Aramid 2
2
To inumbe̍t niya Ispiritu Santu
1Ket ito nadatngan ya algew niya Padaya Pe̍nte̍koste̍s, uwed dito amin nga mamati nga naur-urnung iya isa nga lugar. 2Pagamwan da ngas nga uwed nabileg nga ungug nga gayat ka langit, nga arig nga ungug niya nabileg nga belluut. Ket to uni, imungug iya uneg nito baley nga nagtugtugawan da. 3Ket uwed met nasingen da nga arig nga gilab niya apuy nga nagwaras iya tunggal isa igida nga uwed antuni. 4Ket naidalan da nga aminin iya Ispiritu Santu, ket nagkagkagi da ka nadumaduma nga pagkakagi yin. Pinagkagi niya Ispiritu Santu da ka pagkakagi nga nadumaduma.
5Ket itun, uwed da Hudyu nga aged-edyan enna He̍rusale̍m nga taga-sabasabali nga pagiliyan iya amin nga lubung. Napasnec didi nga nangtungtungpal iya pammati da nga Hudyu. 6Ket ito nagicna da to ungug, adu diya naguurnung iya edyan dito mamati. Ket nasdaaw da ngarud, ta nagicna da nga amin ya kabucbukudan da nga pagkakagi nga ibalbalikas dito mamati yin. 7Ket nasdaaw ngarud diya toltoley, se̍ nasikuran dan, ket kinunen da, “Nih! Taga-Galilya met amin didi nga agkagkagi. 8Ape̍ magicna met niya tunggal isa dactida ya nakaiyanakan tida nga pagkakagi? 9Uwed met dactida diya iParsiya, se̍ uwed pe̍ iMe̍diya se̍ ie̍lam. Se̍ uwed dactida pe̍ diya iMe̍suputamya, kada iHudya, iKapadusiya, iPuntu, se̍ iAsiya, 10se̍ iPrigya, iPampilya, se̍ ie̍hiptu, se̍ uwed pe̍ gayat kadiya sakup niya Libya nga denni ka Sire̍ne̍. Uwed pe̍ dactida diya sangaili nga iRuma, nga Hudyu se̍ bekken nga Hudyu nga napasurut iya pammati tida nga kinaHudyu. 11Uwed pe̍ dactida diya iKre̍ta se̍ iArabya. Ngem diya nadumaduma nga pagkakagi tida met gayam ya magicgicna tida iya panangikagi da maipanggep kadiya naturay nga wangwangel ne̍ Apu Diyus,” kunen da.
12Ket padapada da nga amin nga nasdaaw se̍ nagpangpangaag, ket nagsisinnaludsud da nga kinunen da, “Nagan ngata ya kaipapennan na yani?” kunen da.
13Ngem uwed da pe̍ naguyaw nga kinunen da, “Ne̍nglew da ngas met diyan!” kunen da.
To panagpalawag ne̍ Pe̍dru
14Ket itun, simangu ngarud diya sangapulu ket duwa nga apustule̍s kadito toltoley. E̍ Pe̍dru ya pannakabeggi da nga mangipalawag, ket nibileg na ya panagkagi na, nga kinunen na igida, “Padac nga Hudyu, se̍ dakayu nga amin nga aged-edyan ennid He̍rusale̍m, denggen nu kuma ya kagic, ta ilawlawag ku dakayu ya kaipapennan na yani. 15Pagarup nu no ne̍nglew kami, ngem bekken met. Ta alas nuwe̍be̍ pekkem iya agsapa, ket gidam met ya panagiinum diya toley. 16Ngem ya napasamac dakami ita, itu yan ya pannakatungpal nito nipadtu itun nito Huwe̍l nga mammadtu ne̍ Apu Diyus. 17Nisurat nito Huwe̍l to kinunen ne̍ Apu Diyus nga agten idi:
‘Iyalubuc nad ya Ispirituc
iya amin nga toley iya kaodiyan nga timpu.
Ket diya anac nu nga lalaki se̍ babey,
ikaskasaba da nad ya kagic.
Diya agtutubu nu nga lalaki,
maparmata da nad pe̍ diya ipasingec igida,
se̍ mapasmeggan nad pe̍ diya lallakay nu
diya ipapasmeg ku igida.
