അപ്പൊസലല 5
5
അനനാസ്‌മ് സപീറാമ്
1അനനാസ് എങ്ക ഒരുത്താന്‌മ് തന്ന് പെ്ണ്ട് സപീറാമ് സേന്ത് തമ്മ്‌ദ് ഒരു ലേസ ബൂമിന ബിറ്റാര്. 2ഈ ബൂമിന ബിറ്റ് കെ്ഡേത്ത പണാത്തിലി ലേസ പണണ തമാക്ക് ബേ്ണ്ടി അയാള് എ്ഡ്‌ത്ത് ബെത്താ്. അച്ചെ എ്ഡ്‌ത്ത് ബെത്താദ് പെ്ണ്ട്‌ക്ക്‌മ് തെരിന്ത് ഇര്‌ന്ത്‌ദ്. മിച്ചണ എ്ഡ്‌ത്ത് പോയി അപ്പൊസലലാക്കെ കൊഡുത്താര്.
3അക്കുളെ പത്ത്‌റോസ് സൊന്നാ്: <<അനനാസെ, ണിന്ന് മനേസ്സ്‌ണ സെയിത്ത്യാ് പേസ്‌ക്ക് ആളാക്കി ണീ സാമിണിഗാല്‌ക്ക് ണേരെ ഉറുട്ടു സൊന്നാദ്‌മ് ണിനാക്ക് ബൂമി ബിറ്റ് കെ്ഡേത്ത പണാത്തിലി ലേസ എ്ഡ്‌ത്ത് ബെത്താദ്‌മ് എന്ത്‌ക്ക്? 4ബൂമി ബിക്കാത്ത മുദ അദ് ണിന്ന്‌ദ് താനെ ആയിര്‌ന്ത്‌ദല്ല? അദ്‌ണ ബിറ്റ് കെ്ഡേത്ത പണാമ് ണിന്ന് കയ്യിലി താനെത്ത്യല്ല ഇര്‌ക്കാദ്? പിന്നെ എന്ത്‌ക്ക് ണീ ഇച്ചെല്ല സെയ്‌ദാദ്? ണീ മന്‌സാര്‌ക്കെ അല്ല ഉറുട്ടു സൊന്നാദ്, സാമിക്കാക്കു!>>
5അനനാസ് ഇദ്‌ണ കേ്ട്ടാദ്‌മ് അദ്‌ക്കെ താനെ ബ്‌ന്ത് സത്താ്. ഇച്ചെ ആനാദ്‌ണ കേ്ട്ട് ആള്‌ഗാക്കെല്ല റമ്പ കോവെ പ്‌ഡിത്ത്‌ദ്. 6അദിലി ഇര്‌ന്ത ബണ്ടാര് സാവുക്ക് സീലെ ഇക്കി ബെ്ള്യെ എ്ഡ്‌ത്ത് പോയി പൊദേത്താര്.
7ഇദ് ഒന്റുമ് തെര്യാദെ അനനാസ്‌ദ് പെ്ണ്ട് ഒരു മൂണ് മണികൂറ് കളിന്ത് അദ്‌ക്കെ ബന്ത. 8പത്ത്‌റോസ് അവാണ ഇച്ചെ കേ്ട്ടാ്: <<ണീമ് ണിന്ന് ആളാ്ന്‌മ് സേന്ത് ഇത്തിനിക്ക്‌ത്തേഗ അയ്യി ബൂമിന ബിറ്റാദ് സൊല്ലു?>>
അക്കുളെ അവ: <<ഈ്, ഇത്തിനിക്ക്‌ത്തെ ബിറ്റാദ്>> എന്ത് സൊന്ന.
9അക്കുളെ പത്ത്‌റോസ് ഇച്ചെ സൊന്നാ്: <<എന്ത്‌ക്ക് ണിമ്മ റണ്ട് ആള്‌മ് സാമ്യാന ആണ്ടവാ് ണിഗാല്‌ണ സോദണെ സെയ്യ മുഡിവു എ്ഡ്‌ത്താദ്? ഇദാ ഈങ്ക് ണോഡ്, ണിന്ന് ആളാ്ന പൊദേത്തവാര് ബാസാത്തിതാനെ ഇര്‌ക്കാര്. അദേപാസെ അവാര് ണിനാണാമ് എ്ഡ്‌ത്ത് പോവാര്!>> 10അപ്പ്‌താനെ സപീറാമ് പത്ത്‌റോസ്‌ദ് കാലര്‌ഗെ ബ്‌ന്ത് സത്ത. ബണ്ടാര് ബന്ത് ണോഡുഗാട്ടി അവാമ് സത്തിര്‌ന്ത. അവാര് അയ്യി സാവുണാമ് എ്ഡ്‌ത്ത് പോയി ആളാ്ന്‌ദ് അള്ളെര്‌ഗെത്താനെ പൊദേത്താര്. 11ഏസുക്കാറാര് കൂട്ടാക്ക്‌മ് ഇദ്‌ണ കേ്ട്ട ബേ്റെ ആള്‌ഗാക്ക്‌മ് റമ്പ കോവെ പ്‌ഡിത്ത്‌ദ്.
അദിസ്യഗാമ് അഡ്യാളഗാമ് സെയ്‌രാര്
12അപ്പൊസലലോഡെ എത്തിന്യൊ അദിസ്യഗാമ് അഡ്യാളഗാമ് ആള്‌ഗ പട്ടിലി ണഡാന്ത്‌ദ്. ഏസുക്കാറാര് മുച്ചുഡ ഒരേ മനേസ്സോഡെ സലോമോന്‌ദ് എങ്ക മണ്ടഗാക്കെ ഒന്റായി കൂഡി ബന്ത് ഇര്‌ന്താര്. 13ആള്‌ഗ ഇവാര്‌ണ ണല്ല പെര്‌മെപട്ടിര്‌ന്താര്. ആനാല്‌മ് ഇവാര്‌ദ് കൂട്ടാക്ക് എജേഗാത്ത ആള്‌ഗ ഇവാര്‌ക്ക് എജേയ കോവെപട്ടാര്. 14എന്താല്‌മ് ആണ്ടവാന ണമ്പ്‌റ ആണ്‌മക്കഗാമ് പെ്ണ്ണ്‌മക്കഗാമ് ഇര്‌ക്ക ഒരു കൂട്ട അവാര്‌ക്ക് എജേന്ത് കൊണ്ടിര്‌ന്താര്. 15പത്ത്‌റോസ് ബന്ത് പോഗാട്ടി ണോയിക്കാറാര്‌ണ പായോഡേമ് ക്‌ഡാക്ക സീലോഡേമ് എ്ഡ്‌ത്ത് ബന്ത് ബയ്യ്യോരാക്കെ ആള്‌ഗ ക്‌ഡാത്തിനാര്. എന്ത്‌ക്കെന്റ അയാള്‌ദ് ണിഗാല് എന്താല് ണോയിക്കാറാര്‌ക്ക് തട്ടിനാമദി എന്ത് ണെനേത്ത്‌ത്തെ. 16അദല്ലാദെ എര്‌സലേമ്‌ക്ക് സുറ്റുമുറ്റിര്‌ക്ക പട്ടണാക്ക്‌റാഗ ഇര്‌ന്ത് മൊത്തന ആള്‌ഗ ണോയിക്കാറാര്‌ണാമ് കെ്ട്ടജാദി തട്ടി ഇര്‌ക്കവാര്‌ണാമ് എ്ഡ്‌ത്ത് ബന്താര്. അവാര് മുച്ചുഡാമ് തെ്ളിന്താര്.
അപ്പൊസലലണ കൊഡിമെപഡ്‌സ്‌റാര്
17എഗുദ ബെല്ല്യ പൂസാരിക്ക്‌മ് അയാള് തൊണെക്കാറാര് ആയിര്‌ക്ക എല്ല സദൂക്യ കൂട്ടാര്‌ക്ക്‌മ് അപ്പൊസലലോഡെ എര്‌സ ബന്ത്‌ദ്. അദ്‌ണാലെ അപ്പൊസലലണ എന്താറ്റ് സെയ്യുഡൊ എന്ത് അവാര് മുഡിവു എ്ഡ്‌ത്താര്. 18അവാര് അപ്പൊസലലണ പ്‌ഡിത്ത് ജെയില്‌ക്ക് ഇക്കിനാര്. 19ആന അയ്യി ജാമാത്തിലി ആണ്ടവാന്‌ദ് ദൂദാ് ജെയില്‌ദ് ബാസണ തുറാന്ത് അവാര്‌ണ ബെ്ള്യെ എ്ഡ്‌ത്ത് ബന്ത് സൊന്നാ്: 20<<ണിമ്മ സാമികൂരേക്കെ പോയി ണിന്റ് അദിലി ഇര്‌ക്ക ആള്‌ഗാക്കെ ഏസു തര ഈ പുദ്യ ഉജുറുണ പറ്റി സൊല്ലി.>> 21അയാള് സൊന്ന പാസെ അപ്പൊസലല ബെ്ഡ്യാകാലാത്തിലി സാമികൂരേക്കെ പോയി പഡിസ്യ പ്‌ഡിത്താര്.
എഗുദ ബെല്ല്യ പൂസാരിമ് തന്ന് തൊണെക്കാറാര്‌മ് എ്ണേന്ത് ഇസ്‌റേല്‌ക്കാറാര്‌ദ് തലെവല ഇര്‌ക്ക എഗുദാര്‌ദ് ഗോഡ്‌ദിന കൂട്ടിനാര്. അവാര് അപ്പൊസലലണ തമ്മ് പട്ട്‌ക്ക് കൂട്ടി ബര്യ ജെയില്‌ക്ക് ആള് ബ്‌ട്ടാര്. 22ആന സാമികൂരേല്യ ഉദ്ദേഗക്കാറാര് പോയി ജെയില്‌ണ ണോഡുഗാട്ടി അപ്പൊസലല ഇല്ലെ. അവാര് തിലിമ്പി പോയി ഇച്ചെ സൊന്നാര്: 23<<എമ്മ പോയി ണോഡുഗാട്ടി ജെയില് ണലമായി പൂട്ടി ഇര്‌ക്കാദ്‌ണാമ് കാവക്കാറാര് ബാസ പട്ടിലി ഇര്‌ക്കാദ്‌ണാമ് കണ്ടേര്. ആന ബാസണ തുറാന്ത് ഉള്ളുക്ക് പുക്കി ണോഡുഗാട്ടി അദിലി ആര്‌മ് ഇല്ലെ.>> 24എഗുദ പൂസാരി തലെവലാമ് സാമികൂരെ കാവക്കാറാര്‌ദ് തലെവാന്‌മ് ഇദ്‌ണ കേ്ട്ട് ഇദ് ഇനി എന്ത ആയെക്ക്‌ദൊ എന്ത് അപ്പൊസലലണ ണെനേത്ത് അദിസ്യപട്ടാര്. 25അയ്യി ഗള്യേലി ഒരുത്താ് ബന്ത് അവാര്‌ക്ക് സൊന്നാ്: <<ണിമ്മ ജെയില്‌ക്ക് ഇക്കി ബെത്തിര്‌ന്തവാര് സാമികൂരേലി ണിന്റ് ആള്‌ഗണ പഡ്‌സ്‌റാര്.>> 26അക്കുളെ കാവക്കാറാര്‌ദ് തലെവാന്‌മ് തനാക്ക് അഡി ഇര്‌ക്ക കാവക്കാറാര്‌മ് പോയി അപ്പൊസലലണ കൂട്ടി ബന്താര്. ആള്‌ഗ തമാണ കല്ല് എ്റിവാരെന്ത് ണെനേത്ത് കോവേക്ക് ഇവാര്‌ണ ഒന്റുമ് സെയ്യാദെ കൂട്ടി പോനാര്.
27അച്ചെ അവാര്‌ണ എഗുദ ഗോഡ്‌ദി മുന്തുക്ക് ണില്ലിസിനാര്. എഗുദ ബെല്ല്യ പൂസാരി അവാര്‌ണ കേ്ള്‌വി കേ്ട്ട് ഇച്ചെ സൊന്നാ്: 28<<ഏസുദ് പേരിലി ആള്‌ഗണ കണ്ടിപ്പായിമ് പഡ്‌സ ബേ്ഡ എന്ത് എമ്മ ണിമാക്ക് സൊല്ലാലേഗ? ആന ണിമ്മ ഇപ്പ് എന്ത സെയ്‌ദേര് എന്ത് ണോഡിരി. ണിമ്മ്‌ദ് സേദിന എര്‌സലേമ് മുച്ചുഡ ണിമ്മ പരാത്തിനേര്. അയാള്‌ണ കൊന്റ കുറ്റ എമ്മ് തലേക്ക് കെ്ട്ടി ബെക്കുഡൊ എന്ത് ണിമ്മ ണെനേക്കേര്!>>
29പത്ത്‌റോസ്‌മ് ബാക്കി അപ്പൊസലലാമ് തിലിപ്പി ഇച്ചെ സൊന്നാര്: <<മന്‌സാര് സൊന്നാദ്‌ണ ബ്‌ഡ സാമിദ് പേസ്‌ണാത്തെ എമ്മ കേ്ക്കുഡൊ. 30ണിമ്മ കുരുസ്‌ക്കെ സേത്തി ആണി അഡിത്ത് കൊന്റ ഏസുണ ണമ്മ് പാട്ടിപാട്ടലാദ് സാമി സത്താദിലി ഇര്‌ന്ത് ഉജുറു ഏ്ത്തിനാ്. 31തന്ന് ബല സാരി കുക്കാന്ത് തന്ന്‌ദൊപ്പ ആള്യ ഏസുണ തലെവാ്മ് ദെങ്ക്‌സ്‌റവാ്മ് ആക്കി സാമി ഉജാത്തി ബെത്തിര്‌ക്കാ്. അദ് ഇസ്‌റേല്‌ക്കാറാര് സെയ്‌ര കാര്യഗ പാവ എന്ത് അവാര്‌ക്ക് തെരിന്ത് അയ്യി പാവഗണ തള്ള്യെക്കി സാമി സാരി ബര്യാമ്, അവാര്‌ദ് പാവഗാക്ക് പൊറിമെ കെ്ഡേക്ക്യാമ്‌ത്തെ. 32ഈ കാര്യഗണെല്ല കണ്ട എമാക്ക്‌മ് തന്ന് പേസ് കേ്ക്കവാര്‌ക്ക് സാമി കൊഡുക്ക തന്ന്‌ദ് ണിഗാല്‌ക്ക്‌മ് അദ് ണേര് എന്ത് സൊല്ല്യ മുഡ്യു.>>
33ഇദ്‌ണ കേ്ട്ട് എഗുദ ഗോഡ്‌ദില്യവാര്‌ക്ക് റമ്പ മൊനെ ബന്ത്‌ദ്. ഇവാര് അപ്പൊസലലണ തീത്ത് കെ്ട്ട്യ മുഡിവെ്ഡ്‌ത്താര്. 34ആന എഗുദ ഗോഡ്‌ദിക്കാറാര്‌ദ് കൂട്ടാത്തിലി ഗമാല്യേല് എങ്ക പരിസാ് ഇര്‌ന്താ്. അയാള് ഒരു ബേദ ബാത്ത്യാന്‌മ് ആള്‌ഗെല്ല മദിക്ക ആള്‌മ് ആയിര്‌ന്താ്. അയാള് എ്ന്ത് ണിന്റ് ഇച്ചെ സൊന്നാ്: <<അപ്പൊസലലണ ലേസ ണേര ബെ്ള്യെ ണില്ലിസിരി.>> 35അദ്‌ക്ക് പ്‌റ അയാള് ഗോഡ്‌ദിക്കാറാര്‌ക്ക് ഇച്ചെ സൊന്നാ്: <<ഇസ്‌റേല്‌ക്കാറാരെ, ഇവാര്‌ണ എന്താറ്റ് സെയ്‌രദാനാക്കി സെറ്റെ സൂസാരിത്ത് ബേ്ഡു സെയ്യ. 36ലേസ ണാള്‌ക്ക് മുദ തൂദാസ് എങ്കവാ് ണാന്‌ത്തെ ബെല്ല്യവാ് എന്ത് സൊല്ലി ബന്തിര്‌ന്താനല്ല. അയാള്‌ദ് ഒപ്പ ഏദൊ ണാണൂറ് ആള്‌ഗ എജേന്താര്. ആന അയാള്‌ണ കൊന്റാര്. അവാനോഡെ ഇര്‌ന്തവാരെല്ല സിന്തസിദാറ ആയെക്കി അയാള്‌ദ് പേര്‌ത്തൂര് ബീസാക്ക് ഇല്ലാദെ ആയെക്കിറ്റ്. 37അദ്‌ക്ക് പ്‌റ ആള്‌ഗണ കണാക്ക് എ്ഡ്‌ക്ക കാലാത്തിലി ജൂദാ് എങ്ക ഗെലീലെക്കാറാ് ബന്താ്. അയാള് ലേസ ആള്‌ഗണ തന്ന് സാരി സേത്തിനാ്. അച്ചെ അയാള്‌ണാമ് കൊന്റാര്. അയാളോഡെ ഇര്‌ന്തവാര്‌മ് ജില്ലമ്പുല്ലാത്ത് ആയെക്കിനാര്. 38അദ്‌ണാലെ ണാന് ഒന്റു സൊല്ലുറെ, അവാര്‌ണ ഒന്റുമ് സെയ്യാദെ ബ്‌ഡ്‌രി. ഇദ് മന്‌സാര്‌ദ് ണെനേവുമ് ബേലേമാന അദ് ഇല്ലാദെ ആയെക്കു. 39ആന ഇവാര്‌ദ് ണെനേവുമ് സെയ്‌ര ബേലേമ് സാമിദ് ആനാക്കി ഇവാര്‌ണ കൊല്ല്യ മുഡ്യമാട്ട. അദ്‌ക്ക് ണിമ്മ സാമ്യോഡെ മല്ല് പ്‌ഡിക്കവാര് ആഗ ബേ്ഡ.>>
ഗമാല്യേല് സൊന്ന കാര്യണ എഗുദ ഗോഡ്‌ദില്യവാര് സെരിത്തെ എന്ത് സൊന്നാര്. 40അവാര് അപ്പൊസലലണ ഒളേത്ത് ബര്‌സി അഡിത്ത് ഏസുദ് പേരിലി ഒന്റുമ് സൊല്ല ബേ്ഡ എന്ത് സൊല്ലി അവാര്‌ണ മെ്റ്‌ട്ടി ബ്‌ട്ടാര്.
41അപ്പൊസലല ഏസുദ് പേരിലി മാനഗെ്ട്ടാര്. അദ് പ്‌ണ്ണ്യ എന്ത് ണെനേത്ത് എഗുദ ഗോഡ്‌ദിലിര്‌ന്ത് അവാര് പിര്യപിര്യാത്ത് ഇ്റാങ്കി പോനാര്. 42അദ്‌ക്ക് പ്‌റാമ് അവാര് ണാള്‌ക്ക്‌മ് സാമികൂരേലിമ് കൂരെകൂര്യാമ് ഏസുത്തെ ക്‌റ്‌സ്‌ത്ത് എങ്ക ഈ ണല്ല സേദിന സൊല്ലി പഡിസി ബന്താര്.
Zvasarudzwa nguva ino
അപ്പൊസലല 5: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature