Luku 15
15
Latilovo so itema ukamulinu sipisipiou loxo ulusi
1Ioxe, la tamitema so itaxusou taxisi xe tamitema so ili'ilixo masua iouiou mine'e alai noxou Iesua so ilolomu noxou. 2La Tapalisi oli'a tamitema so lavulavu no anu lavuloto opone'i tu'umaxu mo mimunumunuxu lexe, “Itema ano'o uvaitami noxi'a tamitema so ili'ilixo masumasua mo oli'a ipita i'ani'ani to!”
3Laso Iesua mu'oxonu latilovo noxi'a aloxo 'o, 4“Loxo vile noxinge tasipisipiou 100. Ia loxo vile noxi'a ulusi la anu unava? Anu masi upilixine'i 99 ixoxolu no anu apu so ani'anixa'a tanixu. UpiliÂxine'i ia anu ulai ukakamulinu soxu vilesisi olele xo mo uxalisou. 5Uxalisou ukalui la anu utilonu no laxasou mo oponu u'osa'osa. 6Ulutu xo xe uxali no tani la u'avali'a tamenexu oli'a tatemanu tatani ala'alai ne ka uvikalane'i lexe, 'Ai nenge nenge'a ta'osasi xo sipisipixeli vile mulusi ia exalisou 'oe.'” 7La Iesua muvikala aloxo 'ola, “Avikalangengi lexe tamiÂtema 99 loxo milapusi mukalu la tava'u so ixiunu opone'i mo i'isalilinoxula uasi. Laso anu laixe, ia loxo itema so ilixo masumasua soxu vilesisi uxiunu oponu mo u'isalilinoxu la osa'ilasou no tualasou Mosinge uua'ulixu ane so si'a 99 olele.”
Latilovo so lamoli mulusi
8La Iesua musolonu aloxo 'ola, “Loxo sema vile lamolie siliva 10. Ia loxo vile ulusi nonano no tani la ane inava? Ane masi ilexexu lalamo mo isilapa mo ikakamuli laixe xo mo ixalisou. 9Ixalisou mukalu laso i'avali'a tamenexie oli'a tatemanu tatani ala'alai ne ka ivikalane'i lexe, 'Ai, nenge nenge'a ta'osasi xo lamoli e mulusi exalisou 'oe.'” 10La Iesua muvikalane'i lexe, “Avikalangengi lexe osa'ila axone uxali no taine'i ta'angelou Mosinge no voxo loxo itema so ilixo masumasua soxu vilesisi uxiunu oponu mo u'isalilinoxu.”
Latilovosou itema olu u'umesou ka ulivu noxou
11Ioxe, Iesua mu'oxonu latilovo aloxo 'ola, “Itema vile ta'olu tamulu tamei. 12La anu ane tameisou muvikalanu momu lexe, 'Papao, mimi e nemulaxu lexe noxixe noxou vivilo la nakalipalanu mo na'a xeli la nalosilosi.' Laso momu mukalipalanu mo mulosi'a ta'olu tamei ne. 13Ioxe, mune'e maxuÂveni uasi la olu tameisou mupitanu mimiou ka musalimunu noxi'a tamitema. Xe muno'u lamolisou la muxexesou momu mo mulai muxolu no tuala vile nopaxa. Muxolu ne la mupapunu lamoliou vitanisi no anu ili'ilixo iouiou. 14Mupapunu lamoliou xo mole mukalu avile. La no voxo anene vitolo mukasou xale lia muxolu no anu ne mo anu xou mi vilela uasi. 15Laso anu mulai noxou itema vile no anu xale lia ne so muxaxai noxou. La itema ne mupalusou mulai no vimelusi'a tameme so usaxila'a. 16Muxoxolu la itema vile ulosou la'ilali uasi sila mumaisi'a tameme i'ani'ani visoma sosou xo mole anu umasaxau uuana'ananixu oponu no anu kalumo.
17Sila xavutalaou mulamana la mu'oxo lexe, 'Ai tauokuvoiou mamilo olele ne la'ilali umomomo so ikalusou masaxa noxi'a avile. Ia eni 'o la axolu asolixo la masi akalu avile 'oe. 18Eni masi a'avuti mo alivu noxou mamilo la avikalanu lexe, “O Papao, eni esusu no iou Mosinge xe noxine kalumo. 19Eni amitema alaixe umomomo so namoxo'ilo lexe a'ilinela uasi. Na'italoleli so axali vile noxi'a tauokuvoimenisi.'”
20Laso anu mu'avuti so ulivu noxou momu. Mulutu xo la anu so uxali ia momu musu'anu iouou mi ne anu a unene'e nopaxasio. Momu mumaisou axone la oponu tanuxu misevile sila muiave mulai noxou ka musavunoxu mo mumaxa'u sexela noxou. 21La olu muvikaÂlanu lexe, 'O Papao, eni esusu no iou Mosinge xe noxine kalumo. Eni amitema alaixe umomomo so namoxo'ilo lexe a'ilinela uasi.' 22Ia momu mu'avuti la muavali'a tamiÂtema so xaixai noxou mine'e la mupalusi'a lexe, 'Ngingi ngapalea ngano'u lavuluti lailaixe noxilo mo ngasakinu noxou 'o. Mo ngamuÂlaxu lingi vile no anu avolu xe ngatanu lasu no tava'u. 23Mo ngalai ngano'u kau ilie ane tongolixu laixe ka ngavau usoli. Ukalui laso ane, nenge ta'ani mo ta'osasi. 24Xo alixeli 'o musoli mukalu ia anu a mumaulila. Anu mulusi ia a muxali noxinge 'oe.' Laso ane'i misoko'u so i'ani'ani mo i'osa'osasi.
25Ioxe, olu laposalaxu molu no xai mune'e. Mune'e xe muxali alai no tani la mulomu lexe tamitema a ixoxolu ilelexe mo ilelei. 26Laso anu mu'avalou uokuvoi vile la mutali'i lexe, “Ane'i a i'oxo mi ma'ia to ne?” 27La mukolinu lexe, “Vivine a mulivu muxali. Laso mamine muvau kau ile e tongolixu laixe so umaxa'u osa'ilasou olu xo mulivu noxou la laixenusi. 28Ioxe, olu laposolaxu mulomu axone la oponu la'iaxu mo u'osa so u'unalai no tani uasi. Muxolu noale laso momu muatu la mulemolu vaikala so ulu'enu oponu. 29Ia anu mukolinu momu lexe, 'Uo axova? Eni exolu tau ie tavu'alo sasaieli so e'oxonu xaixai noxine. Mo nepalusilo axova la alomuaneni sevile uasisi, elomuxenesi. Laso alaxu vile nelosilo koti olu sesi so noxi'a tamenexilo ta'ani mo ta'osa? Uasi to! 30Ia iline ano'o ne mulai mupeinu lamolimeni vitanisi noxi'a tasema so vote'i. Xe mulivu muxali la alaxu vilesisi nevau kau olu tongolixu laixe so namaxa'u osa'ila noxine so lailivuxu.'
31La momu mukolinu lexe, 'Alixelio, nini utotomu naxolu noxilosi mo mixemixeli ne nini na'a ninisi. 32Ia vaimomo 'o nenge ta'osa mo takekesi. Xo vivine soxu 'o musoli mukalu ia a mumaulila, mo anu mulusi ia a muxali noxinge 'oe.'”
Zvasarudzwa nguva ino
Luku 15: ATA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Copyright 1999 New Tribes Mission, Sanford, FL 32771-1487