Mufananidzo weYouVersion
Mucherechedzo Wekutsvaka

मत्ती 2

2
येशूकी दर्शन जाट्‍की राछ ज्‍योतिषीको
1येशूओ जन्‍म यहूदियुङ बेथलेहेम डेच लाङ्‍घाङ छानन्‍या। होडीक बेलुङ राजा चहीँ हेरोद लेया। टब पूर्वउङ ज्‍योतिषीको होसकोकी पाचै यरूशलेमाङ राहा। 2होखुरीकै इट डेयार गीना, “चाम-चाम यहूदीकुङ राजा छानार जन्‍मडीस्‍च कुला ले? हीजैडेनाङ कानै होसको जन्‍मडीस्‍च कुरा थाहा याछ टुगाकी पूर्वाङ फेर्‌च डाङा र होसकुङ दर्शन जाट्‍की राछ हो।”
3इसे कुरा सेयार हेरोद राजा आटडीसा, र होसको खाटा यरूशलेमुङ पट्‍ट न भर्मीको र आटडीसा। 4होटै हेरोद राजै मुख्‍य पुजाहारीको र धर्मगुरुकोलाक आर्‌घा अनी भेला जाटार गीना, “मुक्‍ति याछ ख्रीष्‍टौ जन्‍म कुला छान्‍ने?” 5होखुरीकै डेया, “यहूदियुङ बेथलेहेम लाङ्‍घाङ, हीजैडेनाङ धर्मशास्‍त्राङ अगमवक्‍तै इसे बारेयाङ इट डेम रीक्‍ङने:
6‘ए यहूदियाङ लेच बेथलेहेम लाङ्‍घा,
नाङ कुसे कीसीमै र यहूदियुङ शासककुङ मीघ्‍याङ कुसे डेनाङ र मार्‌जा माले
हीजैडेनाङ नाङ लकीङ काट जना शासक ख्‍योम्‍ह राल्‍हे
होचे गोठलाकै लेखा न ङौ भर्मी इस्राएलीकुङ हेरचाह जाट्‍ले।’#मीका ५:२
7इसे कुरा सेयार हेरोदै पूर्वलकीङ राछ ज्‍योतिषीकोलाक सुटुक्‍क आर्‌घार टुगा कुडीक बेला डाङ्‍च हो, डेम गीनार पट्‍टा लैडीया। 8हेरोदै होखुरीककी बेथलेहेमाङ इट डेम बीर्‌न्‍हका, “नाखुरीक नुङार होसे बालखकी सेम्‍हजा पानी। होसकी डुप्‍रखीङ ङाकी खबर जाट्‍की, अनी ङा र नुङार होसकोकी दर्शन जाट्‍ले।”
9हेरोद राजौ कुरा सेयार ज्‍योतिषीको बेथलेहेमलाक व्‍हा। लामाङ नुङ्‍चै जाट्‍नाङ होखुरीकै पहीला पूर्वाङ फेर्‌न ङुच होसे न टुगाकी फेरी डाङा। होसे टुगा होखुरीकुङ अघी-अघी नुङार बालख लेच ठाऔ सीढा ढेनाम टाहार होसे टुगा होला न अडडीसा। 10जब होखुरीकै होसे टुगा डाङा, र होखुरीक सार्‍है न मार्‍हाङा।
11ज्‍योतिषीको होसे इमाङ टाहार होखुरीक भीत्री पर्‌या, बालखकी होसकुङ मोइ मरीयम खाटा न डाङा, र होसकुङ मीकुवाङ घुकुरुक छानार होखुरीकै दर्शन जाटा। होटै न्‍हुइङ लाहा लहो कन्‍तुर खोल्‍हार सुन, बासना राछ ढुप र मुर्रओ भेटी चढडीया।
12होटै न्‍हुइङ ज्‍योतिषीकै माङ्‍नामाङ “हेरोद लेठाङ ल्‍हेसार मानुङ्‍की” डेच परमेश्‍वरौ चेतावनी डुपा र होखुरीक अर्‌को न लाम छानार लहो देशाङ ल्‍हेसा।
योसेफ लहो जहान लार मिश्राङ भोग्‍डीस्‍च
13होसे ज्‍योतिषीको नुङ्‍रखीङ योसेफै माङ्‍नामाङ परमप्रभुओ काट स्‍वर्गदूतकी डाङा र स्‍वर्गदूतै डेया, “सोना, तुरुन्‍तै बालख र होसकुङ मोइकी लार मिश्राङ भोग्‍डीस्‍की क्‍योटो। ङै ल्‍हेसार राखी माडेठर नाखुरीक होला न ङुकी हीजैडेनाङ हेरोदै बालखकी साट्‍च विचार जाट्‍न न ले।”
14याङ्‍च माङ्‍नाम डाङ्‍रखीङ योसेफ सोवार बालख र होसकुङ मोइकी लार मिश्र देशाङ नाबीक न व्‍हा। 15होटै हेरोद राजा मासीठर होखुरीक होला न ङुवा। इटजाट्‍न परमप्रभुये अगमवक्‍तालकीङ ङाक्‍च वचन पुरा छाना, “ङै मिश्र देशलकीङ लहो मीजाकी आर्‌घा।”#होसे ११:१
हेरोदै बालखकोलाक साट्‍की लैडीच
16जब ज्‍योतिषीकै लाहाकी ढाँट्‍डीच कुरा हेरोदै थाहा डीन्हा, र होसे साप्फी मीरीस ख्‍योहा। ज्‍योतिषीको लकीङ टुगा कुसे समयाङ डाङ्‍ङन्‍या डेच कुरा थाहा छान्‍च अनुसार हेरोदै बेथलेहेम र होसे वार्‌लाक-पार्‌लाकुङ लाङ्‍घुङ नीस वर्ष म्‍हाकुङ पट्‍ट न लेन्‍जा मीजाकोलाक साट्‍की लैडीया। 17टब होसबेला यर्मिया अगमवक्‍तै डेच वचन पुरा छाना,
18“रामा डेच ठावाङ काट सोर सेया,
डाँको डास्‍न-डास्‍न राप्‍च र विलाप जाट्‍च बाड्‍को सोर,
राहेल लहो मीजाकुङ लागी राप्‍म ङुच,
सान्‍त्‍वना यान्‍हाङ र होचे इन्‍कार जाटा,
हीजैडेनाङ होच्‍यो मीजाको सीमने।”#यर्मिया ३१:१५
19हेरोद सीरखीङ योसेफै परमप्रभुओ काट स्‍वर्गदूतकी मिश्र देशाङ माङ्‍नामाङ डाङा, 20र योसेफकी डेया, “सोना, बालक र होसकुङ मोइकी लार इस्राएल देशाङ ल्‍हेसो हीजैडेनाङ बालककी साट्‍की पाचको सीम भ्‍यामने।” 21होटै न्‍हुइङ योसेफै येशू र होसकुङ मोइकी लार इस्राएल देशाङ ल्‍हेसा।
22टर यहूदियाङ हेरोदौ मीजा अर्‌खीलाउसै बोयो ठावाङ राज्‍य जाट्‍न न ले डेच सेयार योसेफ होला नुङ्‍की बीर्‍हीया। फेरी परमप्रभु लकीङ माङ्‍नामाङ चेतावनी डुपार होसे गालीलाङ नुङा। 23होसे नुङार नासरत डेच ठावाङ ङुवा। इटजाट्‍न अगमवक्‍ताकोलकीङ ङाक्‍च वचन पुरा छाना, “होसकोकी नासरी डेले।”

Zvasarudzwa nguva ino

मत्ती 2: EMGP

Sarudza vhesi

Pakurirana nevamwe

Sarudza zvinyorwa izvi

None

Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda