MATEO 2
2
Mágukunapa adorakiynin
1Judea Belenchow Jesús yuririptin rey Eródispa junaqninkunachow, inti ya rqamunanpita shayámorqan Jerusalenman mágukuna, 2nishpa: —¿Judyukunapa reynin yurishqa, meychowtaq keykan? Inti yarqamunanchowmi qoyllurninta rikáyarqó, i shayámorqó adoraqnin.
3Keyta wiyarirna, rey Eródis turbakárerqan, i tseynow Jerusalenchow nunakunapis. 4I llapan prinsipal saserdotikuna qayatsishqa, i judyukunapa leynin yachatsikoqkuna, peykunata tapurqan Kristu meychow yurinan kanqanta. 5Peykunam niyarqan: —Judea Belenchow; tseynowmi qellqashqa keykan profetapa:
6I qam, Belen, Judá markapita,
Manam ichikllantsu kanki Judápa
pweblunkunachow;
qampitam yarqonqa juk pushakoq,
Israyel pweblútam mitsenqa.
7Tseynam Eródis, mágukunata pakeyllapa qayarir, allillapa tapuparqan peykunata qoyllur imey yurishqanta; 8i Belenman kacharirna nerqan: —Eywayey washata i alleqpa tapupakayámiy wamrapaq; i taririrna, musyatsiyamey, noqapis adoraq eywanápaq.
9Peykuna, reyta wiyarirna, ewkuyarqan; kaq keymi inti yarqamunanchow rikáyashqan qoyllur peykunapa nowpanta eywaq, chárirna, wamra keykanqanchow párarerqan. 10I qoyllurta rikárir, kushikuyarqan jatun kushikiywan. 11I wayiman yeykurirna, rikáriyarqan wamrata maman Maryatawan i qonquriykurna, adorayarqan; i tesorunkunata kicharirna, qareykunata qoyarqan: óruta, insensyuta i mírrata. 12Sweñíninkunachow rikátsikiypa willashqa kar Eródisman mana kutiyananpaq, kutikuyarqan markanta juk nánipa.
Egiptuman safakiy
13Peykuna ewkuyanqanchownam, kaq key Señorpa juk angelnin Joséta yuriporqan sweñíninchow i nerqan: “Sharkiy, wamrata i mamanta apey, i Egiptuman safakiy, i tseychow key noqa nenqaqyaq; Eródismi ashinqa wamrata wanutsinanpaq.”
14I pey, riyarkurna, ampipa wamrata i mamanta aparkur, ewkorqan Egiptuman, 15i tseychow karqan Eródis wanunqanyaq; profetapa Señor nenqan kumplikánanpaq, nenqannow: Egiptupitam qayarqá Tsuriyta.
Wamrakuna wanutsi
16Tseynam Eródis mágukunapa engañashqa rikakurir, piñakurkorqan allápa, i Belenchow i llapan jiruroqninkunachow ishkey watayoqpita ureypa kaq llapan wamrakunata wanutsiyánanpaq mandarqan, mágukunata tapunqan tyempumannow. 17Tseynam tinkurerqan profeta Jeremias nenqan, nishqannow:
18Ramáchow bos wiyashqa karqan,
jatun llakikiy, waqey i jiwey;
Rakel wawankunapaq waqan,
i shoqashqa keyta munarqatsu,
wanushqana kayaptin.
Egiptupita kuti
19Eródis wanurenqanchowna, kaq key Señorpa juk angelnin sweñíninchow yuriporqan Joséta Egiptuchow, 20nirnin: “Sharkiy, apey wamrata mamantawan, i ewkiy Israyel markaman, wanuyashqanam wamrata wanutsi munaqkuna.”
21Tseynam pey sharkurqan, i wamrata mamantawan aparkur, shamurqan Israyel markaman. 22Teytan Eródispa rantin Judeachow Arkelao reynékanqanta wiyarirna, mantsarqan washaman eyweyta; peru sweñuchow rikátsikiypa willashqa kar, ewkorqan Galileya ládupa, 23i shamorqan i yacharqan Nasaret jutiyoq markachow, profetakunapa nishqan tinkunanpaq, nasarenu jutishqa kananpaq.
Zvasarudzwa nguva ino
MATEO 2: QUEAN
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Quechua Ancash New Testament © Peruvian Bible Society, 1992.