YOANE 5
5
1I bo ŋanina kolo druma na Yahudi kilona druga na yeŋundra. Yesu druga utu Yerusalema yu. 2Yerusalema kata yu i ketimi na Kebilizina i kutu yu‚ atapara lu yu‚ laga lo luŋu ku kutu na Yahudina a Betezata. Piri ŋanina gbo ku pirito mukana naga a ti tilimo. 3I pirito ŋani kine kata yu ŋutulu laga ku ’beri mimiye kilo rodri apipiriki kata yu‚ ŋutulu laga ku konye a mudumudu kilo, ku laga a babatratu kilo, ku laga a liwa kilo, [laga lo mondru droro na pio kine kilo. 4’Bo ku luŋa ku’de kilo malaikata le’de lo Matalo bita kiyundra ka i atapara katani i drodyu na pio kine i latuni. Druga ŋutu laga lo lubo a kayo i bo na latu na pio kinelo druga totoruwe, ’dibani kodro ku tuwane lo lepelo gbo adinyo kpe]. 5’Bo ti le’de ŋutu lu yu de, lepe gbo ku tuwane kiŋazi meria musala konye budro. 6Kugbo Yesu laga amedra lepe ku lepe i pirikini, ku lepe adeni adi lepe lu yu de luŋa rodri, Yesu druga piza lepe adi, “Do nyadru ti mugu nonuna yeŋundri soso ya?” 7Ŋutu laga ku mugu na mimiyelo druga teyitokindro lepe adi, “Mata, i latu na pioni, ŋutu lio lo ’delakindra na i atapara katanilo ’bayi, ’bo kuwe pondrani, druga ŋutu le’de lo kiyadru ka yu a nze ku na.” 8Yesu druga takindra lepe adi, “Ŋine, ’dokoro pari nonuna, woroni.” 9Wuleŋa gele ŋutulo druga totoruwe, druga ’dokoro pari nanyena, druga woworo. Ti lu luŋa de a sabato. 10Kuwade Yahudi kilo druga takindra ŋutu laga atoruwelo adi, “Indikinina ŋolo a luŋa lo sabatolo. Kukuzuna ani rugo adi ti do ’dokoro pari nonuna.” 11Lepe druga teyitokindro ko adi‚ “Ŋutu laga lo toruzo nalo lo takindra na adi‚ ‘ ’Dokoro pari nonuna, woroni.’ ” 12Ko druga piza lepe adi “Ŋutu lo takindra do adi, ‘ ’Dokoro lepe, woroni’ ilo, a ŋa ya?” 13’Bo ŋutu laga lo toruwelo aku deni lepe a ŋana igbonaga Yesu a’dotodru mugu tali, ti mongoyo na ŋutuluna inga ina i piri. 14I bo ŋanina Yesu druga rumbi lepe i kadi na Ŋun ina kata yu, druga takindra lepe adi, “Mete, mugu nonuna ayeŋundra soso. Ku kokonu toro ’do, ŋo laga loro arodrulo ka’bi ku yeŋundra konuni.” 15Ŋutulo druga utu ku trukokindro Yahudi kilo adi ŋutu lo toruzo nyelo ŋolo derengi a Yesu. 16Ku kine kulia de Yahudi kilo druga poki i wowondru na Yesu, igbonaga lepe akondra kine kulia de i luŋa lo sabatolona. 17Yesu druga teyitokindro ko adi, “Monye liolo ilo kondra kita yeŋundra tozo tinade, na lo kondra kita ’do.” 18Ku kine kulia de, Yahudi kilo druga ga’yu tatuza na lepe alangu a kayona, igbonaga lepe agbo’da kokorozu luŋa lo sabatolo ka’deloni, ’bo igbonaga lepe alungu Ŋun a Monye lonye lepe, ku ’delakindra na mugu zozo be Ŋun ina. 19Yesu druga teyitokindro ko adi, “Na takindra ta a ’diri, Ŋirolo ani romoki kondra le’de ŋo ku kuwe nanye, ’bo lepe kondra ŋo laga ma lepe medri Monye i kondranilo, igbonaga ŋo laga ma lepe kondrilo, Ŋirolo kondra deŋa itrona. 20’Bo Monyelo anyari Ŋirolo, lepe ilo kpekindra lio ŋo giri lo konu nye kilo, ’bo lepe ikpekpekindra lio konesi naga na langu kine de kine, ma ta ku rambi ’beri ’busa. 21Beti naga ma Moneylo toŋizi ŋutulu laga atatuwa kilo i tikindra na ko i gbo’da zoruna, gbode Ŋirolo ititikindra ŋutulu i gbo’da zoru itro, ŋutulu laga ma lepe nyadri ti ko gbo’dini zoru kilo. 22A ’diri Monyelo ani ŋedya kulia ti le’de ŋutu, ’bo lepe atikindra Ŋirolo i ŋedya na kuliata giri, 23ma ŋutulu giri sobi Ŋirolo‚ be naga ma ko sobi Monyelona. Le’de ŋutu