JOHONIN 7
7
Isua le Aparual ngai
1Hava suale Isua Galili na ava cheia. Juda ulian ngaiin athat rang ei val u sika Judai rama chu va chei zot lai mak. 2Hatuka Juda mi ngai Chubuk Panta hun chu ahonga nai zei a. #Lev 23.34; Dan 16.13 3Hasik han a parual ngaiin ama rang, “Hiva mun hi lei mak tan Judai rama lei se ro, na zolai ngaiin um na sin tho ngai mu u rase. 4Aninga suar asuak rang azot ngaiin maruka sin atho om ngai mak, hiva sin ngai hi nei tho nget ani ten, ramual pumpuiin na re rase!” ati u na. 5Ama a parual ngai lenin iam u mak.
6Hava taka han Isuan amani rang, “Ka hun la hong suak mak, tenchu nangni ngai rang hun chu atung thur keng. 7Ramual miringin nangni ana mumak thei, koi keng ei na mumak u, asik chu a sin tho asiat ngai ha kei man riat u ani. 8Nangni ngai keng pantana ase u chachak, hiva pantana koi chu la se no ning asik chu ka hun la suak mak,” ati na. 9Hiva chong ngai amani kom aril sua le chu Galili na a oma.
Isua Chubuk Pantana Ase
10A parual ngai pantana ase sua u le Isua ham asena. Tenchu vantang riat luia maruk siaia asena. 11Hava han Juda ulian ngaiin Panta lai taka ama chu arok u na, “Ama hi hontiangmo ei om?” ati u na. 12Hatuka havana mipui ngaiin ama ruia aril susup u na, ten mi senkhatin chu, “Mi dik keng,” ati u na, hatuka atei senkhat retin, “Mi dik ni mak, haneka mipui ngai hi asanok tiang keng ei ruai ani zei, atim a om u na.” 13Tenchu Juda ulian ngai ei achi u sika ama ruia tuten vantang riat rang khopa aril ngam om mak.
14Panta nikhua anbak atheng sua le Isua chu Biakina asena ava manchuna. 15Hatuka Juda ulian ngaiin, “Hiva miring hin anchu lui ta na hontinmo hidor pei Pathian lekha ei riat thei?” ati na aboi amandong sabak u na.
16Isuan amani koma, “Keina manchu u na ngai koi ata nimak, ana honga tirpu ata kiar keng. 17Ama ei zot atho zot doran chu hiva kei man chuna hi Pathian ata mo ole koi ka ning ata mo atia riat thei inti. 18Ama aninga ei ril aniten ama ei anlianna ranga aval keng, tenchu ama ahonga tirpu ei lian theina ranga aval ngai chu mi dik ani, hatuka ama na han adik nok omlai mak. 19Mosin nangni ngai hi dan ei na pek u nok mo ani? Hava suanam nisela nangnin hava dan zi u mak che, ichangamo ana that rang nei na vang chian u?” atia a masanga.
20Mipuiin amasanga, “Kachaiin ei na sur keng na ni zei, nang ana that ranga tumo ana val?” ati u na.
21Isuan amani koma, “Sin khat dak kei thona hin na lom u na na chang nei man dong u. 22Mosin ser atan dan ei na pek u, hatuka nangnin Pongansana nikhuana ser nei tan u, tenchu hava ha Mosi ata asuak nimak na chi pui u ngai ata asuak keng. #Anp 17.10; Lev 12.3 23Mosi Dan ei chai nokna ranga nangnin Pongansana nikhua nam ser nei mantan u, hanle koiin Pongansana nikhuana mi khat kei man dam atina mo ka chunga na tak ei si u? #Jn 5.9 24Na mitin ei mu u anga ruiril u no tan adik taka rui ril u ro,” ati na a masanga.
Isua hi Messia ani mo?
25Hatuka Jerusalema mi senkhatin, “Hiva mi hi ni zei no ni mo athat ranga ei val u ha? 26En u ta! Vantang riat ranga keng chong ei ril ani zei tenchu tuten avan kok thei um om mak. Hanle ama hi Messia atina ruaitu ngaiin ei riat tatak u mo ani zei? 27Messia ahong tik le chu hovan ata ahong mo tuten riat no ni, tenchu hiva mi ei hong suakna chu koinin na riat zit.”
28Isuan Biakina a manchu lai tak han ankheka, “Na na riat kiar u hale, hovan ata ahong mo ka ni, hava ham na riat u, koi hi ka ningbarchana ahong ni makung, tenchu ana honga tirpu hi atak le anthuam ani. Ama ha nangnin riat u mak che. 29Tenchu koi chu ama ha ka riat asik chu ama ata ahong ka ni, hatuka ama ha keng ana honga tir ngal.”
30Hasik han ama chu asur rang aval u na, tenchu tuten ama chunga kut anlek ngam om maka, ahun ei la hong tung pe nok sika han. 31Mipui kar ata mi atampa han ama alei iam u na hatuka, “Messia ahong tik chu hiva mi hin boidong sin ei lei tho neka ama han la hong tho sa inti,” ati u na.
Isua ava Sur ranga Sipai ngai atir u
32Mipuiin Isua aruia ei ril susup u Pharisi ngaiin ariat u le chu amani le chaizung ulian ngaiin ama ava sur ranga sipai atir u na. 33Hatuka Isuan, “Atun hin na bil u na hun alakte ranga ka la om, hava suale chu ana honga tirpu koma se ret ka ting. 34Na la rok un na ti, tenchu na tok u no ta ni, asik chu kei om nana hong thei u no ta ni,” ati na.
35Hatuka Juda ulian ngai kara amani le amani ha an ril u na, “Koinin nei tok thei nok rang khopa hiva mi hi hovanmo ei se rang? Koini na mi ngai omna Grik khopuia ei sena mo Grik mi ngai ei va manchu rang? 36Ama han ei la ti keng, na rok un na ti, tenchu na tok u no ta ni, hatuka ama ei omna munam se thei no ma ni ti hi hong ei ti na mo?” anti u na.
Damna Ti Nar aluang
37Panta liankhit ahek rang nikhuana Isua andinga ankheka, “A ti anral tak chu ka koma hong buang rase, #Lev 23.36 38hatuka a iam tak pei chu Pathian lekhabuna ei ti anga, ‘ama lungril ata damna ti nar luang inti,’ ati na. #Ez 47.1; Zek 14.8 39Isuan, ama iam ngaiin Ratha ei la man u na rang rui hi ei ril. Isua anliana ei la om nok sika han Ratha achunga ei la hong tung nok.
Mipui Kara Ansenna Suak
40Hatuka mipui bil ata senkhatin hava chong ariata, “Hiva mi hi atak taka Deari keng!” ati u na.
41Atei senkhat, “Ama hi Messia ani,” ati u na. Tenchu senkhat retin, “Krista Galili ata hong no ni. 42Krista chu David achi ata, hanuk David ei omna Betlehem khopuia keng ei lan zir rang atina Pathian lekhabuna ei ti keng,” ati u na. #2 Sam 7.12; Mik 5.2 43Hantin han Isua sika mipui kara ansenna ei suak ani. 44Hasik han senkhatin ama asur ranga ei val u tenchu tuten akut anlang om maka.
Juda Ulian a Iamnok ngai
45Hatuka sipai ngai ha chaizung ulian ngai le Pharisi ngai koma ahonga kir u na, hatuka amanin alei rakel u na, “Ichangamo nei hong ruai u nok?” ati u na.
46Hatuka sipai ngaiin, “Hi miring ei chong anga tuten chong la ril ngai mak,” ati na amasang u na. 47Pharisi ngaiin, “Nangnim mo amo ei na lei manlo ani u zei?” alei ti pe u na. 48“Angkhat ngal in mo Pharisi ngaiin a iama mo na riat u zei? 49Tenchu hiva mipui Dan riat lui ngai hi khomak atung rua ani u,” ati u na.
50Nikodem, zana Isua koma ahongpu ha, amam abil u na anchela, ama han akom u na, #Jn 3.1-2 51“Koini na Dan anga chu, mi hi mansana achong le a om tho ngai na riata na mu vang bak nokin rui mo aril ngai?” ati pe na.
52Hatuka amani han, “Nang um Galili mi mo na ni? Thunta, Galili ata deari la suak ngai mak,” ati na amasang u na. 53Hatuka angkhakhata a in chipa ase kiar u na.
Zvasarudzwa nguva ino
JOHONIN 7: RANGBSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.