18Ngarud, no iyan nga timpu,
iyalubuc ya Ispirituc
kadiya agsirsirbi iyaken,
lalaki man winno babey,
ket ikaskasaba da nad ngarud diya kagic.
19Uwed nad ipasingec
nga nakaskasdaaw iya abac lawa,
se̍ pagilasinan iya sap-ew niya ginet,
ta uwed nad daga, apuy,
se̍ napuskul nga asuc.
20Gumicbet nad ya sinag,
ket ya bulan,
dumgang nad nga arig nga daga ngin.
Amin diyan nga nakaskasdaaw,
maariman nad ngarud.
Kalpasan na, madatngan ya Timpu niya Apu.
Nakaskasdaaw yan nga timpu
nga awan kapada na.
21Ket diya amin nga umawag nad iya Apu,
nga sitatalec iya kinaturay na,
ket maisalakan da nad met,’
kunen nito Huwe̍l ito padtu na itun,” kunen ne̍ Pe̍dru.
22Ket nituluy ne̍ Pe̍dru to panagpalawag na nga kinunen na, “Kapadpadac nga Israe̍lita, denggen nu kuma ya ibagac. No maipanggep e̍ Je̍sus nga iNasare̍t, nipakaemmu ne̍ Apu Diyus dactida ya nakaibonan na, ta uwed nipasingen na dakayu nga nakaskasdaaw, se̍ milagru se̍ pagilasinan. Ngem emmu nu diyanin, ta nasingen nu met dito nipawangel ne̍ Apu Diyus e̍ Je̍sus itun iya imatang nu mettas. 23Ket iyan nga Je̍sus, gapu ta emmu itun ne̍ Apu Diyus ya mapasamac, nipalubus na ya pannakaiyawat na dakayu, ta itu ya panggep ne̍ Apu Diyus. Ket dakayu, nipapatey nu met, ata nipailansa nu kadiya managdacdake̍c ka krus. 24Ngem pinagungar met ne̍ Apu Diyus nge̍ Je̍sus, nga winayawayaan nan iya pannakabalin niya patey, ta madi ngarud mabalin nga abaken niya patey nge̍ Je̍sus.
25“Tutu met yan, ta kinunen nito Ari Dabid itun maipanggep e̍ Je̍sus,
‘Kankanayun nga emmuc
nga ya Apuc ya pe̍yeng nga mangidalan iyaken,
ket awan ansing kun,
ta pe̍yeng nga uwed iyaken.
26Dikad pe̍ maragsakan nac,
se̍ aganggem mac pe̍ iya panagkagic,
ta orey matey ya beggic,
sinanama ngac pekkem.
27Ta emmuc ngamin nga ikew,
madi nac baybay-an iya pennan diya natey.
Se̍ madi ka ipalubus nga maropsa ya beggic,
iyaken nga dungdungnguwem nga agsirsirbi ikew.
28Nipakaemmum iyaken nin
diya dalan nga agturung
iya biyag nga agnanayun.
Ket gapu iya kinauwed mu iyaken,
ket paragsaken nac,’
kunen nito Ari Dabid itun.
29“Wawagi, emmu tida met nga amin, nga to ama tida nga Dabid, tutu nga natey mettin, ket naitamen. Ket orey ita, uwed pekkem ya tamen na idi nga ili. 30Isa nga mammadtu to Ari Dabid kadito nipaikagi ne̍ Apu Diyus igina. Ket naemmuwan na ya kari ne̍ Apu Diyus igina, ta nikari ne̍ Apu Diyus ka napasnec ito Dabid nga pagbalinen na nad nga ari ya isa kadiya kapututan nito Dabid, nga agten mettas iya panagari nito Ari Dabid. 31To Ari Dabid, naemmuwan na ya panggep ne̍ Apu Diyus maipanggep iya maadpangan. Ket to kinunen nito Dabid, kinagi na met maipanggep iya panagungar niya Kristu. Ya Kristu ngarud ya kinunen na nga madi mabaybay-an iya pennan diya natey, se̍ madi pe̍ maropsa ya beggi na. 32Maipanggep ngarud e̍ Je̍sus mettas dito kinagi nito Ari Dabid itun. Ket amin mi, masacsiyan mi nga pinagungar ngarud ne̍ Apu Diyus nge̍ Je̍sus. 33Naipangatu nge̍ Je̍susin nga nawe̍ iya madiwanan ne̍ Apu Diyus, nga itu ya kadayawan nga saad. Ket inawat ne̍ Je̍sus to nikari ne̍ Apu Diyus itun, nga itu ya Ispiritu Santu nga naiyalubu win dakami. Ket itu win ya masingsingen se̍ magicgicna nu ita. 34Tutu met, ata bekken nga to Ari Dabid to nawe̍ ka langit itun, no di lugud e̍ Je̍sus. Ta to Dabid, kinunen na ngarud,
‘Kinunen niya Apu iya Apuc,
“Agtugew ka idi nga madiwanan ku,
35agingga nga mapasukuc diya gumurgura ikew,
nga arig da nad nga pagipatayam iya saka mun,”’
kunen na itun.
