Joannostir 3
3
Džeļ, 3.
1Maškir farisejenge sav isis, lavesa Nikodīmos, jek Judengo bāredīrendir.
2Jov javdža ko Iisusos rati, te phendža Leske: Ravvi! me džinas, so Tu sikļakirbnaskīro, javdlo Davlestir; hai dasai dživi, sai Tu kēresa, nikon našti kērel, keļi lesa najāla Devēl.
3Iisusos phendža leske ano otpheniben: lašņes, lašņes rakirava tuke: keļi kon naločola opatunestir, našti dikhel Davleskīro kraļuma.
4Nikodimos rakirla Leske: sir mānuš vašti ločol, kedi jov isi phūro? hobi vašti jov vār molos džāl an peskīre dakīre masa te meločol?
5Iisusos atphendža: lašņes, lašņes rakirava tuke: keļi kon naločola paņingestir te Duhostir, našti džal an Devēleskīro kraļuma.
6Ločīno masendir isi masa; ne ločīno Duhostir isi duhos.
7Nadživintut pe dova, so Me phendžom tuke: čhebi tumenge ločon opratunestir.
8Duhos phurdela, kai kamela, te glos leskīri šunesa, ne nadžines, karīg jāvela te kai džala; jake isi svakonesa, kon ločola Duhostir.
9Nikodimos phendža Leske ano otpheniben: sir dava vašti jāl?
10Iisusos otphendža te rakirla leske: tu Izraiļengo sikļakirbnaskīro, te dava nadžines?
11Lašņes, lašņes rakirva tuke: Me rakiras dolestir, so džinas, te švatkinasa dolestir, so dikšam; ne tume švatkuma Māro nakamena dolen.
12Keļi Me phendžom tumenge phujatir, te tume napačana: sir pačana, keļi phenava tumenge bolibnastir?
13Nikon na zagija po boliben, sir feņu javibnaskīro bolibnastir mānušeskīro Čhāvo, sav isi ano boliben.
14Te sir Moisejos hadija opre sapes ane čuči phu, jake čhebi jāl opre hadīna mānušeskīro Čhāvo,
15Svako, pačaibnaskīro an Leske, me nazgiņinel, ne mejāl leske džīben bekoncoskīro.
16Iake miļidža Dēvel svetos, so otdija Peskīres jek ločine Čhāves, sobi svako, pačaibnaskīro an Leske, menazgiņinel, ne mejāl leske džīben bekoncoskīro.
17Nabičadža Devēl Peskīre Čhāves ano svetos, sobi sendines svetos, ne sobi svetos nazgiņinel te mejāl rakhlo druh Leske.
18Pačaibnaskīro an Leske nasendinipes, ne napačaibnaskīro uže sendume, vašo dova so napačandija an Davleskiro jekločīno Čhāveskīro lav.
19Senduma zatardžola an dova, so švatluma javdža ano svetos; ne mānuša butir miļidne čemnuma, nasir švatluma; vašo dova so buča lengīre isis hinde mirzona.
20Hai svako, hindo keribnaskīro, naiedikhela švatluma te najavela ko švatluma, sobi najān čhingardīne leskīre buča, vašo dova so jone hinde — mirzona.
21Kon čačipen kērla dova džala ko švatluma, mejān dikhle leskīre buča, vašo dova so jone isi kērde ane Davleske.
22Pošļi dova lisusos javdža Peskīre sikļaibnangīrensa ane Judengīri phu, te doi lensa džividža, te boldža.
23Ioannos nin boldža ane Enona, paše ke Saļima, vašo dova so doi isis būt paņinga; te javenas doi, te bolenas pen.
24Hai Ioannos oščo nasis čhudlo ano stārīben.
25Togi Ioannoskīre sikļaibnangīrenge vigija gola Judensa vašo rožuma.
26Te javdle ko Ioannos, te phendle leske: ravvi! Dova, Kon isis tusa ke Iordana te Konestir tu švatkindžan, Jov bolela, te sāre jāvena ke Jov.
27Ioannos phendža otpheniben: našti mānuš niso lel pe peske, keļi najāla dīno leske bolibnastir.
28Tume kokore mange švatki pe dova, so me phendžom: na me Hristos, ne me bičado angil Leske.
29Koneske mlodžikica dova isi mlodžikos; ne pšečeļos mlodžikoskīro, tardo te kandela Les, te radindoi radžakirlapes, šunindoi mlodžikoskīri gloss. Da raduma mīro pšečkirdžapes.
30Leske čhebi barjol, ne mange tikņuvav.
31Kon jāvela opratunestir, dova isi bāredīr sārendir; kon phujatir phujakīro isi, te rakirla, sir pe phu pjujatir; jāvibnaskīro bolibnastir isi bāredīr sārendir.
32Te so Jov dikhja te šundža, dolestir švatkini; te nikon nalela Leskīro švatkuma.
33Līno Leskīra švatkuma dolesa značakirlapes, so Dēvel isi lašņo.
34Hai dova, sajes bičardža Dēvel, rakirla Davleskīre lava; Dēvel nadela Duhos mērosa.
35Dād miļini Čhāves te sāro dija an Lesko vast.
36Pačandoi ane Čhāveske isi džīben sajek; ne napačandoi ane Čhāveske nadikhela džīben, ne Davleskīri holin jačhela pe leske.
Zvasarudzwa nguva ino
Joannostir 3: LET1933
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© British and Foreign Bible Society 1933, 2016