Romans 3
3
1Ngafwandi achani, chino awa Yuda weni walusizya amakandi? Pamwi wuzye kweni ukulembwa uwusilama kuli nawuzi-chi? 2Ili, kweni walusya nkaninye, mwakwe vyonsi! Amuno pakutalika, Leza wasuwizile awa Yuda awano awapa amazwi yakwe. 3Ngafwandi chingawa wuli ndi awa Yuda wamwi wasi nisuwilo? Wuzye fwandi chochonye achino chingalesya ukuti Leza asi amusuwilwa? 4Nanti katichi-tichi! Leza weni awakusimichila, chingatenga awantu wonsi weni awachawufi. Ndimuno Amawaliko Matele yavwanjila yati,
Wenji ukulungamika kwako, we Leza, kukaloleka mumuvwango;
ukasinda mumilandu ponsi pano ukupanzwa.
5U kuwa nga tungati wuli ndi uwuwipe witu awuno wukasokolola palwenze ukulungamika kwakwe Leza? Nga tungati wuli? Wuzye tunagti Leza akakwifya muno akatusunda? (Nkuvwanga muno awantu wakavwanjila.) 6Nkuti ng'o! Amuno fwandi nd'achino Leza asi awakusimichila, nga angapanzya awamunsi wuli?
7Ngafwandi ndi uwufi wane awuno wukaleka uwukankala wakwe Leza awuloleka apatiswe; ngachino nenji ngalanga nkakwitwa ukuti nemuwembu achani? 8Ole, ngafwandi amuno chani chino tutanga tuti, tuyani tuwachita uwuwipe alyakuti uwuzima wize? Nachawuzimanye avino awantu wamwi wakachita, wakankwelengula awantuka nukuntuka awambipizya nukumbipizya awati naninye nkavwanga vyovyonye. Awantu wamwatanye woo walisundwa ukulingana nimiwele yawo.
Pasi umuiungamane nanti wenga-wenga
9Ole, wuzye swe wa Yuda twazipa twalusya amakandi muno achani? Nanti katichi-tichi! Nawalanjizya kuno awa Yuda namakandinye awuliwonga wonsinye awazya waluwembu. 10Ndivi no Amawaliko Matele yavwanga yati,
Pasi umulungamane nanti wengawenga,
11pasi nawumwi wino akakwiluka,
nanti awino akavwamba Leza.
12Awantu wonsinye wafutatila Leza, wonsinye wawembuka.
Pasi nanti wenga-wenga wino akachita ichete, nanti wenga.
13Imilomo yawo yasama ngati ankungwe zino zili kwasi;
uwuwipe wawo uwawufi wukaselasela pandimi zyawo,
namazwi yawo amawipe yakafondomoka mumilomo yawo ngati ansalile zyanzoka,
14wizuzya intipo zyawululu mumilomo yawo pwi.
15Wakasamalila kukuzwisya uwazi nukukoma;
16konsinye kuno wakuyanga wakusyanga ivyala vitupu nuwulanda.
17Watamanya inzila zyamutende,
18nanti we Leza-nye watamumanya nanti akumutina wasimutina.
19Ukuwa twamanya kuno amasundo yonsi yano Leza wapile Musa, ayakwe walyanye wane wazipila ukuyatontela, alyakuti awantu wonsi watize wawe nutupemezyo wamanye kuno awamunsi wonsi walipanzwa nu Leza. 20Amuno amasundo yasi ayano yakalungamika umuntu kwe Leza nd'achino watontela amasundo; chino kwawela amasundo alyakuti awantu wavimanya ndi wawembuka.
Vino Leza akalungamika awantu
21Ukuwa kanonzi Leza wasokolola inzila yakwe iyakuputulila imilandu yawantu ukuti walungamane kweweliwe, yoyonye isi anzila yakutontela amasundo. Amasundo nawatumwaawano wapanichisya pakwe chonye-choo: 22Leza akaputula umulandu wamuntu wino akuwika insingo mwakwe Yesu Klistu. Leza akalungamika wonsi wano wasuwila Klistu, amuno kusi uwusilamo wumwi; 23awantu wonsi wawembuka wali ukutali nitulwa lyakwe Leza. 24Ukuwa muno achawila chankumbu nkulu zyakwe Leza wonsi walungamikwa nu Yesu Klistu wino wawakulula. 25Leza wafimile Yesu Klistu alyakuti mumfwa yakwe amuno awantu watetelelwe ukuwifyakwawo, ndi wamusuwila. Leza wachisile wonye-woo alyakuti alanjizye uwulungamane wakwe. Kali, Leza wazizimichizizye nanti kupechela kuluwembu lwawantu; 26ukuwa kanonzi Leza akalola uluwembu lwawantu, kukulanjizya uwulungamane wakwe. Mumwatanye woo akayilanjizya kuno amulungamane swinya akalungamika wonsi wane wakusuwila Yesu.
27Ngafwandi swenji, tungayitumvizya chani? Nachimwi! Ngamuno chani chino tutanga tuyitumvizye? Wuzye tutanga tuyitumvye muno tukatontela amasundo? Awe, nanti katichi-tichi! Tungayitumvya amuno tukasuwila. 28Achaleka fwandi nkani-nkani Leza akalungamika umuntu ndi wasuwila, ukuwa asi amuno akuchita chino amasundo yataka. 29Wuzye nche e Leza we Leza wawa Yuda watupu? Wuzye amakandi weni asi we Leza wawo? Nachawuzimanye nawonye we Leza wawoo 30Leza awiliwenganye-nsu, wino alilungamika awa Yuda namakandinye muno alisuwilo lyawo. 31Wuzye fwandi vino isuwilo lyoo alino likalondwa twazipila ukusambilizya amasundo? Awe, nanti katichi-tichi; ukuwa isuwilo alino likawomya amasundo.
Zvasarudzwa nguva ino
Romans 3: WWN82
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.