അപ്പൊസലല 11
11
എര്‌സലേമിലി ഇര്‌ക്ക ഏസുക്കാറാര് കൂട്ടാക്ക് പത്ത്‌റോസ് സേദി സൊല്ലുറാ്
1എഗുദാര് അല്ലാത്ത ജാദിഗാമ് സാമി സൊല്ലുസുലാക്കണ കെ്ഡേസിനാര് എന്ത് അപ്പൊസലലാമ് എഗുദേലി ഇര്‌ക്ക ഏസുക്കാറാര്‌മ് കേ്ട്ടാര്. 2പത്ത്‌റോസ് എര്‌സലേമ്‌ക്ക് എജ്ജിന പ്‌റ സുന്നത്ത് സാത്ത്‌റ കളിത്ത എഗുദാര് ഇയാള്‌ണ ഇച്ചെ കുറ്റ സൊന്നാര്: 3<<സുന്നത്ത് സാത്ത്‌റ കളിക്കാത്ത ആള്‌ഗാക്ക് പോയി അവാര്‌ദൊപ്പ ണീ തിന്ത്‌കുഡിത്ത് ഇര്‌ന്ത് ബന്താദ് എന്ത്‌ക്ക്?>>
4അദിലി ണഡാന്ത കാര്യഗണെല്ല ഒന്റുണാമ് ബ്‌ഡാദെ പത്ത്‌റോസ് അവാര്‌ക്ക് ഇച്ചെ സൊക്കാന സൊല്ലികൊഡുത്താ്. 5<<ണാന് ഓപ്പെ പട്ടണാത്തിലി പരേസി കൊണ്ട് ഇര്‌ക്കാട്ടി എനാക്ക് ഒരു തോറ്റ കാട്ടിത്ത്. അയ്യി തോറ്റാത്തിലി എത്തറാഗൊ ബെല്ല്യ ദുപ്പുട്ടിന പാസെ എന്താഗൊ ഒരു ജാദിന ണാല് താനെന കെ്ട്ടി ബാനാത്തിലിര്‌ന്ത് എന്ന് പട്ട്‌ക്ക് ഇ്റാക്കി ബ്‌ഡ്‌റാദ്‌ണ ണാന് കണ്ടെ. ആന അദ് എന്ന് പട്ട്‌ക്ക് ബന്ത്‌ദ്. 6ണാന് അദ്‌ണ സൊക്കാന ണോഡുഗാട്ടി അദിലി ബൂമിലിര്‌ക്ക എല്ല സാക്ക്‌റ ബേ്ണ്ട്‌ഗണാമ്, സോലെ ബേ്ണ്ട്‌ഗണാമ്, ഊരിന്ത് ണഡാക്ക ഉജുറുകെ്ളെഗണാമ്, ബാനാത്തില്യ പക്കിഗണാമ് കണ്ടെ. 7<പത്ത്‌റോസെ എ്ന്ത് ഇദിലി ഇര്‌ക്കാദ്‌ണ കൊന്റ് തിന്ന്> എന്ത് സൊല്ലുറ ഒരു ജദ്ദണാമ് ണാന് കേ്ട്ടെ.
8<ആണ്ടവാനെ ണാന് ഇദ്‌ണ സത്ത്‌മ് തിന്നാഗെമാട്ടെ, അയ്യിത്ത്യായിര്‌ക്കാദ്‌ണാമ്, തിന്ന ബേ്ഡ എന്ത് സട്ട ബെത്തിര്‌ക്കാദ്‌ണാമ് ണാന് ഒരു ണാള്‌മ് എന്ന് ബായിക്കെ അണ്ട്‌സാഗെ ഇല്ലെ> എന്ത് ണാന് സൊന്നെ.
9<സാമി സുത്താപ്പാക്കിനാദ്‌ണ ണീ അയ്യിത്ത്യുള്ളാദ് എന്ത് ണെനേക്ക ബേ്ഡ> എന്ത് പിന്നേമ് അയ്യി ജദ്ദ ബാനാത്തിലി ഇര്‌ന്ത് കേ്ട്ടെ. 10ഇച്ചെ മൂണ് ജമ്പ്‌മ് ജദ്ദ ബന്ത്‌ദ്. പ്‌റ അദ്‌ണ ബാന്‌ക്ക് താനെ ബലിത്ത് എ്ഡ്‌ത്ത്‌ദ്.
