YOHANES 2
2
O Kana etoma, kwe agun oba kunogo burak dago darkugwa wene
1Ininggi mbere nogo yiluk, o kota Kana, Galilea paga etoma, kwe ap oba kunogo buok nen yiluk dago nggok dakunem, Ar Yesus agwiya enogo etoma inom welagage. 2Ar Yesus aworomi inom enogo ogwe dakunem yemenogo inom eru paga inayonggo barugwa ar o. 3Dago nunggunem anggur amburu arar dek agagemo, Ar Yesus agwiya nen Ar Yesus yoga dogolir, “Ir yoma anggur amburu obok dek agama o,” yiluk yorige.
4Yorigemo, Ar Yesus nen wene onggo yoga dogolir, “Kwe yi, An yonega maga o. An neyawak nen yiluk kenam aru eti, o auwan panggo yi wagik dek o.”
5Ogwe Ar Yesus agwiya nen, akuni yabu mende yemenogo yoraga dogolir, “Ar wene nena-nena yokiraga kalok, yokeragin ndak-ndak dikbiluk etno o,” yiluk yoragage.
6Nen igirak yiluk muluk emam paga, i 100 liter ndak-ndak negen, ir Yahudi mende adat erirtagwi paga, akuni i yalinabu ake paga todogo birugwa welagage o. 7Mar Ar Yesus nen akuni yedoman mende yemenogo yoraga dogolir, “Igirak etoma akla, i ande kerok togon torni o,” yiluk yirigemo, ir yedoman mende yemenogo nen, i ande kerok togon arar todogo birugwa o. 8Arar ekugwama, Ar Yesus nen yoraga dogolir, “Yogondak i bugudak kalok ambi todogo ap dago kepala eti wogori lani o,” yiluk ir enogo yoragagemo, ir i enogo todogo ap dago kepala enogo wogori lagugwa. 9Wogori lagugwama, ar ap enogo nen, wedek ebe i ar mende, elalin anggur amburu erogo birige enogo, induk walkarige o. (Ogwe i anggur amburu eti ngga mende ar unggukdek, nen inilu eti ir yedoman mende, i eti torkugwa werek enogo mban inilu o.) Etege rogon agagemo, ap dago kepala enogo ap kwe kodau werek enogo oba lagagerek yoga dogolir, 10“Wene ya yegerogon eku dogolir mo, anggur amburu pano kwak eti ndak, ir ninarugi yemenogo wogoralok nen, obok ndonggok baga kalok, anggur amburu we ugunar nau mende yemenogo wulabi warir taga mendek o. Ogwe kar nogar, anggur amburu pano mende kwak biluk ar agandik keyagi o,” yiluk yorige.
11Wene yi Ar Yesus erukbuk mende elalin ibanini mondok ekige mende eti, yi arar o. Ar o Kana Galilea paga etoma ekige. Ar Elalin eti ekige paga, Ar mende obatne werek ernogo, akuni inilu erogo barige. Etnogo eki nanggige, ir Ar mutok lagwi mende yemenogo iniliti ar oba ebebar andarugwa.
12 #
Mat. 4:13
Eti eka lagagerek, Ar agwiya imbirak o Kapernaum etoma, Ar ogariyak inom, Ar aworomi mutok lagwi mende inom, arar lagugwa. Nen ir etoma lagugwarik, ininggi we idu paga negen ar welagugwa.
Ar Yesus Tuhan Ai Palekma unggirige wene
(Mat. 21:12-13; Mrk. 11:15-17; Luk. 19:45-46)
13 #
Kel. 12:1-27
Ir akuni Yahudi mende hari raya Paskah ake komakwi paga, arar panggo yirigemo, Ar Yesus o Yerusalem arar lagage. 14Nen o Tuhan Ai palekma, o Yerusalem yemenogo lagage mende, ir akuni pakalok nen; sapi onggo kunggwi, domba onggo kunggwi, tewe merpati yogu talek eti onggo kunggwi, tuguluk ir akuni uang tukar ekwi mende yemenogo korek latuk, onggo wokbigik nen onggo kundigik ekwi il darige. 15Ekwi Il daga lagagerek, Ar Yesus kede ndugi lakmbirok ambi ekbega lagagerek, ye wado nde wado yemenogo inom, domba inom, sapi inom, obogar Tuhan Ai Palekma nen mugogo wuldarige. Nen ir akuni uang tukar ekwi mende yemenogo, inameja ndalek mende, abuk daguk paguk eka, inauang yemenogo nggiluk piluk, ya mbu ndak mbu lakbirige o. 16Nen ir tewe merpati onggo kunggwa mende yoraga dogolir, “Yoma obogar nggarelogo wulak bini o. An Nombae Ai Palekma yoma, kinamende onggo kundigik wokbigik eku dogorak mondok maga o,” yiluk yirige. 17#Mzm. 69:10Eki nanggige, Ar mutok lagwi mende yemenogo, wene Alkitab paga diru mbalek, “An niliti kunik mondok eti, Kar Kao palek ma arar ma, niliti yi kali bani eme o, Allah Nombae waa,” yiluk yirige mende eti arar inakla eber tari wagage.
18Ma eki nanggige, ir ap Yahudi mende inewai nen, wenemuk yogu dogolir, “Kar erir tagan yoma, kar etnowerek nen ar erir tagan yiluk keyawok nen, erukbuk mende elalin ambi erin nda,” yiluk yorugwa.
19 #
Mat. 26:61, 27:40; Mrk. 14:58, 15:29 Ar Yesus nen onggo yoraga dogolir, “O palek yi danggulogo wura warnek nda, nen An ninggi tiga hari paga arar, iyok paga paligin o.”
20Yiluk yirigemo, ir nen onggo yogu dogolir, “We abeyak, o Tuhan Ai palek yi, palkwi kigik ininggi enam puluh tahun ekugwa o. Nen Kar nen palka keyagik, kinggi we tiga hari arar eru yegen a?”
21Ogwe Tuhan Ai yiluk yirige eti, ar Yesus ebe ake paga arar yirige o. 22Tuguluk welagugwarik nen, Ar Yesus kambiluk nen iluk agage eti paga, Ar mutok lagwi mende yemenogo, wene yi yirige mende enogo arar etari waga o yiluk, inakla ebetari wagage. Eti paga nen, Ir nen Alkitab akla diru mbalek paga inom, nen Ar Yesus yirige paga inom, ebebar yiluk inakla andarugwa.
Ar Yesus nen ir akuni obogar iluk yirige wene
23Ar Yesus o Paska ake dago dakwi paga, o Yerusalem yatnogo werek kigik, ye wene nde wene elalin erukbuk mende pakalok ar ekige eti paga, akuni pakalok iniliti Yesus ebebar andarugwa o. 24Ogwe, Ar Yesus nen, ir yi ebebar andaga yiluk akla andalok dek. Nenaluk ir akuni nen inakla andagwi mende eti, Ar obok ilu paga ma o. 25Ye akuni nde akuni etoma tani yiluk, ir nen wene emerirurak eti mondok ndak dek o, nenaluk Ar adigar nen eti, akuni inakla eberkwi mende eti, Ar obok ilu mondok arar o.
Zvasarudzwa nguva ino
YOHANES 2: WLW
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda