Lukas 24
24
To panagungar ne̍ Je̍sus
Mat. 28:1-10; Mar. 16:1-8; Juan 20:1-10
1Ket ito nasapa pekkem nga unay iya algew Duminggu, nawe̍ dito babey iya nakaitamennan ne̍ Je̍sus. Ket nitarey da dito bangbanglu nga nisagana da nga pangbalsamar iya bangkay.
2Ket ito dimateng da antuni, nasingen da nga ya dackel nga batu nga naigiset ito nailiyang nga tamen, naibukalig mettin. 3Ket nimuneg da ngarud ito tamen, ket nasingen da met nga awan gayam to bangkay ne̍ Apu Je̍susin. 4Ket nasikuran da ngarud no ape̍. Ket pagamwan da ngas nga uwed met duwa nga lalaki nga gasisikad iya abay dan, nga makapurar ya kawwes da. 5Ket nagdumug ngarud dito babey gapu iya napalaus nga ansing da.
Ket dito lalaki, kinunen da igida, “Ape̍ nga ya edyan diya natey ya pangsapsapulan nu iya sibibiyag? 6Awan met idi nin ya sapsapulen nu, ta nagungarin. Madi kayu kad malagip to kinagi na dakayu ito kauwed na pekkem enna Galilya? 7Ta nibaga na met nga masapul nga maiyawat ya Anac nga Naipatoley kadiya toley nga managdacdake̍c, se̍ masapul nga mailansa ka krus, ket agungar mettas iya maikatlu nga algew, kunen na met itun,” kunen dito lalaki.
8Ket nalagip ngarudin dito babey to kinagi ne̍ Je̍sus itun. 9Ket pimanaw da ngarud ito edyan nito tamen, nga simoli iya siyudadin. Ket ito sinumpuc dan, nipadamag da amin diyan kadito sangapulu ket isa nga adalan ne̍ Je̍sus, se̍ kadito duduma nga pasurut na.
10Ket dito babey nga nagipadamag kadiyan kadito apustule̍s, igida de̍ Marya nga iMagdala, Huwana, se̍ e̍ Marya nga ina ne̍ Santiyagu. Didi se̍ dito kabulun da nga duduma nga babey diya nagipadamag kadito apustule̍s. 11Ngem madi met namati dito nakaibagaan niya damag, ta pagarup da no agsimsimangtaw was dito babey.
12[Ngem e̍ Pe̍dru, nanagtag met nga nawe̍ naningen ito tamen. Nagdokot nga sime̍re̍p iya uneg nito tamen, ket awan sabali nga nasingen na no di ngas to luput nga line̍n nga nangkubit da itun ito bangkay ne̍ Je̍sus. Itu nga nagawirin, nga nasdaawan gapu iyan nga napasamac.]
To panagpasingen ne̍ Je̍sus kadito duwa nga agpa-E̍maus
Mar. 16:12-13
13Ket iyan mettas nga algew, uwed duwa nga pasurut ne̍ Je̍sus nga mawe̍ iya isa nga ili nga managan ka E̍maus. Ket ya ili nga E̍maus, mabalin nga sangapulu ket isa nga kilume̍tru ya kaaddeyyu na manipud ka He̍rusale̍m. 14Ket ito manmanalan da, sapsaputen da to amin nga napasamac maipanggep e̍ Je̍sus.
15Ket ito agsapsaput da pekkem, uwed imadenni nga nakibulun pe̍ igidan. Ket e̍ Je̍sus met. 16Nasingen da, ngem madi da nga nailasin nga e̍ Je̍sus ya kabulun da.
17Ket sinaludsud ne̍ Je̍sus igida, “Nagan ya sapsaputen nu iya panagdaldalan nu?” kunen na.
Ket nagsardeng ngarud nga nanalan dito duwa, ket masingen met kadiya rupa da ya leddaang da. 18Ket ya isa igida nga agnagan ka Kliyupas, simungbat met e̍ Je̍sus nga kinunen na, “Madim kad emmu? Ikew was kid ya aged-edyan ka He̍rusale̍m nga madi makaemmu no nagan ya napaspasamac antuni kadito nagkallabes nga algew,” kunen na.
19Ket kinunen met latta ne̍ Je̍sus igida, “Ape̍? Nagan kad niyan?” kunen na.
Ket simungbat da manin igina nga kinunen da, “Maipanggep ngarud kadiya amin nga napasamac ito Je̍sus nga iNasare̍t, itu ya sapsaput mi. Mammadtu met to Je̍sus, ket nabileg ya pannakabalin na nga nasingen kadiya winangel na se̍ kinagi na, bekken nas nga iya imatang diya toltoley, no di pe̍ iya imatang ne̍ Apu Diyus. 20Ket diya pangpangulu diya agsirsirbi iya Te̍mplu, se̍ diya duduma nga pangpangulu tida, niyawat da lugud met tasun maikeddeng nga matey. Ket iya agten iyan, nipailansa da ngarud ka krus. 21Ngem dakami, ninamnama mi met itun nga igina ya mangwayawaya kuma nga mangisalakan dactida nga iIsrae̍l. Ngem ya napasamac, ket maikatlu nga algew itan ya napalabes sin, kalpasan nito panangpatey da igina.
22“Ngem orey agten iyan, mas-asdaaw kami met itan, ta uwed da kabulun mi nga babey nga nasapa nga nawe̍ iya tamen nito Je̍sus ito agsapa. 23Ket simoli da nga nangibaga dakami nga awan kanu met to bangkay nan. Ket uwed da kanu pe̍ nagpasingen igida nga anghe̍l nga nangipadamag igida nga sibibiyag kanu nge̍ Je̍sus. 24Ket uwed da pe̍ kabulun mi nga lalaki nga nawe̍ nangpanecnec ito nakaitamennan na. Ket gapu ito nasingen da, napanecnekkan da ngarud nga pudnu to kinagi dito babey. Ngem madi da kanu met nasingen nge̍ Je̍sus,” kunen na.
25Ket e̍ Je̍sus, kinunen na ngarud igida, “Ape̍ lugud nga nakapsut ya pannakaawat nu? Ape̍ nga narigat kayu nga mamati kadito amin nga kinagi dito mammadtu? 26Di ngarud masapul nga mona nga agrigat ya Kristu ka agten kadiyan, se̍ kalpasan na, makadateng nad iya pakaidayawan na?” kunen na. 27Ket iya agten iyan, nipalawag ne̍ Je̍sus igida ya banbanag nga naisurat iya amin nga Bibliya maipanggep mettas igina, nga nirugi na kadito nisurat nito Muyse̍s, se̍ nituluy na kadito kinagi dito amin nga mammadtu nga naisurat iya Bibliya.
28Ket ito sumungsungad dan iya ili nga pennan dito duwa, arig nga manalan latta nge̍ Je̍sus nga tumalib ngas iyan nga ili. 29Ngem pinilit da nga kinunen da igina, “Ageppaw ka idi nin, ta gidamin, ket gumicbet pe̍ yin,” kunen da. Dikad nawe̍ ngarud nge̍ Je̍sus nga makidagus igida.
30Ket ito nagsasangu dan iya panganan, namet nge̍ Je̍sus iya tinapay, se̍ nagyaman e̍ Apu Diyus. Ket pinisey na, se̍ na niyawat igida. 31Ket iyan mettas nga kanitu, arig nga nalukatan diya mata dan, ta nalasin da mettin nga igina gayam nge̍ Je̍sus. Ngem nagpukaw mettasin iya panagsingen da.
32Ket kinunen ngarud dito duwa iya panagtebbar da, “Itu mettas gayam nga naganas nga unay to panaggigicna ta iya kagi na ito uwed tida pekkem iya dalan, ito nipalawag na dacta ya banbanag dito naisurat iya Bibliya!” kunen da.
33Ket dagus da mettas nga simoli ka He̍rusale̍min. Ket nadateng da nga naurnung met antuni nin dito sangapulu ket isa nga adalan se̍ duduma pe̍ nga kabulun da. 34Ket dito naurnung mettas ya nona nga nagkagi, nga kinunen da kadito duwa, “Pudnu met nga nagungar ya Apu win! Nagpasingen met e̍ Simon!” kunen da.
35Ket dito duwa, nipadamag da met pe̍ to napasamac igida ito nagpa-E̍maus da, se̍ nibaga da pe̍ no kumaan nito pannakailasin da e̍ Je̍sus ito nangpisey na ito tinapay.
To panagpasingen ne̍ Je̍sus kadito adalan na
Mat. 28:16-20; Mar. 16:14-18; Juan 20:19-23; Ara. 1:6-8
36Ket ito madama da pekkem nga mangis-istorya iyan, nagparang met nge̍ Je̍sus, nga gasisikadin iya nagtetengngaan da. Ket kimablaaw ngarud igida nga kinunen na, “Talna kuma ya uwed dakayu,” kunen na.
37Ngem nakigtut da, se̍ napalaus ya ansing da, ta pagarup da no be̍law ya nasingen da. 38Ket kinunen ne̍ Je̍sus igida, “Ape̍ masikuran kayu? Ape̍ nga uwed panagduwaduwa nu? 39Singen nu diya ima se̍ sakac, tasun maemmuwan nu nga iyaken mettas. Ricnaen dac, tasun mapanecnekkan nu. Ta no ya be̍law, awan met sebbit se̍ tulang na. Singen nu, ta uwed met iyaken nga gennung,” kunen na. 40[Kalpasan niya panangagi na iyan, nipasingen na igida diya ima na se̍ saka na.]
41Napalaus nga unay ya anggem da, ket arig nga madi da pekkem mamati iya nasingen da, ta mas-asdaaw da pekkem. Itu nga kinunen ne̍ Je̍sus igida, “Uwed kanen nu idi?” kunen na. 42Ket ne̍cdan da ngarud ka sangagerret nga natunu nga lames. 43Inawat na, se̍ na kinan iya imatang da.
44Kalpasan na, kinunen na igida, “Itu yani to nibagac dakayu ito nakibulbulun nac pekkem dakayu itun, nga masapul nga matungpal amin nga naisurat maipanggep iyaken iya Linteg nito Muyse̍s se̍ kadiya liblibru dito mammadtu se̍ iya libru nga Salmu,” kunen na.
45Ket itun, arig nga linukatan ne̍ Je̍sus ya pannakaawat da, tasun maawatan da diya naisurat iya Bibliya. 46Ket kinunen na igida, “Agten idi met ya naisurat iya Bibliya: Ya Kristu, masapul nga agrigat se̍ mapatey. Ngem agungar iya maikatlu nga algew. 47Ket kunen na pe̍ iya Bibliya nga masapul nga gapu iya turay ne̍ Kristu, maikasaba ya damag maipanggep iya panagbabawi, se̍ iya pannakapakawan diya basbasul. Ngarud, mona nga maikasaba idi nga He̍rusale̍m, se̍ maiwaras pe̍ kadiya amin nga pagpagiliyan iya lubung. 48Ket dakayu mettas ya mangipakaemmu iya pudnu maipanggep kadidi nga banbanag. 49Ket agten idi: Ibon ku dakayu to nikari niya Amac. Ket masapul nga madi kayu ngarud pekkem pumanpanaw idi nga siyudad, agingga nga di kayu pekkem mae̍cdan ka pannakabalin nga gayat ka langit,” kunen na.
To ipeppen ne̍ Je̍sus ka langit
Mar. 16:19-20; Ara. 1:9-11
50Ket itun, niruwar ne̍ Je̍sus iya siyudad dito pasurut na. Ket ito nakadateng dan iya denna niya ili nga Be̍tanya, nitayag ne̍ Je̍sus diya ima na, ket nikararagan na dito pasurut na. 51Ket ito madama nga mangikarkararag nge̍ Je̍sus igida, nasingen da nga pimanaw igidan, nga naipangudu win nga nawe̍ ka langit.
52Ket nagdaydayaw da ngarudin igina, se̍ da simoli ka He̍rusale̍m nga siaanggem nga unay. 53Ket kanayun da nga nawe̍ iya Te̍mplu itun nga nagdaydayaw e̍ Apu Diyus.
Zvasarudzwa nguva ino
Lukas 24: YBT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1990 New Tribes Mission, Sanford, FL 32771-1487, USA.
Printed in the Philippines.