Yoáni 20
20
Yéso ajujúki ka kukuwa
(Ɔna phɔtɔ Mat 28.1-8; Mkɔ 16.1-8; Lók 24.1-12)
1Esa á yenga, ka koɗokanaga á esa na kaiphiɔ n'a phɔ́tɔ ɓei, Malía nseka á ka Magadála ɗáge ka bóta. Kó, ɗáɔni gea ɓáphúi ɛtɛ nde ɗáɓágbukumi na kubu á bóta. 2Wa, áoja mbangɔ mɔtɛ á Simɔ́ni-Pɛ́tɛɛ na ngoigi ɓaangbo mmbɔ Yéso ɗánkondi, áǒngoɗea ɓe: «Ɓáphúi mǒnda á Mɔkɔta ka bóta, ɓékéoúba ɔma nde ɓábisi mǒnda akɛ.»
3Mpɔ, Pɛ́tɛɛ na ngoigi mmbɔ ɓaangbo ɓáoga ka bóta. 4Ɓɔbu ɓaɓɛ ɓáoga mbangɔ kimoci. Mmbɔ ngoigi ɓaangbo ɗányɛ́nyi gǎkɛ Pɛ́tɛɛ ka mbangɔ. Áokiɗia ka bóta mosá á Pɛ́tɛɛ. 5Ɓî akiɗi kó, áogbúta, áɔɔna sanda ka oɗo. Yɛ, kangiɛ gǎkɛ suɓi í. 6Ɓî Simɔ́ni-Pɛ́tɛɛ ɗáomɓea, â phɔtɔ okiɗia ka bóta, áongia suɓi í. Áɔɔna sanda ka oɗo. 7Â phɔtɔ ɔɔna ediǐ á bɔngɔ nde ɗáɓákombei na mɔ̌ á Yéso. Ediǐ á bɔngɔ ndɔ na ɓáikitikigi ɓáobisa ɔma nɛngbo ɗanga na sanda. 8Mpɔ ngoigi ndɔ ɗákiɗi mosá ka bóta â phɔtɔ ongia. Aɔni ye, áoɓeekea. 9Nga ɓagoigi ɗáɓákáengekisimbɛ phɔ́ nyɔngɔ nde Ɓuku á Mokonga ɗáyɔngi gea, ambe Yéso ájujúkɛ ka kukuwa#Ɔna Jab 16.10. 10Mbusa, ɓagoigi ɓaɓɛ ndɔ ɓáoja mɔtɛ-aɓɔ.
Yéso ansɛnɛkɛi Malía nseka á ka Magadála
(Ɔna phɔtɔ Mat 28.9-10; Mkɔ 16.9-11)
11Malía ɗáiki ka nsɛngɛ bíbí á bóta n'aogáma. Ɓî ɗáogáma, áogbúta, áɔkɛngɛɗia suɓi á bóta. 12Kó, áɔ̌ɓɔna ɓamalaéka ɓaɓɛ na ɓáɔ́li ngɔ́mbɛ ábu na ɓáiki ka oɗo ɔma nde ɗáɓábisi mǒnda á Yéso. Moci ɗáiki nci á na mɔ̌, ɓaangbo gǎkɛ â koika nci á n'ecinji. 13Ɓamalaéka ndɔ ɓáomúsia Malía: «Nke nde ca! Ekende oogámea?» Áǒsikisia: «Neogáma nga, ɓámphúi Mɔkɔta nɛmɔ. Cɔ, kéoúba ɔma nde ɓámbisi.»
14Mbusa á yɔnga akɛ ɓó, áǒpháia mbusa. Mpɔ áɔmɔna Yéso n'amame. Ɗákáúbi gǎkɛ gea yɛ aámbɔ. 15Yéso áomúsia: «Nkende ca, ekende oogámea? Ani mmbé oonkaɓa?» Malía ɗá gǎkɛ okanisia te, ande mbɛɗanigi á k'ɔma ndɔ. Kaɓondɔ, áongoɗea gea: «Moko, aoɓá n'ɔɓɛ aámbé onkumbi, omongoɗea ɔma nde ombisi. Eme negande gǎkɛ ɔmbɛɗa.» 16Yéso áongoɗea: «Malía!» Malía áǒpháia kuɓî Yéso aɔ, áongoɗea ka Kiɛbulanía: «Labúni!» Ande gea te: Ngoisigi. 17Mpɔ, Yéso áongoɗea: «Kómodungɛmbɛ! Nga, kétáimbɛ mɔtɛ á Abɛ. Gǎ ndiu óngoɗeɛ ɓana-ayi gea, netái mɔtɛ á Abɛ, mmbé a phɔtɔ Abanu, mɔtɛ á Mokonga nɛmɔ, mmbé a phɔtɔ Mokonga nɛnu.» 18Mpɔ, Malía nseka á ka Magadála áoga ǒngoɗea ɓagoigi gea: «Nɛmɔni Mɔkɔta.» Áɔ̌tɔmiaga nyɔngɔ nde Yéso ɗángoɗi.
Yéso aɛsɛnɛkɛi ɓagoigi nɛkɛ
(Ɔna phɔtɔ Mat 28.16-20; Mkɔ 16.14-18; Lók 24.36-49)
19Cɔ, ɔgɔgɔ á esa á yenga ndɔ tɔ, ɓagoigi ɓáophatia kǐo á k'ɔma nde ɗáɓáiki ka nyɔngɔ á ɓanga ɓakɔta á Ɓayúda. Yéso â gǎkɛ obika omama sɔsɔɓɛ aɓɔ, áǒngoɗea: «Ɓáni na ɓujɛjɛ!» 20Mbusa á yɔnga akɛ nndɔ, áǒphangia ɓagoigi njaga akɛ na mpambá akɛ. Mpɔ ɓagoigi ɓáotúma na maseye ka ɔna Mɔkɔta. 21Yéso â goto ǒngoɗea: «Ɓáni na ɓujɛjɛ! Eme nenoteki phɔtɔ ɓíndɔ Abɛ ɗámoteki.» 22Mbusa á yɔnga akɛ nndɔ, áǒophia mpophɛ na ngoɗea aɓɔ: «Cɔ, tɔani Měma á kanga ɓojeɗe. 23Nkpa buakɛ mmbé ɓoímande ɓojeɗe nɛkɛ, ɓojeɗe ndɔ áoímika. Nkpa buakɛ mmbé ɓókóímɛku gǎkɛ ɓojeɗe nɛkɛ, ɓojeɗe ndɔ káímikɛku.»
Yéso ansɛnɛkɛi Tɔmá
24Cɔ, Tɔmá mmbé ɓáɔmɔphana Mphase, ka ɓagoigi nkama na ɓaɓɛ (12), ɗákátú kimoci na ɓadakɛ mbenɔ nde Yéso ɗáekiɗianei ɓagoigi. 25Ɓagoigi ndɔ ɓáongoɗea gea: «Ɓɛmɔni Mɔkɔta.» Tɔmá â gǎkɛ ǒsikisia gea: «Kaɓɛ na kɛ́ɔni epe á musumali ka njaga akɛ, na bisa miki á njaga ani ka epe á musumali, na nekébisi njaga ani ka mpambá akɛ kéɓêkeɛku.» 26Mbusa á esa ngianjaga isaɔ (8), ɓagoigi ndea Yéso ɓâ goto odondanaga suɓi éndu, Tɔmá â ye tɔ oɓá na ɓɔ. Ɓî ɗáɓáphǎti endu, Yéso áobika omama sɔsɔɓɛ aɓɔ, áǒngoɗea: «Ɓáni na ɓujɛjɛ!» 27Mpɔ, áongoɗea Tɔmá: «Cɔ, bisa miki á njaga akɔ wani na ɔ́ɔnjiɛ njaga ani. Bisa phɔtɔ njaga akɔ ka mpambá ani. Tókisa ngǎka óɓɛ ndiu mɓêki!» 28Tɔmá áonsikisia gea: «Hoo! Mɔkɔta nɛmɔ na Mokonga nɛmɔ!» 29Yéso áongoɗea: «Ka nyɔngɔ nde ɔmɔɔni aunge oɓeeki? Maseye ka ɓunde ɓáoɓeekea nyɔngɔ na ɓákáɔni!»
Cina á ɗundua á ɓuku ndee
30Yéso ɗátɔtɔkisi phɔtɔ mphangiɔ ásii mosá á ɓagoigi nɛkɛ, nnde ɗáɓákáɗundu suɓi á ɓuku ndee. 31Cɔ, ɗáɓáɗundu gǎkɛ nnde ka gea, ɓóɓeekeɛ gea, Yéso ande Kiísito Muna-Mokonga. Kaɓɛ na ɓomɓeeki, ɓoɓande na enda ka yɛ.
Zvasarudzwa nguva ino
Yoáni 20: KMW
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2021, Wycliffe Bible Translators, Inc.