അപ്പൊസലല 7
7
തേപാനോസ് ബദ്‌ള് സൊല്ലുറാ്
1അക്കുളെ എഗുദ ബെല്ല്യ പൂസാരി തേപാനോസ്‌ണ കേ്ട്ടാ്: <<ഇവാര് സൊല്ലുറാദെല്ല ണേര്‌ത്തേഗ?>>
2അദ്‌ക്ക് തേപാനോസ് ഇച്ചെ സൊന്നാ്: <<അണ്ണതമ്പിലാഗെ, അച്ച്യച്ചലാഗെ, ണാന് സൊല്ലുറാദ്‌ണ കേ്ളിരി! അവുറഗാമ് പാട്ടാ് ആരാ് എങ്ക എ്ഡേക്കെ പോരാദ്‌ക്ക് മുദ മെസെപൊത്തേമിലി പെ്ളേത്തിര്‌ന്താ്. അയ്യി ഗള്യേലി, ണമ്മ്‌ദ് കണ്ണിലി ണോഡ്യ മുഡ്യാത്ത ബെ്ള്‌സാത്തിലിര്‌ക്ക സാമി അവുറഗാമ് പാട്ടാന്‌ക്ക് ബെ്ളിപട്ട് സൊന്നാ്: 3<ണീ ണിന്ന് ജാദിനാമ് സീമെനാമ് ബ്‌ട്ട്, ണാന് കാട്ടി തര ണാഡ്‌ക്ക് പോ.>#ഉറുപത്തി 12:1
4അച്ചെ അയാള് പെ്ളേത്തിര്‌ന്ത കല്‌ദാര് എങ്ക സീമെന തള്ളി ആരാന്‌ക്ക് ബന്ത് പെ്ളേത്താ്. അവുറഗാമ് പാട്ടാന്‌ദ് അപ്പാ് സത്ത പ്‌റ അദിലിര്‌ന്ത് ണിമ്മ ഇപ്പ് ഇര്‌ക്ക സീമേക്കെ സാമി അവുറഗാമ്‌ണ സൊല്ലിബ്‌ട്ടാ്. 5അവുറഗാമ് പാട്ടാന്‌ക്ക് ഒരു തുണ്ടു ബൂമി ബീസാക്ക് സാമി കൊഡുക്കാലെ. ആന അയ്യി കാലാത്തിലി അവുറഗാമ് പാട്ടാന്‌ക്ക് മക്ക ബീസാക്ക് ഇല്ലാദെ ഇര്‌ന്ത്‌മ് സാമി അവുറഗാമ്‌ക്ക്‌മ് അയാള്ദ് മക്കഗാക്ക്‌മ് ഈ ബൂമിന സൊന്തമായി തരുവെ എന്ത് ബാക്ക് കൊഡുത്താ്. 6സാമി ഇച്ചെ സൊന്നാ്: <ണിന്ന് കാല്‌കെ്ളേക്ക് പട്ടവാര് ബേ്റെ സീമേക്കെ പോയി പെ്ളേക്കുവാര്. അവാര്‌ണ അദില്യവാര് ണാണൂറ് ബര്‌സ അഡിമെഗ ആക്കി ബേലെ സെയ്‌സുവാര്. 7ആന ഇവാര്‌ണ ആര് അഡിമെ ബേലെ സെയ്‌സ്‌റാരൊ അവാര്‌ക്ക് ണാന് ദണ്ടണെ കൊഡുക്കുവെ. അദ്‌ക്ക് പ്‌റ അയ്യി ണാഡ്‌ണ തള്ളി ണിന്ന് കാല്‌ക്ക് പട്ടവാര് ഈ സീമേക്കെ എജ്ജി എനാണ കുമ്മുഡ്‌വാര്.>#ഉറുപത്തി 15:13,14 8അദ്‌ക്ക് പ്‌റ സാമിമ് അവുറഗാമ്‌മ് ആങ്കീങ്ക് ഒപ്പ്‌കെ്ട്ട് ബെത്താര്. അദ്‌ദ് അഡ്യാളത്തെ സുന്നത്ത് സാത്ത്‌റ കളിക്കാദ്. അച്ചെ അവുറഗാമ്‌ക്ക് ഇസാക്ക് എങ്ക മഗാ് പ്‌റാന്ത് ണാള് തെഗേന്താദ്‌മ് അയ്യി മ്‌ഗാണ സുന്നത്ത് സാത്ത്‌റ കളിത്താ്. ഇസാക്ക് തന്ന് മഗാ് ആക്കോവുണാമ്, ആക്കോവു തന്ന് പന്നന്റ് മക്കഗണാമ് സുന്നത്ത് സാത്ത്‌റ കളിത്താ്. ഇവാര്‌ത്തെ ണമ്മ് ബങ്കേസാത്തില്യ പേര്‌കേ്ട്ട പന്നന്റ് പാട്ടല.
9ഈ പാട്ടലാക്ക് തമ്മ് തമ്പി ഓസേപോഡെ ഇര്‌ക്ക എര്‌സണാലെ ഈജിത്ത്‌ക്കാറാര്‌ക്ക് അഡിമെ ആക്കി ബിറ്റെക്കിനാര്. ആന സാമി അയാള്ദ് ഒപ്പ ഇര്‌ന്താ്. 10ഈജിത്തിലി ഓസേപ്‌ക്ക് എത്തിന്യൊ കജട്ടഗ ബന്ത്‌ദ്. ആന അദിലിര്‌ന്തെല്ല സാമി അവാന കാപാറ്റിനാ്. ഈജിത്തില്യ റാജാവുദ് മുന്തുക്ക് ഓസേപ് പോഗാട്ടി സാമി അയാള്‌ണ ണല്ല അറുവാളിമ് റാജാവുക്ക് പ്‌ഡിത്തവാന്‌മ് ആക്കി ബെത്താ്. ഈജിത്തില്യ റാജാവു ഇയാള്‌ണ അയ്യി ണാഡ്‌ക്ക് അദിഗാരിമ് റാജാവു കോട്ടെന ണോഡി ണഡാത്ത്‌റവാന്‌മ് ആക്കിനാ്.
11അയ്യി കാലാത്തിലി ഈജിത്തിലിമ്, കാനാനിലിമ് ഇര്‌ക്ക എ്ഡേഗളിലി മുച്ചുഡ പഞ്ച പ്‌ഡിത്ത്‌ദ്. അക്കുളെ അയ്യി ണാഡ്‌ക്ക് റമ്പ കജട്ടാമ് ബന്ത്‌ദ്. അദ്‌ണാലെ ണമ്മ്‌ദ് പാട്ടലാക്ക്‌മ് തീനിഗ കെ്ഡേക്ക്യ മുഡ്യാദെ ആറ്റ്. 12ഈജിത്തിലി അന്ന കെ്ഡേക്കു എന്ത് ആക്കോവുക്ക് സേദി കെ്ഡേത്ത്‌ദ്. അദ്‌ണാലെ ആക്കോവു തന്ന്‌ദ് മഗനാരാന ണമ്മ്‌ദ് പാട്ടലണ അദ്‌ക്കെ ബ്‌ട്ടാ്. അച്ചെ അവാര് മുദമുദായി ഈജിത്ത്‌ക്ക് പോനാര്. 13അവാര് റണ്ടാവദ്‌മ് ഈജിത്ത്‌ക്ക് പോഗാട്ടി ഓസേപ് തന്ന് അണ്ണലാക്കെ ണാന്‌ത്തെ ണിമ്മ് തമ്പി എന്ത് സൊല്ലികൊഡുത്താ്. അച്ചെ ഈജിത്തില്യ റാജാവുക്ക് ഓസേപ്‌ദ് കുഡുമക്കാറാര്‌ണ തെരിന്ത്‌ദ്. 14അദ്‌ക്ക് പ്‌റ ഓസേപ് തന്ന്‌ദ് അപ്പാ് ആക്കോവുണാമ് തന്ന് കുഡുമാത്തില്യ എല്ലാര്‌ണാമ് സേദി ബ്‌ട്ട് ഈജിത്ത്‌ക്ക് ബര്‌സിനാ്. അവാര് താനെ എ്ള്‌വത്തഞ്ചാള് ഇര്‌ന്താര്. 15അച്ചെ ആക്കോവു ഈജിത്ത്‌ക്ക് പോനാ്. അദിലി ആക്കോവുമ് തന്ന് മഗനാര്‌മ് സത്താര്. 16അവാര്‌ദ് സാവുഗണെല്ല സേക്കേമ്‌ക്കെ എ്ഡ്‌ത്ത് പോനാര്. അവുറഗാമ് പാട്ടാ് ആമോര്‌ദ് മഗനാര്‌ക്ക് പണ കൊഡുത്ത് ബാങ്കിന സുഡാലെക്കെ അയ്യി സാവുഗണ ഇക്കിനാര്.
17സാമി അവുറഗാമ്‌ക്ക് കൊഡുത്ത ബാക്ക് ണഡാക്ക്യ പോര കാല ആഗാട്ടി ഈജിത്തിലി ഇസ്‌റേല്‌ക്കാറാര് മൊത്തനാക്ക് പെര്‌ഗിനാര്. 18കഡേസിലി ഓസേപ്‌ണ പറ്റി ഒന്റുമ് തെര്യാത്ത ഒരു റാജാവു ഈജിത്തിലി ആള്യ പ്‌ഡിത്താ്. 19അയ്യി റാജാവു ണമ്മ് പാട്ടലണ ഏമാത്തിമ് ണല്ല കൊഡിമെപഡ്‌സിമ് ഇര്‌ന്താ്. പച്ചെ പ്‌ള്ളെഗണ കൊന്റെക്ക്യ ഉജുറോഡെ കൂരേലിര്‌ന്ത് ഗുബിക്കെ എക്ക്യ റാജാവു ണത്തിനാ്.
20അയ്യി ഗള്യേലിത്തെ മോസെ പാട്ടാ് പ്‌റാന്താദ്. മോസെ പാട്ടാ് ണല്ല അളാഗ് ബായി മ്‌ഗ ആയിര്‌ന്താ്. മൂണ് മാസമാട്ട് കൂരേലി അവ്വപ്പലോഡെ ബളാന്താ്. 21അദ്‌ക്ക് പ്‌റ മ്‌ഗാണ ബെ്ള്യെ എക്കിനാര്. അയ്യി മ്‌ഗാണ ഈജിത്തില്യ റാജാവുദ് മഗ എ്ഡ്‌ത്ത് തന്ന് മഗാന പാസെ ബളാത്തിന. 22ഈജിത്ത്‌ക്കാറാര്‌ക്ക് ഇര്‌ക്ക എല്ല അറുവുണാമ് മോസെ പഡിത്താ്. അച്ചെ അയാള് സൊല്ലുറ ബാക്കിലിമ് സെയ്‌ര കാര്യാത്തിലിമ് മ്‌ഗ്‌ന്തവാ് ആനാ്.
23മോസേക്ക് ണാപ്പദ് ബയ്യിസ് ആനാദ്‌മ് തന്ന് കൂട്ടാരാന ഇസ്‌റേല്‌ക്കാറാര് എച്ചെ ഇര്‌ക്കാര് എന്ത് ണോഡ്യ പോയ മുഡിവു എ്ഡ്‌ത്താ്. 24ഒരു ഈജിത്ത്‌ക്കാറാ് ഇസ്‌റേല് കൂട്ടാര്‌ദി ഒരുത്താന ണല്ല കൊഡിമെപഡ്‌സ്‌റാദ്‌ണ മോസെ കണ്ടാ്. മോസെ ഇസ്‌റേല്‌ക്കാറാന്‌ക്ക് തൊണെ ണിന്റ് ഈജിത്ത്‌ക്കാറന അഡിത്ത് കൊന്റ് പളി തീത്താ്. 25തന്ന് കൂട്ടാര്‌ക്ക് പട്ട ഇസ്‌റേല്‌ക്കാറാര്‌ണ അഡിമേലി ഇര്‌ന്ത് ബ്‌ഡ്‌സി എ്ഡ്‌ത്ത് ബര്യ തനാണ സാമി ബ്‌ട്ടിര്‌ക്കാദ് എന്ത് ഇസ്‌റേല്‌ക്കാറാര് ണെപ്പ്‌കെ്ഡേസി ഇര്‌ക്കുവാര് എന്ത് മോസെ ണെനേത്താ്. ആന ഇച്ചെല്ല അവാര് ണെനേക്കാമില്ലെ. 26മറ് ണാള് റണ്ട് ഇസ്‌റേല്‌ക്കാറാര് മല്ല് കെ്ട്ടി കൊണ്ട് ഇര്‌ക്കാദ്‌ണ മോസെ കണ്ടാ്. അവാര്‌ണ റാജി കൂട്ട്യ ബേ്ണ്ടി ഇച്ചെ സൊന്നാ്: <ണിമ്മ ഒരേ കൂട്ടാര് അല്ലഗ? ണിമ്മ എന്ത്‌ക്ക് ഇച്ചെ മല്ല് കെ്ട്ട്‌റാദ്?>
27ആന മല്ല്‌ക്ക് എ്ഡേഞ്ചിനവാ് മോസേന ഉന്തി തള്ളി ഇച്ചെ സൊന്നാ്: <ണീ എമാക്ക് റാജാവ? ണിനാക്ക് ഈ അദിഗാര തന്താദ് ആര്? 28ണിഗാറ്റ് അയ്യി ഈജിത്ത്‌ക്കാറന കൊന്റാദ്‌ണ പാസെ എനാണാമ് കൊല്ല്യ ണോഡുറേഗ?>#പയണ 2:14 29ഇദ്‌ണ കേ്ട്ട് മോസെ ഓഡി പോനാ്. അവാ് മിദ്യാന് എങ്ക ണാഡിലി ജാദ്യനായി പെ്ളേത്താ്. അയാള്‌ക്ക് അദിലി റണ്ട് മഗനാര്‌മ് പ്‌റാന്താര്.
30ണാപ്പദ് ബര്‌സ പോന പ്‌റ സീനായി മലെ അര്‌ഗെ ബെ്ട്ടെകാഡിലി ബെത്ത് മുള്ളുഗുമ്പ് തീ കത്തികൊണ്ട് ഇര്‌ക്കാദ്‌ണ മോസെ കണ്ടാ്. കത്തികൊണ്ട് ഇര്‌ക്ക മുള്ളുഗുമ്പിലി ഒരു സാമിദൂദാ് മോസേക്ക് ബെ്ളിപട്ടാ്. 31ഇദ്‌ണ കണ്ട് മോസെ അദിസ്യപട്ടാ്. അദ്‌ണ സൊക്കാന ണോഡ്യ അര്‌ഗെ പോനാ്. ആന ആണ്ടവാ് ഇച്ചെ സൊന്നാദ്‌ണ അയാള് കേ്ട്ടാ്: 32<ണാന് ണിന്ന്‌ദ് പാട്ടല സാമിത്തെ. ണാന് അവുറഗാമ്‌ദ്‌മ്, ഇസാക്ക്‌ദ്‌മ് ആക്കോവുദ്‌മ് സാമിത്തെ.>#പയണ 3:6 അക്കുളെ മോസെ അഞ്ചി സദ്‌റബെ്ട്ടിനാ്. അദ്‌ക്ക് പ്‌റ അദ്‌ണ ണോഡ്യ ഗൂഡി ദയ്യിര ബരാലെ.
33ആണ്ടവാ് സൊന്നാ്: <ണീ സുത്താപ്പിര്‌ക്ക എ്ഡേലി ണിന്റിര്‌ക്കാദ്‌ണാലെ ണിന്ന് കാലില്യ സെര്‌പ്പ്‌ണ ഊരി എക്ക്. 34ഈജിത്തിലി എന്ന് ആള്‌ഗണ കൊഡിമെപഡ്‌സ്‌റാദ്‌ണ ണാന് കണ്ടിര്‌ക്കെ. അവാര് അഗ്‌റ അഗാറ്റ്‌ണ ണാന് കേ്ട്ടെ. അദ്‌ണാലെ ണാന് അവാര്‌ണ അദിലി ഇര്‌ന്ത് കാപാറ്റ്യ ഇ്റാങ്കി ബന്തിര്‌ക്കെ. അദ്‌ക്ക് ണിനാണ ണാന് ഈജിത്ത്‌ക്ക് ബ്‌ഡുവെ.>#പയണ 3:5,7,8,10 >>
35തേപാനോസ് പിന്നേമ് സൊന്നാ്: <<ഇസ്‌റേല്‌ക്കാറാര് തള്ളി എക്കിന അദേ മോസെത്തെ ഇദ്. <ണീ എമാക്ക് റാജാവ? ണിനാക്ക് ഈ അദിഗാര തന്താദ് ആര്?> എന്ത് അവാര് കേ്ട്ടാര്. ആന സാമി മോസേന അവാര്‌ക്ക് അദിഗാരിമ് അവാര്‌ണ കാപാറ്റ്‌റവാന്‌മ് ആക്കി ബെത്താ്. തീ കത്തികൊണ്ട് ഇര്‌ന്ത മുള്ളുഗുമ്പിലി കണ്ട സാമിദൂദാ് ഇദ്‌ക്ക് ബേ്ണ്ടി മോസേന താങ്കിനാ്. 36മോസെ ഇസ്‌റേല്‌ക്കാറാര്‌ണ ഈജിത്തിലിര്‌ന്ത് ബെ്ട്ടെകാഡ് മേലെ ണാപ്പദ് ബര്‌സ കാല ണഡാത്തിനാ്. സെങ്കഡാലിലിമ് ഈജിത്തിലിമ് അദിസ്യഗാമ് അഡ്യാളഗാമ് സെയ്‌ദ് കൊണ്ട്‌ത്തെ അവാര്‌ണ ണഡാത്തിനാദ്.
37<ആണ്ടവാനായിര്‌ക്ക ണിമ്മ് സാമി എനാണ സൊല്ലിബ്‌ട്ട പാസെ ഒരു സാമിദാസ്‌ണ ണിമാക്ക് സൊല്ലിബ്‌ഡുവാ്. അയാള് ണിമ്മ്‌ദ് കൂട്ടാത്തിലി പട്ട ഒരുത്താ് ആയിര്‌ക്കുവാ്>#മറ്‌ദെ സൊല്ലുറ സട്ട 18:15 എന്ത് ഇദേ മോസെ താനെത്തെ ഇസ്‌റേല്‌ക്കാറാര്‌ക്ക് സൊല്ലി ഇര്‌ക്കാദ്. 38സാമിദൂദാനോഡെ സീനായി മലേലി ബെത്ത് പേസിനാദ്‌മ്, ബെ്ട്ടെകാഡിലി ഇസ്‌റേല് കൂട്ടാര്‌ദൊപ്പാമ്, ണമ്മ് പാട്ടലാദൊപ്പാമ് ഇര്‌ന്താദ് ഈ മോസെത്തെ. ണമാക്ക് തര്യ ബേ്ണ്ടി സാമിദ് ജീവാ് തര സൊല്ലുസുലാക്ക ഇയാള്‌ക്ക്‌ത്തെ സാമി കൊഡുത്താദ്.
39ആന അയാള്ദ് പേസ് കേ്ക്ക്യ ണമ്മ് പാട്ടലാക്ക് മനേസ്സ് ഇര്‌ക്കാലെ. അയാള്‌ണ തള്ളി എക്കാമ് സെയ്‌ദാര്. അവാര്‌ദ് മനേസ്സ് ഒട്ടുക്ക് ഈജിത്ത്‌ക്ക് താനെ തിലിമ്പി പോഡൊ എന്ത് ഇര്‌ന്ത്‌ദ്. 40അദ്‌ക്ക് അവാര് അഗരോന്‌ക്കെ ഇച്ചെ സൊന്നാര്: <എമാണ ഈജിത്ത് ണാഡിലിര്‌ന്ത് കൂട്ടി ബന്ത മോസെ എന്തായി എക്കിനാ് എന്ത് എമാക്ക് തെര്യ. അദ്‌ണാലെ എമാണ ണോഡി ണഡാത്ത്യ സാമിഗണ ഉണ്ടാക്കി തരുഡൊ.>#പയണ 32:1 41അയ്യി കാലാത്തിലിത്തെ അവാര് ഒരു ഓരി കന്റ് സെലെ ഉണ്ടാക്കിനാദ്‌മ് അദ്‌ക്ക് പലി കൊഡുത്താദ്‌മ്. അച്ചെ അവാര് തമ്മ് കയ്യാലെ ഉണ്ടാക്കിന ഓരി കന്റ് സെലേക്ക് ണോമ്പി സെയ്‌ദ് കൂത്താഡിനാര്. 42അക്കുളെ സാമി അവാര്‌ണ തള്ളി സൂര്യാനാമ്, ബെ്ള്ളിനാമ്, ണിലാവുണാമ് കുമ്മുഡ്യ ബ്‌ട്ടാ്. സാമിദാസ്‌ദ് ബുക്കിലി ഇച്ചെ എ്ള്‌ദി ബെത്ത് ഇര്‌ക്ക്‌ദ്,
<ഇസ്‌റേല്‌ക്കാറാരെ! ണിമ്മ ബെ്ട്ടെകാഡിലി ബെത്ത് ണാപ്പദ് ബര്‌സ
ബേ്ണ്ട്‌ഗണ ബെ്ട്ടി സോരെ പലി തന്താദ് എനാക്ക്‌ത്തേഗ?
43ണിമ്മ മേലോക്ക് എങ്ക സാമിദ് ഗുഡുസ്‌ണാമ് ഉരുപ്പണാമ് സുമാന്ത് ണഡാന്തേര്,
രേപാ് എന്ത് സൊല്ലുറ ബാന്‌ലി ഇര്‌ക്ക ബെ്ള്ളി ഉരുപ്പണ സാമി എന്ത് കുമ്മുഡിനേര്.
ഇദ്‌ഗെല്ല ണിമ്മ കുമ്മുഡ്യ ഉണ്ടാക്കിന സെലെഗാത്തെ.
അദ്‌ണാലെ ണാന് ണിമാണ ബാവിലോണ്‌ക്ക് അച്ചാരി മുഡിക്കി ബ്‌ഡുവെ.>#ആമോസ് 5:25
44ബെ്ട്ടെകാഡിലി ണമ്മ് പാട്ടലാക്ക് ഒരു ഗുഡുസ് ഇര്‌ന്ത്‌ദ്. സാമി അവാര്‌ദൊപ്പ ഇര്‌ക്കനെന്തുള്ള തെ്ളുവുത്തെ ഈ ഗുഡുസ്. അയ്യി ഗുഡുസ് എച്ച്‌ള ദിന്‌സിലി കെ്ട്ടുഡൊ എന്ത് മോസേക്കെ സാമി കാട്ടി കൊഡുത്തിര്‌ന്താ്. അദേപാസെ താനെ മോസെ ഗുഡുസ് ഉണ്ടാക്കാമ് സെയ്‌ദാ്. 45മോസെ അയ്യി ഗുഡുസ്‌ണ ണമ്മ് പാട്ടലാക്ക് കൊഡുത്താ്. ഇവാര്‌ക്ക് സാമി കൊഡുക്കെ എന്ത് സൊന്ന ബൂമിലിര്‌ന്ത ആള്‌ഗണെല്ല സാമി താനെ ഇല്ലാദാക്കിനാ്. അയ്യി ബൂമിക്കെ ഓസുവാദൊപ്പ ണമ്മ് പാട്ടല പോഗാട്ടി ഈ ഗുഡുസ്‌ണാമ് എ്ഡ്‌ത്ത് പോനാര്. ഇദ്‌ണ ദാവീദ് പാട്ടാ് പെ്ളേത്തിര്‌ന്ത കാലമാട്ട്‌മ് സൊക്കാന പേ്ണ്‌സി ബെത്തിര്‌ന്താര്. 46ദാവീദ് സാമിക്ക് ണല്ല പ്‌ഡിത്തവാ് ആയിര്‌ന്താ്. അദ്‌ക്ക് ഇയാള് ആക്കോവുദ് സാമിക്ക് ഒരു കൂരെ ബെക്ക്യ സാമിന കേ്ട്ടാ്. 47ആന, ദാവീദ് മഗാ് സലോമോന്‌ത്തെ സാമിക്ക് കൂരെ ബെത്താദ്.
48ആന അവാന ബ്‌ഡ ബെല്ല്യവാ് ആര്‌മില്ലെ. സാമി മന്‌സാര് ഉണ്ടാക്കിന കൂരെക്ക്‌റാഗ ഇര്‌ക്കമാട്ടാ്. സാമിദാസ് ഇച്ചെ സൊല്ലുറാ്,
49<ആണ്ടവാ് സൊല്ലുറാ്,
മേലോഗ ണാന് കുക്കാക്ക കുറിഞ്ചി,
ബൂമി എന്ന് കാല് ബെക്ക പട്ട്,
എച്ച്‌ള കൂരെ ണിമ്മ എനാക്ക് ബെത്ത് തരുവേര്?
ണാന് തങ്ക്‌റ എ്ഡെ ഏദ്?
50ഇദ്‌ഗണെല്ല ദ്‌ട്ടിസിനാദ് ണാന് അല്ലഗ?>#എസയ്യാ് 66:1,2 >>
51തേപാനോസ് പിന്നേമ് സൊന്നാ്: <<ണിമ്മ സില്ലറെ പ്‌ഡിബാദാക്കാറാരല്ല. ണിമ്മ്‌ദ് മനേസ്സിലി സാമിദ് ണെനേവു ഇല്ലാദെ ണിമ്മ എത്തറാഗൊ കെ്ട്ട് തള്ളിര്‌ക്കേര്? ണിമ്മ സാമി പേസ് കേ്ക്ക്യ ലേസ ഗൂഡി മനേസ്സ് ബെക്കാദില്ലെ. ണിമ്മാമ് ണിമ്മ് പാട്ടലണ പാസെതാനെ സാമിണിഗാല്‌ക്ക് ണേരെ ഒറേത്ത് മെ്ട്ട്‌റേര്. 52ണിമ്മ്‌ദ് പാട്ടല ഏദാറ്റ് സാമിദാസ്‌ഗണ കൊഡിമെപഡ്‌സാദെ ഇര്‌ന്താര? സാമി സൊന്നാദ്‌ണെല്ല അദേപാസെ സെയ്‌രവാ് ബരാദ്‌ണ പറ്റി സൊല്ല്യ ബന്തവാര്‌ണാമ് ഈ പാട്ടല കൊല്ലാമ് സെയ്‌ദാര്. അവാര് സൊന്ന പാസെ ബന്തവാന ണിമ്മ ഇപ്പ് കാട്ടി കൊഡുത്ത് കൊന്റ് എക്കാമ് സെയ്‌ദേര്. 53ദൂദലമേലെ സാമി തന്ന് സട്ടണ ണിമാക്ക് തന്താ്. ആന അദ്‌ണാമ് ണിമ്മ എ്ഡ്‌ത്ത് ണഡാക്കാലെ!>>
തേപാനോസ്‌ണ കല്ല് എ്റിരാര്
54ഇദ്‌ണ കേ്ട്ടാദ്‌മ് എഗുദ ഗോഡ്‌ദിക്കാറാര്‌ക്ക് തേപാനോസോഡെ മൊനെ ബന്ത് അവാര് ഇയാള്‌ക്ക് ണേരെ പല്ല് കഡിത്താര്. 55ആന തേപാനോസ്‌ക്ക് സാമിണിഗാല് തുമ്പ ഇര്‌ന്താദ്‌ണാലെ അയാള് മേലോഗണ സൊക്കാന ണോഡിനാ്. അക്കുളെ അവാ് സാമിദ് സെര്യാന മദ്‌പ്പ്‌ണാമ് സാമിദ് ഒപ്പ ആള്യ സാമിദ് ബല സാരി ഏസു കുക്കാന്ത് ഇര്‌ക്കാദ്‌ണാമ് കണ്ടാ്. 56തേപാനോസ് ഇച്ചെ സൊന്നാ്: <<ഈങ്ക് ണോഡി! മേലോഗ തുറാന്ത് ഇര്‌ക്കാദ്‌ണാമ് മന്‌സാനായി പ്‌റാന്തവാ് സാമിദ് ഒപ്പ ആള്യ സാമിദ് ബല സാരി കുക്കാന്ത് ഇര്‌ക്കാദ്‌ണാമ് ണാന് കാണ്‌റെ!>>
57അപ്പ്‌താനെ എഗുദ ഗോഡ്‌ദിലി ഇര്‌ന്തവാര് ഒട്ടുക്ക് കാദ്‌ണ പൊത്തി ആലാത്ത് ക്‌ളാമ്പികൊണ്ട് തേപാനോസ്‌ക്ക് ണേരെ ഓഡിനാര്. 58അദ്‌ക്ക് പ്‌റ അയാള്‌ണ പ്‌ഡിത്ത് പട്ടണാക്ക് ബെ്ള്യെ എ്ഡ്‌ത്ത് പോയി കല്ല് എ്റിന്താര്. തേപാനോസ്‌ക്ക് ണേരെ ഉറുട്ടു സൊന്നവാര് തമ്മ്‌ദ് ഉഡുപ്പുഗണ സവുല് എങ്ക ബീ്ണാന്‌ക്കെ പ്‌ഡിക്ക്യ കൊഡുത്തിര്‌ന്താര്. 59ഇവാര് തേപാനോസ്‌ണ കല്ല് എ്റിന്ത് കൊണ്ടെ ഇര്‌ക്കാട്ടി അവാ് സാമിന ഒളേത്ത് <<ഏസു ആണ്ടവാനെ, എന്ന് ഉജുറുണ ണീ എ്ഡ്‌ക്കുഡോമെ!>> എന്ത് പരേസിനാ്. 60അവാ് സന്ത് ഊന്റി ബെല്ല്യാദ്‌ക്ക് ഇച്ചെ അഗാറിനാ്: <<ആണ്ടവാനെ! ഇവാര് സെയ്‌ദ ഈ കുറ്റാക്ക് ഇവാര്‌ക്ക് ദണ്ടണെ കൊഡുക്ക ബേ്ഡാമെ!>> എന്ത് സൊല്ലിര്‌ന്ത് സത്താ്.
Zvasarudzwa nguva ino
അപ്പൊസലല 7: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature