Yoáni 2
2
Yéso agaí iɓo ka divai
1K'ésa á ko isaɔ mbusa í, ɗáɓábiki n'ɛkɛka ka Kána nji moci á ka Galiláya. Amakɛ na Yéso ɗá gǎkɛ wa. 2Ɓâ phɔtɔ ɔmɔphana Yéso na ɓagoigi nɛkɛ k'ɛ́kɛka kau. 3Cɔ, na ɓá phɔ́tɔ k'ɛ́kɛka, divai áosia. Kaɓondɔ, amakɛ na Yéso áongea: «Ɓáká ye na divai.» 4Yéso â gǎkɛ onsikisia: «Ayi, nyɔngɔ sina nde ɓen'oɓɛ kau? Mbenɔ nɛmɔ kájúmbɛ.» 5Mpɔ, amakɛ áǒngoɗea ɓabɛɗanigi-ɛ́kɛka: «Geani tɔ kema bui nde anóngoɗeande.»
6Cɔ, ɗáɓátú gǎkɛ wa na mbikiɓo ngianjaga (6) nnde ɓáconji n'etae. Ɓayúda ɗáɓátú ǒsokosa n'iɓo á suɓi í ka nyɔngɔ á esomba á sokosea á ɓojeɗe nɛɓɔ. Mbikiɓo ndɔ ɗá gǎkɛ otúma na ngbanda mia moci na nkama ɓɔku (150). 7Yéso áǒngoɗea ɓabɛɗanigi: «Túmisani mbikiɓo ndɔ na iɓo.» Ɓáotúmisa ú, pu! 8Áǒngoɗea: «Dogani kau ábɔa kɛ̌kɛnde, ɓógɛ ně mosá á mǒko-ɛ́kɛka.» Ɓáogea ɓó. 9Ɓî mǒko-ɛ́kɛka akengi iɓo ndɔ, n'ěgaí ka divai. Yɛ, kaúbɛ gǎkɛ ɓî divai ndɔ atóki. Ɓabɛɗanigi ɗáɓá gǎkɛ oúba nga, ɓɔ ɓáunge ɗáɓádogi ú. Yɛ, áɔmɔphana mǒko-ɛ́kɛka, 10áongoɗea: «Ɓakpa ɓɔbu ɓá phɔ́ kǒɓopha ɓato á ɛkɛka makana nde aánjá phɛɛ mosá-mosá. Mbusa á noa í ásii, ɓáǒɓopha mokongo. Cɔ, oɓɛ obisi gǎkɛ tɔ makana nde aánjá phɛɛ mbusa!»
11Nndɔ, ɗátú mphangiɔ á ketangaɔ á k'ama mosá-mosá ndea Yéso, nnde atɔtɔkɛani ka Kána á ka Galiláya. Yéso ɗáphangi ně base ɓoombia nɛkɛ. Kaɓondɔ, ɓagoigi nɛkɛ ɓáomɓeekea. 12Mbusa á wa, Yéso áoga na Kapɛɛnaúmu#Ɔna Mat 4.13, kimoci na amakɛ, ɓana-amakɛ, na ɓagoigi nɛkɛ. Ɓáoika kó k'ésa ábɔa.
Yéso ěɓǐgi ɓasombisigi nkumba k'éndu á Mokonga
(Ɔna phɔtɔ Mat 21.12-13; Mkɔ 11.15-17; Lók 19.45-46)
13Cɔ, ɓî esa á jaí á Pasáka ndea Ɓayúda ɗá ye tɔ bíbí, Yéso áoga na Yɛusalɛ́ma#Ɔna Jua 12.1-27. 14Áongia k'éndu á Mokonga, áǒdonda ɓasombisigi ɓangɔmbɛ, ɓamɔgɔgɔ na ɓamboe. Â phɔtɔ ǒdonda ɓaánganisigi-imɔna na ɓáiki ka mɛja nɛɓɔ#Ɔna Mkɔ 11.15. 15Kaɓondɔ, Yéso áɔɓɔngisaga gbútu na ngoi. Áǒɓeaga ɓakpa ɓɔbu ka nsɛngɛ éndu ndea Mokonga, na ɓangɔmbɛ na ɓamɔgɔgɔ nɛɓɔ. Áophanja imɔna ndea ɓaánganisigi-imɔna ka oɗo, â phɔtɔ okpúngbumisa mɛja ɗanga-ɗanga nɛɓɔ. 16Áǒngoɗea ɓasombisigi-ɓamboe gea: «Caa! Ótokisani ɓamboe nde wani.» Â goto ǒgea: «Ɓókogaíɛmbɛ endu ndea Abɛ k'éndu á sombisaga á nkumba.» 17Ɓagoigi nɛkɛ ɓâ ye tɔ okanisia nyɔngɔ nde ɓáɗundu suɓi á Ɓuku á Mokonga ɓe: «Mokonga hoo! Ekondi á k'éndu nɛkɔ, ande ɓea nsa n'aǒtoɓoaga suɓi ani#Ɔna Jab 69.10.»
18Mpɔ, ɓakɔta á Ɓayúda ɓáomúsia gea: «Ona mphangiɔ á ketangaɔ sina ka úbisa asu gea, ona kɔkɔta á tɔtɔkisa á kema nde?» 19Yéso áǒsikisia: «Uɗáni endu á Mokonga nde, nɛphɛkande ú k'ésa isaɔ#Ɔna Mat 26.61; 27.40; Mkɔ 14.58; 15.29.» 20Ɓayúda ɓâ gǎkɛ omúsia gea: «Ɗáɓáphɛ̌ki endu ndea Mokonga nde ka ɓasaga nkama gena na ngianjaga (46). Cɔ, ɔɔtɔka n'omesi ú k'ésa isaɔ tɔ?»
21Endu ndea Mokonga nde Yéso ɗáɔyɔnga nyɔngɔ í, ɗátú ndiu nyama akɛ. 22Mbusa á jujúka á Yéso ka kukuwa, ɓagoigi nɛkɛ ɓáokanisia gea ɗáyɔngi nyɔngɔ ndɔɔ. Ɓáoɓeekea nyɔngɔ nde Yéso ɗěngoɗi, n'índe ɓáɗundu ka phɔakɛ suɓi á Ɓuku á Mokonga.
Yéso aoúba kema bui á ka suɓi á měma á nkpa
23Cɔ, ka matú ndɔ ɓî Yéso ɗátú na Yɛusalɛ́ma ka jaí á Pasáka, ɓakpa ɓásii ɓáomɓeekea, ka nyɔngɔ á ɔna á ketangaɔ nde ɗáɔtɔtɔkisa. 24Yéso ɗákábisi gǎkɛ měma akɛ ka ɓɔ, ka nyɔngɔ nde ɗáěengekisi ɓɔbu ánjá. 25Nga, ɗákátú na siki á nkpa ka tɔ̌miaga akɛ nyɔngɔ ndea ɓakpa, ɓî yɛ sasakɛ ɗáúbi ye měma aɓɔ.
Zvasarudzwa nguva ino
Yoáni 2: KMW
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2021, Wycliffe Bible Translators, Inc.