Neto'te 3
3
Mba bo ta' Adam bo Eva nka' Edèn nà
1Nyu #Apok. 12.9; 20.2na' mb'a ngazete netèt njoṅ nyàm tshwèt fa tse Tshùaben Nsi nabte là. A tshob mènnzwi ndù: A kua' nenùn ndù Nsi tshob bin mbe kà bin jù tàm njoṅ ntù fa mum nka' ké? 2Mènnzwi tshob nyu ndù: Bag ghù nejù tàm ntù mi a ntùm nka' là, 3là, mbe se' mba tàm tù s'a netèt nka' là, Nsi lo tshob ndù kà bag jù ke bèn nkwage, mbwôg ndù kà bag kwù. 4Nyu tshob mènnzwi ndù: Nga, bin ke nsi kwù, 5là Nsi lèn ndù lé'njù se bin nsi jù là, miag min nsi to, bin be mba Nsi là, ndèn mebwô bo kebwô.
6Mènnzwi yen ndù tàm tù bwô nejù mba neyene, nta njoṅ, nke nga' nze zenu. Ndùlala, a lo' tàm se njù, mbèn mfà mba se ndu i z'a be mbaṅ i là, a jù. 7Miag mba we lo netèt bo to, bo lèn ndù bo b'a tunntôg, ndùlala bo yoṅte tshaten ntaṅ tun bo.
8Bo ju' nze Tshùaben Nsi z'a ke nkatte ntùm nka' mfetnjù là. Mandum bo nzwi i lem tà ngùanesà num miag Tshùaben Nsi, netèt ntù mi a ntùm nka' là. 9Là Tshùaben Nsi tsiaṅ mandum ntshob yi ndù: O b'a yà? 10A bùnte ndù: Me lo nju' nz'o ntùm nka', mbwôge, nummbe me b'a tunntôg. A ju z'a ghù me lem nà. 11Tshùaben Nsi bètt'é ndù: We z'a soṅ o ndù o b'a tunntôg à? O jù tàm tù se me na' nto' o nejù là kà? 12Mandum bùnte ndù: Mènnzwi z'o yab mbaṅ àm nà fà tàm tù me, kà me njù. 13Tshùaben #2 Korin. 11.3; 1 Tim. 2.14Nsi tshob mènnzwi ndù: Numk'o ngù yen nu li à? Mènnzwi tshob ndù: Nyu fùt'àm kà me njù tàm tù.
14Tshùaben Nsi tshob nyu ndù: Mb'o ghù ndùlala là, ndon num tu o netèt njoṅ nyàm nke'nke' fa, mba netèt njoṅ nyàm tshwèt fa. O nsi ke zin à num bam so, ke jù tsha' njoṅ lé'njù yôg so fa! 15Me #Apok. 12.17nsi yab nkembàn netèl o bin mènnzwi, netèt nzwil o bo ze nzwit. Nzwil i nsi ke nya' tu o, tu wul o, o ke nya' i, tshôg tun ku i.
16Tshùaben Nsi tshob mènnzwi ze ndù: M'a' kwi'te tsho nge', nkwi'te tsho nge' ndùs'o be jùm nà; o nsi bwe bon à ntùm nge' yàme; ntshàmntù nsi ke lo' o nèn yi mbaṅ ndu o, tu wul i ke ntô o. 17Tshùaben #Héb. 6.8Nsi se' num mandum ntshob ndù: Mb'o ju' ntshu nzwi o, njù tàm tù se me na' ntshù' o yi là, ndon tshùa num tu o ntsho num tsha'a. O nsi ke sô yu ju neyôg yi bw'a ntùm nge' yàme, ndùlala num njoṅ lé'njù yôg so fa. 18Njô boa kwékwénàndô nsi bit num tsha'a, o ke mfèt nenà. 19O nsi ke kwiaṅ ze'ni se o kà ghù ju z'o jù là, ndùlala tà nkum ndùs'o bèn njam mum tsha' là, nummb'a dù' ze bo lo' o bwe là. Tshù, o b'a mbabe, mbe ndù o nsi bèn tù' mbabe. 20Adam tsiaṅ nzwi i ndù Eva, nummb'a b'a mà njoṅ benntùn fa. 21Tshùaben Nsi lo' ngub nabte nzwe yi ma' num mandum bo mènnzwi. 22Ndùlala #Apok. 22.14Tshùaben Nsi tshob ndù: Tshù mènntùn n'a tù' mba be nke ndèn mebwô bo kebwô là! Ndonni a bwô nezete ndù k'a tshag bu i nkàb mba tàm tù yôg, njù, ntù' yôg tse matmat!
23Ndùlala Tshùaben Nsi ta' i ntùm nka' Edèn, ndù a ke ndù' tsha' ze bo na' nsô i bwe là. 24A ta' mènntùn, njab ba kérubim ntshu nka' Edèn boa nsansa ṅwi mbwôg tse bo ke nshùm nà, ndù bo ke mbéb manze z'a nèn nkum num tù yôg là.
Zvasarudzwa nguva ino
Neto'te 3: BMa
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
La Sainte Bible en Bamiléké-Medùmba © Alliance Biblique du Cameroun, 1993. All rights reserved.