Matius 9
9
Yesus nen ap ageikhe iki isok aborlok dek meke hano hagakhikhe wene
(Markus 2:1-12; Lukas 5:17-26)
1Itithogon yogokhukhama, at Yesus ku akla ukiluk, ku warogo i aik ilibaganke italhikhesik o ukul at aila lageikhe hak, 2ap ageikhe iki isok aborlok dek welageikhe meke thabuleka dit talogo noge ekherekma witik werek korlek yerogo wolok oba wagoukhama, at Yesus nen he,
“It iti inetaiken an noba hakotdegasik nen wolok wageikha higi,” iluk, ileken ekagat hisalok nen, ap iki isok aborlok dek meke etnogo men yogokhikhe,
“Na'but o. Hakla arleken akhan. Hat weak hagakhe lagan meke re, an nen thagalogo degetdigi o,” iluk yogokhikhe. 3Itithogon yogokhikhemo it ap Allah ane holal waganek iteerek meke aperek inakla nen he,
“Eiye! Ap yi Allah akla meanetdiluk etaga weagatdiliogo,” iluk apasukha. 4Itithogon apasukhama, at Yesus nen inobabut ekagat palhikhesik nen, men isikhe,
“Hit hinakla nen wene korlo meke ebekhe lagap iti nenaluk? 5An nen ap yi wene yogosusak alhe hakene ki apegep.
Hat weak hagakhe lagan meke iti arat thagalogo degetdigi, iluk yogokhi iti alhe hakene meke yogokhi apegep a? E a, at he,
Hebe melatluk lan o, iluk yogosusak alhe hakene apegep a. Dek o. Hebe melatluk lan, iluk yogosumo akinat o. 6Akin mekeat he, an abat itaklasi agagi iti, agat oba yoma dogolik, akhuni yi weak it weak hagakharek meke an nenat thagalogo degetdekhe dogoagaluk Allah nen iteerek danhikhe iti hutdanubageik nen, yogosik,” iluk nen, ap iki isok aborlok dek meke etnogo men yogokhikhe,
“Hebe melatluk direka talek noge ekhe lagan meke ithi horlalok haila lan o,” iluk la'isikhe. 7La'isikhemo, ap etnogo melatluk aila lageikhe. 8Itithogon hagakhikhemo, it akhuni emenogo inileken hasukhasik inayuk agoukhasik nen,
“Allah nenat yigithogon hagakhe dogoagaluk akhuni meke meldekhemo iti nayuk o,” iluk, Allah hogorakhukha.
Yesus nen Matius ayoko 'bisikhe wene
(Markus 2:13-17; Lukas 5:27-32)
9At Yesus o etoma thogotdiluk laga dogolik, ap ageikhe etaga Matius, kantor uang pemerintah hasik kino iluk waganhe lagoukhama hurek werekma, ileken halok,
“Noporlik eme o,” iluk yogokhikhemo, melageikhesik oporligat lageikhe. 10Lageikhesik, at Yesus Matius ipisak at aila ukisikhesik hipiri nuogoluk hurek werekma, it ap uang pemerintah hasik kino iluk waganhe lagoukha meke aperek men, it aperek weak hagarik nekhe lagoukha meke men, inebe doalegat uki agoukhasik, at Yesus ebe inom, agarumi ane waganhe lagoukha meke emenogo inomat opakimo hurek latluk hipiri neke lagoukha. 11Itithogon nasi werekma, it ap Farisi meke nen inileken kola'isalok, it ap Yesus ane waganhe lagoukha meke emenogo men yogeisasukha,
“Hit hinoe wene yakulhisiliogo meke ithi, it ap uang pemerintah hasik kino iluk waganharek meke inom, it aperek weak hagarik nekharek meke inom, opakimo hurek latluk hipiri niliogei yi nenaluk,” iluk yogeisasukha. 12Itithogon yogeisasukhama, at Yesus asuk holhikhesik nen, men yogeisasikhe,
“It akhuni aperek inoba hano meke, dokter nen u hagarinabuagaluk inayoko 'busak nogo? Dek o. Inoba u werek halogat dokter lak inayoko 'busak o. 13#Hosea 6:6 Allah ane ageikhe men isikhe,
An Allah nakla nen, akhuni nen inako
watnekharek iti na'it o. It akhuni
inamurinakhe dogosak itiat warlok o,
iluk isikhe wene iti hutdi lani o. An wagagi iti re, akhuni inobabut hano hagakharek meke inayoko 'bigiluk wagagi 'buk. Dek o. Akhuni inobabut weak hagakharek meke iti inayoko 'bigiluk wagagi o,” iluk yogeisasikhe.
Sembayan uogoluk hipiri nikidek welageikherek wene
(Markus 2:18-22; Lukas 5:33-39)
14Itithogon yogeisasikhesik oba nen, it Yohanes agarumi ane waganhe lagoukha meke Yesus oba wagoukhasik nen, men yogokhukha,
“Nit men, it ap Farisi meke men, sembayan uogoluk, hipiri nikidek hibiku-yogoku welagorek mekeat he, it ap hat hane waganiogei meke yoma anek he, itithogon hagariogei dek iti nenaluk,” iluk yogokhukha. 15Yogokhukhama, at Yesus nen men yogeisasikhe,
“Ap ageikhe age waganhe dogolik, at agarlak lak erugi inomat dogolik, it inakla wiik-weakhogo dogosak nogo? Dek o. Itithogon mekeat he, agarlak lak erugi 'bisalok, ap iti wolok lugun oba weregat o. Itithogon wolok laumo anek, it iti iniki ageikhe hipiri nikidek sembayanat isi dogogunat o,” iluk yogeisasikhe. 16Itithogon yogeisasikhesik, ageikhe men yogeisasikhe,
“Akhuni nen, su alep iriogei meke li'bilaga halok, kain ket meke baga 'bugukasumo, yabokane kain ket meke iti dikilik dogolik, su iti kogat li'bilarik lausak o. 17Iti hakene, akhuni nen anggur eken apusu herelogo apusu ket meke isoak domba oado meke haganeat hagarek meke akla ukhakharek dek. Itithogon ukhasugun halok he, isoak domba oado meke hagarek etnogo sup ekhe dogolik, anggur eken apusu iti tialogo hagatlageik, isoak iti suphogon alomatlageik, hagasinogo. Itithogon hagasinogo iluk anggur eken apusu ket meke halok he, isoak ket hano hagarek meke halogat akla henasusak o. Itithogonat hagasumo nen, pereat hano dogosak,” iluk yogeisasikhe.
Yesus nen Yairus a'but horlak inom, he ageikhe inom, u hano hagarinakhikhe wene
(Markus 5:21-43; Lukas 8:40-56)
18Itithogon yogeisugunem, ap ageikhe o akhuni Yahudi meke sembayan egarekma ite dogolik kok welageikhe meke iti Yesus oba wageikhesik, itibagal yukukhogo hurek dogolik, men yogokhikhe.
“An na'but horlak ket yogotak yaat watlagama meke re, hat nen hiki hakha laumo re, iluk atluk oba the asigin o, iluk hayoko wagei,” iluk yogokhikhe. 19Itithogon yogokhikhemo, at Yesus ebe inom ap etnogo inom, it ap Yesus ane waganhe lagoukha meke emenogo inom, inom tha'bokhogonat lagoukha. 20Lagunem, he ageikhe amep lago motok werek korlek 12 tahun welageikhe meke, inoporlik laga dogolik, Yesus asu ilugun iki hakhasike. 21Itithogon hakhasikhe iti re, at he iti akla nen,
“Yesus iti asu niki hakhaumo, namep palasigin o,” iluk akla apalok itithogon hagakhikhe. 22Iki hakhasikhemo, at Yesus nen ileken dagakhogon 'bikhasikhesik nen, men yogokhikhe,
“Neru o! Hakla arleken akhan o. Hetaiken noba hakotdegen iti nen hano agan o,” iluk, isi korlek eranogoat, he etnogo arat hano ageikhe. 23Itithogon hagarik hagarik nen, at ap kok Yesus ayoko wageikhe meke etnogo aila lagoukha hak, akhuni de aga dogolik pikon wakharek meke wakhik, de naik-waik ageik, ugunem ileken 'birisalok, 24men yogeisasikhe,
“Horlak yi watlageidek, noge iliogo. Halok he, kikil warani o,” iluk yogeisasikhe meke re, it akhuni doalegat emenogo nen, obato kogat agoukha. 25Obato kogat agoukhama, inebe ula'isalok at horlak etnogo welageikhemo ukiluk iki hago meldisikhemo iluk ageikhe. 26Itithogon hagakhikhemo,
“Yesus nen hagakhe o,” iluk, o yi ai ti ai etoma abok motok thak-pak isikhe.
Yesus nen ap inebe pere inileken weak meke hano hagarinakhikhe wene
27At Yesus o etoma nen lagunem ap inebe pere inileken puk meke inane kokhogon ilik oporlik laga dogolik, men yogokhukha,
“Ap Daud nen itago meke noe a! Hakmu nisan o,” iluk yogokhukha. 28Itithogon yogokhukhama, at Yesus ebe uma ukiluk werekma, it ap inebe pere inileken weak meke eranogo oba ukisukha. Ukisukhama, at Yesus nen, men yogeisasikhe,
“Hit hinakla,
At nen erlok hano hagatninabusak, iluk apekhe lagap a?” iluk yogeisasikhemo, it nen,
“I o. Ninoe. Erlogat hano hagatninabusak apekhe lago,” iluk yogokhukha. 29Itithogon yogokhukhama, at Yesus nen inileken etnogo iki hageisekhe dogolik, men yogeisasikhe,
“Hagathinabigin o. Hinetaiken noba hakotdegep iti baga hano atni o,” iluk yogeisasikhe. 30Itithogon yogeisekhe korlek eranogoat inileken etnogo hano agoukha. Hano agoukhama nen, at Yesus ane obatnerogonat yogeisekhe dogolik,
“An hano hagathinakhi meke yi, akhuni aperek motok yogeisugup o,” iluk yogeisasikhe. 31Itithogon yogeisasikhe mekeat he, it akhuni emenogo nen o etoma at abok motok yogeisilik nekhe lagoukha.
At Yesus nen ap ageikhe ane motok dek meke hagakhikhe wene
32O etoma nen dukhisinem, it akhuni aperek nen ap ageikhe mokat obabut weak meke akla ukisikhemo ane dek motok welageikhe meke Yesus oba wolok wagoukha. 33Wolok wagoukhama, at Yesus nen mokat obabut weak meke ap etnogo akla ukiluk werekma mukhogo ula'isikhemo, ap etnogo ane huak iluk nen, wenekak isikhe. Itithogon hano hagakhikhemo, it akhuni inebe doalegat welagoukha meke nen Yesus hogorakhe dogolik, men isukha,
“Yigithogon hagakhunem nit akhuni Israel meke nen ageikhe ninileken hogorek dek meke nayuk,” iluk hogorakhukha. 34Itithogon hogorakhukhama mekeat he, it ap Farisi meke emenogo nen, men isukha,
“At Yesus nen Iblis agarumi inoe kok etnogo obatne baga mokat obabut weak meke iti akhuni inakla ukiluk werekma mukhogo ula'isiliogo,” iluk isukha.
At Yesus nen akhuni akmurinakhe dogolik yogeisasikhe wene
35At Yesus o ukul kokmake, herlekha'bukmoke, ya ukigik, ta ukigik, nekhe dogolik, o it akhuni Yahudi meke sembayan egarekma ukiluk, hano wene ninopase Allah nen apma 'binanherek wene etnogo yakulisigik, yi u ti u inoba werek meke inom, inobatne dek erlok dek meke inom, hano hagarinakhik, hagarik nekhe lageikhe. 36Itithogon hano hagarinabik nekhe dogolik, akhuni doalegat ileken lageisalok nen,
“Ap domba therisek welageikharek hak, it yoma ap therisek dogou meke inebe dek nen yugunat thirlik-pirlikhogon thet yagalek liliogei yoma nakmu lak o,” iluk akmurinakhikhe. 37Akmurinakhikhesik, at agarumi ane waganhe lagoukha meke emenogo men yogeisasikhe,
“Eken ugu doalegat werek mekeat he, akhuni eken ebe palusak meke inebe pererlagat o. 38Iti nen he, ap ayabu Iteerek meke etnaga nen akhuni eken palusak meke aperek la'isoak nen, at ayoko 'bekhe dogono,” iluk yogeisasikhe.
Zvasarudzwa nguva ino
Matius 9: LAIDNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda