Markus 10
10
At Yesus nen, “Ap inagugi waganek meke lologo here'isausak motok dek o,” iluk yogeisasikhe wene
(Matius 19:1-12; Lukas 16:18)
1At Yesus nen wene itithogon yogeisalok nen, o etoma thogotdiluk, o Yudea etoma usasikhesik nen, i Yordan aik ilibaganke italhikhe. Italhikhemo nen, akhuni doalegat yabokane at oba natogosi agoukhama, wene hibiku-yogoku yakulisekhe lageikhe hagat, yakulisasikhe. 2Yakulisugunem, ap Farisi meke aperek Yesus oba wagoukhaat. Wagoukhasik men yogokhukha,
“Yesus. Ap nen, he waganek meke lologo here'isausak erlok a? Erlok dek a,” iluk obabut paluogoluk hinok waganhukha. 3Hinok itithogon waganhukhama, at Yesus nen men yogeisasikhe,
“At Musa nen wene nikithogon hinasuk wakhikhe nogo,” iluk isikhemo, 4#Ulangan 24:1-4 it nen men yogokhukha,
“At Musa nen, wene ninasuk wakhe dogolik men yogeisasikhe,
Ap ageikhe nen he waganek meke here'isagaluk
halok he,
He yi hebe na'it. Arat here'agagi o, iluk holal
waganogo wogotluk erlok here'isausagat o,
iluk yogeisasikhe,” iluk Yesus yogokhukha. 5Itithogon yogokhukhama, at Yesus nen men yogeisasikhe,
“At Musa nen,
Itithogon erlok hagakhe dogosak, iluk, inasuk warogo holal waganhikhe iti hit hinakla motok puk dogolik yokhisugunem hinasuk holusak motok elrok dek iti nen, iti nenat yogeisasikhe. 6#Kejadian 1:27, 5:2 Itithogon yogeisasikhe mekeat he, erlo baga Allah nen winametdinanhikhe iti hasik, holal men iluk waganek werek,
Ap winametdigik, he winametdigik,
winametdisasikhe.
7Iti nen, ap nen, agosa opase thogotdisalok age
ipisak hano dapulik dogolik,
8 #
Kejadian 2:24
it iti, inebe pere mekeat he, opakiat asugun o,
iluk isikhemo holal waganek werek iti nen, yabokane it iti inebe pere 'buk. Opakiat ageikhasik werek o. 9At Allah nenat itithogon ipisak dapukhogon 'bisasikhesikmo, it akhuni inekaerek nen hethelasusak motok dek o,” iluk yogeisasikhe. 10Itithogon yogeisalok nen, at agarumi ane waganhe lagoukha meke emenogo inom uma ukiluk, Yesus oba hinok waganhe dogolik men yogokhukha,
“Wene yogeisegen iti ebe nikithogon. Hanorogon yoknisan,” iluk oba hinok waganhukha. 11Hinok waganhukhama, at Yesus nen men yogeisasikhe,
“Ap tha nen, age waganek meke lologo here'isalok, he ninat meke ageikhe waganhe halok he, age alep meke iti il damelogo, age yabokane meke ipisak paramat hagasugun o. 12Nen, it humi tha nen inaguni waganek meke here'isalok ap ninat meke ageikhe woginabi laga halok he, paramat hagakhesik werek o,” iluk yogeisasikhe.
Yesus nen, “Yekerugi 'bugurlaktek iti an noba wetnek,” iluk yogeisasikhe wene
(Matius 19:13-15; Lukas 18:15-17)
13At Yesus nen, wene itithogon yogeisasikhesik werekma, it akhuni aperek nen yekerugi 'bugurlaktek meke Yesus nen iki hageinabuagaluk oba wogosik wagoukha. Wagoukhama re, at agarumi ane waganhe lagoukha meke emenogo nen wenageisasukha. 14Itithogon wenageisugunem, at Yesus ileken hisalok akla aga dageiluk men yogeisasikhe,
“Akhuni inobabut it yekerugi ithi inobabut iti hakene hagatlasugun halok he, Allah nen apma 'bisekherekma etoma iteerek asugun iti nen, yekerugi 'bugurlaktek ethoma an noba wetnek. Wene palhe 'buk o. 15Tha nen, yekerugi 'bugurlaktek meke Allah nen apma 'bisekherek wene iti waganiluk ukegarek iti hak ukigidek halok he, ukigin motok dek o, iluk eberogonat yokhisigi,” iluk yogeisasikhe. 16Itithogon yogeisasikhesik yekerugi 'bugurlaktek emenogo inebe dopok agamo woginabiluk iki inukuloak thebelogo, at nen,
“Allah nen hanothinakhe dogoak,” iluk woginabiluk yogeisilik lageikhe.
Ap ageikhe ameke doalegat meke Yesus oba wageikhe wene
(Matius 19:16-30; Lukas 18:18-30)
17Wene itithogon yogeisalok at Yesus o etoma nen holak piokthek lagaluk lagunem, ap ageikhe pirlirli oba wageikhe. Wageikhesik itibagal yukukhogon apma hureklasi ageikhesik nen, men yogokhikhe,
“Guru noe. Wene yakulnisekhe lagan iti, hat hano o. An naburlal-haburlal hagatnabuak nen, an nobabut nikithogon hagakhe dogosak,” iluk yogokhikhemo, 18at Yesus nen men yogokhikhe,
“Hat hano o, iluk yoknekhen iti nikithogon nen yoknekhen. At ageikhe hano dek o. Allah arligat hano o. 19#Keluaran 20:12-16 Wene at nen,
Yigithogon hagatno, itithogon hagatno, iluk ninasuk wakhe dogolik, men isikhemo werek,
Akhuni inebe inasusak dek o.
Param ha'isausak dek o.
Hiniki abusak waganusak dek o.
Hinekalat inabok palusak dek o.
Nukherinabusak dek o.
Hinagosa hinopase inalon halinakhe dogosak o,
iluk ninasuk wakhikhe wene etnogo hat hiluat o,” iluk yogokhikhemo, 20at nen men yogokhikhe,
“Noe. Wene yoknekhen iti, tha'bokhogonat an nebe yekerek oba nenat nasuk hologo mothogon hagakherek mekeat o,” iluk yogokhikhemo, 21at Yesus ileken oba halok akmu atluk nen, men yogokhikhe,
“Hat he, wene opakiat anek ageikhe hagakhidek welagan o. Hat yoma nen lalok hameke yi meke ti meke etoma tha'bokhogonat it aperek inoba oko pali lan o. Oko paliluk oko wokhesugun meke iti, it akhuni aperek inameke dek inerlageik meke iti supusogo wogeisano. Itithogon wogeisegen halok he, hat pogot oba meke kogat iteerek asigin o. Halok he, itithogon arat supusogo wogeisalok an noporlik nekhe dogonok nen wetno,” iluk yogokhikhemo, 22wene iti asuk holhikhesik nen, ameke motok doalegatma nogo nen, elokhoken aga dageiluk nen, akla weak atluk lageikhe. 23Lageikhemo, at Yesus nen agarumi ane waganhe lagoukha meke emenogo ileken hisilik lageikhesik men yogeisasikhe,
“Akhuni inameke doalegat meke Allah nen apma 'bisekherekma etoma nikithogon uku heat o,” iluk yogeisasikhemo 24wene yogeisasikhe iti baga inayuk agoukha. Inayuk agoukhama, at Yesus nen yabokane men yogeisasikhe,
“Nagarumi. Allah nen apma 'bisekherekma etoma nikithogon uku heat o. 25Wam unta kok muluk meke iti, disu elo horlelekma kola'umo erlok lelokhogon ukusak mekeat he, it akhuni inameke doalegat meke iti Allah nen apma 'bisekherekma etoma nikithogon ukusak motok erlok dek o,” iluk yogeisasikhe. 26Itithogon yogeisasikhemo, it inayuk motok agoukhasik, it-it men isukha,
“Halok he, Allah nen akhuni thani hak erlok tilinabusak he,” iluk isukha. 27Itithogon ugunem, at Yesus ileken it inoba halok he, men yogeisasikhe,
“Akhuni nen hagasusak motok erlok dek mekeat he, Allah nen hagasusak erlok dek 'buk. At nen yi meke ti meke hagasusak erlok anek o,” iluk yogeisasikhe. 28Itithogon yogeisasikhemo at Petrus nen men yogokhikhe,
“Meke re, nit hat hoporlik nekhe dogouogoluk yi meke ti meke tha'bokhogonat here'isalok wagosik nekhe lago meke yi anek he, nikirlik,” iluk yogokhikhemo, 29at Yesus nen men yogokhikhe,
“Nane eberogonat yokhisak. Tha nen, an akmu nen, wene hano wene yi warlok nen, ai halek men, oe agot men, erugi men, agosa opase men, a'buri men, aen waganek men, here'isalok waga halok he, 30iti ebe dopok obolukmo, yogotak ya ai halek men, agarlak lak men, erugi men, agosa men, a'buri men, aen waganek men, doalegat 100 hakene wogokhe korlek, akhuni nen weagatdekhe dogogunat o. Weagatdekho werekma, yabokane o ilugun hurli baga hagatlasigin iti hagatlaga halok he, naburlal-haburlal wogeisiginat o. 31Itithogon mekeat he, it akhuni o yogotak inetaga werek meke doalegat yabokane inetaga dek asigin. Nen, it aperek yogotak inetaga dek werek meke inetaga werek asigin o,” iluk yogeisasikhe.
“An nasugun o,” iluk iki pere baga yogeisasikhesik nen, yabokane ageikhe yogeisasikhe wene
(Matius 20:17-19; Lukas 18:31-34)
32Yabokane at Yesus itithogon yogeisalok, agarumi ane waganhe lagoukha meke inom o Yerusalem usauwogoluk, holagarlem usekhe dogolik, at Yesus holak waganhikhemo it agarumi emenogo inayuk atluk hogorakhukha. Nen, it akhuni aperek inoporlik usekhe dogolik inayuk agoukhaat. Itithogon inayuk atluk, usasukha usasukha it ap inebe 12 nen emenogo inasokneat ponhogo wogosik usekhe dogolik, at nen, men yogeisasikhe,
“An yabokane yigithogon hagatnabugun, itithogon hagatnabugun,” iluk yogeisilik usasikhe. 33Itithogon yogeisekhe dogolik men yogeisasikhe,
“Nagarumi. Nit yogotak o Yerusalem usekhe lago. Arat usalokma nen, an abat itaklasi agagi etnogo, ap nen yoko lalok, an nebe it ap Allah iteerek inougi koktek men, Allah ane holal waganek iteerek meke men, iniki baga 'banumo ap aperek nen nasuagaluk ukum noba 'biluk nen, it nen it ap itikmanke meke iniki baga 'banugun o. 34Itithogon 'banumo it nen inane aik dagok yoknikhik, wosi la'banhik, tugi la'bisoko tugi nakhik, hagatluk nen, nebe arat nasugun o. Nakhunem, niki pere warek dogoluk nen, niki ageikhe baga yi nen niluk asigin o,” iluk yogeisasikhe.
Yakobus Yohanes ipisak Yesus ageikhe kino yogokhukha wene
(Matius 20:20-28)
35Yesus nen wene itithogon yogeisasikhesik werekma, ap Zebedeus a'buri Yakobus Yohanes ipisak Yesus oba wagoukhasik men yogokhukha,
“Noe. Nit nen ageikhe kino yokhugunem, hat nen hagatnisanogoluk hoba wago,” iluk yogokhukha. 36Yogokhukhama, at nen men yogeisasikhe,
“An nen nikithogon hagathinabuagaluk warlok nen wagap,” iluk yogeisasikhemo, 37it nen men yogokhukha,
“Hat yabokane Hetagapogot atluk hagakhunem, akhuni nen hogothakhe dogogun itinem, ninom kogat dogouok nen, nit ageikhe hiki ebeke, nen ageikhe hiki paike, dogoagaluk meldinaninogoluk wago,” iluk yogokhukhama, 38at nen men yogeisasikhe,
“Kino yoknekhep iti, wene ebe hinokodegat dogolik, yoknekhep o. An yi aik ti aik hagatnabugun iti, hit itithogon hagathinabusak erlok apegep?” u hak,
“An nagei henago nugun iti, hit erlok nausak apegep? Nen, ima usa'isegarek hak usa'anugun iti, hit erlok usa'inagusak apegep?” iluk oba lisogon yogeisasikhemo, 39it nen,
“Erlok nausagat o,” iluk yogokhukhama, at nen men yogeisasikhe,
“An yi aik ti aik hagatnabugun iti hak, hit itithogonat hagathinabugun o. Nen, ima usa'isegarek hak, an usa'anugun iti, hit itithogonat usa'inagagunat o. 40Mekeat he, hat ageikhe an niki ebeke, nen, hat ageikhe niki paike ninom kok dogouogoluk, an nen meldinagusak erlok dek o. Haganeat Allah akla nen,
It meldisagein, iluk apasikhe meke werek o,” iluk yogeisasikhe. 41Itithogon yogeisugunem at Yesus agarumi ane waganhe lagoukha meke ebetlake inebe 10 nen inasuk holhukhasik inakla aga Yakobus Yohanes ipisak inoba 'bisukha. 42Inakla aga itithogon inoba 'bisukhama at Yesus nen inebe tha'bokhogonat natogosuagaluk waisasikhemo natogokhukhama men yogeisasikhe,
“Nagarumi. It akhuni itikmanke meke inougi pemerintah meke nen,
Hinougi koktek nirat o, iluk, mep dageik-dagokhogon hagarinakhik, nen, it ap koktek iti nen, hin motok han motok yogeisigik, hagakharek iti hinilu. 43-45Meke re, hit nen it hagakharek iti hak, itithogon hagakhe dogosak motok dek o. An abat itaklasi agagi etnogo hit natuaneke dogolik yi meke ti meke hagatnekhe dogobageik iluk wagagi dek o. At he, an nen hit hinatuaneke dogeigiluk wagagi o. Itithogon hagakhe dogolik hinebe herle warek negen welagap meke iti, hinebe doalegat herle hisalhinabigiluk anat nasuagaluk wagagi iti. Iti hakene, hit ageikhe tha nen,
An inoe kok asigin, iluk apasi halok he, hinagorat asuak. Nen, hit ageikhe tha nen,
An netaga kok asigin, iluk apasi halok he, at ebe hit tha'bokhogonat hinatuaneke asuak o,” iluk yogeisasikhe.
Yesus nen Bartimeus ileken puk meke hano hagakhikhe wene
(Matius 20:29-34; Lukas 18:35-43)
46At Yesus ebe men, agarumi ane waganhe lagoukha meke emenogo men, wene itithogon ilik usasukha usasukha, o Yeriko silimoke turlem usasukhasik, thogotdiluk dukhugunem, akhuni aperek inebe doalegat inoporlik dukhisukha. Dukhugunem ap Timeus a'but etaga Bartimeus ileken puk meke yi meke ti meke ape kino weak ekhe lageikhe meke iti holagarlem hurek werekma dukhisukha. 47Dukhugunem akhuni nen,
“Yesus ai o Nazaret meke etnogo wiriogo o,” iluk isukhama, at ap etnogo asuk holhikhesik ane kokhogon Yesus men yogokhikhe,
“Yesus Daud nen itago meke noe a! Hakmu nean o,” iluk yogokhikhemo, 48it akhuni doalegat emenogo nen,
“Hane o,” iluk wenagakhukha mekeat he, yabokane ebenageik ane kokhogon men yogokhikhe,
“Daud nen itago meke noe a! Hakmu nean o,” iluk yogokhikhemo, 49at Yesus ebe huk ageikhesik akhuni emenogo men yogeisasikhe,
“Wisuak nen watni o,” iluk yogeisasikhemo, it nen waekhe dogolik men isukha,
“Yesus nen wahiriogo iti hakla arleken akhilik melasin o,” iluk yogokhukha. 50Itithogon yogokhukhama asu itikmanke ugu meke nokorlogo po la'isalok, ibat melatluk Yesus oba wageikhe. 51Wageikhemo, at nen men yogokhikhe,
“An nen nikithogon hagathabuagaluk yoknekhen,” iluk hinok waganhikhemo ap ileken puk meke etnogo nen men yogokhikhe,
“Noe. Nileken hano hagatnabinogoluk yokhikhi o,” iluk yogokhikhemo, 52at Yesus nen men yogokhikhe,
“Hetaiken noba hakotdegen iti bagaat hano agan o. Halok he, lan o,” iluk yogokhe korlek eranogoat ileken puk meke etnogo hano ageikhesik Yesus holagarlem lagunem oporlik inomat lagoukha.
Zvasarudzwa nguva ino
Markus 10: LAIDNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda