मत्ती 2
2
ग्यानी लोगां गो आणो
1जद राजा हेरोदेस गै टेम में यहुदियां गै बेतलेहम में यीसू गो जन्म हो'ग्यो तो पूरब दिसा ऊं केई ग्यानी लोग यरुसलेम में आ'गे पूछण लाग्या, 2“यहुदियां गो राजा झिकै गो जन्म होयो है बो कठै है? म्हे बिंगै तारै गो निसान आकास में देख्यो। म्हे बिनै आराधना करण आया हां।”
3जद राजा हेरोदेस ओ सुण्यो तो भोत उदास हो'ग्यो अर यरुसलेम गा सारा लोग डरग्या। 4जद बण यहुदियां गै मुख्य याजकां अर नेम सिखाण आळै लोगां नै भेळा कर'गे पूछयो कै मसी गो जन्म कठै हो'सी? 5बां केयो, “यहुदियां प्रांत गै बेतलेहेम गाम में है।” क्यूंकै परमेसर गी बात बताण आळै गै द्वारा इंया लिखेड़ो है,
6“ओ यहूदा गी धरती पर बणेड़ा बेतलेहेम,
तूं यहुदां गै अधिकारियां गी रीति में छोटो कोनी
क्यूंकै तेरै में एक राजा पैदा होवैगो
झिको मेरै लोगां इसराएल नै संभाळैगो।”#मीका 5:2,4
7जद राजा हेरोदेस पूरब गै ग्यानी लोगां नै चुपकै सी बुलाया अर पूछयो कै बो तारो कद उग्यो हो। 8फेर बण बानै बेतलेहेम भेज दिया अर केयो, “जा'गे टाबर गो पतो लगावो। जद थानै ठा लागज्यै तो मनै बी बताईयो कै मैं बी जा'गे बिंगी आराधना करूं।” 9फेर बे राजा गी बात सुणगे उड़ग्या झिको तारो बानै आकास में दिख्यो बो आ'गै चालगे बिं जिग्यां रुकग्यो जठै बो टाबर हो। 10तारै नै देखगे बे भोत राजी होया। 11फेर बां घर गै मा जा'गे टाबर अर बिंगी मां मरियम नै एक सागै देख्या। अर बां बिं टाबर आ'गै सिर झुकागे प्रणाम करयो अर बिंगी आराधना करी। बां बिंगै आ'गै सोनो, धूप अर सुरम आळी केई किमती चिजां गी भेंट चढाई। 12पण परमेसर एक सपनै में बानै बता दियो कै थे पाछा राजा हेरोदेस कनै ना जाईयो। जद बे दूसरै रा माखर आपगै देस में पाछा उड़ग्या।
यीसू नै लेगे मिस्र देस में जाणो
13जद बे लोग उड़ग्या तो युसुफ नै प्रभु गै एक सुरगदूत सपनै में आ'गे केयो, ईं टाबर अर इंगी मां नै लेगे मिस्र देस में उड़जा। जद तांई मैं ना केऊं बठै रेई क्यूंकै राजा हेरोदेस ईं टाबर नै मारण खातर ढूंडण लागरयो है। 14जद युसुफ रात नै ई खड़यो होगे बानै लेगे मिस्र देस कानी चाल पड़यो। 15फेर हेरोदेस गै मरण तांई बठै ई रेओ। ओ ईंखातर होयो कै प्रभु परमेसर गी बात बताण आळै गै द्वारा केयेड़ो बचन पूरो होवै कै, “मैं आपगै बेटै नै मिस्र ऊं बारै आण गो केयो।”#होसया 11:1 16हेरोदेस नै जद ठा लागग्यो कै पूरब गै ग्यानियां बिंगै सागै धोखो करयो है तो बिनै भोत तकड़ी रीस आयी। जद बण हुकम दियो कै बेतलेहम अर बिंगै आसैपासै गै गामां गा दो सालां तांई गै सारै टाबरां नै मरवा दिया। 17इंया यिरमयाह परमेसर गी बात बताण आळै गो केयेड़ो बचन पूरो होयो।
18“रामाह सैहर में दुख सुण्यो,
रोणो अर जोर गो विलाप सुण्यो,
राहेल आपगै टाबरां खातर रोण लागरी ही।
अर चुप कोनी होणो चावै ही
क्यूंकै बे अब कोनी रेया।”#यिरमयाह 31:15
मिस्र देस ऊं पाछो आणो
19फेर हेरोदेस गै मरण ऊं बाद युसुफ नै प्रभु गै सुरगदूत सपनै में आ'गे केयो, 20“उठ, टाबर अर इंगी मां नै लेगे इसराएल उड़जा। क्यूंकै झिका टाबर नै मारणो चावै हा बे आप सारा मरग्या।” 21जद बो बानै लेगे इसराएल आ'ग्यो। 22पण जद युसुफ नै ठा लाग्यो कै हेरोदेस गी जिग्यां बिंगो बेटो अरखिलास यहुदियां में राज करण लागरयो है तो बो डर ग्यो। फेर बो परमेसर ऊं सपनै में हुकम लेगे गलील परदेस में उड़ग्यो। 23अर बठै नासरत नाम गै गाम में रेण लागग्यो। इंया परमेसर गी बात बताण आळां गो केयेड़ो बचन पूरो होयो कै बो नासरी कुहावैगो।
Zvasarudzwa nguva ino
मत्ती 2: BGQ
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023 (Active), Wycliffe Bible Translators, Inc. All rights reserved. © WIn Publishing Trust