ഓഗന്നാ് 7
7
ഏസു ഗുഡുസ് കെ്ട്ടി കൊണ്ടാഡ്‌റ ണോമ്പിക്ക് പോരാ്
1അദ്‌ക്ക് പ്‌റ ഏസു ഗെലീലെ ണാഡ് മുച്ചുഡ സുറ്റി ണഡാന്താ്. ഏസുണ എഗുദാര് കൊല്ല്യ ണോഡുറാദ്‌ണാലെ എഗുദ ണാഡ് മേലെ പോയ അവാന്‌ക്ക് മനേസ്സ് ബരാലെ. 2അക്കുളെ എഗുദാര് ഗുഡുസ് കെ്ട്ടി കൊണ്ടാഡ്‌റ ണോമ്പി ബര്യ ആയിര്‌ന്ത്‌ദ്. 3അദ്‌ണാലെ ഏസുദ് തമ്പില: <<ണീ സെയ്‌ര കാര്യഗണ ണിന്ന് സൊല്ലുപഡി ണഡാക്കവാര് കാണ്യ ബേ്ണ്ടി ഇദ്‌ലിര്‌ന്ത് എഗുദ ണാഡ്‌ക്കെ പോ, 4പേര് കെ്ഡേസ്യ ആസെപഡ്‌റവാര് ആര്‌മ് ഒളിസി ഒരു കാര്യാമ് സെയ്‌രാദില്ലെ. ണീ ഈ കാര്യഗണ സെയ്‌രദാനാക്കി ണീ ആര് എന്ത് ഉലഗാത്തില്യ ആള്‌ഗാക്കെ കാട്ടി കൊഡു>> എന്ത് സൊന്നാര്. 5എന്ത്‌ക്കെന്റ ഏസുദ് തമ്പില ബീസാക്ക് അവാനിലി ണമ്പിക്കെ ഇര്‌ക്കാലെ.
6ഏസു അവാര്‌ക്കെ: <<എനാക്ക് തഗ്‌ന്ത ണേര ബരാലെ. ആന ണിമാക്കൊ ഏദ് ഗള്യേക്ക്‌മ് കാര്യഗ സെയ്‌ല. 7ഉലഗാത്തില്യ ആള്‌ഗാക്ക് ണിമാണ തൊറേയ മുഡ്യമാട്ട. ആന അവാര് സെയ്‌ര കാര്യഗ കെ്ട്ടാദ് എന്ത് ണാന് സൊല്ലുറാദ്‌ണാലെ എനാണ അവാര് തൊറേന്തെക്ക്‌റാര്. 8ണിമ്മ ണോമ്പിക്ക് പോയിരി. എനാക്ക് തഗ്‌ന്ത ണേര ഇന്നിമ് ബരാത്താദ്‌ണാലെ ണാന് ഈ ണോമ്പിക്ക് പോരാദില്ലെ.>> എന്ത് സൊന്നാ്. 9ഇച്ചെ സൊല്ലി ഏസു ഗെലീലെ ണാഡിലി താനെ തങ്കിനാ്.
10എന്താല്‌മ് തന്ന് തമ്പില ണോമ്പിക്ക് പോന പ്‌റ ഏസുമ് ആര്‌ക്ക്‌മ് തെര്യാദെ സൂഗാന പോനാ്. 11ആന ണോമ്പി ഗള്യേലി എഗുദാര്: <<അവാ് ഏദിലി?>> എന്ത് കേ്ട്ട് കൊണ്ട് ഏസുണ പരാന്താര്.
12ആള് കൂട്ടാത്തിലി ഏസുണ പറ്റി: <<അയാള് ണല്ലവാ്>> എന്ത് ലേസ ആള്‌ഗാമ് <<അല്ല, അവാ് ആള്‌ഗണ ഏമാത്ത്‌റവാ്>> എന്ത് ബേ്റെ ലേസ ആള്‌ഗാമ് പജിക്കി പജിക്കി സൊല്ല്യ പ്‌ഡിത്താര്. 13ആന എഗുദാര്‌ണ അഞ്ചി ആള്‌ഗ കേ്ക്ക പാസെ ആര്‌മ് ഏസുണ പറ്റി പേസാലെ.
ണോമ്പി ഗള്യേലി ഏസു പഡ്‌സ്‌റാ്
14ണോമ്പി പഗ്‌ദി ആഗാട്ട്യെല്ല ഏസു സാമികൂരേക്കെ പോയി പഡിസ്യ പ്‌ഡിത്താ്. 15<<പഡിപ്പില്ലാത്ത ഇവാന്‌ക്ക് ഇത്തറ അറുവു ഏദിലിര്‌ന്ത് കെ്ഡേത്ത്‌ദ്>> എന്ത് സൊല്ലി എഗുദാര് അദിസ്യപട്ടാര്.
16അക്കുളെ ഏസു അവാര്‌ക്കെ ഇച്ചെ ബദ്‌ള് സൊന്നാ്: <<ണാന് പഡ്‌സ്‌റ ബുദ്ദിണായ എന്ന് ണായ അല്ല, എനാണ സൊല്ലിബ്‌ട്ടവാ് പഡിസ്യ സൊന്ന ബുദ്ദിണായാത്തെ. 17സാമിക്ക് പ്‌ഡിത്താദ് സെയ്യ ആസെപഡ്‌റവാന്‌ക്ക്, ഈ ബുദ്ദിണായ സാമിലിര്‌ന്ത് ബരാദൊ ഇല്ലെ ണാനാഗെ സൊല്ലുറാദൊ എന്ത് ണെപ്പ് തെര്യു. 18അവാനവാന്‌ദ് അദിഗാരത്തിലി സൊല്ലുറവാ് തനാക്ക് പേര്‌പെര്‌മെ കെ്ഡേസ്യ ണോഡുറാ്. ആന തനാണ സൊല്ലിബ്‌ട്ടവാന്‌ക്ക് പേര്‌പെര്‌മെ കെ്ഡേക്കുഡൊ എന്ത് ണെനേക്കവാ് സത്ത്യ ഉള്ളവാ്ത്തെ. അവാനോഡെ കള്ളകവാഡൊന്റുമ് ഇര്‌ക്കമാട്ട. 19മോസെ ണിമാക്ക് സാമി സട്ടണ തന്തിര്‌ക്കാനല്ല? എന്താല്‌മ് ണിമ്മ് കൂട്ടാത്തിലി ആര്‌മ് അയ്യി സട്ടപഡി ണഡാക്കാദില്ലെ. പിന്നെ എന്ത്‌ക്ക് ണിമ്മ എനാണ കൊല്ല്യ ണോഡുറാദ്?>>
20അക്കുളെ ആള്‌ഗ: <<ണിന്നോഡെ കെ്ട്ടജാദി തട്ടിര്‌ക്ക്‌ദ് ണിനാണ ആര് കൊല്ല്യ ണോഡുറാര്?>> എന്ത് സൊന്നാര്.
21അദ്‌ക്ക് ഏസു സൊന്നാ്: <<ണാന് ഒരു അദിസ്യ സെയ്‌ദെ. അദ്‌ണ കണ്ട് ണിമ്മൊട്ടുക്ക് അദിസ്യപഡ്‌റേര്. 22മോസെ ണിമാക്ക് സുന്നത്ത് സാത്ത്‌റ സെയ്‌ര സട്ട തന്താദ്‌ണാലെ ണിമ്മ ഒരു മ്‌ഗാണ ഒയിവു ണാള് സുന്നത്ത് സാത്ത്‌റ കളിക്കേര്. [ആന ഇദ് സെയ്യ പ്‌ഡിത്താദ് മോസെ ഇര്‌ന്ത കാലാത്തിലി അല്ല. പാട്ടല കാലാത്തിലിത്തെ.] 23മോസെ ബെത്ത സാമി സട്ടണ ണഡാത്ത്യ ബേ്ണ്ടി ഒയിവു ണാള്‌മ് ഒരു മ്‌ഗാണ സുന്നത്ത് സാത്ത്‌റ കളിക്കേര്. അച്ചെ ആനാക്കി ഒരു മന്‌സാന ണാന് ഒയിവു ണാള് ഒരേപെ്ട്ട് തെ്ള്‌സിനാദ്‌ണാലെ ണിമ്മ എന്ത്‌ക്ക് എനാണ മൊനേക്ക് പഡ്‌റാദ്? 24ണിമ്മ കണ്ണ്‌ക്ക് കാണ്‌റ പാസെ ബിദിക്കാദി. ണേര് എന്തായെന്റ് തെരിന്ത പ്‌റ ബിദിരി.>>
ഇവാ് ക്‌റ്‌സ്‌ത്ത്‌ത്തേഗ?
25അക്കുളെ എര്‌സലേമിലി ഇര്‌ക്ക പഗ്‌ദി ആള്‌ഗ: <<അവാര് കൊല്ല്യ പരാക്കാദ് ഇവാനത്തെ? 26ഇദാ ണോഡി, അവാ് എല്ലാര്‌ദ് മുന്തുക്ക് ണായ പേസ്‌റാ്. എന്ത്‌ട്ട്‌മ് അവാര് അവാന ഒന്റുമ് സൊല്ലുറാദില്ലെ. ഇവാ് ക്‌റ്‌സ്‌ത്ത്‌ത്തെ എന്ത് സെരിക്ക്‌മ് അദിഗാരിഗാക്ക് തെരിന്ത്‌ദൊ? 27എന്താല്‌മ് ഇവാ് ഏദിലി ഇര്‌ന്ത് ബന്താ് എന്ത് ണമാക്ക് തെര്യു. ആന ക്‌റ്‌സ്‌ത്ത് ബര്‌ഗാട്ടി അവാ് ഏദിലിര്‌ന്ത് ബരാ് എന്ത് ആര്‌ക്ക്‌മ് തെര്യമാട്ട>> എന്ത് സൊന്നാര്.
28അദ്‌ണാലെ ഏസു എഗുദാര് പരേസ്‌റ കൂരേലി പഡിസി കൊണ്ട് ഇര്‌ക്കാട്ടി, <<ണിമാക്ക് എനാണ തെര്യു. ണാന് ഏദിലിര്‌ന്ത് ബന്തെ എന്ത്‌മ് ണിമാക്ക് തെര്യു. ണാന് എന്ന് അദിഗാരത്തിലി അല്ല ബന്താദ്. ആന എനാണ സൊല്ലിബ്‌ട്ടാദ് സത്ത്യമാനവാ്ത്തെ. അവാന ണിമാക്ക് തെരിരാദ്‌മില്ലെ. 29ആന ണാന് അവാ് പട്ടിലിര്‌ന്ത് ബന്താദ്‌ണാലേമ് അവാ് എനാണ സൊല്ലിബ്‌ട്ടാദ്‌ണാലേമ് എനാക്ക് അവാന തെര്യു>> എന്ത് ബെല്ല്യാദ്‌ക്ക് സൊന്നാ്.
30അക്കുളെ ആള്‌ഗ ഏസുണ പ്‌ഡിക്ക്യ ണോഡിനാര്. ആന അവാന്‌ക്കുള്ള ണേര ബരാത്താദ്‌ണാലെ ആള്‌ഗ ആര്‌മ് അവാന അണ്ണാലെ. 31എന്താല്‌മ് ആള്‌ഗാദിലി എത്തിന്യൊ ആള്‌ഗ ഏസുണ ണമ്പിനാര്: <<ക്‌റ്‌സ്‌ത്ത് ബര്‌ഗാട്ടി ഇവാ് സെയ്‌ദാദ്‌ണ ബ്‌ഡ എത്തിന്യൊ അദിസ്യമാന അഡ്യാളഗ അവാ് സെയ്‌വാന?>> എന്ത് അവാര് സൊന്നാര്.
ഏസുണ കാവകാക്ക പഡെയാളിഗ പ്‌ഡിക്ക്യ ണോഡുറാര്
32ഏസുണ പറ്റി ആള്‌ഗ ഇച്ചെ ആങ്കീങ്ക് പജിക്കി കൊണ്ട് ഇര്‌ക്കാദ്‌ണ പരിസല കേ്ട്ടാര്. അദ്‌ണാലെ ഏസുണ പ്‌ഡിക്ക്യ ബേ്ണ്ടി എഗുദ പൂസാരി തലെവലാമ് പരിസലാമ് കാവകാക്ക പഡെഗണ ബ്‌ട്ടാര്.
33അക്കുളെ ഏസു: <<ണാന് ഇനി ണിമ്മോഡെ സെറ്റെ ണേരാത്തെ ഇര്‌ക്കെ. അദ്‌ക്ക് പ്‌റ എനാണ സൊല്ലിബ്‌ട്ട അപ്പാ് പട്ട്‌ക്ക് താനെ പോരെ. 34ണിമ്മ എനാണ പരാക്കുവേര്. ആന ണിമ്മ എനാണ കാണമാട്ടേര്. ണാന് ഇര്‌ക്ക പട്ട്‌ക്ക് ണിമാക്ക് ബര്യ മുഡ്യാമ് മാട്ട>> എന്ത് സൊന്നാ്.
35അക്കുളെ എഗുദാര്: <<ഇവാ് ണമ്മ കാണാദെ ഇര്‌ക്ക്യ ഏങ്ക് പോയ ണെനേക്കാ്? ഗ്‌റീക്ക്‌ക്കാറാര് പട്ടിലി സിന്തസിദാറ ആയിര്‌ക്ക ണമ്മ് ആള്‌ഗ ഇര്‌ക്ക പട്ട്‌ക്കെ പോയി ഗ്‌റീക്ക്‌ക്കാറാര്‌ണ പഡിസ്യ ണോഡുറാനൊ? 36<ണിമ്മ എനാണ പരാക്കുവേര്. ആന ണിമ്മ എനാണ കാണമാട്ടേര്. ണാന് ഇര്‌ക്ക പട്ട്‌ക്ക് ണിമാക്ക് ബര്യ മുഡ്യാമ് മാട്ട> എന്ത് അവാ് സൊന്നാദ്‌ക്ക് അര്‌ത്ത എന്ത?>> എന്ത് അവാര് തമാക്ക് തമാക്ക് പേസിനാര്.
ഉജുറു തര തണ്ണിദ് ഉറാവു
37ണോമ്പിദ് കഡേസി ണാള് ബന്ത്‌ദ്. അയ്യി ണാള്‌ത്തെ മുക്ക്യമാന ണാള്. അയ്യി ണാള് ഏസു എ്ന്ത് ണിന്റ്: <<തണ്ണിബേ്ക്കെ എ്ഡ്‌ക്കവാര്‌ഗെല്ല എന്ന് പട്ട്‌ക്ക് ബന്ത് കുഡിക്കുഡൊ. 38സാമി ബുക്കിലി എ്ള്‌ദിര്‌ക്ക പാസെ എനാണ ണമ്പ്‌റവാന്‌ദ് മനേസ്സ്‌ക്കുള്ളുക്കിര്‌ന്ത് ഉജുറു തര തണ്ണിര്‌ക്ക ണാലിഗ ഒഗു>> എന്ത് ബെല്ല്യാദ്‌ക്ക് സൊന്നാ്. 39തനാണ ണമ്പ്‌റവാന്‌ക്ക് കെ്ഡേക്ക്യ പോര സാമിണിഗാല്‌ണ പറ്റിത്തെ അവാ് ഇച്ചെ സൊന്നാദ്. അന്നാരമാട്ട്‌മ് ഏസുക്ക് മദ്‌പ്പ് കെ്ഡേക്കാദെ ഇര്‌ന്ത്‌ദ്. അദ്‌ണാലെ ണമ്പ്‌റവാര്‌ക്ക് സാമിണിഗാല് കെ്ഡേക്കാദെ ഇര്‌ന്ത്‌ദ്.
ഏസുണ പറ്റി ആള്‌ക്ക് ഒരൊരു ണായ സൊല്ലുറാര്
40ഏസു സൊന്ന ണായഗണ കേ്ട്ട് ആള് കൂട്ടാത്തില്യ ലേസ ആള്‌ഗ: <<ഇവാ് ണേര്‌മായിമ് സാമി സൊല്ലിബ്‌ഡുവെ എന്ത് സൊന്ന അയ്യി സാമിദാസ്‌ത്തെ?>> എന്ത് സൊന്നാര്.
41പഗ്‌ദി ആള്‌ഗ: <<ഇവാ് ക്‌റ്‌സ്‌ത്ത്‌ത്തെ>> എന്ത് സൊന്നാര്.
ആന ലേസ ആള്‌ഗ: <<ക്‌റ്‌സ്‌ത്ത് കണ്ടിപ്പായി ഗെലീലേലിര്‌ന്ത് അല്ല ബരാദ്? 42ദാവീദ്‌ദ് കാല്‌ക്ക് പ്‌റാന്ത് ദാവീദ് പെ്ളേത്തിര്‌ന്ത ബെദ്‌ലെഗേമ് ഊരിലി ഇര്‌ന്ത്‌ത്തെ ക്‌റ്‌സ്‌ത്ത് ബരാദ് എന്ത് സാമി ബുക്കിലി എ്ള്‌ദാലേഗ?>> എന്ത് സൊന്നാര്. 43ഇച്ചെ ആള്‌ഗ ഏസുണ സൊല്ലി ഒരൊരു കച്ചിഗ ആനാര്. 44അവാര്‌ദിലി ലേസ ആള്‌ഗ ഏസുണ പ്‌ഡിക്കുഡൊ എന്ത് ണെനേത്താര്. ആന അവാര് ആര്‌മ് അവാന അണ്ണാലെ.
എഗുദ തലെവല ഏസുണ ണമ്പ്‌റാദില്ലെ
45അച്ചെ കാവകാക്ക പഡെയാളിഗ എഗുദ പൂസാരി തലെവലാദ്‌മ് പരിസലാദ്‌മ് പട്ട്‌ക്ക് തിലിമ്പി ബന്താര്. അക്കുളെ അവാര്: <<ണിമ്മ എന്ത്‌ക്ക് ഏസുണ പ്‌ഡിത്ത് ബരാലെ>> എന്ത് അയ്യി കാവക്കാറാര്‌ണ കേ്ട്ടാര്.
46അക്കുളെ കാവകാക്ക പഡെയാളിഗ: <<അയാള് പേസ്‌റാദ്‌ണ പാസെ ആര്‌മ് ഒരു ണാള് ഗൂഡി പേസാലെ>> എന്ത് സൊന്നാര്.
47പരിസല അവാര്‌ക്കെ: <<അപ്പ് ണിമാണാമ് അയാള് സദിത്താന? 48ണമ്മ്‌ദ് അദിഗാരിഗാദില്യൊ പരിസലാദില്യൊ ആരാറ്റ് അയാള്‌ണ ണമ്പിര്‌ക്കാര? 49ആന ഈ ആള്‌ഗാക്ക് മോസെ ബെത്ത സാമി സട്ട തെര്യ. അദ്‌ണാലെ അവാര് സാപ പ്‌ഡിത്തവാര്‌ത്തെ>> എന്ത് സൊന്നാര്.
50ആന മുദ ഏസു പട്ട്‌ക്ക് പോയിര്‌ന്തവാന്‌മ് അയ്യി പരിസല കൂട്ടാക്ക് പട്ടവാന്‌മാന ണിക്കോദിമോസ് അവാര്‌ക്കെ: 51<<ഒരു മന്‌സാ് സെയ്‌ദാദ് എന്തായെന്റ് അവാന മുദ കേ്ക്കാദേമ്, അവാ് സെയ്‌രാദ് എന്തായെന്റ് തെര്യാദേമ് മോസെ ണമാക്ക് ബെത്ത സാമി സട്ട അവാന കുറ്റ ബിദിക്ക്‌ദ?>> എന്ത് കേ്ട്ടാ്.
52അക്കുളെ അവാര്: <<അപ്പ് ണീമ് ഗെലീലെക്കാറാന? സാമി സൊല്ലുസുലാക്കണ പഡിത്ത് ണോഡ്. ഗെലീലേലിര്‌ന്ത് ഒരു സാമിദാസ്#7:52 ഒരു സാമിദാസ് മുദ എ്ള്‌ദിനാദ്‌ണ ണോഡി എ്ള്‌ദിന ലേസ കായിദാത്തിലി സാമി സൊല്ലിബ്‌ഡുവെ എന്ത് സൊന്ന അയ്യി സാമിദാസ് എന്ത്‌ത്തെ എ്ള്‌ദിര്‌ക്കാദ്. ബരാദില്ലെ എന്ത് അപ്പ് ണിനാക്ക് തെര്യു>> എന്ത് സൊന്നാര്.
53 # 7:53 മുദ എ്ള്‌ദിനാദ്‌ണ ണോഡി എ്ള്‌ദിന ലേസ കായിദാത്തിലി 7:53-8:11 മാട്ടുള്ള സൊല്ലുസുലാക്ക ഇല്ലെ. [അദ്‌ക്ക് പ്‌റ അവാരൊട്ടുക്ക് അവാനവാന്‌ദ് കൂരേക്കെ പോനാര്.
Zvasarudzwa nguva ino
ഓഗന്നാ് 7: സാമിദ് സേദി
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Literature