അപ്പൊസലല 10
10
പത്ത്‌റോസ്‌മ് കൊറ്‌ണലോസ്‌മ്
1കയ്യിസര്യ എങ്ക പട്ടണാത്തിലി കൊറ്‌ണലോസ് എങ്ക ഒരുത്താ് ഇര്‌ന്തിര്‌ന്താ്. അയാള് റോമ പഡെഗളിലി <<ഇത്താലിഗ>> എങ്ക പഡെ കൂട്ടാത്തില്യ പഡെതലെവലാദി ഒരുത്താ് ആയിര്‌ന്താ്. 2അയാള് ഒരു ണല്ല ബക്‌ദിക്കാറാ് ആയിര്‌ന്താ്. ഇസ്‌റേല്‌ക്കാറാര് കുമ്മുഡ്‌റ സാമിന അയാള്‌മ് അയാള്‌ദ് കൂരെക്കാറാര്‌മ് കുമ്മുഡി ഇര്‌ന്താര്. അയാള് ഏ്ളെഗ ആന എഗുദാര്‌ക്ക് എത്തിന്യൊ ദാനദറ്‌മ്മഗ സെയ്‌ദ് ഇര്‌ന്താ്. എപ്പ്‌മ് അയാള് സാമിന പരേസിമ് ഇര്‌ന്താ്. 3ഒരു ണേര ഉച്ചി തിരിന്ത് മൂണ് മണിക്ക് അയാള്‌ക്ക് ഒരു തോറ്റ കാട്ടിത്ത്. അയ്യി തോറ്റാത്തിലി അയാള് പട്ട്‌ക്ക് ഒരു സാമിദൂദാ് ബരാദ്‌ണ സൊക്കാന അയാള് കണ്ടാ്. സാമിദൂദാ് <<കൊറ്‌ണലോസെ>> എന്ത് ഒളേത്താ്.
4അയാള് കോവേക്ക് കണ്ണ് ബൊഡൊബൊഡൊത്ത്‌കൊണ്ട് സാമിദൂദാന ഇച്ചെ സൊന്നാ്: <<എന്ത പണ്ണാഡ്യെ?>>
സാമിദൂദാ് സൊന്നാ്: <<സാമി ണിന്ന് പരേസണ കേ്ട്ട് ഇര്‌ക്കാ്. ണീ സെയ്‌ദ ദാനദറ്‌മ്മഗണാമ് കണ്ടിര്‌ക്കാ്. അദ്‌ണാലെ സാമി ണിനാക്ക് ണല്ലാദ് സെയ്യ പോരാ്. 5ണീ ഓപ്പേക്ക് ലേസ ആള്‌ണ ബ്‌ട്ട് പത്ത്‌റോസ് എന്ത് സൊല്ലുറ സീമോന്‌ണ ബര്‌സ്. 6അയാള് തോലിലി ഒരൊരു ജാദിഗ ഉണ്ടാക്ക്‌റ ബേലെ സെയ്‌ര സീമോന്‌ദ് കൂരേലി ഇര്‌ക്കാ്. അയ്യി സീമോന്‌ദ് കൂരെ കഡാലോരാത്തിത്തെ ഇര്‌ക്കാദ്.>>
7ഇച്ചെല്ല സൊന്ന പ്‌റ സാമിദൂദാ് പോനാ്. അദ് കളിന്ത് കൊറ്‌ണലോസ് റണ്ട് ബേലെക്കാറാര്‌ണാമ് ഒരു പഡെയാളിനാമ് ഒളേത്താ്. അയ്യി പഡെയാളി ഒരു ബക്‌ദിക്കാറാന്‌മ്, കൊറ്‌ണലോസ്‌ക്ക് എല്ല കാര്യഗാമ് ണലമായി സെയ്‌ദ് കൊഡുക്കവാന്‌മ് ആയിര്‌ന്താ്. 8അവാര്‌ക്ക് ണഡാന്ത കാര്യഗണെല്ല സൊല്ലി കൊറ്‌ണലോസ് അവാര്‌ണ ഓപ്പേക്ക് അന്‌പ്പിനാ്.
9അവാര് മറ് ണാള് ആഗാട്ടി ഓപ്പേക്ക് അര്‌ഗെ എജ്ജിനാര്. അക്കുളെ പത്ത്‌റോസ് മൊട്ടെമാഡിക്ക് പരേസ്യ പോയിര്‌ന്താ്. അക്കുളെ ണേര ഉച്ചി ആയിര്‌ന്ത്‌ദ്. 10പത്ത്‌റോസ്‌ക്ക് ണല്ല പജി പ്‌ഡിത്ത് ഇര്‌ന്ത്‌ദ്. എന്താറ്റ് തിന്ന്യ കിട്ടിനദാന എന്ത് അയാള് ആസെപട്ടാ്. അക്കുളെ കൂരെക്കാറാര് സാപാഡ് ഉണ്ടാക്കി കൊണ്ടിര്‌ന്താര്. അയ്യി ഗള്യേലിതാനെ പത്ത്‌റോസ്‌ക്ക് ഒരു തോറ്റ കാട്ടിത്ത്. 11ബാന്‌ണ തുറാന്ത് ഒരു ബെല്ല്യ ദുപ്പുട്ടിന പാസെ എന്താഗൊ ഒരു ജാദിന അദ്‌ദ് ണാല് താനെന കെ്ട്ടി ബൂമിക്കെ ഇ്റാക്ക്‌റാദ്‌ണ അയാള് കണ്ടാ്. 12അദിലി ബൂമിലി ഇര്‌ക്ക എല്ല ബേ്ണ്ട്‌ഗാമ്, ഊരിന്ത് ണഡാക്ക ഉജുറുകെ്ളെഗാമ്, ബാനാത്തില്യ പക്കിഗാമ് ഇര്‌ന്ത്‌ദ്. 13<<പത്ത്‌റോസെ എ്ന്ത് ഇദിലി ഇര്‌ക്കാദ്‌ണ കൊന്റ് തിന്ന്>> എന്ത് സൊല്ലുറ ഒരു ജദ്ദണാമ് കേ്ട്ടാ്.
14ആന പത്ത്‌റോസ്: <<ആണ്ടവാനെ സത്ത്‌മ് ണാന് ഇദ്‌ണ തിന്നാഗെമാട്ടെ. തിന്ന്യ മോസ ആയിര്‌ക്കാദ്‌ണാമ്, തിന്ന ബേ്ഡ എന്ത് സട്ട ബെത്തിര്‌ക്കാദ്‌ണാമ് ഇന്നിമ് ണാന് തിന്നാഗെ ഇല്ലെ>> എന്ത് സൊന്നാ്.
15അയ്യി ജദ്ദ പിന്നേമ് കേ്ട്ട്‌ദ് <<സാമി ണല്ലാദ് ആക്കിനാദ്‌ണ ണീ ആഗ എന്ത് ണെനേക്ക ബേ്ഡ.>>
16ഇച്ചെ മൂണ് ജമ്പ്‌മ് ജദ്ദ ബന്ത്‌ദ്. അദ്‌ക്ക് പ്‌റ അയ്യി ജാദിന ബാന്‌ക്ക് താനെ ബലിത്ത് എ്ഡ്‌ത്ത്‌ദ്.
17ഇച്ചെ കാട്ടിനാദ്‌ദ് പൊറുള് എന്താഗൊ എന്ത് പത്ത്‌റോസ് അദിസ്യപട്ടെക്കിനാ്. അക്കുളെ കൊറ്‌ണലോസ് സൊല്ലിബ്‌ട്ട ആള്‌ഗ സീമോന്‌ദ് കൂരെ ഏദിലെന്ത് കണ്ട്‌പ്‌ഡിത്ത് അയ്യി കൂരെ ബാസ മുന്തുക്ക് എജ്ജിനാര്. 18<<പത്ത്‌റോസ് എങ്ക സീമോന് ഇദിലിത്തേഗ ഇര്‌ക്കാദ്?>> എന്ത് അവാര് ബെല്ല്യാദ്‌ക്ക് ഒളേത്ത് കേ്ട്ടാര്.
19അയ്യി ഗള്യേലി പത്ത്‌റോസ് തനാക്ക് കാട്ടിന തോറ്റാദ് പൊറുള് എന്തായെന്റ് ണെനേത്ത്‌കൊണ്ടെ ഇര്‌ന്താ്. അക്കുളെ സാമിണിഗാല് ഇച്ചെ സൊല്ലിറ്റ്: <<അദാഗെ മൂണ് ആള് ണിനാണ പരാന്ത് ഇദ്‌ക്കെ ബന്തിര്‌ക്കാര്. 20ണീ അഡി ഇ്റാങ്കി പോ. അവാര്‌ണ ണാന്‌ത്തെ അന്‌പ്പി ഇര്‌ക്കാദ്. അദ്‌ണാലെ ണീ അവാര്‌ദൊപ്പ പോരാക്ക് ഒരു സന്തേഗാമ് പഡ ബേ്ഡ.>>
21പത്ത്‌റോസ് ഇ്റാങ്കി അവാര് പട്ട്‌ക്ക് പോയി: <<ണിമ്മ പരാക്ക ആള് ണാന്‌ത്തെ, ണിമ്മ എന്ത്‌ക്ക് ബന്തേര്?>> എന്ത് അവാര്‌ണ കേ്ട്ടാ്.
22അക്കുളെ അവാര് സൊന്നാര്: <<കൊറ്‌ണലോസ് എങ്ക പഡെതലെവാ്ത്തെ എമാണ ഈങ്ക് സൊല്ലിബ്‌ട്ടാദ്. അയാള് ണല്ലവാന്‌മ്, സാമിന കുമ്മുഡ്‌റവാന്‌മ്‌ത്തെ. എല്ല എഗുദാര്‌മ് അയാള്‌ക്ക് മദ്‌പ്പ് കാട്ടിര്‌ന്താര്. ണിനാക്ക് സൊല്ല്യ ഇര്‌ക്കാദ്‌ണ തനാക്ക് കേ്ക്ക്യ ണിനാണ തന്ന് കൂരേക്ക് ഒളേത്ത് ബര്‌സുഡൊ എന്ത് ഒരു സാമിദൂദാ് കൊറ്‌ണലോസ്‌ക്ക് സൊന്നാനമ്പ.>> 23പത്ത്‌റോസ് അവാര്‌ണ കൂരേക്ക് കൂട്ടി പോയി അയ്യി ജാമാത്തിലി അദിലി തങ്ക്യ സൊന്നാ്.
മറ് ണാള് ബെ്ഡ്യാലെ പത്ത്‌റോസ് അയ്യി മൂണാള്‌ദ് ഒപ്പ പോനാ്, ഓപ്പേലി ഇര്‌ന്ത് ലേസ ഏസുക്കാറാര് പത്ത്‌റോസോഡ പോനാര്. 24മറ് ണാള് ആഗാട്ട്യെല്ല അവാര് കയ്യിസര്യാക്ക് എജ്ജിനാര്. അദിലി കൊറ്‌ണലോസ് ഒളേത്ത് ബര്‌സിന തന്ന് എ്ണേവുക്കാറാര്‌മ്, കുഡുമകൂട്ടാര്‌മ് ഇര്‌ന്തിര്‌ന്താര്. ഇവാര് കൊറ്‌ണലോസ്‌ദ് ഒപ്പ പത്ത്‌റോസ്‌ണ കാത്തിര്‌ന്താര്. 25പത്ത്‌റോസ് ബാസ പട്ട്‌ക്ക് ബര്‌ഗാട്ട്യെല്ല കൊറ്‌ണലോസ് പോയി അയാള്‌ദ് കാല്‌ക്ക് സഡാങ്ക ബ്‌ന്ത് കുമ്മുഡിനാ്. 26ആന പത്ത്‌റോസ്: <<എ്ന്ത്, ണാന്‌മ് ഒരു മന്‌സാത്തെ>> എന്ത് സൊന്നാദ്‌മ് അയാള് എ്ന്ത് ണിന്റാ്.
27പത്ത്‌റോസ് കൊറ്‌ണലോസോഡ ണായ പേസികൊണ്ട് കൂരെക്കുള്ളെ പുക്കിനാ്. അക്കുളെ അദിലി മൊത്തന ആള്‌ഗ തുമ്പി ഇര്‌ക്കാദ്‌ണ പത്ത്‌റോസ് കണ്ടാ്. 28പത്ത്‌റോസ് അവാര്‌ക്ക് ഇച്ചെ സൊന്നാ്: <<എഗുദാര് അല്ലാത്ത ജാദിഗ പട്ട്‌ക്ക് പോരാദൊ, അവാരോഡെ എജേരാദൊ, എഗുദാര് സട്ട്‌മെ്ട്ടിലി ഇല്ലെ എന്ത് ണിമാക്ക് എല്ലാര്‌ക്ക്‌മ് ണലമായി തെര്യുമല്ല. ആന എഗുദാര്‌ദ് സട്ട ബെത്ത് ആര്‌ണാമ് കെ്ട്ടവാ് എന്തൊ ആഗാത്തവാര് എന്തൊ ണെനേക്കാക്കില്ലെ എന്ത് സാമി എനാക്ക് കാട്ടി തന്താ്. 29അദ്‌ണാലെത്തെ ണിമ്മ എനാണ ഒളേക്ക്യ ആള് ബ്‌ഡാട്ടി ഒല്ലെ എന്ത് സൊല്ലാദെ ണാന് ബന്താദ്. എന്ത്‌ക്ക് ണിമ്മ എനാണ ഒളേത്താദ് എന്ത് സൊല്ലിരി?>>
30അക്കുളെ കൊറ്‌ണലോസ് ഇച്ചെ സൊന്നാ്: <<ഒരു മൂണ് ണാള്‌ക്ക് മുദ ഇദേ ഗള്യേലി ഉച്ചി തിരിന്ത് മൂണ് മണിക്ക് ണാന് കൂരെക്കുള്ളുക്ക് പരേസി കൊണ്ട് ഇര്‌ന്തെ. സട്ടന ദഗദഗാത്ത് മിന്ന്‌റ ഉഡുപ്പ് ഇക്കിര്‌ക്ക ഒരുത്താ് എന്ന് മുന്തുക്ക് ബന്ത് ണിന്റാ്. 31അയാള് ഇച്ചെ സൊന്നാ്: <കൊറ്‌ണലോസെ, സാമി ണിന്ന് പരേസണ കേ്ട്ട് ഇര്‌ക്കാ്. ണീ സെയ്‌ദദാന ദറ്‌മ്മഗണെല്ല കണ്ട സാമി ണിനാക്ക് ണല്ലാദ് സെയ്യ പോരാ്. 32ണീ ഓപ്പേക്ക് ആള് ബ്‌ട്ട് പത്ത്‌റോസ് എന്ത് സൊല്ലുറ സീമോന്‌ണ ബര്‌സുഡൊ. അയാള് തോലിലി ഒരൊരു ജാദിഗ ഉണ്ടാക്ക്‌റ ബേലെ സെയ്‌ര സീമോന്‌ദ് കൂരേലി ഇര്‌ക്കാ്. അയ്യി സീമോന്‌ദ് കൂരെ കഡാലോരാത്തിത്തെ ഇര്‌ക്കാദ്.> 33അപ്പ്‌താനെ ണാന് ണിന്ന് പട്ട്‌ക്ക് ആള് ബ്‌ട്ടെ. ണീ ണല്ല മനേസ്സ് കാട്ടി ഒന്റുമ് സൊല്ലാദെ ബരാമ് സെയ്‌ദെ. ഇപ്പ് എമ്മ എല്ലാര്‌മ് ഇദിലി സാമി പട്ട്‌ക്ക് ബന്ത് ഇര്‌ക്കേര്. ആണ്ടവാന്‌ക്ക് എമ്മോഡെ സൊല്ല്യ ഇര്‌ക്ക കാര്യഗണെല്ല ണീ എമാക്ക് സൊല്ലു, അദ്‌ക്ക്‌ത്തെ എമ്മ ഒട്ടുക്ക് ഇദ്‌ക്കെ ബന്ത് ഇര്‌ക്കാദ്.>>
പത്ത്‌റോസ് സൊല്ലുറാ്
34അക്കുളെ പത്ത്‌റോസ് ഇച്ചെ സൊല്ല്യ പ്‌ഡിത്താ്: <<സാമി ആള്‌ഗണ ഒട്ടുക്ക് ഒരേ പാസെത്തെ കാണ്‌റാദ് എന്ത് എനാക്ക് ഇപ്പ് ബോദ്യ ബന്ത്‌ദ്. 35സാമിന അഞ്ചി ണേരെമൊറെ പെ്ളേക്കവാര്‌ണാമ്, സാമി ണല്ലാദ് എന്ത് സൊല്ലുറ കാര്യ സെയ്‌രവാര്‌ണാമ്, അവാര് ഏദ് ജാദിക്കാറാര് ആനാല്‌മ് സെരി, സാമി അവാര്‌ണ തങ്കാരിക്കുവാ്. 36എല്ല ആള്‌ഗാദ്‌മ് ആണ്ടവനാന ഏസു ക്‌റ്‌സ്‌ത്ത്‌ത്തെ മന്‌സാര്‌ണാമ് സാമിനാമ് റാജി കൂട്ടിനാദ്. മന്‌സാര്‌ണാമ് സാമിനാമ് ഏസു റാജി കൂട്ടിനാ് എന്ത സേദിന ഇസ്‌റേല്‌ക്കാറാര്‌ക്ക് സാമി സൊല്ലിര്‌ക്കാ് എന്ത് ണിമാക്ക് തെര്യു അല്ല. 37എഗുദ ണാഡിലി മുച്ചുഡ എന്ത ണഡാന്താദ് എന്ത് ണിമ്മ കേ്ട്ട് ഇര്‌ക്കേരല്ല? തണ്ണിക്ക് മുളുഗ്‌സ്‌റാദ്‌ണ പറ്റി ഓഗന്നാ് സൊന്ന പ്‌റ മുദ ഇദ് ണഡാന്താദ് ഗെലീലേലിത്തെ. 38ണസറത്ത് ഊര്‌ക്കാറാ് ഏസുണ പറ്റി ണിമാക്ക് തെര്യു. സാമി താന് ണെനേത്തിര്‌ന്ത കാര്യണ സെയ്‌ദ് മുഡിക്ക്യ ഏസുണ തെരിന്തെ്ഡ്‌ത്താ്. അദ്‌ക്ക് ബേ്ണ്ടി ഏസുക്ക് സാമി തന്ന് ണിഗാല്‌ണാമ് ണല്ല സക്‌ദിനാമ് കൊഡുത്താ്. സാമി അയാള്‌ദ് ഒപ്പ ഇര്‌ന്താദ്‌ണാലെ എല്ലാര്‌ക്ക്‌മ് ണല്ലാദ് സെയ്‌ദ് കൊണ്ട്‌മ് കെ്ട്ടജാദി തട്ടിര്‌ന്തവാര്‌ണെല്ല തെ്ള്‌സികൊണ്ട്‌മ് അയാള് എല്ല എ്ഡേഗാക്കേമ് പോനാ്.
39എര്‌സലേമിലിമ് പിന്നെ എഗുദ ണാഡിലിമ് ഏസു സെയ്‌ദ എല്ല കാര്യഗണാമ് കണ്ട എമാക്ക് അദ് സൊല്ല്യാമ് മുഡ്യു. പ്‌റ അയാള്‌ണ അവാര് കുരുസ്‌ക്കെ സേത്തി ആണി അഡിത്ത് കൊല്ലാമ് സെയ്‌ദാര്. 40ആന സാമി അയാള്‌ണ സത്തവാര്‌ദ് പട്ടിലി ഇര്‌ന്ത് മൂണ് ണാള് എങ്കാട്ടി ഉജുറു ഏ്ത്തിനാ്. 41ഉജുറെ്ന്ത പ്‌റ ഏസുണ എല്ല ആള്‌ഗാക്ക്‌മ് സാമി കാട്ടാലെ. ആന അയ്യി ഏസുണ കാണ്യ ബേ്ണ്ടി സാമി തെരിന്ത് എ്ഡ്‌ത്ത് ഇര്‌ന്ത എമാക്ക്‌ത്തെ കാട്ടിനാദ്. ഏസു ഉജുറെ്ന്ത പ്‌റ എമ്മ അയാളോഡെ ഒപ്പ ഇര്‌ന്ത് തിന്ത്‌കുഡിത്ത് ബന്തേര്. 42ഉജുറോഡെ ഇര്‌ക്കവാര്‌മ് സത്തവാര്‌മ് സെയ്‌ദ എല്ല കാര്യഗാക്ക്‌മ് ബിദി സൊല്ല്യ സാമി ബെത്ത് ഇര്‌ക്ക ആള്‌ത്തെ ഇയാള്. ഈ കാര്യഗണാമ് തന്ന്‌ദ് ണല്ല സേദിനാമ് എല്ല ആള്‌ഗാക്ക്‌മ് സൊല്ല്യ ബേ്ണ്ടി എമാണ ഏസു ബെത്തിര്‌ക്കാ്. 43ഏസുണ ഏദ് മന്‌സാര് ണമ്പിനാല്‌മ് അവാര് സെയ്‌ദ പാവഗണ അയാള് പേരിലി സാമി പൊറുക്കുവാ് എന്ത് എല്ല സാമിദാസ്‌ഗാമ് സൊല്ലുറാര്.>>
സാമിണിഗാല് എഗുദാര് അല്ലാത്ത ജാദിഗാക്ക്‌മ് കെ്ഡേക്ക്‌ദ്
44പത്ത്‌റോസ് സൊല്ലികൊണ്ട് ഇര്‌ക്കാട്ടി ഇദ്‌ണ കേ്ട്ട് ഇര്‌ന്ത എല്ല ആള്‌ഗാക്ക്‌മ് സാമിണിഗാല് ഏ്റിറ്റ്. 45ഓപ്പേലിര്‌ന്ത് പത്ത്‌റോസ്‌ദ് ഒപ്പ ഏസുണ ണമ്പിന ലേസ എഗുദാര്‌മ് ബന്ത് ഇര്‌ന്താര്. സാമി തര ണിഗാല് എഗുദാര് അല്ലാത്ത ജാദിഗാക്ക്‌മ് ഏ്റിനാദ്‌ണ കണ്ട് അവാര് അന്തബ്‌ട്ടെക്കിനാര്. 46അവാര് ബേ്റെബേ്റെ ണായഗ പേസ്‌റാദ്‌ണാമ് സാമി സെയ്‌ദ ബെല്ല്യ ബെല്ല്യ കാര്യഗണ സൊല്ലുറാദ്‌ണാമ് അയ്യി എഗുദാര് കേ്ട്ടാര്.
പത്ത്‌റോസ് ഇച്ചെ കേ്ട്ടാ്: 47<<ണമാണ പാസെതാനെ സാമിണിഗാല് കെ്ഡേത്ത ഇവാര്‌ണ തണ്ണിക്ക് മുളുഗ്‌സ ബേ്ഡ എന്ത് ആര്‌ക്ക് സൊല്ല്യ മുഡ്യു?>> 48അച്ചെ ഇവാര്‌ണ ഏസു ക്‌റ്‌സ്‌ത്ത്‌ദ് പേരിലി തണ്ണിക്ക് മുളുഗ്യ അയാള് സൊന്നാ്. അദ്‌ക്ക് പ്‌റ അവാര് പത്ത്‌റോസ്‌ണ ലേസ ണാള് തമ്മോഡെ ഒപ്പ ഇര്‌ക്ക്യ സൊന്നാര്.
Zvasarudzwa nguva ino
അപ്പൊസലല 10: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature