JOHAN 3
3
Jesu Leh Nikodem Houlimna
1Pharisaite lak a mi, Judate vaihawmpa, a min Nikodem a om hi. 2Huai mi zan in Jesu kiang ah a hong a, a kiang ah, “Rabbi, Pathian a kipan hongpai sinsakpa na hi chih ka thei uhi. Pathian na kiang a omlou hileh hiai thillamdang na hihte kuamah in a hih theikei ding” a chi hi.
3Jesu’n a dawng a a kiang ah, “Chihtaktak in, chihtaktak in k’on hilh ahi, Mi kuapeuh a pianthak kei leh Pathian gam a mu theikei” a chi hi.
4Nikodem in a kiang ah, “Mi a teknung in bangchi’n a piangthak thei dia? A nu sung a nihvei lut in a piang thei dia hia?” a chi hi.
5Jesu’n a dawng a, “Chihtaktak in, chihtaktak in k’on hilh ahi, Kuapeuh tui a leh Kha a a pianthak kei leh Pathian gam a lut theikei hi. 6Sa suan peuhmah sa ahi a, Kha suan peuhmah kha ahi. 7Na pianthak ngeingei ding ahi k’on chih lamdang sa ken. 8Huih a utna na ah a nung a, a ging na za hi, himahleh koi a kipan hongpai ahia, koi ah ahia a hoh ding chih na thei ngalkei a; kuapeuh Kha a piang huchibang mah in a om hi” a chi hi.
9Nikodem in a dawng a, “Hiai bangchi’n a omthei dia?” a chi hi.
10Jesu’n a dawng a a kiang ah, “Israelte sinsakpa na hi ngal a, huaite na theikei maw? 11Chihtaktak in chihtaktak in k’on hilh ahi, kou ka theih uh ka gen ua, ka muh uh ka theisak uh; himahleh ka thu theihsak uh na sangkei uhi. 12Khovel thil k’on hilh bawn gingtaloute’n, vanlam thil honhilh leng bangchi’n na gingta ding ua? 13Mihing Tapa van a ompa leh van a kipan hongsukpa kia loungal kuamah van ah a kahtou ngeikei uhi.
14“Mosi in gamdai a gul a khaikang bang in, Mihing Tapa khaikang in a om ding hi. 15Kuapeuh a gingta in amah ziak a tangtawn hinna a neihna ding in. 16Pathian in khovel a it mahmah ziak in a Tapa tang neihsun a pia hi. Kuapeuh amah gingtate a manthat louh ua, tangtawn hinna a neih zawkna ding un. 17Khovel siamlouh tangsak ding in Pathian in a Tapa khovel ah a sawl kei, khovel amah vanga a hin theihna ding in a sawl ahizaw hi.
18“Kuapeuh amah gingta siamlouh in a omkei ding a, kuapeuh a gingtalou, tu a kipan siamlouh in a ompah ngal hi, Pathian Tapa tang neihsun min a gintak louh ziak in. 19Hiai siamlouhna ahi, vak khovel ah a hong a, himahleh min vak sang in mial a itzaw uh, a thilhihte uh a gitlouh ziak in. 20Kuapeuh thil gilou hih in vak a hawnak, vak ah leng a hongpai kei hi; huchilou in zaw a thilhihte a lang kha ding hi. 21Himahleh kuapeuh a dik hihte a thilhih uh Pathian ziak a hih chih a latna ding in vak ah a hongpai uhi” a chi hi.
Jesu Leh Johan
22Huaikhit in Jesu a nungzuite toh Judia gam ah a hoh ua, huai ah Jesu a kiang uah a om nilouh a, a baptist zel uhi. 23Johan in leng Ainon ah, Salim khaw kiang ah a baptist sam a, huai a tui a tam ziak in mi a hong ua, baptisma a tang uhi. 24Hiai hun in Johan suangkulh a khum ahi naikei hi.
25Huan Johan nungzuite leh Juda khenkhat silsiang thu ah a kisel uhi. 26Johan kiang ah a hongpai ua, a kiang ah, “Rabbi, Jordan gal a na kiang a om, a thu mi na theihsakpan, ngai dih, mi a baptist a, mi tengteng a kiang ah a hongpai uh” a chi uhi.
27Johan in a dawng a, “Van apan a piak ahihkeileh mihing in bangmah a nei theikei uhi. 28Kei Khrist ka hi kei hi, a ma a misawl ka hi, ka chih, noumau mahmah hon theihpihte na hi uhi. 29Mouneipa mounu pasal ahi; himahleh mouneipa lawm ding a a thu za mouneipa aw ziak in a kipak mahmah a; En un ka kipahna a tungta ahi. 30Amah a lian semsem ding a, kei bel ka neu hiaihiai ding hi” a chi hi.
Van Apan Hongpaipa
31Tunglam a kipan hongpai zaw mi tengteng sang a tungnungpen ahi; lei a kipan bel lei a ahi a, leithu a gen a, van a kipan a hong paipa zaw mi tengteng sang a tungnungpen ahi. 32A muh leh a zak peuh a theisak hi; kuamah in a thu theihsak a taksang kei uhi. 33A thu theihsak taksang in, Pathian midiktat ahi, chih a kipsak hi. 34Pathian sawl in Pathian thu a gen hi; aman zaw teh chitchiat in Kha a pe ngalkei hi. 35Pa in Tapa a it a, a khut ah bangkim avek in a peta hi. 36Kuapeuh Tapa gingta in tangtawn hinna a nei; himahleh Tapa gingtalou in hinna a neikei ding a, Pathian thangpaihna a tung ah a omzaw” a chi hi.
Zvasarudzwa nguva ino
JOHAN 3: PAITBSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.