Luk 20
20
Tʉtʉ viʼi Islel bèm əkɨ kəshi a Yesò lyɨ adyòʼ wen fa tsu
(Mat 21.23-27; Mak 11.27-33)
1Tʉʼ nlayn kətsi kətsenkə, Yesò sə ziʼi viʼi a ngə̀ŋ Nyìngòŋ, shəʼtə̀ ntɨm jùŋ à vəwenə. Tʉtʉ vəpfèm və ngə̀ŋ Nyìngòŋ nə̀ ndìʼsə̀ sə təsoʼ, bènə̀ vəchəʼ vì 2ə bèm à wen la, “Shəʼtə̀ à yès la wù nè nyʉ̀ venə nə̀ adyòʼ mu ghə̀ lù fafe a? A ku ndo nku adyòʼ a ghenə à wù a?”
3Ghə̀ bwènsə̀ gàʼ à vəwenə la, “Ma boŋ bèm kənyʉ̀ à ghə̀ŋ. Ghə̀ŋ shəʼtə̀ à mò la, 4à lù ku Nyìngòŋ ku adyòʼ a Joyn la ghə̀ nè nku mu à viʼi mu, à nkù viʼi lo?”
5Vəwenə sə̀ kayntə kənyʉ̀ a kyì à vəwenə a ntìntìn gàʼa la, “Vəghəŋ sətsèn gàʼ la, ‘A nku Nyìngòŋ ku adyòʼ a wen,’ ghə̀ à bèm la, ‘Ghə̀ŋ be faŋ kè byɨmə kənyʉ̀ a ghə̀ ngàʼà byìʼì ghò?’ 6Vəghəŋ sətsèn gàʼ la, ‘A nku viʼi ku adyòʼ à wen,’ viʼi vətsèm à tem ə zhwilə vəghəŋ nə̀ ngùʼsə byiʼ ando vəwenə nkɨ la Joyn ndiʼi nshə̀ʼtə̀ ghoʼo.” 7Ando vəwenə nkwòʼtə̀ alì, mù gàʼ la yès ko ki kəshi a kə nlù fa tsu.
8Yesò mù gàʼ à vəwenə la, “No nkàyntə mò lì ko shə̀ʼtə̀ kəshi a adyòʼ lu fa tsu sə nè nyʉ̀ a venə.”
Yesò mò ngàyn, ghə̀ ghaʼ tʉtʉ no vətsèm
(Mat 21.33-46; Mak 12.1-12)
9Ando ghə̀ ngaʼà alì bè mò ngàyn tsen à vəwenə la, “Wutsen nlu boʼ sɨm lamsə lwi wen, ə ku a viʼi la və shyèʼ, ə gə̀tə̀ ku wen nə̀ fo a və fʉ̀ fa tsu. Mù lù ə dyʉ̀ a loʼ tsen ghə̀ no kəghaf. 10Zhʉ kwʉ̀ʼ, və kwòŋ; ghə̀ tɨm wù shyèʼ wen tsen la ghə̀ dyʉ̀ ə gàʼ viʼi vyì a ghə̀ ku sɨm lamsə ayì à vəwenə la vəwenə ku və lamsə̀ vətsen və à wen lo. Viʼi a vyi ghaʼ wù shyèʼ ayì ə ghòm ə dzɨ̀mə̀ wen, ghə̀ bwènə̀ pfwo tò nə̀ avu ə zɨm ghə̀. 11Ghə̀ be tɨm wù shyèʼ tsen, vəwenə bè ghòm wen tò ghòmə be nyàblə̀ nə̀ wen ndi dìʼsə kətʉ kə wen ə dzɨ̀mə̀ wen ghə̀ bè pfwo tò nə̀ avu zɨm ghə̀. 12Ghə̀ be tɨm ghə̀ muʼ a ndiʼ viʼi shyèʼ və taʼ, vəwenə ghòmə lyomsə wen ə ten shìsə wen fa sɨm ayì. 13Tì sɨm ayi kwòʼtə̀ no kənyʉ̀ a ghə̀ zì ghə̀ ne ə gàʼ tò a wen tyɨm la, ‘Ma tɨm wàyn kòŋ mò, zhʉ tsen ghə̀ vəwenə à fàyn wen.’ 14Wàyn wen ayì dyʉ̀, vəwenə yen wen ə gàʼ la, ‘Ghèn diʼ njɨ̀ngə̀ŋ tìʼ sɨm ghèn. Vəghəŋ ghaʼ wen ə zhwi ndi lyɨ̀ fo vyi a ghə̀ tə̀ diʼi lu kiʼi a ndiʼ və vəghəŋ.’ 15Vəwenə gàʼ alì mù ghaʼ wen ə fʉ̀ nə̀ wen fa sɨm ayì ə dyʉ̀ zhwi.”
Yesò mù bèm à vəwenə la, “Ghə̀ŋ kwòʼtə̀ la, tì sɨm ayì zì ghə̀ ne no ghò nə̀ viʼi a venə a? 16Ghə̀ à vì ə zhwilə viʼi a vyi no vətsèm ə lyɨ̀ sɨm ayì ə ku a viʼi kədyàŋ.”
Yesò ne myètə̀ ngàyn a ghèn, viʼi vyì zhʉtə alə̀ ə gàʼ la kə Nyìngòŋ lə̀ byɨmə wìʼ ne nki kənyʉ̀ kènkə a viʼi shyèʼ sɨm a vyì nlù mwòm lə̀.
17Yesò ki vəwenə alə̀ mù bèm la, “Kəshi kə ŋwàʼlə̀ Nyìngòŋ kèn gàʼà la gho, kə gàʼà la:
‘Ngùʼ yì a viʼi kəmbwom tə̀ màʼà lì
kaʼsəli sə diʼ ngùʼ bʉ ngə̀ŋ’.
18No məndo a ghə̀ kàŋtə a ngùʼ bʉ ngə̀ŋ a ghèn, ghə̀ à fə̀ŋ ə tyinkə a temə a temə, ngùʼ ayì fəŋ tə̀ a kətʉ, ndo ghə̀ a bvʉ̀sə̀ tò bvʉsə.”
Tʉtʉ vyi bèm kənyʉ̀ byìʼì lòʼo kənsè
(Mat 22.15-22; Mak 12.13-17)
19Ndìʼsə̀ sə təsoʼ bènə̀ tʉtʉ vəpfèm və ngə̀ŋ Nyìngòŋ kɨ la ghə̀ yi mò ngàyn yì byìʼì vəwenə mù sə kəŋ ji əghaʼ wen tò a zhʉ ayì ali vəwenə ə fàyn nə̀ ashɨ viʼi. 20Vəwenə mù ghʉ ashɨ à wen a wèn be lòʼ viʼi ə tɨm à wen a bàm la vəwenə wamə nè taʼ sə vəwenə diʼ viʼi və jùŋvə, ə bèmtə̀ nyʉ̀ a wen əzhʉ la ghə̀ ko gàʼ kənyʉ̀ ə və ghaʼ wen tsu ə ku à wìʼ a Luma a ghə̀ nsoʼ shə loʼ ayi. 21Vəwenə gàʼ à wen la, “Yès kɨ la wù gàʼ à tò nəmwèʼè, be ziʼi tò nyʉ̀ vyi a diʼi tò nyʉ̀ nəmwèʼè, wù ko lyè la wìʼ chò wutsen, alì wù lutə̀ sù ziʼi tò təsoʼ tə Nyìngòŋ ando tə diʼì. 22Soʼo lè byɨmə la yès lòʼ kənsè à fòyn ghoʼo a Luma mu ghə̀ ko byɨmə à?”
23No a zhʉ kò, Yesò kɨ tofə vəwenə mù gàʼ la, 24“Ghə̀ŋ dìʼ ko kəkas à mò lì.” Vəwenə dìʼ, ghə̀ bèm la, “A diʼ kəndemndem kəkə̀ʼ ndo tsu bənə̀ zhiʼi wen lə̀?”
Vəwenə bwènsə̀ gàʼ la, “A diʼ kə̀ʼ fòyn ghoʼo fa Lum nə̀ zhiʼi wen ə̀.”
25Yesò mù gàʼ la, “Kə ndiʼ alì, ghə̀ŋ nku fo fòyn tò à fòyn bè ku fo Nyìngòŋ tò à Nyìngòŋ.”
26Kə chò vəwenə byiʼàndo, vəwenə nko yen kənyʉ̀ əghaʼ wen tsu a ntìntìn viʼi. Təchʉ̀ tə vəwenə zɨm, vəwenə, chiʼ la kùʼ.
Viʼi Sadùsi bèm kənyʉ̀ kùmə̀ məlù fa pfʉ
(Mat 22.23-33; Mak 12.18-27)
27Viʼi Sadùsi vətsenvə vì a Yesò, a diʼ viʼi vyì a və ko byɨmə la wìʼ lə lù fa pfʉ, bèm a wen la, 28“Ndìʼsə̀, gàʼa kò Mosìs nlù nyòʼo à yès la, ‘Lèmə̀ wìʼ sətsèn pfʉ, kiʼ wùwì, a lì ke nkiʼ vunə, lèmə̀ wu pfʉ a yì à lyɨ̀ wùwì mphʉ ayì, wenə wen bwi vunə wu pfʉ ayì lo?’ 29Vəlèmə ndiʼi sòmbo, ghə̀ mbì lam wùwì ə pfʉ, kèn nə̀ wàyn. 30Bamə wen nyòŋsə̀ wùwì ayì be pfʉ mòʼtə̀ ken nə̀ wàyn. 31Kənkùmtə̀ kə wen bè nyòŋsə̀ wùwì ayì be pfʉ ken nə̀ wàyn. Vəwenə no vətsèm lu nyòŋsə̀ wùwì ayì be pfʉ̀kə ken nə̀ wàyn. 32Wùwì ayì bè nè kaʼà pfʉ. 33A le lu ndiʼ a kətsi a və lu fa pfʉ, wùwì a ghèn ndiʼ ghə̀ ndo, ando vəlèmə a vyi sòmbo lam li wen no vətsèm a?”