11അപ്പ്‌താനെ കയിസര്യാലി ഇര്‌ന്ത് സൊല്ലിബ്‌ട്ട മൂണാള് എമ്മ ഇര്‌ന്ത കൂരെ മുന്തുക്ക് എജ്ജിനാര്: 12ഒന്റുക്ക്‌മ് സന്തേഗപഡാദെ അവാര്‌ദൊപ്പ പോയ സാമിണിഗാല് എനാണ സൊല്ലിറ്റ്. ഓപ്പേല്യ ഈ ആറ് ഏസുക്കാറാര്‌മ് എന്ന്‌ദൊപ്പ കയ്യിസര്യാക്ക് ബന്താര്. എമ്മ കൊറ്‌ണലോസ്‌ദ് കൂരേക്ക് പോനേര്. 13തന്ന് കൂരേക്ക് ഒരു സാമിദൂദാ് ബന്ത് ണിന്റ് ഇര്‌ക്കാദ്‌ണ താന് കണ്ടെ എന്ത് കൊറ്‌ണലോസ് എമാക്ക് സൊന്നാ്. അയ്യി ദൂദാ്: <ണീ ഓപ്പേക്ക് ആള് ബ്‌ട്ട് സീമോന് എന്ത് സൊല്ലുറ പത്ത്‌റോസ്‌ണ ബര്‌സുഡൊ, 14ണീമ് ണിന്ന് കുഡുമക്കാറാര്‌മ്, ദണ്ടണേലി ഇര്‌ന്ത് ദെങ്ക്‌റാദ്‌ക്കുള്ള ബയ്യി ദൂദാ് അയാള്‌ക്ക് സൊന്നാനെന്ത്> അയാള് എമാക്ക് സൊന്നാ്.
15ണാന് അച്ചെ പേസ്യ പ്‌ഡിത്താദ്‌മ് സാമിണിഗാല് ണമാക്ക് മുദ ഏ്റിന പാസെ ഇവാര്‌ക്ക്‌മ് ഏ്റിറ്റ്. 16<ഓഗന്നാ് ആള്‌ഗണ തണ്ണിക്കെ മുളുഗിസിനാ്. ആന ണിമാണ സാമിണിഗാലിലി മുളുഗ്‌സ്‌വാ്> എന്ത് ആണ്ടവാ് സൊന്നാദ്‌ണ ണാന് അക്കുളെ ണെനേത്തെ. 17അദ്‌ണാലെ ആണ്ടവനാന ഏസു ക്‌റ്‌സ്‌ത്ത്‌ണ ണമ്പിന ണമാക്ക് തന്ത അദേ ദറ്‌മ്മ സാമി അവാര്‌ക്ക്‌മ് കൊഡുത്താ്. അദ്‌ക്ക് സാമിന ബേ്ഡ എന്ത് സൊല്ല്യ ണാന് ആര്?>>
18അവാര് ഇദ് കേ്ട്ട പ്‌റ അയാള്‌ണ കുറ്റ സൊല്ലാലെ. സാമിന ഒഗെ ഇക്കികൊണ്ട് സൊന്നാര്: <<പാവഗണ തള്ളി ണലമായി പെ്ളേക്ക്യ സാമി എഗുദാരല്ലാത്ത ജാദിഗാക്ക്‌മ് ബാഗ്യ കൊഡുത്താനല്ല.>>
അന്തൊക്ക്യ എങ്ക ണാഡില്യ ഏസുക്കാറാര് കൂട്ട
19തേപാനോസ് സത്ത പ്‌റ ഉണ്ടാന കൊഡിമേലി ഏസുക്കാറാര് സിന്തസിദാറി പഗ്‌ദി ആള്‌ഗ പൊയിനിക്ക്യ, കുപുറോസ്, അന്തൊക്ക്യ എങ്ക ണാഡ്‌ക്കെ പോയി എജ്ജിനാര്. ഇവാര് എഗുദാര്‌ക്ക് താനെത്തെ ഏസുണ പറ്റി സൊല്ലിര്‌ന്താര്. 20ആന കുപുറോസിലിര്‌ന്ത്‌മ്, കുറേനേലിര്‌ന്ത്‌മ് അന്തൊക്ക്യാക്കെ ബന്ത ബേ്റെ പഗ്‌ദി ഏസുക്കാറാര് ഏസു ആണ്ടവാന്‌ദ് ണല്ല സേദിന ഗ്‌റീക്ക് ണായ പേസ്‌റ ആള്‌ഗാക്കെ സൊന്നാര്. 21ആണ്ടവാന്‌ദ് സക്‌ദി അവാരോഡെ ഇര്‌ന്താദ്‌ണാലെ എത്തിന്യൊ ആള്‌ഗ അദ്‌ണ ണമ്പി ആണ്ടവാന്‌ദ് സാരി എജേന്താര്.
22എര്‌സലേമിലി ഇര്‌ക്ക ഏസുക്കാറാര് കൂട്ട ഇവാര്‌ണ പറ്റി സേദി കേ്ട്ടാര്. അച്ചെ അവാര് ബറ്‌ണവാസ്‌ണ അന്തൊക്ക്യാക്കെ സൊല്ലിബ്‌ട്ടാര്. 23അയാള് ആങ്കെ എജ്ജി സാമി അവാര്‌ക്ക് കൊഡുത്തിര്‌ക്ക ബരണ കണ്ട് പിര്യപട്ടാ്. ണിമാക്ക് ഏസോഡെ ഇര്‌ക്ക ണമ്പിക്കെ ഒരു ണാള്‌മ് ഇല്ലാദെ ആരാക്കില്ലെ എന്ത്‌മ് മനേസ്സാറ ആണ്ടവാന്‌ക്ക് ബേ്ണ്ടി പെ്ളേക്കുഡൊ എന്ത്‌മ് അയാള് അവാര്‌ക്ക് സൊന്നാ്. 24അച്ചെ എത്തിന്യൊ ആള്‌ഗ ഏസു ആണ്ടവാന്‌ക്ക് എജേഗാമ് സെയ്‌ദാര്. ബറ്‌ണവാസ് ണല്ല മന്‌സാന്‌മ്, സാമിണിഗാല് ഇര്‌ക്കവാന്‌മ്, ണല്ല ണമ്പിക്കെ ഇര്‌ക്കവാന്‌മ് ആയിര്‌ന്താ്.
25അദ്‌ക്ക് പ്‌റ ബറ്‌ണവാസ് സവുലുണ പരാന്ത് തറ്‌സീസ്‌ക്ക് പോനാ്. 26അച്ചെ അയാള്‌ണ കണ്ട പ്‌റ ബറ്‌ണവാസ് അന്തൊക്ക്യാക്കെ കൂട്ടി പോനാ്. അവാര് റണ്ട് ആള്‌മ് ഒരു ബര്‌സ മാട്ട് അദിലി ഇര്‌ന്ത്‌കൊണ്ട് ഏസുക്കാറാര് കൂട്ടാക്ക്‌റാഗ പോയി എത്തിന്യൊ ആള്‌ഗണ പഡിസിനാര്. അന്തൊക്ക്യാലി ബെത്ത്‌ത്തെ ഏസുക്കാറാര്‌ക്ക് മുദമുദായി ക്‌റ്‌സ്‌ത്താനിഗ എന്ത് പേര് കെ്ഡേത്താദ്.
27അയ്യി ഗള്യേലി എര്‌സലേമിലിര്‌ന്ത് ലേസ സാമിദാസ്‌ഗ അന്തൊക്ക്യാക്കെ ബന്താര്. 28അവാര്‌ദിലി അഗബോസ് എങ്ക ഒരുത്താ് ഉലഗ മുച്ചുഡ പഞ്ചകാല ബര്യ പോദ് എന്ത് സാമിണിഗാല്‌ദ് സക്‌ദ്യാലെ സൊന്നാ്. (ഇച്ചെ സൊന്നാദ് കവുദോസ് എങ്ക റാജാവുദ് കാലാത്തിലി ണഡാന്ത്‌ദ്). 29എഗുദേലി ഇര്‌ക്ക ഏസുക്കാറാര്‌ക്ക് ഉദാവി സെയ്യ അന്തൊക്ക്യാലിര്‌ക്ക ഏസുദ് സൊല്ലുപഡി ണഡാക്കവാര് തമാക്ക് മുഡിരാദ്‌ണ പാസെ പണ കൊഡുത്ത് ബ്‌ഡുഡൊ എന്ത് മുഡിവു എ്ഡ്‌ത്താര്. 30അച്ചെ കെ്ഡേത്ത പണണ അവാര് ബറ്‌ണവാസ്‌ദ്‌മ് സവുല്‌ദ്‌മ് കയിക്ക് എഗുദേലി ഇര്‌ക്ക മൂപ്പലാക്കെ കൊഡുക്ക്യ കൊഡുത്ത് ബ്‌ട്ടാര്.
Zvasarudzwa nguva ino
അപ്പൊസലല 11: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature