അപ്പൊസലല 6
6
ഏ്ള് ആള്‌ണ തെരിന്ത് എ്ഡ്‌ക്കാര്
1അയ്യി കാലാത്തിലി ഏസുദ് സൊല്ലുപഡി ണഡാക്കവാര് പെര്‌ഗി കൊണ്ടെ ഇര്‌ന്താര്. അക്കുളെ ഗ്‌റീക്ക് ണായ പേസ്‌റ ഏസുക്കാറാര്‌ക്ക്‌മ് എവുറാര് ണായ പേസ്‌റ ഏസുക്കാറാര്‌ക്ക്‌മ് തറ്‌ക്ക ബന്ത്‌ദ്. എപ്പ്‌മ് സാമാനഗ പങ്കി കൊഡുക്കാട്ടി തമ്മ് മ്‌ണ്ടേസിഗണ സൊക്കാന ണോഡുറാദില്ലെന്ത് ഗ്‌റീക്ക് ണായ പേസ്‌റ ഏസുക്കാറാര് സൊന്നാര്. 2അക്കുളെ പന്നന്റ് അപ്പൊസലല എല്ല ഏസുക്കാറാര്‌ണാമ് ഒളേത്ത് ബര്‌സി ഇച്ചെ സൊന്നാര്: <<എമ്മ സാമിദ് ണല്ല സേദിന സൊല്ല്യ ണില്ലാദെ ണിമാക്ക് സാമാനഗ പങ്കി തര ബേലേക്ക് ണില്ല്‌റാദ് സെര്യല്ല. 3അദ്‌ണാലെ ഏസുക്കാറാരെ, ണിമ്മ ഒരു ബേലെ സെയ്യിരി. ണിമ്മ് കൂട്ടാത്തിലിര്‌ന്ത് ഏ്ള് ആള്‌ണ തെരിന്ത് എ്ഡ്‌രി. അവാര് ആള്‌ഗാക്ക് മുച്ചുഡ പ്‌ഡിത്തവാര്‌മ്, എല്ല കാര്യഗണ ണലമായി സെയ്യ ബുദ്ദി ഇര്‌ക്കവാര്‌മ്, സാമിണിഗാല് തുമ്പ കെ്ഡേസി ഇര്‌ക്കവാര്‌മ് ആയിര്‌ക്കുഡൊ. എമ്മ അവാര്‌ണ അയ്യി ബേലേക്ക് ബ്‌ഡ്‌റേര്. 4അച്ചെ ആനാക്കി എമാക്ക് ഇര്‌ക്ക ണേരണ മുച്ചുഡ പരേസികൊണ്ട്‌മ് സാമിദ് ണല്ല സേദിന സൊല്ലികൊണ്ട്‌മ് ഇര്‌ക്കുവേര്.>>
5അപ്പൊസലല ഇച്ചെ സൊന്നാദ് എല്ലാര്‌ക്ക്‌മ് പ്‌ഡിത്ത്‌ദ്. ണല്ല ണമ്പിക്കേമ് സാമിണിഗാല്‌മ് ഇര്‌ക്ക തേപാനോസ്‌ണാമ്, പീലിപ്പോസ്, പ്‌റാഗ്‌രോസ്, ണിക്കനോറ്, തിമോന്, പറ്‌മ്മെനാസ്, എഗുദ മദാക്ക് എജേന്തിര്‌ന്ത അന്തൊക്ക്യക്കാറാ് ണിക്കൊളവാസ് എങ്ക ആള്‌ഗണാമ് അയ്യി ബേലേക്ക് തെരിന്തെ്ഡ്‌ത്താര്. 6അദ്‌ക്ക് പ്‌റ അവാര്‌ണ അപ്പൊസലല പട്ട്‌ക്ക് കൂട്ടി ബന്താര്. അപ്പൊസലല അവാര് തലേക്ക് കയ്യി ബെത്ത് പരേസി ബ്‌ട്ടാര്.
7പിന്നെ സാമി സൊല്ലുസുലാക്ക എല്ല എ്ഡേഗാക്കേമ് പാസികൊണ്ടെ ഇര്‌ന്ത്‌ദ്. എര്‌സലേമിലി ഏസുദ് സൊല്ലുപഡി ണഡാക്കവാര് പെര്‌ഗി മൊത്തന ആനാര്. എത്തിന്യൊ എഗുദ പൂസാരിഗാമ് ഏസുക്കാറാര് കൂട്ടാക്കെ സേന്താര്.
തേപാനോസ്‌ണ പ്‌ഡിക്കാര്
8തേപാനോസ്‌ക്ക് സാമ്യോഡെ ഇര്‌ന്ത് എത്തിന്യൊ പ്‌ണ്ണ്യഗാമ് ബിലാമ് കെ്ഡേത്ത്‌ദ്. അയാള് ആള്‌ഗാദ് പട്ടിലി ബെല്ല്യ ബെല്ല്യ അദിസ്യഗാമ് അഡ്യാളഗാമ് സെയ്‌ദാ്. 9അഡിമേലി ഇര്‌ന്ത് ബെ്ള്യെ ബന്തവാര് എന്ത് സൊല്ലുറ ഒരു എഗുദാര് പരേസ്‌റ കൂരെ അദിലി ഇര്‌ന്ത്‌ദ്. അലക്ക്‌സാന്ത്‌റി, കുറേനെ, കിലിക്ക്യ, ആസ്യ എങ്ക ണാഡ്‌ക്ക്‌റാഗ ഇര്‌ന്ത ആള്‌ഗ അയ്യി പരേസ്‌റ കൂരേക്കെ കുമ്മുഡ്യ ബന്തിര്‌ന്താര്. അവാര് മുച്ചുഡാമ് തേപാനോസോഡെ തറ്‌ക്ക്യ പ്‌ഡിത്താര്. 10ആന സാമിണിഗാല് തേപാനോസ്‌ണ ണല്ല ബുദ്ദ്യോഡെ പേസ്യ ബെത്ത്‌ദ്. അദ്‌ണാലെ അവാര്‌ക്ക് അയാള്‌ദ് ണായാത്തിലി മുട്ട്യ മുഡ്യാലെ.
11അദ്‌ക്ക് അവാര്: <<തേപാനോസ് സാമിക്ക്‌മ് മോസേക്ക്‌മ് ണേരെ കെ്ട്ട ണായ സൊന്നാദ്‌ണ എമ്മ കേ്ട്ടേര്>> എന്ത് സൊല്ലിസ്യ പഗ്‌ദി ആള്‌ഗണ പണ കൊഡുത്ത് തമ്മ് സാരി കൂട്ടിനാര്.
12അച്ചെ അവാര് ആള്‌ഗണാമ്, മൂപ്പലഗണാമ്, ബേദ ബാത്ത്യലണാമ് തേപാനോസ്‌ക്ക് ണേരെ മൂട്ടി ബ്‌ട്ടാര്. അദ്‌ക്ക് പ്‌റ തേപാനോസ്‌ണ പ്‌ഡിത്ത് എഗുദ ഗോഡ്‌ദിക്കെ ണില്ലിസിനാര്. 13അയാള്‌ക്ക് ണേരെ അവാര് ഉറുട്ടു സൊല്ല്യ ഏദൊ ലേസ ആള്‌ഗണ കൂട്ടി ബന്താര്. അവാര് ഇച്ചെ സൊന്നാര്: <<ഇദാ ഇവാ് സാമികൂരേക്ക് ണേരേമ് മോസെ ബെത്ത സാമി സട്ടാക്ക് ണേരേമ് എപ്പ്‌മ് കെ്ട്ട ണായ സൊല്ലി ണഡാക്കാ്. 14അയ്യി ണസറത്ത്‌ക്കാറാ് ഏസു സാമികൂരേന ഇല്ലാദാക്കുവാ് എന്ത്‌മ്, മോസെ ണമാക്ക് തന്ത സട്ട്‌മെ്ട്ട്‌ണ മാറ്റുവെ എന്ത്‌മ് ഇവാ് സൊല്ലുറാദ്‌ണ എമ്മ കേ്ട്ടേര്.>>
15അക്കുളെ എഗുദ ഗോഡ്‌ദിക്കാറാര് എല്ലാര്‌മ് തേപാനോസ്‌ണ സൊക്കാന ണോഡിനാര്. അയ്യി ഗള്യേലി അയാള്‌ദ് മൂഞ്ചി സാമിദൂദാ് മൂഞ്ചിന പാസെ അവാര്‌ക്ക് കാട്ടിറ്റ്.
Zvasarudzwa nguva ino
അപ്പൊസലല 6: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature