JOHONIN 12
12
Isua Bethani a Sariak Anthi
(Mt 26.6-13; Mk 14.3-9)
1Zokna Panta ni ruk mana Isua chu Lazar athi ata ei mathui retna Bethani khuana ava tunga. 2Hava han ama ranga khului bu nekna a mansuk pe u na, Marthan a dorbo adoma, Lazar ha bu nek ei ansut pui ngai bila angkhat ani. 3Hatuka Mari han ser atan zotor sariak marim ahui alu khit a hong choia Isua ke a hong khua pe na hatuka a sam le a ke a hui pe na, hava sariak marim han in pumpui ei thut ziak ani zei. #Lk 7.37-38 4Hatuka Isua a zolai ngai bila Juda Iskariot ama ansur rangpu han, 5“Hava sariak marim ahui ha sumru razan thum le azuara ichangamo anriang ngai ei anpek nok?” ati na. 6Hava ha anriang ngai lung ei man pong sika ei ti ni mak, tenchu anru ei ni tuara ei ti keng, asik chu sum siakna marsa ha aman ei vong ania, havan ata ha sum ei lak chachak ania.
7Tenchu Isuan, “Ama chu atheia mak u ro, asik chu nangkan kan phum tika rang lei man hoi u ro. 8Anriang ngai chu umora na bil u na a om rang keng tenchu na bil u na koi chu om babang no ning,” ati na. #Dan 15.11
Lazar Thatna rang Anvang
9Hatuka Juda mi ngaiin Isua chu Bethani khuana a om ti ariat u na hava han ase lup u na, tenchu Isua sika ronga ase ni u lai mak, ama han athi ata ei mathui Lazar ava mu rang uala ase u ani. 10Hava bibila han chaizung ulian ngaiin Lazar um athatna avang u na. 11Asik chu Juda mi atam riaiin ama sika Isua a iam ei hong tam u na han.
Anlian Sabaka Jerusalema Lut
(Mt 21.1-11; Mk 11.1-11; Lk 19.28-40)
12Hava nikhua zingkhua vara Zokna Pantana ase mipuiin Isua Jerusalema ahong zei ti ariat u le chu, 13Theiletum bua anlek chunga ama le anmu ranga alei va suak u na, ankhek u na, “Hosanna! Puma raminga ahong Israel Reng ahong chu borsang tung rase,” ati u na. #Sam 118.25,26
14Isuan sakuarpar khat chunga achunga Pathian lekhabuna anziak ang tak han,
15“Zion sanu, achi no ro, na reng chu sakuarpar chunga achuanga ahong zei,” ati na. #Zek 9.9
16Hava lai tak han chu a zolai ngaiin la riat vak thei u maka, tenchu Isua anlala ahonga om suale chu Pathian lekhabuna ama ruia ei lei ril ngai le min ama chunga ei tho u ngai dora hankeng ei lan thei u ala ni.
17Hatuka aman Lazar ha than ata a paia athi ata a mathui laia a bila mi atampa a om ngai len han ariatpui achang u na. 18Hava sika han mipuiin ama chu avan tong pui u na, ama han hiva boidong sin ngai hi ei tho keng ti ei riat u na han. 19Pharisi ngai ha anril ansiat u na, “En u ta, ite nei tho thei omlai mak hile! Na mu u zei mo! Ramual mi doran ama nuk keng ei zi zit ani zei,” ati u na.
Grik Senkhatin Arok
20Pantana Pathian abiak ranga Jerusalem ase Grik mi senkhat a oma. 21Hava mi ngai ha Galili rama Betsaida mi Philip akoma ase u na, “Ka pu, Isua hi amu rang na zot,” ava ti u na.
22Hankeng Philip ase na Andria kom ava rila, hatuka anin u Isua kom ase na ava ril u na. 23Tenchu Isuan akom u na, “Miring Sapa chu ei anlalna rang hun ahonga suak zei. 24Atak taka keina ril ani u zei, sahum hi phila achula athu nok ten asang bang ke ei ni, tenchu hava ha athun keng mara tampa ei rasua. 25Aninga ei damna andit ngai la machan unti, tenchu hi ramuala aninga ei damna itena tel lui ngai chu umora adamna ei siak sua keng ani zei. #Mt 10.39; 16.25; Mk 8.35; Lk 9.24; 17.33 26Ka dorbo adom zot ten ka nuk na hong zi nget rase. Kei omna taka ka dorbondom ham ei om theina ranga, Ka dorbondom tak chu ka Pa ninum lalchi man ruai inti.
Isuan ama Thina rang rui Aril
27“Atun hin ka malung ahongan buai zei, Imo kei ril rang? ‘Ka Pa, hiva hun ata na manlen ro ba’? Tenchu hiva hun antak asuak rang ngala atun hiva ten hin kei hong den ani zei! 28Hasik han ka Pa, na raming anliana om rase!” ati na. Hatuka vanram ata hiva he hi ahong anthanga, “Ka manlian sua zei, athara manlian ret ka ting,” ati na.
29Hava he ha akola mipui anding ngaiin ariat u na hatuka ankhal u na mi senkhatin, khuanri imo ni ati u na. Hanuk atei senkhatin chu, “Vanpalai ngai khatin ei chong pui keng ei ni rang,” ati u na.
30Tenchu Isuan akom u na, “Hiva he hi koi ka ranga ahonga chong ni mak tenchu nangni ngai rang keng. 31Atun hin hi ramual mi ruirilna ani zei, atun hin hi ramuala ruirilpu chu anpei inti. 32Hatuka ramual ata chunga ka kal tik le chu mi dora ka tiang la rakuai kiar ka ti,” ati na. 33Ama chu i ang thina na mo ei va thi rang hava ha achong ril han ei manlang ani.
34Hatuka mipuiin akoma, “Messia chu umora a om keng, koinin chu Dan bu ata nei riat. Hanle hontinmo nangin, Miring Sapa chu chung tiang ei la kal rang nei ti? Hanle hava Miring Sapa ha tumo?” ati na amasang u. #Sam 110.4; Isa 9.7; Ez 37.25; Dan 7.14
35Isuan amani rang, “Ra-ang hi na kar u na chomokhat bak rang ala om, ra-ang na nei ulai hin chei u ta ro, azingin ei na chelbo thei u nokna ranga, azing kara aleng chu aninga ei se na rang ti thei mak. 36Ra-ang na nei ulai hin ra-ang hi iam u ro, ra-ang mi nei hong chang thei u na ranga.”
Mi Aiamnok ngai
Isuan hiva chong ngai aril suale chu amani bil ata ankhaia avan thup vata. 37Amani matona hiva ang boidong sin atho nam ama chu iam thei u mak. 38Hava ha deari Isaiin chong alei ril ei hong dik theina ranga; #Isa 53.1 (LXX)
Aman ei ti: “Puma, koinin nei ril hi tumo a iam?
Tu kom mo Puma akut Puma ranak ei manlang rang?”
ati na. 39Hiva sik hin amanin ei iam thei u nok, Isaiin ei ti sa chu:
40“Pathianin amit u ei manzing pe, #Isa 6.10 (LXX)
A malung u ei man it pe,
Hanoten ala hong mu u na,
A la hong riat thei u na
A la honga kir ving u ten Ka la mandam unle.”
41Isaiin hiva chong ngai hi ei ril, asik chu Isua ei anlianna ei mu hatuka ama arui hakeng ei ril ngalum.
42Hanum nisela Juda ruaitu ngai bila mi tampan Isua a iam u na, tenchu Pharisi ngai anchi tuara angam panga ril ngam u maka, asik chu anchuna in ata ei masuak u rang ani na. 43Asik chu Pathian koma anpakna nek ten miring koma anpakna keng ei madit bet u.
Isua Chongin Rui Aril
44Isuan ankheka ei ti, “Koia ana iam chu koi rong la ni mak, koi ana honga tirpu ham keng ei iam. 45Hatuka koi ana mu chu koi ana honga tirpu ham ei mu keng. 46Ramuala ra-ang anga ahong ka ni, koi ana iam tak chu azing kara ei om lai nokna ranga. 47Koi ka chong ariata tel lui ngai chunga ite ruiril makung asik chu ramuala rui aril ranga ahong ni makung tenchu ramual andam ranga ahong ka ni. 48Koi ana henga ka chong pom lui chu achung u na rui aril rang angkhat a om. Hiva ka chong ril nget hi nikhua hek tika achung u na rui la hong ril inti! 49Asik chu koi ka ninga kei ril ni mak Tenchu kei ti rang le kei ril rang ngai dora hi koi ana honga tirpu Pa han chong ei na pek keng. 50Hanuk chu a chong rasua ngai dora hi umor damna ti ka riat. Hasik han chong kei ril ngai dora hi Pa han ka koma ei na ril anga kei ril.”
Zvasarudzwa nguva ino
JOHONIN 12: RANGBSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.