmen Jesús lá yakbeꞌena be ta li mbin Jesús wa. Parea tsoꞌo na mbangal Jesús cha nseaꞌ xa gibeꞌa, leꞌa bexa mtseꞌa ladna lak nkeaniꞌi diꞌizh ten Dios cuent ten Jesús, cha uniꞌí bexa leꞌa Jesús lika mbin.
17Leꞌa zha na utezh Jesús Lázaro len baꞌa, cha mxiste Jesús xa ndoꞌ gealgut, leꞌa bexa nde sa wa cha mbidiꞌizh ta uniꞌí bexa wa ndoꞌ be men. 18Ta weꞌe li ngwaꞌikanes be men Jesús, geal leꞌa bexa mbiꞌín ta na li mbin Jesús uyon wa. 19Parea leꞌa bexa fariseo ndab ndoꞌ be ltsaꞌa na:
—Bwiꞌi bega, leꞌa ta na ndun beuna naꞌan xtiꞌin. Leꞌa be men ndi itea nchaꞌbe wats Jesús.
Pla bexa naꞌanpa xa judio nlad iniꞌí Jesús
20Leꞌa lat bexa na li nchaꞌbe yankea Dios gezh Jerusalén ujest Pascua wa, ncho pla bexa naꞌanpa xa judio. 21Leꞌa bexa wa cha ulen wats Julip xa gezh Betsaida ten Galilea, ndab bexa:
—Señor, leꞌa besa nlad iniꞌí Jesús.
22Leꞌa Julip cha ngwaꞌyab‑a ndoꞌ Ndres, weꞌe itop bexa ngwaꞌyab‑a ndoꞌ Jesús. 23Leꞌa Jesús cha ukaꞌab ndab:
—Yá ngol gor iniꞌí be men ta juert nak naꞌ, Xa Myak Men Ndoꞌ Gizhliyo. 24Leꞌa naꞌ gáp ndoꞌ bego tal leꞌa dub bid ten trig lá igaꞌach len yo cuent dub ta ngut, leꞌa idub tiemp leꞌa‑yá bidtsa gak. Ná tal leꞌa‑yá igaꞌach, leꞌa‑yá sianpa bid usaꞌa. 25Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Parea leꞌa tal ton ndi ukwaꞌan gun ta nlad Dios, leꞌa xa wa ndi gap gealnaban nunk lá idub. 26Leꞌa tal ton nlad gun tiꞌin ndoꞌ naꞌ nsabndoꞌ isankea xa tsoꞌo naꞌ. Weꞌe leꞌa sa yoꞌo naꞌ leꞌa xa no yoo. Leꞌa tal ton gun tiꞌin ndoꞌ naꞌ, leꞌa Xus naꞌ gab leꞌa xa wa wenka ndun.
Jesús mbidiꞌizh leꞌa gat
27No ndab Jesús:
—Nat uzheꞌeb kweaꞌ ncho lad naꞌ, no ni lá iní naꞌ xteꞌe gáp naꞌ ndoꞌ Xus naꞌ. Ndanbeꞌe naꞌ gáp naꞌ ndoꞌ xa koꞌo xa naꞌ ndoꞌ gealkweaꞌ ndee, parea leꞌa naꞌ tiꞌin weꞌe ndal ndoꞌ gizhliyo. 28Leꞌa naꞌ ndi gáp: “Xus naꞌ, bin ga ta na uluu xteꞌe siꞌil nak go.”
Leꞌa gor weꞌe cha mgen ti Dios ulen gibeꞌa, ndab xa ndoꞌ Jesús:
—Leꞌa naꞌ mlula xteꞌe siꞌil nak naꞌ, no ulu naꞌ‑yá stub biaj.
29Leꞌa lat bexa kwaꞌad wa ncho bexa ndab leꞌa ta mbiꞌín bexa wa usiꞌi. No ncho bexa ndab leꞌa‑yá dub angel uníꞌi ndoꞌ Jesús.
30Leꞌa Jesús cha ndab ndoꞌ be men:
—Leꞌa ta mgen wa naꞌanpa ulen por na goꞌón naꞌ‑yá, leꞌa‑yá ndi ulen ndontsa goꞌón bega‑yá. 31Leꞌa nat leꞌa Dios gab ná ton ndap ke ndoꞌ gizhliyo. No nat kontuꞌub Dios maxuꞌu, xa nibeꞌe ndoꞌ gizhliyo. 32Leꞌa gor na ixits bexa naꞌ gaꞌap ndoꞌ yo, leꞌa naꞌ gun leꞌa be men ilen wats naꞌ.
