Jẹnẹsis 40
40
Josẹf fan otọ rẹ Evwerhẹ rẹ Ohwo ra Kanre na
1Ọmọke vwọ wanre, omuidi rẹ ovie rẹ Ijipt kugbe okakemu rọye da chọ urhi rẹ ọrovwayen ovie rẹ Ijipt na. 2Ivun de miovwo Fero kpahe inotu rọye ivẹ na, omuidi na kugbe okakemu na, 3o de mu ayen phihọ uwodi vwẹ uwevwi rẹ onotu rẹ idugbu na, vwẹ evun rẹ uwodi re ji mu Josẹf phihọ na. 4Onotu rẹ idugbu na da vwẹ ayen kẹ Josẹf, kọye vwẹ ẹro te ayen; ayen da rhe dia uwodi na emerha. 5Ason ọvo ayen ivẹ na da vwerhẹ evwerhẹ–omuidi na kugbe okakemu na rẹ ovie rẹ Ijipt re mu phihọ uwodi na, dohwo devwerhẹ rọye, dohwo dotọ rọye. 6Ri Josẹf vwo bru ayen rhe irhiọke re mrẹ ayen, ayen de muomahọ. 7Ọ da nọ inotu ri Fero na re mu phihọ uwodi vwẹ uwevwi rẹ onini rọye na, Die nẹrhẹ ovwan muomahọ nonẹ? 8Ayen da ta kẹ, Avwanre vwerhẹ evwerhẹ, a rha mrẹ ohwo rọ faotọ rọye kẹ avwanre-e. Josẹf da ta kẹ ayen; Ọ dia Ọghẹnẹ re faotọ rẹ evwerhẹ? Gba ta kẹ vwẹ, Me rẹ wẹ.
9Kọye omuidi na da ta evwerhẹ rọye ki Josẹf, ọ da ta kẹ, Vwẹ evwerhẹ mẹ na urhe ri vain da obaro Me, 10vwẹ enu ri vain na eghọn erha da herọ; rọ ghwa vwọ kpa ipho na, ọ da ghwa mọ ibi, siẹvuọvo na ibi na da ghwa vware. 11Yẹ uko ri Fero rhe vwe obọ; Me da reyọ otie na mi de mi ayen phihọ uko ri Fero na, mi de mu uko na phihọ obọ ri Fero. 12Etiyin Josẹf da ta kẹ, Ọnana otọ rọye: eghọn erha na eye ẹdẹ erha; 13vwẹ evun rẹ ẹdẹ erha na Fero kọ kpare uyovwi wẹn kpenu kọ rhoma phi we phihọ edia wẹn, ku wo mu uko phihọ obọ ri Fero kirobo ri wo ruẹ jovwo, ọke ru wọ vwọ omuidi rọye. 14Ẹkẹvuọvo karo ovwẹ, ọke ro de yovwi kẹ wẹ, re wo ji ru ẹse na kẹ vwẹ, Me rẹ wẹ, re wọ fan odẹ mẹ ki Fero, re o si vwẹ nẹ uwevwi nana. 15Kidie vwẹ uyota e cho vwe nẹ otọ ri Hibru rhe; vwẹ obonẹ na mi ji ru emu rọ chọre re vwo mu vwe phihọ evun rẹ ẹmwa na-a.
16Ọke rẹ olori rẹ ekakemu na vwọ mrẹ nẹ ọ fan otọ rọye yoyovwi, ọ da ta ki Josẹf, Me je vwerhẹ evwerhẹ rhe: ibere rẹ ikara erha da enu rẹ uyovwi mẹ, 17ọ rọ ka obenu ejobi da vọn vẹ emu ra kakere ki Fero, ẹkẹvuọvo ephran ke sohrọ ria vwẹ enu rẹ uyovwi mẹ. 18Josẹf da kpahe, Ọnana ye otọ rọye: ibere erha eye ẹdẹ erha; 19vwẹ evun rẹ ẹdẹ rẹ erha na Fero kọ kpare uyovwi wẹn nu we oma; ko churu we si urhe; ephran ke cha sohrọ uvwo wẹn re.
20Vwẹ ẹdẹ rẹ erha, rọ dia eduvwiẹ ri Fero, o de chere emu kẹ idibo rọye ejobi, ọ da kpare uyovwi rẹ onotu rẹ omuidi na kpenu kugbe uyovwi rẹ onotu rọ kakemu na kpenu vwẹ usun rẹ idibo rọye na. 21Ọ da rhoma reyọ onotu rẹ omuidi na phihọ ako rẹ iruo rọye o de mu uko phihọ obọ ri Fero, 22ẹkẹvuọvo o de churu onotu rọ kakemu na si, kirobo ri Josẹf fan otọ rẹ evwerhẹ na kẹ ayen. 23Yẹ ẹkẹvuọvo onotu rẹ omuidi na gbe sa karophihọ Josẹfu-u, o da chọẹro.
Zvasarudzwa nguva ino
Jẹnẹsis 40: UBV77
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bible in Urhobo © United Bible Societies, 1977.