YAHYA 2
2
Khanuri meukawen di Kana
1Dua uroe óh lheueh nyan na khanuri meukawen di banda Kana Galilea, dan mak Isa na disinan. 2Isa ngon murit-murit Gobnyan na cit jiundang nibak khanuri nyan. 3Watée ié anggô ka habéh, mak Isa geupeugah ubak aneuëk geuhnyan, “Awaknyan ka habéh ié anggô.”
4Geujaweueb lé Isa, “Mak, bék neuyue ulôn. Gohlom trok watée jih ulôn peugah soe droe Ulôn nyoe.”
5Teuma mak Isa geupeugah ubak peulayan-peulayan nyang na inan, “Peubuet mantong peue nyang jipeugah ubak gata.”
6Nibak teumpat nyan na nam boh guci nyang ka teukeubah sibagoe teumpat seumeu rhah meunurot adat Yahudi. Guci-gucinyan maséng-maséng asoe jih kira-kira sireutoh arée. 7Isa laju geupeugah ubak peulayan-peulayan nyan, “Pasoe kheueh laju mandum guci nyan ngon ié,” dan awaknyan laju jipasoe lagée nyang geupeurintah lé Isa nyan sampoe peunoh. 8Laju Isa geupeugah ubak awaknyan, “Jinoenyoe cok laju bacut ié nyan dan gata ba laju ubak peumimpén khanuri.” Awaknyan laju jiba ié nyan ubak peumimpén khanuri, 9lé peumimpén khanurinyan laju jirasa bacut ié nyang ka meu-ubah jeuet keu ié anggô. (Gobnyan hana geuteupeue pane teuka jih ié anggô nyan, teuma peulayan-peulayan nyang leng ié nyan mantong nyang teupeu.) Teuma lé peumimpén khanurinyan laju geupeurab ubak linto barô, 10laju geupeugah ubak teungku linto nyan, “Lazem jih ureuëng geuhidang anggô nyang paleng gét leubeh ilée, óh lheueh nyan barô kheueh ié anggô biasa. Teuma digata takeubah ié anggô nyang paleng gét sampoe bak saátnyoe!”
11Nyan kheueh buet ajaéb nyang phon that geupeuleumah lé Isa. Gobnyan geupeubuetnyan di Kana di Galilea. Deungon tanda nyang lagéenyan gobnyan ka geutunyok keuagongan Gobnyan. Teuma lé murit-murit Gobnyan laju jimeuiman ubak Gobnyan.
12 #
Mat. 4:13
Óh ka lheueh nyan Isa laju geujak u Kapernaum meusajan ngon ma Gobnyan, syedara-syedara Gobnyan dan murit-murit Geuh. Awaknyan tinggai disinan na padub uroe treb jih.
Isa geutamong lam Rumoh Iébadat
(Mat. 21:12-13; Mrk. 11:15-17; Luk. 19:45-46)
13 #
Keu. 12:1-27
Watée Uroe Raya Paskah Yahudi ka tô, Isa laju geujak u Yerusalem. 14Di Rumoh iébadat di Yerusalem nyan Gobnyan laju meurumpok ngon ureuëng-ureuëng nyang teungoh peubloe leumô, bubiri dan cicém mirah pati; meunan cit ngon ureuëng-ureuëng tuka péng teungoh duek bak teumpat nyan. 15Isa laju geucok talo geupeugét peunyuenuet ngon peunyuenuet nyan geu-use mandum bubena beulatang nyan, bah kheueh bubiri meunan cit ngon leumô, nibak lam Rumoh iébadat. Meunan cit ngon meuja-meuja ureuëng tuka péng habéh geubalek sampoe péng-péng nyang na ateueh meuja nyan habéh meusipreuk bansaboh nyan. 16Óh lheuehnyan laju geupeugah bak ureuëng nyang peubloe cicém mirah pati, “Beuôt banmandum nyang na nibak teumpat nyoe. Bék gata peujeuet Baét Bapak ulôn keuteumpat meukat!” 17#Zab. 69:10 Teuma lé murit-murit Gobnyan laju teuingat keu ayat Alkitab nyang na teutuléh lagée nyoe, “Cinta ulôn keu Baét Droeneueh ya Allah, jipeututong até ulôn.”
18Lé peunguasa Yahudi laju jilawan Isa, jipeugah lé peunguasa nyan lagéenyoe, “Cuba peugét buet nyang ajaéb paih lagée tanda bak kamoe bahwa gata na hak tapeubuet nyang lagée nyoe.”
19 #
Mat. 26:61, 27:40; Mrk. 14:58, 15:29 Geujaweueb lé Isa, “Baétnyoe, lam lhée uroe Ulôn peudong lom teuma.”
20Laju jipeugah lé awaknyan, “Peuet ploh nam thon watée jih keu teupeugot Baét Iébadat nyoe. Dan gata keuneuk peudong lom lam tempo lhée uroe?”
21Teuma Baét Iébadat nyang geumeukeusut lé Isa na kheueh tuboh Gobnyan keudroe. 22Teuma óh lheueh nyan, óh ka lheueh Isa geupeubeudôh lam kawan ureuëng maté, teuingat kheueh lé murit-murit Gobnyan bahwa hainyan ka lheueh geupeugah. Teuma jipatéh kheueh lé awaknyan ngon peue nyang ka teutuléh lam Alkitab dan ubak peue nyang ka geupeugah lé Isa.
Isa geuturi keu mandum ureuëng
23Teungoh Isa mantong na di Yerusalem bak watée Peurayaan Paskah, ramé that-that ureuëng nyang meuiman ubak Gobnyan sabab buet-buet ajaéb nyang ka geupeubuet lé Gobnyan. 24Teuma Isa keudroe hana geupatéh keu awaknyan, sabab gobnyan geuturi keu mandum manusia. 25Hana peureulée na ureuëng jijak bri keuteurangan ubak Gobnyan keuhai soe mantong, sabab Gobnyan keudroe geuteupeue peue nyang na lam até manusia.
Zvasarudzwa nguva ino
YAHYA 2: LAIACE
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Old and New Testament in Today's Aceh Language @ LAI, 1997.