34Yesò gàʼ à vəwenə la, “Viʼi mbyi layn ə lamə, 35alì viʼi a və kwʉʼù li bwòŋ fa pfʉ a tʉʼ ayì, be zhɨ bwòŋ a ghə̀ faŋə a ghan mùʼ ko lu lam. 36Kə lə ndiʼ alì byiʼ ando vəwenə ko le be pfʉ. Vəwenə lə ndiʼ ndə̀ŋndəŋ to nə̀ ntsɨ̀ŋsə Nyìngòŋ, bè diʼ vunə Nyìngòŋ byiʼ ando vəwenə luli fa pfʉ. 37No bè Mosìs ndiʼi li la və bwòŋsə viʼi fa pfʉ a kəshi kə Ŋwàʼlə̀ Nyìngòŋ kì a kə gàʼà kùmə̀ zhiʼ a ghə̀ mbolə̀ a toʼ. A ndiʼ a kəshi kə ŋwàʼlə̀ a ghèn ghə̀ dzàŋ Bobo nə̀ Nyìngòŋ yì a Ablaham nə̀ Izìk nə̀ Jàkob nlù sə̀ gumlə̀. 38Nyìngòŋ ko diʼ Nyìngòŋ viʼi və pfʉ̀və, a diʼ Nyìngòŋ viʼi a və diʼi və to byiʼ ando ghə̀ sətsèn ndiʼ Nyìngòŋ no mə ndo ayì, a ndiʼi to.”
39Yesò nè gàʼa mwètə̀, ndìʼsə̀ sə təsoʼ sətsensə gàʼ a wen la,“Ndìʼsə̀ wù gaʼà li a nkàyn.” 40Vəwenə gàʼa lì, kò no wìʼ mùʼ bè mwòmsə əbèm kənyʉ̀ a wen.
(Mat 22.41-46; Mak 12.35-37)
41Ghə̀ mù bèm a vəwenə la, “Wìʼ lè zì ghə̀ gàʼ la Klistò dìʼ wàyn Devìt a? 42Gaʼa ko nkàntə̀ Devìt ngàʼa a ŋwàʼlə̀ Salms la:
‘Bobo ngàʼa a Bobo ghom la,
Ŋwʉʼmə ashə̀ kwòŋ toghə mò
43Zaʼa fa zhʉ a mà nè viʼi kəbàyn nə̀ wù kwen a tyi soʼò wù.’
44A lè sətsèn ndiʼ mu Devìt ndzàŋ wen nə̀ Bobo, ghə̀ bè a ndiʼ wàyn Devìt a le lo?”
(Mat 23.1-36; Mak 12.38-40)
Yesò pfàntə̀ ndzɨ̀mtə̀sə bàm wen byìʼì ndìʼsə̀ sə təsoʼ
45Yesò gàʼ a ndzɨ̀mtə̀sə bàm wen a ji a viʼi vətsèm diʼi zhʉ la, 46“Ghə̀ŋ ntùʼmə̀ ghə̀ŋ və ndìʼsə̀ sə təsoʼ sensə. Vəwenə kòŋə njèʼè və dàlə və ghoʼkəvə, fʉ̀ dyʉ̀ a fàf ghoʼkə və ndi viʼi nyɨ vì toŋtə̀ vəwenə, dyʉ̀ aloʼ ntsèntə̀, Nyìngòŋ vəwenə kuʼ ŋwʉʼmə tò ambì, vəwenə be dyʉ̀ a shi kəzhɨ, vəwenə kòŋ əkuʼu ŋwʉʼʉ tò shi ŋaŋtə və. 47Vəwenə kòŋə lobtə kyì mpfʉ̀ ə shi, fo vəwenə no tsèm, wamə ə diʼ la vəwenə diʼ viʼi və jùŋvə, byìʼì ando vəwenə jɨ̀mə̀ lòtə̀. Nyìngòŋ lə ku ngəʼ byìʼì vəwenə.”
Zvasarudzwa nguva ino
Luk 20: bbkDBLnt
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda