അപ്പൊസലല 4
4
പത്ത്‌റോസ്‌മ് ഓഗന്നാന്‌മ് എഗുദാര് ഗോഡ്‌ദിലി
1പത്ത്‌റോസ്‌മ് ഓഗന്നാന്‌മ് ആള്‌ഗോഡെ പേസികൊണ്ടിര്‌ക്കാട്ടി എഗുദ പൂസാരിഗാമ് സാമികൂരേല്യ കാവക്കാറാര്‌ദ് തലെവാന്‌മ് സദൂക്യലാമ് അദ്‌ക്കെ ബന്താര്. 2അപ്പൊസലല ആള്‌ഗാക്കെ ഏസു സത്തിര്‌ന്ത് ഉജുറെ്ന്താ് എന്ത്‌മ്, അദേപാസെ മന്‌സാര് സത്താല്‌മ് ഉജുറെ്ന്തുവാര് എന്ത്‌മ് പഡ്‌സ്‌റാദ്‌ണ അവാര് കണ്ടാര്. അദ്‌ണാലെ അവാര്‌ക്ക് അയ്യി അപ്പൊസലലോഡെ മൊനെ ബന്ത്‌ദ്. 3അദ്‌ക്ക് അവാര് പത്ത്‌റോസ്‌ണാമ് ഓഗന്നാനാമ് പ്‌ഡിത്ത് കെ്ട്ടിനാര്. ജാമ ആനാദ്‌ണാലെ ബെ്ഡ്യമാട്ട് അവാര്‌ണ ജെയില്‌ക്കെ അഡേത്ത് ബെത്താര്. 4ആന അപ്പൊസലല സൊന്ന ണായഗണ കേ്ട്ട് എത്തിന്യൊ ആള്‌ഗ ണമ്പിനാര്. അദിലി ണമ്പിന ആണ്‌മക്കഗതാനെ അഞ്ചായിരാക്ക് പക്ക ആനാര്.
5മറ് ണാള് എങ്കാട്ടി എഗുദാര് തലെവലാമ് മൂപ്പലാമ് ബേദ ബാത്ത്യലാമ് എര്‌സലേമിലി ഒന്റായി കൂഡിനാര്. 6അദിലി എഗുദ ബെല്ല്യ പൂസാരി അന്നാസ്‌ണാമ്, കയ്യപ്പാവുണാമ്, ഓഗന്നാനാമ്, അലക്ക്‌സന്താറ്‌ണാമ്, എഗുദ ബെല്ല്യ പൂസാരിഗാദ് കുഡുമക്കാറാര്‌ണാമ് അവാര് കണ്ടാര്. 7അവാര് അപ്പൊസലലണ തമ്മ്‌ദ് മദ്ദേസാക്കെ ണില്ലിസി ഇച്ചെ കേ്ട്ടാര്: <<ഇച്ചെ സെയ്യ ണിമാക്ക് എന്ത അദിഗാര? ആര് ണിമാക്ക് ഇദ് സെയ്യ അദിഗാര തന്താദ്? ഇല്ലെ ആര് സൊല്ലി ണിമ്മ ഇദ് സെയ്‌ദാദ്?>>
8സാമിണിഗാല് തുമ്പ ഇര്‌ന്താദ്‌ണാലെ പത്ത്‌റോസ് അവാര്‌ക്ക് ഇച്ചെ സൊന്നാ്: <<എഗുദാര് തലെവലാഗെ, മൂപ്പലാഗെ, 9ണിമ്മ എമാണ ഈ മൊണ്ടി കാലാന്‌ക്ക് ണല്ലാദ് സെയ്‌ദാദ്‌ക്ക്‌മ് ഇയാള് സവ്വി ആനാദ്‌ക്ക്‌മ്‌ത്തേഗ കേ്ള്‌വി കേ്ക്കാദ്? 10അച്ചെ ആനാക്കി ണിമ്മാമ് ഇസ്‌റേല് ആള്‌ഗ മുച്ചുഡാമ് ഇദ്‌ണ തെരിന്തിര്‌ക്കുഡൊ. ണിമ്മ കുരുസ്‌ക്കെ സേത്തി ആണി അഡിത്ത് കൊന്റ ഏസു ക്‌റ്‌സ്‌ത്ത്‌ണ സാമി സാവിലിര്‌ന്ത് ഉജുറു ഏ്ത്തിനാ്. ഈ ണസറത്ത്‌ക്കാറാ് ഏസുദ് പേരിലിത്തെ ഇവാ് ണലമായി ആയി മുജ്ജുവോഡെ ണിമ്മ്‌ദ് മുന്തുക്ക് ണിന്റ് ഇര്‌ക്കാദ്. 11ബേദ ബുക്കിലി ഇച്ചെ എ്ള്‌ദിര്‌ക്ക്‌ദല്ല:
<ണിമ്മ കൂരെ ബേലെ സെയ്‌ഗാട്ടി തള്ള്യെക്കിന കല്ല്‌ത്തെ,
ഇപ്പ് എല്ല കല്ല്‌ഗണ ബ്‌ഡ മുക്ക്യമാന കല്ലായി#4:11 മുക്ക്യമാന കല്ലായി ബേസ്‌മട്ടാദ് മൂലേല്യ കല്ല് എന്തൊ കാവഡിന പാസെ ഇര്‌ക്ക ബാസാക്ക് മേലെ ണഡ്‌ക്കെ ആയി ബെക്ക കല്ല് എന്തൊ ഇദ്‌ണ അര്‌ത്ത ആക്കില. ണമ്മ് ആള്‌ഗ കൂരെ എ്ഡ്‌ക്കാട്ടി പെ്ര്‌ങ്കാ് കമ്പ് കൂരേന ഒറേപ്പാക്കി ബെക്ക പാസെ എഗുദാര് കൂരെ എ്ഡ്‌ക്കാട്ടി ഈ കല്ല്‌ത്തെ അവാര്‌ദ് കൂരേന ഒറേപ്പാക്കി ബെക്കാദ്. തീന്താദ്.>#സാമി പാട്ട് ബുക്ക് 118:22
അദേ കല്ല്‌ത്തെ ഈ ഏസു. 12ണമാണ കാപാറ്റ്യ ഏസു അല്ലാദെ ബേ്റെ ഒരുത്താന്‌മ് ഇല്ലെ. ഈ ബാന്‌ക്ക് അഡി ബൂമിലി മന്‌സാര്‌ണ കാപാറ്റ്യ ഏസു അല്ലാദെ ബേ്റെ ഒരുത്താന്‌മ് ഇല്ലെ.>>
13പത്ത്‌റോസ്‌മ് ഓഗന്നാന്‌മ് അത്തറ ബെല്ല്യ പഡിപ്പ്‌ക്കാറാര്‌മല്ല അത്തറ ബെല്ല്യ ആള്‌ഗാമല്ല എന്ത് തെരിന്താദ്‌ണാലേമ് ഇവാര്‌ദ് ദയ്യിരണ കണ്ടാദ്‌ണാലേമ് അദിലി ഇര്‌ന്ത എഗുദ ഗോഡ്‌ദിക്കാറാര് അദിസ്യപട്ടാര്. പത്ത്‌റോസ്‌മ് ഓഗന്നാന്‌മ് ഏസുദ് ഒപ്പ ഇര്‌ന്തവാര് എന്ത്‌മ് അക്കുളെ അവാര്‌ക്ക് തെരിന്ത്‌ദ്. 14ആന ണോയി തെ്ളിന്തവാ് അപ്പൊസലലോഡെ ഇര്‌ക്കാദ്‌ണ കണ്ടാദ്‌ണാലെ അവാര്‌ക്ക് ഒന്റുമ് സൊല്ല്യ മുഡ്യാലെ. 15അദ്‌ക്ക് അവാര് പത്ത്‌റോസ്‌ണാമ് ഓഗന്നാനാമ് എഗുദ ഗോഡ്‌ദിലിര്‌ന്ത് ബെ്ള്യെ പോയ സൊന്നാര്. പ്‌റ അവാര് തമ്മ തമ്മ ഇച്ചെ ഓസണെ എ്ഡ്‌ത്താര്: 16<<ഇവാര്‌ണ ണമ്മ എന്ത സെയ്യ? അവാര് ബെല്ല്യ അദിസ്യമാന അഡ്യാള സെയ്‌ദിര്‌ക്കാദ്‌ണ എര്‌സലേമ്‌ക്കാറാര്‌ക്ക് മുച്ചുഡ തെരിന്തിര്‌ക്ക്‌ദ്. ആന ഇദ്‌ണ ഇല്ലെ എന്ത് സൊല്ല്യ ണമാക്ക് മുഡ്യമാട്ട. 17ആന ഈ സേദി ആള്‌ഗാക്കെ പാസാദെ ഇര്‌ക്ക്യ ആര്‌ക്കേമ് ഏസുദ് പേരിലി ഇനി ഒന്റുമ് സൊല്ല ബേ്ഡ എന്ത് അവാര്‌ണ മെ്റ്‌ട്ടി ബ്‌ഡില.>>
18അദ്‌ക്ക് പ്‌റ അപ്പൊസലലണ ഒളേത്ത് കണ്ടിപ്പായിമ് ഏസുദ് പേര്‌ണ പറ്റി സൊല്ലുറാദൊ പഡ്‌സ്‌റാദൊ സെയ്യ ബേ്ഡ എന്ത് സൊന്നാര്. 19ആന പത്ത്‌റോസ്‌മ് ഓഗന്നാന്‌മ് ഇച്ചെ സൊന്നാര്: <<സാമി പേസ്‌ണ കേ്ക്കാദൊ ഇല്ലെ ണിമ്മ് പേസ്‌ണ കേ്ക്കാദൊ ഇദിലി ഏദ് സെരി എന്ത് ണിമ്മ താനെ ണെനേത്ത് ണോഡി. 20എമ്മ കണ്ടാദ്‌ണാമ് കേ്ട്ടാദ്‌ണാമ് പറ്റി സൊല്ലാദെ ഇര്‌ക്ക്യ മുഡ്യമാട്ട.>>
21ആന ആള്‌ഗ മുച്ചുഡ ഇച്ചെ ണഡാന്താദ്‌ണ കണ്ട് സാമിന ണല്ലവാ് എന്ത് ഉജാത്തി സൊന്നാര്. അദ്‌ണാലെ അപ്പൊസലലാക്കെ ദണ്ടണെ കൊഡുക്ക്യ എഗുദ ഗോഡ്‌ദിക്കാറാര്‌ക്ക് ഒരു ബയ്യിമ് കെ്ഡേക്കാലെ. അക്കുളെ എഗുദ ഗോഡ്‌ദിക്കാറാര് പിന്നേമ് അവാര്‌ണ ണല്ല മെ്റ്‌ട്ടി ബ്‌ട്ടാര്. 22ആന അയ്യി ണോയി തെ്ളിന്ത് ണലമായി ആനവാന്‌ക്ക് ബയ്യിസ് ണാപ്പദ്‌ക്ക് മേല് ആയിര്‌ന്ത്‌ദ്.
ണല്ല ദയ്യിര കെ്ഡേക്ക്യ ഏസുക്കാറാര് പരേസ്‌റാര്
23പത്ത്‌റോസ്‌മ് ഓഗന്നാന്‌മ് അവാര് പട്ടിലിര്‌ന്ത് കഡാന്താദ്‌മ് തമ്മ് കൂട്ടാര്‌ദ് പട്ട്‌ക്ക് പോനാര്. അദ്‌ക്ക് പ്‌റ എഗുദ പൂസാരി തലെവലാമ് മൂപ്പലാമ് സൊന്നാദ്‌ണ അവാര്‌ക്ക് സൊന്നാര്. 24അക്കുളെ ഇദ്‌ണ കേ്ട്ട് ഏസുക്കാറാര് ഒന്റായി എജേന്തിര്‌ന്ത് ഇച്ചെ പരേസിനാര്: <<ബൂമിനാമ് ബാന്‌ണാമ് കഡാല്‌ണാമ് ഇദിലി ഇര്‌ക്ക എല്ലാദ്‌ണാമ് ദ്‌ട്ടിസിന സാമിത്തെ ണീ. 25ണിന്ന് ബേലെക്കാറാനാന എമ്മ്‌ദ് പാട്ടാ് ദാവീദോഡെ സാമിണിഗാല് ഏ്റി ഇച്ചെ സൊല്ലിസിനെല്ല:
<എഗുദാര് അല്ലാത്ത ജാദിഗ എന്ത്‌ക്ക് മൊനേക്ക് തെ്ട്ട്‌റാദ്?
ആള്‌ഗ സാമിക്ക് ണേരെ സട്ടകെ്ട്ട്‌റാദ് എന്ത്‌ക്ക്?
അവാര് എച്ചെ ണോഡിനാല്‌മ് സാമിന ഗെലിസ്യ മുഡ്യ.
26ആണ്ടവാന്‌ക്ക്‌മ് തന്ന് ക്‌റ്‌സ്‌ത്ത്‌ക്ക്‌മ് ണേരെ
ബൂമിലി ഇര്‌ക്ക റാജാവുഗ ഒരുങ്കിര്‌ക്കാര്,
അദിലി ഇര്‌ക്ക അദിഗാരിഗാമ് എല്ല ഒന്റായി എ്ണേന്തിര്‌ക്കാര്.>#സാമി പാട്ട് ബുക്ക് 2:1,2
27ണിനാക്ക് ബേ്ണ്ടി സൊല്ലി ബെത്തിര്‌ക്ക ഏസുണ ണീ താനെ ക്‌റ്‌സ്‌ത്ത് ആക്കി ബെത്തിര്‌ക്കെ. ഇയാള്‌ക്ക് ണേരെ എരോദാന്‌മ്, പൊന്തിയോസ് പീലത്തോസ്‌മ് എ്ണേന്ത് എഗുദാര് അല്ലാത്ത ജാദിഗോഡേമ് ഇസ്‌റേല്‌ക്കാറാരോഡേമ് ഒപ്പ ഈ പട്ടണാത്തിലി ഒന്റായി കൂഡിനാര്. 28ണീ മുദതാനെ മുഡിവു എ്ഡ്‌ത്ത് ബെത്തിര്‌ന്ത കാര്യഗണ ണഡാത്ത്യാത്തെ അവാര് ഇച്ചെ കൂഡിനാദ്. ണിന്ന് സക്‌ദിണാലേമ് ണിന്ന് ആസെണാലെമ്‌ത്തെ ഇദ്‌ഗെല്ല ണഡാന്താദ്. 29അദ്‌ക്ക് ഇപ്പ് ആണ്ടവാനെ, എമാണ അവാര് മെ്റ്‌ട്ട്‌റാദ്‌ണ ണീ ണോഡുഡോമെ. ണിന്ന് ബേലെക്കാറാരാന എമാക്ക് ണീ സൊല്ല്യ തന്തിര്‌ക്ക സേദിന സൊല്ല്യ ണല്ല ദയ്യിര തന്ത് എമാണ താങ്കുഡോമെ. 30ണീ കയ്യി ണീ്ട്ടി ണോയിക്കാറാര്‌ണ തെ്ള്‌സ്‌ഡോമെ. ണിനാക്ക് ബേ്ണ്ടി സൊല്ലി ബെത്തിര്‌ക്ക ഏസുദ് പേരിലി അദിസ്യാമ് അഡ്യാളാമ് സെയ്‌ദ് കാട്ടുഡോമെ.>>
31അവാര് ഇച്ചെ പരേസി തീന്താദ്‌മ് തമ്മ ഇര്‌ന്ത പട്ട് അദ്‌റിറ്റ്. അക്കുളെ അവാര്‌ഗാക്ക് മുച്ചുഡ സാമിണിഗാല് ഏ്റി അവാര്‌ണ മുച്ചിറ്റ്. സാമിദ് സേദി അവാര് പിന്നേമ് ദയ്യിരത്തോഡെ സൊല്ലാമ് സെയ്‌ദാര്.
ഏസുക്കാറാര് തമ്മ് സൊത്തുഗണ ഒരേ ഒപ്പ പങ്ക്‌റാര്
32ഏസുക്കാറാര് മുച്ചുഡ ഒരേ മനേസ്സോഡെ ഒറ്റെ കെ്ട്ടായി ഇര്‌ന്താര്. തമാക്ക് ഇര്‌ന്ത ഒന്റുണാമ് അവാനവാന്‌ദ് എന്ത് സൊല്ലാദെ ഒരൊരു ആള്‌ക്ക് എത്തിത്തിനി ബേ്ഡുമൊ അയ്യി അളാവുക്ക് പങ്കി എ്ഡ്‌ത്താര്. 33ഏസു ആണ്ടവാ് സത്ത് ഉജുറെ്ന്താദ്‌ണ കണ്ട അപ്പൊസലല അദ്‌ണ ണല്ല ബിലത്തോഡെ സൊന്നാര്. അവാര്‌ക്ക് മുച്ചുഡാമ് സാമിലിര്‌ന്ത് എത്തിത്തിന്യൊ പ്‌ണ്ണ്യഗ കെ്ഡേത്ത്‌ദ്. 34ഇവാരോഡെ ഇര്‌ന്ത ആര്‌ക്ക്‌മ് ഒരു ബുദ്ദിമുട്ട്‌മ് ഇര്‌ക്കാലെ. കൂരെഗൊ കാഡൊ ഇര്‌ന്തവാര് അദ്‌ഗണെല്ല ബിറ്റ് പണണ എ്ഡ്‌ത്ത് പോയി 35അപ്പൊസലല കയ്യിക്ക് കൊഡുത്താര്. അയ്യി പണാണ ഒരൊരു ആള്‌ദ് ബുദ്ദിമുട്ടുക്ക് തഗ്‌ന്ത പാസെ പങ്കി കൊഡുത്ത് ഇര്‌ന്താര്.
36ഇസ്‌റേലിലി ലേവി എങ്ക കുലാത്തിലി ഓസേപ് എങ്ക ഒരുത്താ് ഇര്‌ന്താ്. അയാള് കുപുറോസ് ണാഡ്‌ക്കാറാ് ആയിര്‌ന്താ്. അപ്പൊസലല അയാള്‌ണ ബറ്‌ണവാസ് എന്ത്‌മ് ഒളേത്ത് ഇര്‌ന്താര് (അദ്‌ദ് പൊറുള് <<ദയ്യിരപഡ്‌സ്‌റവാ്>> എന്ത്‌ത്തെ). 37അയാള് തന്ന് ഗദ്ദെന ബിറ്റ് കെ്ഡേത്ത പണണ അപ്പൊസലല കയ്യിക്ക് എ്ഡ്‌ത്ത് പോയി കൊഡുത്താ്.
Zvasarudzwa nguva ino
അപ്പൊസലല 4: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature