Juan 3
3
I Jesús xaq ma Nicodemo
1O jun chke aj fariseo chi ma Nicodemo ub'i, ire le are jun achi chi lik nim upatan chkixol aj Judío. 2I ma Nicodemo le, x-e che i lapanik ru' i Jesús cha'ab', xub'ij che:
—Tijonel, qeta'am chi at utaqom li i Dios chuk'utik chqe, man mijun ktiki chu'anik i nimaq taq il le we nti i Dios ru' —xcha.
3I Jesús xub'ij che:
—Lik saq laj tzij kinb'ij chawe, jun we kalax ti ukamul, lik kok ti uri che i ajawinik re i Dios.
4I ma Nicodemo xutz'onoj che:
—¿Wach u'ankil uri ile chi jun winaq lik nim chik, kalax tan chik ukamul? ¿Xatab'a kok chik puch'akul uchuch, man kalax tan chik? —Xcha.
5I Jesús xula' uwach che:
—Qatzij kinb'ij chawe: Mijun kok chila che i ajawinik re i Dios we alaxnaq ti uk'aslemal ru' ya xaq ru' Lo'laj Utewal i Dios. 6Jun we xwi alaxnaq che uqajaw uchuch, to' winaq uri, xwiri i jun chi alaxnaq uk'aslemal rumal Lo'laj Utewal i Dios, lik rak'al i Dios uri. 7Matok il che i xinb'ij chawe: Chi konojel ile o uchak kealax tan chik ukamul. 8I tew xaipa kik'aw wi; tupu kata uch'awb'al xwiri aweta'am taj ipa petnaq wi xaq ipa k-e wi. Xaq je keje ni'pa i kealax ru' Utewal i Ajwal.
9I ma Nicodemo xutz'onoj chik che:
—¿Wach taq mer u'anik ile?
10I Jesús xula' uwach che:
—¿Wach usuk' ile chi yet at nim laj tijonel ke aj Israel, xwiri kata ti ub'e ile? 11Saq laj tzij kinb'ij chawe: Yoj kojlapan chrij i wach taq qeta'am; xaq ronojel ni'pa i qilom are ile kqab'ij; xwiri yix kikoj taj wach i kqab'ij chiwe. 12We kikoj taj wach i kinb'ij chiwe re i k'aslemal waral chwach i jyub' ta'aj, ¿Wach ukojik uri ki'an che we kinlap i k'aslemal chiwe aj chikaj?
13Mijun elnaq b'i chikaj; xwi i Jun chi qajnaq li chikaj, chi ke'eloq are jun pacha Winaq chi xolalaxoq chwach ulew. 14Keje pacha xu'an ma Moisés chi xuyak an uk'exwach i kumatz chikaj pa tz'inilik jyub' chaqij, xaq keje ku'an ni jun chi pacha Winaq chi Xolalaxoq chwach Ulew kyak nu b'i chikaj, 15man keje ile pachin kkojon che Ire, lik kuriq ni uk'aslemal uri chi kk'is ti chik.
I k'axnab'al uk'ux i Dios chke konojel i winaq
16I Dios lik k'ax xeuna i winaq chwach i jyub' ta'aj, rumali xutaq li uk'ojol chi lik xa jun olik, man pachin jun kkojon che, lik kuriq uk'aslemal chi kk'is ti chik. 17Man i Dios xutaq ta li uk'ojol chwach i jyub' ta'aj yab'al i tojpen pkiwi i winaq, ire xutaq li Uk'ojol elsab'al ke i winaq chupam i kamik.
18Pachin jun kkojon che Uk'ojol i Dios, lik kya' ti pa tojpen, xwiri pachin kkojon ti che, lik yatal chik uri pa tojpen man xkojon ti che Uk'ojol i Dios chi xa jun olik. 19I winaq chi kekojon taj lik je yatal chik uri pa tojpen, man ike kki'an jalajuj taq b'iroxik chi utz taj, are xk'un i saq chwach i jyub' ta'aj, ike are xki'ul i equm are ti i saq. 20Konojel ni'pa i winaq chi kki'an i utz taj lik tzel kkil i saq xaq kkaj taj chi ketejeb' ru' i saq man kkaj taj kenab'exik wach ketijin chu'anik. 21Xwiri pachin kki'ano pacha kub'ij i saq laj tzij, ketejeb' ru' i saq, man keje ile k-iltaj ni ronojel ni'pa i kki'ano chi are urayijb'al i Dios.
I ma Wan, chi Ajqajsanel Ya, klapan chik chrij i Jesús
22Chrijil chik ronojel ile, i Jesús junam ku' utijoxelab' xe'e che i ulew Judea, chila xenajtin wi chuqajsaxik ya pkiwi i winaq. 23Xaq keje ma Wan ktijin chuqajsaxik i ya pkiwi i winaq, chila Enón, chunaqaj i jyub' Salim, man chila che i k'ijib'al le, lik k'i i ya olik, rumali i winaq keupon chila xaq kqajsax i ya pkiwi. 24Ile xuk'ulmaj chuxe'el uminik ma Wan prexil.
25Xwiri keb' oxib' chke uwinaq ma Wan xkichap kib' che i tzij ru' jun aj Judío puwi u'anik ch'am che kib' chwach i Dios. 26Are uri xe'e chub'ixkil che ma Wan:
—Tijonel, kk'un chak'ux i achi chi xupon awu' jela kanoq chila prelb'al ij che i raqana Jordán, chi xaq xalap chqe chi nim u'ij, wo'or ktijin chuqajsaxik i ya pkiwi i winaq, xwi ta la ile, konojel i winaq ktijin ki'enam ru' —xecha.
27Are uri ma Wan xub'ij chke:
—Ronojel ni'pa ketiki i winaq chu'anik are i Dios yawnaq chke, 28yix lik xita are xinb'ij chi yin in are ti i Cristo, yin xa xinnab'sax li chwach Ire. 29Che jun k'ulankil i rajaw i ali are i ala, i ramiy i ala chi kk'uli'ik o chila, are kuta uch'awb'al i ala lik kkikotik xaq keje inkikotemal yin ile wo'or. 30Ire rajwaxik chi kok'il kel b'i u'ij xaq yin rajwaxik kok'il kqaj li in-ij. Keje ile xub'ij ma Wan chke.
I Jun chi kpe chikaj
31I Jun chi kpe chikaj are Ire o puwi ronojel, i jun we aj chwach ulew are i b'iroxik chi to' aj chwach ulew kulapo. Xwiri i Jun chi kpe chikaj lik o puwi ronojel, 32xaq ronojel ni'pa i kub'ij lik are rilom xaq utom chila ru' i Dios. Xwiri mijun kukojo wach i kub'ij. 33Xwiri we o jun kukojo wach i kub'ij, lik kusaqij uri chi i Dios kub'ij i saq laj tzij. 34I jun chi taqtal li rumal i Dios, kub'ij i tzij chi re i Dios, man i Dios lik k'i utewal kuya che, 35I Ta chikaj lik k'ax kuna Uk'ojol, xaq xuya pu'ab' ronojel ni'pa i olik. 36Pachin kkojon che Uk'ojol i Dios o uri uk'aslemal chi kk'is ti chik; xwiri pachin jun kkojon ti che nti uri uk'aslemal chi kk'is taj, xa kya' ni uri i nim laj utojb'alil umak rumal i Dios.
Zvasarudzwa nguva ino
Juan 3: ACHICUB
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Biblia Achí de Cubulco, Derechos reservados de Sociedad Bíblica de Guatemala