मत्ती 4
4
उजाड ठावाङ येशूओ परिक्षा
(मर्कूस १:१२-१३; लुका ४:१-१३)
1होस न्हुइङ शैतानै येशूओ परिक्षा लाख्यौ डेम पवित्र आत्मै होसकोकी उजाड ठावाङ आल्हा। 2येशू चालीस याक र चालीस नाबीक सम्म उपवास ङुमभ्यारखीङ होसकोकी साप्फी मीटुक रन्छीया। 3टब होडीक बेला येशू लेठाङ शैतान राहार डेया, “इडीक नाको परमेश्वरौ मीजा हो डेनाङ इसे ल्हुङकोलाक रोटो छान्ख्यो डेम आज्ञा जाट्नी।” 4टर येशूये जवाफ याहा, “धर्मशास्त्राङ रीक्ङने, ‘भर्मी रोटोये मट्टै माजीवाले, टर परमेश्वरौ मेङेरीङ ख्योछ हरेक वचन लकीङ जीवाले।’#व्यवस्था ८:३”
5शैतानै येशूकी पवित्र सहर यरूशलेमाङ आल्हा र मन्दिरौ मीचुटाङ टोङ्हाका 6र डेया, “इडीक नाको साँच्ची न परमेश्वरौ मीजा हो डेनाङ इटै म्हाका फाल ङाप्नी, हीजैडेनाङ धर्मशास्त्राङ याङ्च रीक्ङने,
‘परमेश्वरै लहो स्वर्गदूतकुङ जीम्माङ नाकोकी याल्हे,
र होखुरीकै नाकोकी लहो मीहुट मीहुटाङ न ढान्ले, होटबाटै नाकुङ मीखुट्या ल्हुङाङ माठोक्ले।’ #भजनसंग्रह ९१:११-१२”
7येशूये होसकी डेया, “धर्मशास्त्राङ याङ्च र रीक्ङने, ‘नीये परमप्रभु लहो परमेश्वरकी परीक्षा माजाट्की।’#व्यवस्था ६:१६ ”
8होटै न्हुइङ शैतानै येशूकी काट घाङ्च डाडाङ आल्हार संसारुङ पट्ट न राज्य र होच्यौ धन सम्पत्ति टान्हाका, 9र होसकोकी डेया, “नाकै गुव्हार ङाकी झोरा डेनाङ, इसे पट्ट न ठोक ङा नाकोकी याल्हे।” 10टब येशूये डेया, “ए, शैतान, नाङ इटै नुङ्की क्योटो! हीजैडेनाङ धर्मशास्त्राङ रीक्ङने, ‘नीये परमप्रभु लहो परमेश्वरकी मट्टै झोर्की र होसकुङ मट्टै सेवा जाट्की।’#व्यवस्था ६:१३”
11टब शैतानै होसकोकी डासार व्हा अनी स्वर्गदूतको राहार होसकुङ सेवा जाटा।
येशूये गालीलाङ प्रचार सुरु जाट्च
(मर्कूस १:१४-१५; लुका ४:१४-१५)
12बप्तिस्मा याछ युहन्नाकी झ्यालखानाङ ठुना डेच कुरा सेयार येशू गालील पट्टी नुङा। 13टर होसको नासरत डासार कफर्नहुम सहराङ ङुकी नुङा, इसे सहर चहीँ गालील टालौ खेरेप जबुलुन र नप्तालीको ङुच क्षेत्राङ पर्ले। 14इटजाट्न यशैया अगमवक्तै डेच वचन पुरा छाना,
15“यर्दन नदि पारी ताल पट्टी नुङ्च लामाङ लेच जबुलुन र नप्ताली कुलुङ भर्मीको,
र गालीलाङ ङुच अन्यजाति भर्मीको।
16छुम्ठाङ ङुच भर्मीकै काट बाड्को ज्योति डाङ्नने।
मृत्युओ छाया म्होकी ङुचको मीटाक होसे बाड्को ज्योति चम्कडीस्नने।”#यशैया ९:१-२
17होसबेला लकीङ न प्रचार जाट्चै येशूये डेकी ठाला, “लहो पापको डासार परमेश्वर पट्टी ल्हेस्नी, हीजैडेनाङ स्वर्गौ राज्य खेरेप टार्हामने।”
येशूओ पहीलो चेलाको
(मर्कूस १:१६-२०; लुका ५:१-११)
18कायाक येशू गालील टालौ छेउ-छेउ व्हाम न लेनाङ होसकै नीस जनाकी जाल ङाप्म ङुच डाङा। होखुरीक पत्रुस डेच सीमोन र मेन भाइ अन्द्रियास लेया। होखुरीक चहीँ डीस्या घोचको लेया। 19येशूये होखुरीककी डेया, “ङाकी डुट्नी र ङा नाखुरीककी भर्मीको घोच जाल ङाप्चको खास्ले।” 20टब होडीक न बेला लहो जालको डासार होखुरीकै येशूकी डुटा।
21होटै होसको नुङ्चै जाट्नाङ जब्दियो नीस जना लेन्जा मीजाको याकुब र युहन्नाकी लहो बोइखाटा डुङ्गाङ ङुवार लहो जाल रुप्म ङुच डाङा, र होसकै होखुरीककी र आर्घा। 22टब होडीक न बेला होखुरीकै लहो बोइ र डुङ्गाकी डासार येशूकी डुटा।
गालीलाङ येशूओ सेवाकाइ
(लुका ६:१७-१९)
23येशू होखुरीकुङ सभाङुच इमकोवाङ पाहाक्चै, स्वर्गौ राज्यौ सेछ समाचार प्रचार जाट्चै, र भर्मीकोलाक लक्डीस्च खाल खालुङ रोग र शरीरौ कमजोरीको गेपाक्चै पट्ट न गालीलौ क्षेत्राङ छेराहा। 24होटबाटै होसकै जाट्च सेछ कामौ बारेयाङ सीरीयाभरी फैलडीसा। भर्मीकै खाल खालुङ रोग लग्डीस्च, दुष्टआत्मै सटडीचको, छारेरोग, पक्षाघात छान्चको पट्टकी येशूलेठाङ राका र होसकै होखुरीक पट्टकी गेपाका। 25वास्टै भर्मीकै होसकोकी डुटा, होसे भर्मीको चहीँ गालील, डस वटा सहरको लेच डेकापोलीस, यरूशलेम, यहूदिया र यर्दन नदि पारी लकीङ राम्हन्या।
Zvasarudzwa nguva ino
मत्ती 4: EMGP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Wycliffe Bible Translators, Inc. All rights reserved.