36“Dikad pe̍ kapadpadac nga Israe̍lita, maemmuwan tida kuma nga nalaingin nga e̍ Je̍sus nga nipailansa nu ka krus, igina mettin ya dinutukan ne̍ Apu Diyus nga Apu se̍ Kristu.” Itu ya nipakaemmu ne̍ Pe̍dru.
37Ket ito nagicna dito toley to kinagi ne̍ Pe̍dru, linumdaang da. Itu nga kinunen da e̍ Pe̍dru se̍ kadito duduma nga apustule̍s, “Wawagi, nagan ngarud ya wanglen min?” kunen da.
38Ket kinunen ne̍ Pe̍dru igida, “Agbabawi kayu ngarudin, se̍ pabautisaran ya tunggal isa dakayu gapu iya panamati nu e̍ Je̍su Kristu win, tasun mapakawan diya basbasul nu. Ket mae̍cdan kayu pe̍ iya Ispiritu Santu nga sagut ne̍ Apu Diyus. 39Ta dakayu met ya nangikariyan ne̍ Apu Diyus idi, dakayu se̍ diya an-anac nu, se̍ diya amin nga toley nga agedyan ka deyyu. Ngarud, amin diya ayaban niya Apu nga Diyus tida, itu diya nangikariyan na,” kunen na.
40Ket nabayag pekkem nge̍ Pe̍dru nga nagpalpalawag nga sipapasnec igida, ket binagbagaan na da nga kinunen na, “Adu diya nakillu nga toley ita nga timpu. Ilisi nu kuma ngarud diya begbeggi nu iya pannakairaman iya pannakadusa da,” kunen na.
41Ket dito namati kadito kinagi ne̍ Pe̍dru, nagpabautisar da ngarud. Ket itun mettas nga algew, uwed sumaggatlu nga ribu nga naidga iya bungguy dito sigud nga mamati e̍ Je̍sus itun. 42Nagaget da pe̍ nga nagpacpaisuru kadito apustule̍s. Ket pe̍yeng da nga nagtitipun, se̍ nagsasangu nga mangan se̍ agkararag.
To panagbiyag dito damu nga mamati
43Adu diya nakaskasdaaw se̍ pagilasinan nga inariman dito apustule̍s itun, ket nasdaaw ngarud diya amin nga toltoley. 44Nagbubulun dito amin nga mamati, ket nagraramanan da amin nga sansanicwa da. 45Nilaku da pe̍ diya dayday-as da se̍ diya sansanicwa da, se̍ da niwaras ya naglakuwan da kadiya amin nga kabulun da nga uwed kasapulan na. 46Nagkaykaysa da, ket inalgew da nga sangkabungguy nga nawe̍ aggigimung iya Te̍mplu. Nagkaykaysa da kadiya tunggal babaley da, nga pe̍yeng da nga nagtitipun nga nangan. Ket naragsac se̍ natunus ya panagbubulun da. 47Nagdaydayaw da e̍ Apu Diyus, ket nagustuwan diya toltoley da. Ket inalgew, pe̍yeng nga uwed kabarbaru nga naisalakan nga nikameng niya Apu iya bungguy da.
Zvasarudzwa nguva ino
Aramid 2: YBT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1990 New Tribes Mission, Sanford, FL 32771-1487, USA.
Printed in the Philippines.