LUKA 21
21
1Yesu wa petula ovaso, kuenje wa mola olohuasi via imba ovilumba viavo vombango. 2Wa molavo ocimbumba cimue, osuke, ca imbamo alusendu avali. 3Kuenje Yesu wa popia lavo hati, Ndu sapuili siti, Ocili ocimbumba eci, haico osuke, ca imbamo ca lua, vosi vakuavo ci sule. 4Momo ava vosi kukuasi wavo wa lua, vopako ño eci va lumba, eye puãi kusuke waye, wa imbamo cosi a kala laco, haico eteku liaye.
5Kuenje eci vamue va vangula onembele ndeci ya posuisua lovawe a posoka kuenda olombanjaile viomanu, eye wa linga hati, 6Ovina evi vu lete, kuiya oloneke okuti kulo ka ku siala ewe kilu liewe ka li tunguluka. 7Yu vo pula vati, Olongisi, ovina evi vi lingiwa eteke li pi? kuenda ondimbukiso yaco ye, eci ovina evi vi laika oku lingiwa? 8Eye wa va kumbulula, hati, Lunguki sanga vu lueyisua. Momo va lua veya londuko yange vati, Ame, kuenda vali vati, Eteke lieya. Ko ka va kuami. 9Eci vu yeva ovita lovama, ko ka kuati usumba. Momo ovina evi viya tete, puãi ka vi likuama ndopo lesulilo.
10Oco wa popia lavo hati, Ofeka lofeka vi likatukila, kuenda usoma lusoma. 11Ku kala ovilemawe vinene. Kolonele vimue ku kala onjala lefengi. Kilu ku tunda evi vi yokokisa kuenda olondimbukiso vinene. 12Puãi osimbu ovina evi viosi ka via lingiwile, vo kuati kuenda vo kangisi, vo pakuili kolosunangonga lo kotuyike kuenje vu tualiwila onduko yange kolosoma kuenda kolonguluvulu. 13Eci cu wihi evelo lioku imba uvangi. 14Oco kapi ovitima viene okuti ka vu sokolola ndeci vu kumbulula osimbu ka wa pitilili handi kekanga. 15Momo ame ndu wihi omẽla lolondunge vina okuti ovanyali vene vosi ka va tẽla oku vi tamalaila pamue oku vi patãla. 16Vu pakuiwa ndaño lolonjali viene, ndaño la vamanjene, la vangandiene kuenda akamba vene. Vamue pokati kene va ipaiwa. 17Vu suvukilua onduko yange lomanu vosi. 18Puãi ndaño esinga limuamue kovitue viene ka li nyõleha. 19Oco, lepandi liene vu mola omuenyo.
20Puãi, eci vu mola Yerusalãi ya ñualĩwa lovita, limbuki okuti okukunduka kuayo ku kasi ocipepi. 21Oco ava va kasi vo Yudea va tilile kolomunda, lava va kasi vokati ka Yerusalãi va tundemo, lava va kasi ale kumue kuiñi ka va ka iñilemo. 22Momo oloneke evi viefetuluinyo, haivio viokulingiwa kuovina viosi via sonehiwa. 23Ava va kasilili muiñi lava va nyamisa koloneke viaco, ci linga ohenda, ohali yavo yi lua. Momo vofeka mu kala elamba lia lua, kuenje onyeño yi wengukila omanu valo. 24Va fa losipata, va tualiwa umandekua kolofeka viosi, kuenje Yerusalãi yi kosiwa la vakualofeka toke oloneke via vakualofeka vi sula.
25Kekumbi lo kosãi kuenda kolombungululu ku kala olondimbukiso. Kilu lieve ku kala upongo wolofeka via tangelekua lokuõla kuokalunga lakimba ako. 26Omanu va ambuka longuele yovina vi laika oku iya kilu lieve, momo ovonene okilu a lisenga. 27Kovaso yaco va mola Mõlomanu iyilila velende lunene kuenda ulamba wa lua. 28Oco, eci ovina evi vi fetika oku lingiwa, petuli ovaso ene, petulivo ovitue viene, momo eyovo liene li kasi ocipepi.
29Yu wa va tela olusapo hati, Vanji kukuyu, pamue koviti viosi. 30Tuli vu mola okuti via yova vu limbuka ene muẽle okuti ondombo yi kasi ale ocipepi. 31Haico ene, eci vu mola ovina evi okuti vi kasi loku lingiwa, limbuki okuti Usoma wa Suku u kasi ocipepi. 32Mopia lene siti, Ocili ocitumbulukila cilo ka ci pui te ovina evi viosi vi lingiwa. 33Ilu losi vi takata, olondaka viange puãi ka vi takata.
34Lilavi sanga ovitima viene vi vulua lelelele luholua kuenda ovikele viokomuenyo wokilu lieve, kuenje eteke liaco liu wili ocipikipiki ndulivi. 35Momo liya komanu vosi va tunga kuosi kilu lieve. 36Puãi lavululi olonjanja viosi loku likutilila okuti vu kala longusu yoku puluka kovina evi viosi viya, ho talami kovaso a Mõlomanu.
37Eteke keteke, utanya wa longaisa vonembele, uteke puãi wa tunda vimbo, oku ka pekela komunda ya tukuiwa Oliveira. 38Kuenje omanu vosi vo limẽlẽhãila vonembele oku u yevelela.
Zvasarudzwa nguva ino
LUKA 21: EMB63
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Umbundu Bible © United Bible Societies, 1963.