Imilimo 26
26
Pauli ayiluwululila pakwe Agripa
1Agripa anena Pauli ati, Kanonzi watupulilwa ukuti uyiluwululile. Ngapano Pauli akunzulula ikasa lyakwe ayiluwululila avwanga ati,
2Mfumu Agripa! Nasyuka kutaluvile kuno ilelo lyoo nati ndayiluwululila pakwe wewe kuvintu vyonsi vino awa Yuda wandongola. 3Ukulusyenye nakunda amuno wamanyichisya imyata yawa Yuda yonsi namawuzyonye. Nkukuiambilizya nkaninye, ukuti ukolopane unteyelezye.
4Awa Yuda wonsi wamanya imiwele yawulanzi wane wonsi ukufumilila kuwucheche. Wamanya ivyawulanzi wane ukutalichila kunkwatwa yane pano nikalanga munsi yane namwe Yerusalemu. 5Wamanya pyu, ndachino wakuionda ukulinganizya, kuno pakutalikatalika nalinji mwiwumba tale ilyachipepelwe chitu, ichawa Falisi. 6Kanonzi njimilile paa nkupanzwa amuno nkulolela ilayilizyo lino Leza waiayilizizye watatakulu— 7ilayilizyonye lyolyo lino imyiko ikumi nayiwili yawantu witu wakalolela ukulipochelela, pano wakupepa Leza uwusiku numusanya. Achaleka muno akulolelanye koo, mulali, awa Yuda wakunjamba! 8Ngamuno chani chino mwenji mwe wa Yuda chikuwatalila ukusuwila kuno Leza akazyulupula awafwe?
9Nenenye nalwane nelengenianga kuno achizima ukuchita vyonsi iviwipe ukusanguchila izina lyakwe Yesu wa mwe Nazareti. 10Wowonye avino nachitanga mwe Yerusalemu. Napochelelanga amaka kwe wasimapepo wakulu ndanga nkunyepa awantu wavule wakwe Leza muvingololo; napano wanyongwanga naninye nazumilizyanga. 11Nawatamyanga penye mung'anda zyakupepela, ndawapatichizya nukuwapatichizya ukuti wakane isuwilo lyawo.
Nawakalalilanga nkaninye indaya namutwaya tunjinye indawayimvya.
Pauli alondolola imitontolochelwe yakwe
(Imilimo 9:1-19; 22:6-16)
12Nayile ku Damasika namaka yonsi mbali nukukomelezwa nawasimapepo wakulu. 13Mulali, panzila umusanya pakasi, naweni ukuwala kukulu ukulusye ukuwala kwilanzi kwafuma mwiyulu kwiza kwandiwilizya apaliponga nawantu wano walinji nani. 14Swensinye atupona pansi, nga injivwa izwi lyamvwanzya mululimi lwa chi-Heberi lyati, Sauli, Sauli! Ngamuno chani chino ukunjimvya? Ukuyichisa pano ukupanta kunsizi, ngati ankambaku yino ikupanta kunsonzo yakwe yisikulu. 15Nga imbuzya inti, Ngaweweni mulali? Ngapano imfumu ati, Ne Yesu wino ukuyimvya. 16Ukuwa katuka uyimilile. Nakulolechela ukuti nkusole uwe wemuwomvi wane; wandi uwalandila wanji muno wandolela nene ilelo, nga navino nandi ndakulanjizya. 17Ndikutula kuwa Israeli nakumakandi, kuno nandi nkutume. 18Ukawiyulange aminso uwafumye mumfinzi waye ukuswepe, swinya uwafumye mumaka yakwe Satana waye kwe Leza, alyakuti ndi wansuwila nene watetelwe kuluwembu lwawo nga wawe namasyo mukasi muwasolwa wakwe Leza.
E Pauli alondolola ivyamulimo wakwe
19Achaleka, mfumu Agripa, champosile ukukanuzya ichilota chino chafumile mwiyulu. 20Natalichizile ukuwizya mwe Damasika nga inja mwe Yerusalemu, ngapano munsi yawa Yuda yonsi namumakandinye, nawawizizyanga ukuti watontolokwe kuluwembu lwawo waye kwe Leza, walanjizye imilimo yakutontolokwa kwawo. 21Chonye-choo a achino awa Yuda wandemezile pano nalinji mung'anda yakwe Leza, walonda ukuti wankome. 22Muno we Leza wanjavwa achaleka ndipo ukufika nilelo, njimilile paa nkupa uwukalolawane pakwe wonsi, awatichi nawasongo. Nkuvwanga ivilivyonganye vino awatumwa nu Musa wavwanzile awati vilipona: 23ukuti Mesaya ale ayize ayimbe swinya ayize atalichile ukuzyulupuka kuwafwe, awumbule ukuwala kwikomolwa kuwa Yuda nakumakandi.
24Ala Pauli wayichinjilila wonyewoo, Festasi amupazamuchila ati, Wechipena, Pauli! Ukusambilila kwako kwakupenia!
25Pauli atolelela ati, Ntapena, mulali! Amazwi yano nkuvwanga ayakusimichila matupu. 26Mfumu Agripa! Nkuvwanga nukusinama konsi, amuno wamanya ivintunye-vyoo. Nkusimichila umanyile vyonsi ichete-chete, amuno pasi chimwi chino chavwama kuntanda. 27We mfumu Agripa, wuzye wasuwila muwatumwa? Kweni amuno wasuwilanye!
28Agripa anena Pauli ati, Wuzye mukapindi katichinye kaa akano ukulonda imbe ne mu Klistu?
29Pauli atolelela ati, Asi amuno ampindi ntichi nanti antali, ukuwa amapepo yane kwe Leza ukuti wewenye nawonsi wane wakunteyelezya ilelo muwe ndivino nene indi, suka ndakunyepwa niminyololonye yoo kweni pole!
30Ngapano imfumu, nukapanzya, nu Berinisi, nawanji wonsi awakatuka, 31awala wati wafuntuka awanenana wakuti, Kweni umuntunye wee atachita ichiwipe chimwi chino angakomelwa nanti akumunyepwa muvingololo. 32Ngapano Agripa anena Festasi ati, Ndachino umuntunye wee wanga alange atakutila imfumu nkulu inkuta wanga asapulwe.
Zvasarudzwa nguva ino
Imilimo 26: WWN82
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.