Imilimo 23
23
1Pauli alolechesya piwungwe lyakwe wakapanzya avwanga au, Wanawitu! Imiwele yane yonsi ayakusimichila muwulanzi wane wonsi pankolela pakwe Leza, ukufika nilelo. 2E simapepo mukulu e Ananiya anena wane wimilile papipi nu Pauli ukuti wamupame pamulomo. 3Pauli amunena ati, Nachawuzimanye Leza wandi akuzangule—we luwumba lukatase chipawu-we! Uyisile papa ukuti umpanzye ndimuno amasundo yayila, ukuwa ukusundulula isundo ukuwanena ukuti wanjume!
4Awantu wane wapalamizile kwe Pauli awati, Ukutuka simapepo mukulu uwakwe Leza!
5Pauli atolelela ati, lye wanawitu, nenji ntamanyile ndi wesimapepo mukulu. Amazwi matele yavwanga yati, Kusikwezya ukuvwanjila kapanzya wawantu wako uluwi.
6Ala Pauli walola kuno wamwi wane walinji mwiwumba walinji awa Saduki nawanji awa Falisi, apunda mwiwungwe ati, Wanawitu, Nenji ne mu Falisi, umwana wawa Falisi. Kanonzi nkupanzwa amuno nkusuwila kuno awafwe walizyulupuka!
7Ala wavwanga wonye-woo, awa Falisi na wa Saduki awatalika impokoto, iwumba alipawunkana. 8(Muno awa Saduki watanji awantu watanga wazyulupuke ndiwafwa, nakuno kusi awangeli nanti amizimu; ukuwa awa Falisi weni wasuwizile mwakwe vyonsinye vitatu.) 9Ngapano impokoto ilutilizya, nga awazambilizya wamwi awamas undo wane walinji kwiwumba lya wa Falisi awimilila awakana nkaninye awati, Tutazanile uluwi lumwi mumuntunye wee! Nche pamwi amuzimu, pamwi amungeli awino amuvwanzizye!
10Imipanzi ikula ilutilizya achipa numusika wavita intete ati wandi wanyonkolanie Pauli tunyama-tunyama. Achaleka akomelezya ivita vyakwe ukuti vinjile mwiwumba vikasompole Pauli, wamwinjizye mwilinga.
11Akula kwila Imfumu iyimilila lwapapipi nu Pauli iti, Sankana! Wampanichisizya uwukalola wako moo mwe Yerusalemu, avino uchite na mu Romanye.
Awakwamba ukukoma Pauli
12Uwacha awa Yuda wamwi awawungana apaliponga awakwamba. Awalapa awati, watize walye chimwi nanti akung'wa minzi, suka watele wakome Pauli. 13Wano wambanga wonye-woo walusizye pamakumi yani wonsi apaliporga. 14Ngapano awaya kwe wasimapepo wakulu nakwakwe wasongo awati, Tulafile ukuti tutize tulye chimwi suka ndi twatela twakoma Pauli. 15Achaleka aleni, mwemwenye niwumba tumani izwi kwemusika wavita vyawa Roma ukuti awaletele Pauli, mukopelezye muwe ngati mukulonda ukwivwichisya umulandu wakwe ichete. Twandi tumuteyamile tumukome pane atani afike koo.
16Ukuwa umwipwa wakwe Pauli uwachonsi ayivwa ivyakuteyamilwa kwakwe nyinalume; achaleka aya mwilinga anena Pauli. 17Ngapano Pauli ayita inkombe yimwi amunena ati, Senda umulumendo wee umutwale kwemusika wavita, akulonda kamunene chimwi. 18Inkombe isenda umulumendo amutwala kwemusika wavita afika ati, Umukungwe e Pauli watela wanjita wandambilizya ukuti ndete umulumendo wee kwewewe, akasi akunene chimwi.
19Musika alema umulumendonye weyo pikasa, amuwuzya kumbali ati, Nga ukulonda unene chani?
20Ati, Wakapanzya wawa Yuda wivwine ukuti mutondo wize wakulambilizye utwale Pauli kwiwungwe lyamilandu, wakopelezye ngati wakulonda ukwivwichisya ivyamulandu wakwe ichete. 21Ukuwa utize uwivwe, amuno kuli awantu wane walusizye pamakumi yani wane wandi walange wavwamilizile wakumulindilila. Walafile ichilapo chakuti watanga walye chimwi nanti akung'wa aminzi. Kanonzinye kaa wavwamilizile, wakulonda ukwivwa chino wandi utake.
22Musika anena umulumendo ati, Utize unene wumwi uti uyizile walongola ichamwatanye woo kwenene. Aleka umulumendo apita.
Awatwala Pauli kumulasi e Felix
23Ngapano musika ayita awavita vyakwe wawili ati, Yanga kasende awavita imyanda yiwili (200) waye ku Kaseriya, apaliponga nawakakwelela wakwe wakavwalo amakumi munenulambali nawakavwinta wamasumo imyanda yiwili (200), mukatuke ilelo pane kwafita. 24Mupe Pauli wakavwalo wamwi awakukwelela, mumutwale kwe Felix umulasi umutende. 25Ngapano musika walika kalata wamazwi yakuti,
26Mulali, nenenye ne Klaudiya Lisiasi nkulamuka kwakwe wewenye Felix we kapanzya mukulu mulusye. 27Awa Yuda walemile umuntunye weyo walonda ukumukoma. Nalile pano nivwa kuno amu Roma, nayile nivita vyane naya namupoka. 28Nalondanga ukuti manye chino wakumupela umulandu, achaleka namutwazile kwiwungwe lwayo. 29Ukuwa ntaweni umulandu wumwi uwakumukomela nanti awakumunyepa muvingololo; naweni kuno wamuvililichizile muno wapanzyanianga kuvyamasundo yawo, 30Nga nalile pano nivwa kuno awa Yuda wamwi wakumupanjila uwuwi, nazana kuno achizima ukuti mutume kwewewe. Nanenile wane wakulonda chimwi kweweliwe wize wamupe umulandu kwakwe wewenye.
31Achaleka awavita wawomvile namaka yawo. Wasenda Pauli uwusiku waya wamufisya kwe Antipatrisi. 32Uwacha ivita vino vyapitanga pansi vyanyochela kwilinga wasya awavita vyakwe wakavwalo ukuti wapite nu Pauli. 33Awala wafika kwe Kesariya awapa kapanzya kalata, nu Pauli-nye. 34Ala kapanzya wawazya kalata awuzichisya Pauli kumwawo. Ala kapanzya wivwa kuno walinji awaku Silisia, 35ati, Nandi njize njivwe pano wane wakukulongola wafika. Ngapano akomelezya ukuti Pauli asunjililwe nkani mwisano lyakwe Herodi.
Zvasarudzwa nguva ino
Imilimo 23: WWN82
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.