YAHYA 5
5
Teupeupuléh gob nibak kulam Betesda
1Óh lheueh nyan na peurayaan Yahudi, lé sabab nyan Isa geujak u Yerusalem. 2Di Yerusalem rab “Pintoe Bubiri” na saboh kulam,#rab “Pintoe Bubiri” na saboh kulam: atawa rab ngon “Kulam Bubiri” na saboh teumpat. nyang lam basa Ibrani nan jih Betesda.#Betesda: padub-padubboh naseukah kuno: Betzata. Nibak teumpat nyan na limong boh seuramoe. 3Nibak seuramoe-seuramoe nyan jai that-that ureuëng sakét nyang teu-éh-éh; na nyang buta, na nyang capiek, dan na teuma nyang lapée. [Awaknyan banmandum jipreh ié lam kulam nyan meugeulumbang. 4Sabab na watée jih malaikat Tuhan geutreun lam kulam nyan dan geuyok-yok ié lam kulam nyan. Dan ureuëng sakét nyang phon that treun lam kulam nyan watée ié nyan meugeulumbang teuma puléh nibak mandum peunyakét nyang na nibak ureuëng nyan.] 5Nibak teumpat nyan na sidroe ureuëng agam nyang ka keunong sakét lhée ploh lapan thon treb jih. 6Isa geukalon ureuëng nyan teu-éh nibak teumpat nyan, dan geuteupeue bahwa ureuëng nyan ka treb that sakét; lé sabab nyan Isa geutanyong bak ureuëng nyan, “Peu kheueh gatatem gata beu puléh?”
7Ureuëng sakét nyan laju jijaweueb, “Wahe Bapak lôn, hana ureuëng nyang na nibak teumpat nyoe nyang jitem peutamong lôntuan lam kulam nyan watée ié nyan meugeulumbang. Dan watée lôntuan teungoh lôn jak lam kulam, ureuëng laén ka awai leubeh ilée.”
8Teuma Isa laju geupeugah bak ureuëng nyan, “Beudôh kheueh, dan gulong laju tika gata dan gata jak kheueh.” 9Bak watée nyan cit teuma ureuëng nyan puléh. Ureuëng nyan jigulong tika jih laju jijak.
Hainyan na jih jijak uroe Sabat. 10#Neh. 13:19; Yer. 17:21 Lé sababnyan dumna peunguasa Yahudi laju jipeugah bak ureuëng nyang ban puléh nyan, “Uroenyoe uroe Sabat. Gata hana jeuet tabeuôt tika gata.”
11Teuma ureuëng nyan jiseuôt, “Ureuëng nyang peupuléh ulôn bunoe nyang yue bak ulôn mangat lôn gulong tika lôn dan lôn jak.”
12“Soe kheueh nyang yue gata tagulong tika gata dan jiyue jak?” tanyong ureuëng nyan.
13Teuma lé ureuëng nyang ka puléh nyan hana jituri soe ureuëng nyan, sabab Isa ka gadôh lamkawan ureuëng ramé nyan.
14Óh lheuehnyan Isa meurumpok ngon ureuëng nyan lam Baét Tuhan, dan geupeugah bak ureuëng nyan, “Jinoenyoe gata ka puléh. Bék kheueh tapeubuet desya lé, mangat hana gata rasa hai nyang leubeh brok lom nibak nyang ka.”
15Ngon lagéenyan jijak kheueh ureuëng nyan jijak peugah ubak peunguasa bansa Yahudi bahwa Isa kheueh nyang peupuléh jihnyan. 16Dan ngon sabab nyan awaknyan ka jipeuphon jipeusosah Isa, sabab gobnyan geupeu puléh gob nibak uroe Sabat.
17Teuma Isa geupeugah bak awaknyan, “Bapak ulôn teutab geumubuet trok nibak uroenyoe, dan Ulôn pih kumubuet.”
18Deungon tutoe haba nyan ka jeuet keusabab nibak ureuëng Yahudi keuneuk jipoh maté Gobnyan. Awaknyan jipeubuet hai nyang lagée nyan, kon lé sabab Gobnyan geupeu beuáh peuratoran agama keuhai uroe Sabat, teuma lé sabab Gobnyan geupeugah bahwa Po teu Allah nyan Bapak Gobnyan; ngon lagée nyan Gobnyan ka geupeusa droe Geuh saban ngon Po teu Allah.
Keukuasaan Aneuëk
19Isa geujaweueb keu ureuëng-ureuëng nyan lagée nyoe, “Peucaya kheueh, Aneuëk hana hase jipeubuet sapeue ngon kuasa jih keudroe. Gobnyan hase geupeubuet peue nyang ka geukalon nyang geupeubuet lé Bapak Geuh keudroe, nyang kheueh teuma nyang geupeubuet lé Aneuëk. 20Sabab Bapak geugaséh keu Aneuëk dan geutunyok bak Gobnyan banmandum nyang geupeubuet keudroe. Kon nyan mantong, Bapak teuma geutunyok ubak Gobnyan buet-buet nyang leubeh rayeuk lom, ngon sababnyan gata banmandum hireuen. 21Bapak nyan geupeubeudôh ureuëng maté, dan geubri keu gobnyan udeb nyang seujati ngon keukai baka; meunan cit teuma ngon Aneuëk geubri udeb nyang keukai baka ubak ureuëng nyang jitem geubri udeb. 22Bapak keudroe hana geupeu hakém soe-soe mantong. Banmandum keukuasaan keu ngon hakém nyan ka geujok ubak Aneuëk Geuh. 23Bapak geupeubuet mandum nyan mangat mandum ureuëng jihoreumat Aneuëk lagée jihnyan jihoreumat keu Bapak. Ureuëng nyang hana jihoreumat Aneuëk hana teuma jihoreumat Bapak nyang utus Aneuëk nyan.
24Keubiet beutôi nyang lôntuan kheun nyoe: Ureuëng nyang jisimak peue nyang Ulôn peugah, dan meuiman ubak Gobnyan nyang utus Ulôn, ureuëng nyan na udeb seujati ngon keukai baka. Jihnyan hana teuma teuhuköm; jihnyan ka leupah nibak maté dan meuteumé udeb. 25Peucaya kheueh: Teuma teuka watée jih – dan ka trok watée jih – ureuëng maté teuma jideungoe su Aneuëk Allah. Dan ureuëng nyang deungoe nyan teuma udeb. 26Lagée Bapak keudroe jeuet keu sumber udeb, dan Gobnyan geupeujeuet Aneuëk Geuh sumber udeb cit teuma. 27Gobnyan ka geujok bak Aneuëk Geuh nyan hak keujeuet keu hakém, sabab Gobnyan Aneuëk Manusia. 28Bék kheueh sampoe hireuen gata watée tadeungoe hai nyan, sabab watée jih teuma teuka bahwa banmandum ureuëng nyang ka maté jideungoe su Gobnyan, 29#Dan. 12:2 laju jiteubiet lam jrat. Ureuëng nyang ka jipeubuet nyang jroh teuma jibeudôh keu udeb. Teuma ureuëng nyang ka jipeubuet jeuhet teuma jibeudôh keu teuhuköm.”
Bukeuti-bukeuti keuhai Isa
30“Ulôn hana hase lôn peubuet sapeue pih meunyoe ateueh keuheundak lôn keudroe. Ulôn meuhakém lagée nyang geupeurintah lé Po teu Allah. Dan keuputosan Lôn nyan ade, sabab Ulôn hana kuseutôt lagée jikheun lé até Lôn keudroe, teuma keuheundak Bapak nyang utus Ulôn.
31Meunyoe seukira jih ulôn bri keusaksian Lôn keudroe, keusaksian nyan hana jeuet teupatéh. 32Teuma na ureuëng laén nyang meusaksi keuhai Ulôn, dan Ulôn kuteupeue peue nyang jimeusaksi nyan beutôi. 33#Yah. 1:19-27, 3:27-30 Gata ka takirém utosan ubak Nabi Yahya, dan gobnyan ka geumeusaksi nyang beutôi keuhai Ulôn. 34Hai nyoe Ulôn peugah, kon lé sabab Ulôn peureulée keusaksian nibak manusia, teuma mangat gata teupeuseulamat. 35Nabi Yahya nyan lagée panyöt nyang hu dan jipeuteubiet trang nyang muble-ble. Keu sikeujab nyan gata galak tateurimong cahya nyang trang nyan. 36Teuma meusaksi Ulôn leubeh rayeuk nibak meusaksi Nabi Yahya, peue nyang jinoenyoe Ulôn peubuet, na kheueh buat nyang geubri tugaih lé Bapak ubak Ulôn, nyan sibagoe bukeuti bahwa Bapak nyang geu utus Ulôn. 37#Mat. 3:17; Mrk. 1:11; Luk. 3:22 Dan Bapak nyang utus lôn nyan pih geumeusaksi keuhai Ulôn. Gata gohlom na peureunah gata deungoe su Gobnyan atawa gata ngieng hi Gobnyan. 38Tutoe haba Gobnyan hana teukeubah lam até gata sabab gata hana tapatéh keu Ulôn nyang geu-utus lé Gobnyan. 39Gata tameurunoe Alkitab sabab ngon lagée nyan gata sangka ngon cara nyang lagée nyan gata na udeb seujati dan keukai baka. Dan Alkitab nyan keudroe jimeusaksi keuhai Ulôn. 40Teuma gata hana tatem mangat ubak ulôn meuteumé udeb nyang keukai baka.
41Ulôn hana lôn mita jipujoe nibak manusia. 42Ulôn kuturi gata. Ulôn kuteupeue gata hana tagaséh ubak Po teu Allah lam até gata. 43Ulôn kuteuka ngon kuasa Bapak, teuma gata hana tateurimong Lôn. Teuma meunyoe ureuëng laén teuka ngon kuasa jih keudroe, gata tatem teurimong Gobnyan. 44Pakriban gata hase tapatéh, meunyoe gata tamita jipujoe lé sabe keudroe-droe gata, dan hana ta useuha tamita pujoe nibak Po teu Allah nyang Esa? 45Bék gata pike Ulôn kupeusalah gata dikeue Bapak. Nyang bit jih nyang peusalah gata na kheueh Nabi Musa, gobnyan nyang gata harab. 46Seukira jih gata tapeucaya ubak Nabi Musa, gata teuma tameuiman ubak Ulôn, sabab keuhai Ulôn kheueh gobnyan teumuléh. 47Teuma meunyoe gata hana tapatéh ubak peue nyang geutuléh lé Nabi Musa, pakriban teuma gata hase tapatéh ubak nyang Ulôn peugah?”
Zvasarudzwa nguva ino
YAHYA 5: LAIACE
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Old and New Testament in Today's Aceh Language @ LAI, 1997.