LUKAS 20
20
Ar Yesus ta obatne paga erir taga yiluk kinok wokarugwa wene
(Mat. 21:23-27; Mrk. 11:27-33)
1O ambi paga, Ar Yesus Allah Ai Palekma dogolir, akuni wene emerinaka, wene Pano Wene inilu togo yoraga eka lagage. Yoraga werekma, Ir ap imam-imam kepala inom, Guru-guru agama inom, Yahudi inewai mende inom, Yesus oba wagugwa. 2Wagugwarik Ar Yesus yogu dogolir, “Yogo, Kar erir tagan yoma, ta nen erin yokegemo erir tagan?” yiluk yorugwa.
3Ar Yesus nen wene onggo yoraga dogolir, “Kalok, An wene kinok ambi yokerak o. Ma, kir nen An wene onggo yornirni nda, 4ar Yohanes Pembaptis nen akuni ima wukbaga lagage eti, ta nen erin yorige paga? Ar Allah nen yorige paga a, akuni nen yorugwa paga a?”
5Yoragemo ir nen wene mbalku dogolir, “Ar Allah nen yumo, Ar nen, kir nenaluk Allah ane waganggikdek, yiluk yorniragin o. 6Ogwe, nir nen ‘Akuni inobatne paga o,’ yiluk yumo, ir akuni yoma obogar nen, nir nggir paga ninarugun o. Nenaluk, Ir akuni nen ar Yohanes eti ap nabi o, yiluk andagwi eti paga o.” 7Eti paga ir nen onggo yogu dogolir, “Nir ninonggokdek o,” yiluk yorugwa.
8Nen, ar Yesus nen ir yoraga dogolir, “Eta kalok, An nen, An ta endaga paga erir taga eti kir yokeragin dek ar o.”
Ir akuni anggur yabula yabu ekwi mende inoba lirogo yirige wene
(Mat. 21:33-46; Mrk. 12:1-12)
9 #
Yes. 5:1
Ar Yesus nen, ir akuni etoma wene ambi, oba lirogo yoraga dogolir, “Ar ap ambi anggur yago onde nen, akuni inuma lak nen yiluk andega lagagerek, ap inebe amberak anggur yago inoba sewa#20:9: Sewa: Eti anggur ai yago etoma, ar iyok paga watuk koda warik nen yiluk, akuni inoba elalma onggo wokbiluk lagage. erogo biluk lagagerek, inggi idu paga negen ar welagage.
10 Anggur enggen yugu mbalurak arar agagemo, ap yabu onde nen, ayedoman ir yabu ekwi mende inoba, ar mende wogoruwak nen yiluk lakbirige. Ogwe, ir yabu tuam welagwi mende nen, ap yabu onde ayedoman enogo ndugi warogo, kuma lan o, yiluk mugogo lakbirugwa. Ar ap ayedoman ernogo, inggimo ambi wolokdek ar wagage. 11Nen ar ap yabu ondewerek enogo nen, ar ayedoman mende ambi inoba lakbirige ar. Ar ayedoman mende ambi lakbirige mende, ar enogo ndugi wakwi, eku lagugwarik kuma lan, yiluk yotuk, uma lakbirugwa. 12Nen ar ap yabu ondewerek nen, yedoman mende ambi a mbere ambi paga ar lakbirige. Nen ir ap yabu aruwam welagwi mende nen, yedoman mende enogo ndugi wakbiluk, yabumo nen mbo leger abel tekman nggwe mbo wuldirugwama, uma lagage. 13Ap yabu ondewerek akla ebeka lagagerek, ‘Kalok an nena kwak erik? An nakbur niliti kunik mende yi ar lakbumo, ir nen keyagi warogo waganugun o,’ yiluk akla ebekige. 14Ir yabu aruwam mende nen, ap yabu onde akbur arar waga inil kugu lagugwarik, ‘Yogo yi eyakte kodau werek ebe yi arar waga, yogo ar yi ar waruwok. Wakbiluk, eyakte mende etoma nir arar kodawok nen o,’ yiluk yirugwa. 15Nen etegerogon yugu lagugwarik, ir nen akbur enogo ebe min warogo, likalok mbo wulakugwa o.”
Yoraga lagagerek, Ar Yesus nen kinok wokdaga dogolir, “Ap yabu ondewerek mende arar watuk, ir ap yabu aruwam welagwi mende eti, nenggerogon erinabigin kogop? 16Ar erigin mende ebebar kwak eti, ar ebe waga dogoluk, ir yabu ekwi mende warinaka, nen yabu erek etoma wagangga dogoluk, ap adik inoba arar bega, erigin o,” yiluk yorarige.
Nen ir akuni wene yirige mende, ir inaruk kolalku lagugwarik, ir nen Ar Yesus yogu dogolir, “Etegerogon etaru mondok-mondok ndak dek arar o,” yiluk yorugwa.
17 #
Mzm. 118:22
Onggo yorugwama, Ar Yesus nen il bikdaga lagagerek yoraga dogolir, “Etegedek kalok, wene ayat Alkitab paga yege yi ebe enggen kwak nggi?
‘Ap tukang nen o palka dogolir, nggir ambi dambe karige mende eti, nggir odo unggune mende arar etagama o.’
18Ir akuni obogar nggir eti paga watamo, obogar kambugun o. Nen ambi ta nen nggir eti paga, al debeligin kalok, ebe mokmok arar etarigin o.”
Pajak ake onggo bugwi wene
(Mat. 22:15-22; Mrk. 12:13-17)
19Guru-guru agama inom, imam-imam kepala inom, Ar Yesus wene oba like eti, nir yonerage yiluk inilu agugwa. Eta paga ma, Ir nen andugu dogolir, yogo Ar Yesus ebe pagago kede waruwok yiluk wadok andarugwa mende, akuni dogalek inoba inobade nen dambe karugwa. 20Nen ir enogo o telek aga, inil waganggu dogolir, ir nen ap amberak uang wadok mende onggo wogoralok, Ar Yesus ane nggodo negen amberak yuak nen, yiluk kinok-kinok ap pano mende talogo yogwi, etno o, yiluk barugwa. Nen eta yeganem, Ar ebe pagago wolok, ap inarige werek o, nen gubernur o, inoba buok nen o, yiluk yirugwa. 21Ir akuni uang onggo wogorarugwa mende nen Ar Yesus yogu dogolir, “Guru Ninombae o, Kar yitagan inom, nen emeriratagan inom, etoma obogar ebebar mende mban arar o. Nir bikugunem, Kar nen wene emerniratagan eti, Allah iliti akuni inake andega mende, wene yangguk togon telekma yega dogolir, ap inelokte mbenarinabi tagodek arar o. 22Eta ar ma, wene agama nir mende paga nen, pajak Kaisar ake onggo burak ndak a, dek a? Ninombae Kar nen wene onggo yoneran nda?” yiluk kinok yorugwa.
23Ogwe, Ar Yesus nen wene inenggal yugwi eti obok ilu ma, nen wene onggo yoraga dogolir, 24“Yogo uang pawe mende paga endaga erek eti An inugur nani nda! Yogo, yi ta kwak endaga inom, nen agurengge inom, erek?”
Ir nen onggo yogu dogolir, eti “Kaisar arar o!” yiluk yorugwa.
25Nen ar Yesus nen onggo yoraga dogolir, “Etegedek kalok, Kaisar amende kalok, ar Kaisar ar wogotno o, Nen Ar Allah amende kalok, Ar Allah ar wogotno o,” yiluk yorarige.
26Akuni ambik dogalek yemenogo nen, Ar Yesus ane yeganem maduk ambi karugwa mondok dek arar o. Ir inane ambi yigikdek, wene yi yege a, yiluk, bik ambik wakugwa o.
Kambiluk nen iniluk arugun wene
(Mat. 22:23-33; Mrk. 12:18-27)
27 #
Kis. 23:8
Ir ap Saduki mende inebe mbere ambi negen, Ar Yesus oba wagugwa. (Ir nen akuni kambiluk nen, iniluk arugun dek arar o, yiluk andugu lagugwa). Ma wene kinok Ar Yesus yogu dogolir, 28#Ul. 25:5“Guru wae, Musa nen wene nir ninake, diru mbalogo birige, yegerogo: Ap ambi akbur endakikdek kigik kangga kalok, awor nen kwe toge eti kodawak o, nen eti erigin paga, ar ewe kambigin ernogo, akburi wigalarir lowak nen o. 29Etiar ma, Ap ambi akburi inebe endago tujuh paga ma, ar manggwiya kwak kwe waganggige mende, akburi endaginakikdek ar kigik ebe kanggige o. 30Nen elege kedua mende kwe togwe enogo waganggigerek ar ogwe, akbur dek ar kanggige o. 31Wene alep ekugwa eti ndak-ndak ar, ar elege ketiga nen ketujuh kudi inakburi endaginakikdek ar kigik mban kanggugwama o. 32Nen, kwe enogo inom ar kanggigemo o. 33Eti ar ma, o akuni warek mende iniluk erogo mendagin eti paga, kwe eti akuni inebe tujuh paga nen waganggugwarik mo, ta kwak nen agwe kundurogo etarigin kegen?” yiluk yorugwa.
34Ar Yesus nen onggo yoraga dogolir, “Akuni yogondak ya dogolir, kumi wogonakwi, 35ogwe ir akuni iniluk erogo bau ndak mende eti iniluk ekbalok, nen akuni iniluk eta dogogun mende, kumi wogonaku dogogun mendok dek arar o. 36Ir inebe malaikat mende ndak-ndak dogogun o. Nen inebe kambugun mondok dek o. Ir inebe Allah akburi mende arar etarugun o. Nenaluk, Ir inebe kanggugwa mende iniluk erogo bagin eti paga o. 37#Kel. 3:6Musa nen telekma ar yega dogolir, akuni warek mende iniluk erogo mendagin o, yiluk yirige. Ma ar agolan paga diru mbalek eti, irikngga akla indu akda dagaganem etoma nen, Tuhan endaga yega dogolir: Allah Abraham, nen Allah Isak, nen Allah Yakub, yiluk etegeron yirige o. 38Ma, Ar Allah eti, akuni kanggugwa mende inombae dek o. Ir akuni iniluk mende inombae arar o. Nenaluk, Ar Allah paga eti, akuni obok iniluk arar o.”
39Ap inebe guru agama mende amberak nen, “Guru wae, wene onggo yegen pano mondok arar o,” yiluk yorugwa. 40Tuguluk ir ernogo, wene amberak Ar Yesus kinok wokau, inobade mondok arar etagage.
Akuni ndilinakwa Endaga Mbogor wene
(Mat. 22:41-46; Mrk. 12:35-37)
41Ar Yesus nen ir kinok wokdaga dogolir, “Ar Raja Ndilninakwa eti Daud umbu wigalek mende yiluk yitagwi eti, nenggedek kogop? 42#Mzm. 110:1Ar Daud nen ambuku Mazmur paga etoma nen yirige eti,
‘Ar Tuhan nen an mende Tuhan eti yoga dogolir:
Ninggi ebemanggwe ya korektarin o,#20:42: Ninggi ebema nggwe korektarin o: Ir akuni Yahudi mende nen eku dogolir, akuni inalon palek mende inalon palku dogolir kalok eti, ininggi ebema nggwe korek bagu lagugwa.
43Akuni kar kinom wim mbalek mende etoma,
Kar kapma tebe yugun o.’
44Daud nen Raja Ndilinakwa endaga mbogor eti, ‘Tuhan’ arar yorige kalok, Raja eti ar Daud umbu wigalek mende yurak, ndak kogop a?”
Ir guru-guru agama nen nugur kinakunem yoragage wene
(Mat. 23:1-36; Mrk. 12:38-40)
45Ir akuni Ar Yesus nen wene yega inaruk kolalkwi dagik, Ar nen Ar mutok lagwi mende yoraga dogolir, 46#Luk. 11:43“Guru-guru agama eti inaruwam panorogo waku dogono o. Ir nen tu jubah idundak mende yikbiluk, pasar paga etoma, wogokdinanuwak nen yiluk lagwi, Akuni tamban erir tagama o palekma nggwe, dago nggok dakunem nggwe, pogorogo bamo nggwe kau mban lagwi ekwi o. 47Ir nen, kumi togwe nuk puk erinaku dogolir, inai palek tebelkwi, nen ir inerakde mbalogo tamban eku dogolir, tamban idu wadu ekwi o! Eti paga, ir eti anggin nggok mende inoba bigin o,” yiluk yoragage.
Zvasarudzwa nguva ino
LUKAS 20: WLW
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda