Juan 19
19
1Ket iya agten iyan, pinasaplit met ne̍ Pilatu nge̍ Je̍sus ka latiku itun. 2Ket diya suldadu antuni, nangkawikew da met ka lanut nga agrasrasi, nga inariman da ka sinan-balangat, se̍ da nisimpa iya ulu ne̍ Je̍sus. Ket siuuyaw da met pe̍ nga kine̍balan da ka biyule̍ta nga luput, 3ket nagsisinnublat da nga nagasosoli nga nanguy-uyaw igina nga kinunen da, “Wahey! Madaydayaw ka kuma nga ari diya Hudyu!” kunen da, se̍ tinungtungpa da met pe̍.
4Ket e̍ Pilatu, rinumwar manin nga kinunen na kadito Hudyu, “Kad yani, iruwar ku nga isangu dakayun tasun maemmuwan nu nga awan met masmac ku nga basul na,” kunen na. 5Ket iya agten iyan, rinumwar ngarud nge̍ Je̍susin nga sikukuruna ka agrasrasi nga lanut, se̍ sike̍ke̍bal ka biyule̍ta nga luput. Ket kinunen manin ne̍ Pilatu igida, “Kad yani ngarudin to toley!” kunen na.
6Ket dito pangpangulu diya agsirsirbi iya Te̍mplu se̍ dito guwardiya, ito nasingen da, kinunen da nga nip-ipkaw, “Pailansam ka krus! Pailansam ka krus!” kunen da met.
Ngem kinunen ne̍ Pilatu igida, “Ahah! Biyang nu was yanin! Dakayu nga mismu ya mangilansa igina ka krus. Ta no iyaken, awan met emmuc nga basul na,” kunen na.
7Ket kinunen dito Hudyu, “Sigun iya isa nga bilin iya linteg mi, rebbeng na ya matey ya agten iyan nga toley, ta kunen na met nga igina kanu ya Anac ne̍ Apu Diyus,” kunen da.
8Ket ito nagicna ne̍ Pilatu yan, kumarkaru met ya ansing nan. 9Ket simoli manin iya uneg nito palasiyu win, ket kinunen na e̍ Je̍sus, “Awac ngarud ya tutu nga gayatam?” kunen na. Ngem madi negkim nge̍ Je̍susin.
10Dikad pe̍ kinunen manin ne̍ Pilatu igina, “Ape̍ nga madi ka gabay ya sumungbat iyaken? Di ka kad emmu nga uwed iyaken ya turay nga mangpawayawaya winno mangpailansa ikew ka krus?” kunen na.
11Ket kinunen ne̍ Je̍sus, “Awan met turay mu iyaken, no di ngas ya naitalec ikew manipud ka langit. Itu nga nakarkaru ngarud pekkem ya basul nito toley nga nangiyawat iyaken ikew,” kunen na.
12Ket ito nagicna ne̍ Pilatu yan, gabay na manin nga wayawayaan kuma nge̍ Je̍sus. Ngem dito Hudyu, nip-ipkaw da latta nga kinunen da, “No wayawayaam yan nga toley, emmu mi ngarudin nga guraem nge̍ Ari Se̍sar. Ta nabatad met nga ya agten iyan nga toley nga mangibilang iya beggi na nga ari, ket kakuntra na ngarud nge̍ Ari Se̍sar,” kunen da.
To panangikeddeng ne̍ Pilatu nga mapatey nge̍ Je̍sus
13Dikad pe̍ ito nagicna ne̍ Pilatu diyan nga kinagkagi da, niruwar na ngarud nge̍ Je̍sus iya sangu dan. Ket e̍ Pilatu, nawe̍ nagtugew iya tugew nga pangukuman nga maawagan ka “Gabata”, nga itu ya kagi He̍briyu nga kayat na nga kagiyen, “Platapurma nga Batu.” 14Ket dandani agmatuunin iyan nga algew, nga itu to algew nga panagisagana diya Hudyu iya ngilin da iya kadamlag na, ket timpu Padaya Nitatalib ngarud itun.
Ket ito nakatugew nge̍ Pilatu win, kinunen na kadito Hudyu, “Kad yani ya ari nu!” kunen na.
15Ngem dito Hudyu, nipkaw da nga kinunen da, “Ipapatey mun! Ipapatey mu lugudin! Pailansam ka krus!” kunen da.
Ket sinaludsud ne̍ Pilatu igida, “Gabay nu kad nga pailansac ka krus ya ari nu?” kunen na.
Ket simungbat dito pangpangulu diya agsirsirbi iya Te̍mplu nga kinunen da, “Awan met sabali nga ari mi no di ngas e̍ Ari Se̍sar!” kunen da.
16Ket iya agten iyanin, niyawat ne̍ Pilatu nge̍ Je̍sus igidan tasun mailansa ka krus.
To pannakailansa ne̍ Je̍sus ito krus
Mat. 27:32-44; Mar. 15:21-32; Luk. 23:26-43
Ket itun, nimet da ngarud nge̍ Je̍sus, 17se̍ da niruwar iya siyudad nga He̍rusale̍m, nga bugbugtungen na met ya krus na. Ket nipen da iya lugar nga maawagan ka Gulguta, nga itu ya kagi He̍briyu nga kayat na nga kagiyen, “Edyan Bangabanga.” 18Ket antuni nin to nangilansaan da igina ka krus. Ket uwed met pe̍ duwa nga lalaki itun nga naikumpas e̍ Je̍sus, nga nailansa pe̍ kadiya krus da. Nagsumbangir diya krus da iya abay niya krus ne̍ Je̍sus, ket nagkintengnga nge̍ Je̍sus.
19Ket e̍ Pilatu, uwed met isa nga pakaemmu nga nipaisurat na, se̍ nipaipay na ito krus ne̍ Je̍sus. Ket agten idi to naisurat iyan: “E̍ Je̍sus nga iNasare̍t, ya Ari diya Hudyu.” 20Ket adu dito Hudyu nga nakabasa idi nga pakaemmu, ta denni ngas iya siyudad to lugar nga nakailansaan ne̍ Je̍sus. Ket to pakaemmu, naisurat met ka tellu nga pagkakagi, ta naisurat ka pagkakagi nga He̍briyu, Latin se̍ Griye̍gu. 21Ket dito Hudyu nga pangpangulu diya agsirsirbi iya Te̍mplu, kinunen da e̍ Pilatu, “Sukatam to nisurat mu nga ‘Ya Ari diya Hudyu,’ ta agten idi kuma ya isurat mu: ‘Kunen na nga igina kanu ya Ari diya Hudyu,’ kunem, a,” kunen da.
22Ngem kinunen ne̍ Pilatu igida, “Basta nalpas met tuni nin. Madi nga mabaliwanin to nisurat kun,” kunen na met.
23Ket ito nailansa dito suldadu nge̍ Je̍susin, inalac da dito luput na nga inuba da igina itun, se̍ da biningaybingay ka eppat. Ket isa nga pagkapat ya bingay niya tunggal isa igida nga suldadu. Ngem to badu na, awan met saip na nga pulus, ta naabel ka is-isa nga nalayun nga luput. 24Dikad pe̍ nagtutulag dito suldadu nga kinunen da, “Madi tida pigpigisen, a. Pagbibinnunutan tida ngas no nagan dactida ya mangtagikuwa,” kunen da. Ket idi nga winangel da, itu met to nakatungpalan nito padtu nga naisurat iya Bibliya nga kunen na,
“Nagbibingayan da diya kawwes ku.
Ket diya lupluput ku,
nagbibinnunutan da.”
Ket agten iyan ngarud to winangel dito suldadu.
To panangitalec ne̍ Je̍sus iya ina na
25Ket iya denni ito krus ne̍ Je̍sus, uwed nga agsisikad ya ina na, se̍ to kabsat niya ina na nga babey, se̍ e̍ Marya nga asawa nito Klupas, se̍ e̍ Marya nga iMagdala. 26Ket e̍ Je̍sus, ito nasingen na nge̍ ina na se̍ to adalan nga dinungdungngu na nga agsisikad antuni, kinunen na ito ina na, “Inang, kad yan ya anac mun.” 27Ket kinunen na met pe̍ ito dungdungnguwen na nga adalan, “Kad yan ya ina mun,” kunen na.
Ket tutu met nga manipud itunin, kinabbalay se̍ inistimar ngarud nito adalan to ina ne̍ Je̍sus.
To pannakatey ne̍ Je̍sus
Mat. 27:45-56; Mar. 15:33-41; Luk. 23:44-49
28Ket e̍ Je̍sus, emmu na nga natungpal aminin. Ket tasun matungpal kuma ya isa pekkem nga padtu nga naisurat iya Bibliya, kinunen na, “Newwew wac.”
29Ket uwed isa nga putic antuni nga uwed suka na. Ket dito suldadu, namet da ngarud ka kapes nga nipaagsep da ito suka, se̍ da nisuge̍nge̍t iya gawis niya sanga hisupu, se̍ da nigaw-at iya musung ne̍ Je̍sus. 30Ket ito nasepsep ne̍ Je̍sus to suka ngin, ket kinunen na, “Natungpal ngarudin!” kunen na.
Ket kalpasan na, nagdumug, ket nipalubus na ya anges na nga simina ngin.
To pannakadoyoc ne̍ Je̍sus
31Ket gapu ta Algew Panagisagana itun, nga itu ya algew sacbay niya Algew Ngilin, inadeng dito pangpangulu diya Hudyu e̍ Pilatu no mabalin kuma nga ipakettu na diya sacsaka dito nailansa, tasun dagus da nga matey yin, ta maiyulug kuma kanu diya bangkay iyan mettas nga algew. Ta madi da ngamin gabay no mabati diya bangkay kadiya krus da iya Algew Ngilin. Madi da ngarud gabay no mabati da, ta yan nga mapasungad nga ngilin diya Hudyu, mairana met pe̍ iya Padaya Nitatalib, ket nipangruna da ngarud yan nga Algew Ngilin.
32Dikad pe̍ nawe̍ ngarud dito suldadu, ket kintu da met diya saka nito isa nga lalaki nga kabulun ne̍ Je̍sus nga nailansa, se̍ da nisublat to isa manin. 33Ngem ito imadenni da e̍ Je̍susin, nasingen da nga natey mettin. Itu nga madi da kintu diya saka nan. 34Ngem orey pe̍ no agten iyan, ket ya isa kadito suldadu, nidoyoc na latta ya say-ang na iya le̍pyong ne̍ Je̍sus, ket sigida nga uwed rinumwar nga daga se̍ danum.
35Ket ya toley nga nakasingen kadiyan nga napasamac, igina mettas ya mangipakaemmu kadiyan dakayu ita. Ket pudnu ngarud ya ipacpakaemmu na, ta yan nas kinapudnu ya ibagbaga na maipanggep kadiyan, tasun mamati kayu kuma met pe̍. 36Ta dito naariman itun, pakatungpalan ngarud nito padtu nga naisurat iya Bibliya nga kunen na, “Awan nad orey isa nga tulang na nga mactu,” kunen na iya Bibliya. 37Ket kunen na pe̍ iya sabali nga padtu iya Bibliya nga, “Singsingen da nad ya toley mettas nga dinoyoc da.”
To pannakaitamen ne̍ Je̍sus
Mat. 27:57-61; Mar. 15:42-47; Luk. 23:50-56
38Ket itun, uwed isa nga pasurut ne̍ Je̍sus nga isa nga taga-Arimatiya nga agnagan ka Huse̍. Pasurut ngarud ne̍ Je̍sus, ngem madi na met ipadpadlaw, ta mansing ngamin kadito pangpangulu diya Hudyu. Ket kalpasan nito pannakatey ne̍ Je̍sus, nawe̍ nagadeng to Huse̍ e̍ Gube̍rnadur Pilatu ka pammalubus nga alac na ya bangkay ne̍ Je̍sus. Ket nipalubus met ne̍ Pilatu, itu nga nawe̍ ngarud nge̍ Huse̍, ket nimet na to bangkay ne̍ Je̍sus. 39Ket nibulun e̍ Huse̍ to Nikude̍mu, nga itu to nawe̍ nakitbar e̍ Je̍sus iya name̍nsan nga gabi. Ket to Nikude̍mu, nangitangwal ka agtellu nga pulu nga kilu nga bangbanglu, nga itu ya pangbalsamar da nga naggayat ka kayu nga mirra se̍ ya mula nga alu.
40Nimet da ngarud to bangkay ne̍ Je̍sus, ket kinubit da, nga pinute̍putan da ka luput nga maawagan ka line̍n, agraman to pangbalsamar, ta itu ya ugali diya Hudyu no uwed maitamen. 41Ket uwed isa nga minuyungan nga denni ito nakailansaan ne̍ Je̍sus. Ket enna minuyungan, uwed met isa nga kabarbaru nga tamen nga awan pekkem naitamen iya uneg na. 42Ket gapu ta denni iya nakatayan ne̍ Je̍sus, itu wasin ya nangitalipnan da ito bangkay na. Ta Biye̍rne̍s met itunin, nga itu ya algew nga awagan diya Hudyu ka Algew Panagisagana sacbay niya Algew Ngilin.
Zvasarudzwa nguva ino
Juan 19: YBT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1990 New Tribes Mission, Sanford, FL 32771-1487, USA.
Printed in the Philippines.