33Leꞌa ta na li mbidiꞌizh Jesús wa gab leꞌa xa gat ndoꞌ cruz. 34Leꞌa be men wa cha ndab:
—Leꞌa besa mbiꞌín leꞌa ley ten Dios nkeaniꞌi leꞌa xa nak Cristo idub tiemp ncho. ¿Ná xteꞌe ndab ga zha leꞌa be men ixits Xa Myak Men Ndoꞌ Gizhliyo gaꞌap ndoꞌ yo? ¿Ton nak Xa Myak Men Ndoꞌ Gizhliyo wa zhaga?
35Leꞌa Jesús cha ukaꞌab ndab:
—Leꞌa nat leꞌa xa nak xeꞌa naꞌanpa kwenta ncho lat bega. Ta weꞌe usea bega nattsa bi ncho xeꞌa, ndontsa leꞌa sa ukaw naꞌanpa gun gan ndoꞌ bega. Leꞌa tal ton nsea sa ukaw, leꞌa xa wa ni lá iniꞌí pa nchaꞌa. 36Leꞌa nat bi ncho xa nak xeꞌa wa, bingea ladna bega xa, ndontsa isea bega ndoꞌ xeꞌa.
Leꞌa tsoꞌo na li ndab Jesús, cha nchaꞌukachndoꞌ xa ndoꞌ be men.
Be men lá kaꞌab gungea ladna Jesús
37Sian be uyon mbin Jesús ndoꞌ gaꞌal be men, ná leꞌa bexa lá ngungea ladna Jesús. 38Li ngok ta wa lak mbidiꞌizh Isaías sakndoꞌ Dios, ndab xa:
Señor Dios, ¿tonma ndangea ladna ta ndadiꞌizh besa zha?
¿No ton ndoꞌ ná mluu ga xteꞌe juert nak go zha?
39Ta weꞌe leꞌa be men lá ngungea ladna Jesús, no lak ndab Isaías:
40Leꞌa Dios mtsaw ngusndoꞌ bexa,
no mbin ngud Dios ladoꞌo bexa,
ndontsa lá inaꞌ bexa,
no ni lá yakbeꞌena bexa.
Cha naꞌanpa ilen bexa wats Dios,
utsuꞌu Dios be ke ten bexa.
41Li ndab Isaías polta zha na uniꞌí xa xteꞌe siꞌil gak Cristo, cha mbidiꞌizh xa cuent ten Cristo. 42Mas lika ná ncho kwaꞌad bexa mbingea ladna Jesús, no gast ncho bexa nibeꞌe ten bexa judio. Parea naꞌanpa gaꞌal ngudiꞌizh bexa‑yá, geal leꞌa bexa nzheb leꞌa bexa fariseo kontuꞌub bexa len niꞌi sa nzhealbe bexa judio wa. 43Leꞌa bexa wa lá nkwaꞌan xteꞌe wen yaꞌan bexa ndoꞌ Dios, ndi mas nkwaꞌan bexa xteꞌe wen yaꞌan bexa ndoꞌ be men.
Jesús ngoꞌo be men ndoꞌ be ke ten bexa
44Leꞌa Jesús cha ugeꞌ ndab:
—Leꞌa tal ton gungea ladna naꞌ, leꞌa xa wa naꞌanpa nabtsa naꞌ ndangea ladna. Leꞌa xa wa no xa mtuꞌub naꞌ ndangea ladna. 45No liga tal ton iniꞌí naꞌ, leꞌa xa wa no iniꞌí xa mtuꞌub naꞌ wa. 46Leꞌa naꞌ nak xeꞌa ulen ndoꞌ gizhliyo, ndontsa tal ton gungea ladna naꞌ, leꞌa xa wa naꞌantapa yoo sa ukaw.
47’Leꞌa tal ton goꞌón diꞌizh ndáp naꞌ, ná lá uxobgek xa ndoꞌ‑yá, leꞌa naꞌ ndee naꞌanpa nak xa usake xa. Leꞌa naꞌ naꞌanpa ndal ndoꞌ gizhliyo usake naꞌ be men, leꞌa naꞌ ndi ndal ko naꞌ be men ndoꞌ be ke ten bexa. 48Leꞌa tal ton uxelad naꞌ no lá gungea ladna xa be diꞌizh ndáp naꞌ, leꞌa diꞌizh wa leꞌaka usake xa gal wizh lult. 49Leꞌa naꞌ ndee naꞌanpa ndadiꞌizh ta nladtsa naꞌ, leꞌa Xus naꞌ xa mtuꞌub naꞌ unibeꞌe xtaꞌan gudiꞌizh naꞌ no xtaꞌan uluꞌu naꞌ. 50Leꞌa naꞌ uní leꞌa diꞌizh unibeꞌe Xus naꞌ gáp naꞌ, leꞌa diꞌizh wa ta nsaꞌa gealnaban nunk lá idub. Ta weꞌe li ndadiꞌizh naꞌ lakka ndab Xus naꞌ ndoꞌ naꞌ.
Zvasarudzwa nguva ino
San Juan 12: zpt
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2015, Wycliffe Bible Translators, Inc. All rights reserved.