laga ani sobu Ŋirolo ani sobu Monye laga lo sunyundro lepelo itro. 24Na takindra ta a ’diri, ŋutu lo yinga kulia na ta na kine, lo rugo Ŋun lo sunyundro nalo itro‚ lepe igbo’da ku ru naga ani lengana, lepe aka ŋeraki kuliani, ’bo lepe arosodru i tuwa katani, alubo i ru kata yu azo. 25“Na takindra ta a ’diri, luŋalo ilo ipondra, ’bo ayeŋundra azo, i ilo luŋa de ŋutulu laga atatuwa kilo iyinga roro lo Ŋiro lo Ŋun ilo, ŋutulu laga ayinga kilo igbo’da zoru. 26’Bo beti naga ma Monyelo gbo’dini ku ru kanye katanina, gbode lepe atikindra Ŋirolo ti gbo’dini ku ru kanye katani itro. 27’Bo lepe atikindra lio teriŋi na ŋerani kulia kine, igbonaga lepe a Ŋiro lo ŋutulona. 28Ku raramita ’beri ku kine kulia de, igbonaga luŋalo ilo ipondra, i ilu luŋa de ŋutulu giri laga i gulomo kata yu kilo iyiyinga roro lo lepelo, 29ilulupundro. Ko laga akondra a lo’bu kilo ilulubo i ŋiye naga na yeŋo nu‚ ’bo ko laga akondra a loro kilo ilulubo i ŋiye naga na ŋerani kulia nu. 30“Na ani romoki kondra le’de ŋo ku kuwe nio. Na lo ŋedya kulia kine beti naga ma na yingina, ’bo ŋeresi kuwe kilo a laga mŋgba, igbonaga na ani ga’yu kulia naga ma teili liolo nyadri kine‚ ’bo na ga’yu kulia naga ma Ŋun laga lo sunyundro nalo nyadri kine ayu. 31Ku na lo ’dodru bo nio na kuliana‚ bo na kulia naga ma na ’dodri kine ani gbo’da a kulia ti to’diri. 32Ŋutu le’de lo ’dodru bo nio na kuliana, na adeni adi bo nio na kulia naga ma lepe ’dodri kine a kulia ti to’diri. 33Ta asonyodru lo’dia ku Yoane yu, ’bo Yoane a’dodru bo na kulia ti ŋo laga a ’diri. 34Na lepe ani rugo bo na kulia naga ma ŋutu ’dodri kine, ’bo na takindra ta kine kulia de ma ta ririteni. 35Lepe a kima na kokobu, na momo’yu itro, teiliko kasu kilo anyadru nyola ku baŋe a naŋutru ku parara na lepena. 36’Bo bo na kulia na ’doru na kine arodru ti Yoane kine kaŋo, igbonaga kitazi naga ma Monyelo tikindri na ti na leŋe kine, kitazi ŋani naga ma na kondri kine, ko na ’dodru bo nio na kuliana, adi Monyelo lo sunyundro na. 37Monye laga lo sunyundro nalo lepe ku mugu a’dodru bo nio na kuliana. Ta aku yinga roro lo lepelo tro, ta aku medra mugu na lepena tro. 38Ta ani gbo’da ku kulia ti lepe kine kasu katani, igbonaga ta aku rugo ŋutu laga ma lepe sunyundrilona. 39Ta ga’yu i kulia na wuwuro kine kata yu, igbonaga ta rambu adi ta irumbi ru naga ani lengana ku koŋana. ’Bo kulia na wuwuro ŋani kine ko ’dodru bo nio na kuliana. 40’Bo ta ani nyadru pondra kuweni adi ma ta ku rumbi ru ŋanina. 41Na ani rugo pudya na ŋutuluna, 42’bo na adeni ta‚ adi nyadru na Ŋun ina ’bani kasu katani. 43Na apondra ku kari ti Monye liolo kine ’bo ta aku rugo na. Kugbo ŋutu le’de lo pondra ku kari kanye kine, ta irugo lepe. 44Ta laga lo rugo pura kasu dridriŋini kilo‚ ’bo ti ani ga’yu pura naga na ŋiyu ku Ŋun laga gelelo yu ina‚ ta igbo’da ku rugo adidinyo ya? 45Ku raramita adi na lu isosozu kulia kasu kine ku Monye yu‚ kasosoyini lo kulia kasu kinelo ŋolo a Mose, ŋutu laga ma ta ’delakindri teiliko kasu kilo kinilo. 46Kazu kodro ku ta laga arugo Mose, kedri kodro ta irurugo na, igbonaga lepe wudyo kulia kuwe kinena. 47Kugbo ta laga aku rugo kulia na wuru lepe kine‚ ma ta rugo kulia naga ma na tazini kine adidinyo ya?”
Zvasarudzwa nguva ino
YOANE 5: KNT77
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Kakwa New Testament © Bible Society of Uganda, 1974, 1977.