Luk 22
22
Minwiinmunu Jézu ma we ble
(Mt 26:1–5, 14–16; Mk 14:1–2, 10–11; Jn 11:45–53)
1Buru lé lévɛn ’ka a va lo, alé fɛti lé wa laama Taboyi lé fɛti, é bɔ é pu. 2Balebanmunu segelenu valé sɛbɛgifemunu a kwa kulina léé, ’wo Jézu gya, naa, wa kanana munu lee.
3Naa, Judas lé wa laama Kariɔtzan, ’té é ke mi vu ta fié va mi do nya bɛ, Satan wɔra a bli gi. 4Yé Judas go nana lɛ Balebanmunu segelenu valé Balebangikɔn tabin sunyanu nwiinzannu va léé, ’é a kɛla fɛan zo yé é Jézu pa wo lee, a we ma. 5Wo gi nana, yé wo dére pa do léé, ’wo gɔɔli nɔ a lɛ. 6Wo dére pale zuo, bléyian é bɔalɛ léé, é Jézu pa wo lee munu ma trɔnné va, é a ’bɛ naginina.
Jézu valé é zuomunu Taboyi lé fɛti kɛlɛ
(Mt 26:17–25; Mk 14:12–21; Jn 13:21–30)
7Buru lé lévɛn ’ka a va lo, ’bɛ yi bɔ aan wo, yian nya lé woo Taboyi lé ’blané gya bɛ, 8Jézu Piɛri valé Jan nwunvɔ yé é lé wo lɛ léé: ’Ka go Taboyi lé fɛti ma’lɛrɛ ko lɛ yé ko a ble. 9Yé wo lé a lɛ léé: É sɔ i lɛ léé, ko ma’lɛrɛ fɛ kyɛnnaa? 10É a zi pa wo lɛ léé: Ka ye, dé ka bɔ bɔrana fla, ka dan kee lɛ gɔné do nya ’yibɔ nya é bɛ ta; ’ka go a zuo kɔn lé é go a gi, ana, 11yé ’ka fe kɔnzan lɛ léma: Mizan léma: Fɛ kyɛnna lé yee valé é zuomunu é dan Taboyi lé fɛ ble lɛɛ? 12Yé kɔn nwiin kɔn gi blɛn do lé tablé valé blinnu ke a gi, é dan a gɔɔn lɛ ka lɛ; ana lé ’ka Taboyi lé fɛ ma’lɛrɛ ma. 13Wo go, yé wo bɔ fɛnu ma bélé fɛan zo lé Jézu a fe wo lɛ, a zo, yé wo Taboyi lé fɛti lé fɛnu ma’lɛrɛ.
14A bléyi bɔ aan wo, yee valé nwunvɔmunu nyana tablé zi.
Jézu we dɛrɛ paa é zuomunu gi
(Mt 26:26–30; Mk 14:22–26; 1 Kor 11:23–26)
15Yé é lé wo lɛ léé: É sɔ an lɛ é baba léé, maa Taboyi ’ko lé fɛ ble ka va anlé nyanéblele ’lɛ; 16naa, maa lé ka lɛ léé, maa ’ka dan a bɛ ble lɛ lo, fɔɔ ’té a kɛlɛle lɛ sɔɔ Kazambale lé fuatɛrɛ la. 17É ’yiminikana do si aan wo, é Bale bɔ vɔ yé é léé: ’Ka kana ’ko si yé ’ka a gifɛ guli ka ke ma; 18naa, maa lé ka lɛ léé, é sia bléyi ’ko ma, maa ’ka dan dɔrɔyi mini lɛ lo fɔɔ yé Kazambale lé plale mi nwiin é da.
19’Bɛ zuo, é buru si, yé Bale bɔvɔle zuo é a bɔi yé é a nɔ wo lɛ a fele nya léé: An kɔlɛ lé maa a nɔ kalé we ma, yee lé ke ’ko. ’Ka we ’ko kɛlɛ an sele dɔle ka gi we ma. 20A zo duo lé dé wo fɛ ble faa é ’yiminikana si yé é a nɔ wo lɛ a fele nya léé: Fɛ lé ke ’yiminikana ’ko gi, an nyɛ lé; é a gipawe dɛrɛ dɔ plɛplɛ nyɛ lé é zana kalé we gi, a nya.
21Ka ye, mi lé é ke an pana munu lee, a bɛ a an va fɛ pala ’ko gi duowo. 22Maa blami Be a gona, fɛan zo lé Bale a fe, a yɛrama, naa, mi lé é an pa munu lee, a gale nyɔ. 23Yé wo kun we laale ma wo ke lee léé, ’wo va mi kyɛn ɛ dan we ’ko kɛlɛ lɛɛ?
Dé de ɛ ke wo va mi blɛn nyaa?
(Mt 18:1–4; Jn 13:2–17)
24Zavɔle nwa é ziin nwunvɔmunu méléna yé wo léé, ’wo va mi kyɛn ɛ ke mi blɛn nyaa? 25Jézu lé wo lɛ léé: Bɛnnu nwiinmunu a é plale ’wo nwiin plɛplɛ, ’té wa fé wo lɛ léé, ’ka ’wo laa wezinkɛlɛzannu. 26É ’ka ’bɛ zo ka va lo. Ka va mi blɛn ’é kɛlɛ mi kiéné nya ma, yé ka ta loruzan ’é kɛlɛ ka wuozan nya ma. 27Naa, mi lé é ke tablé zi, yee ɛ ke mi blɛn nya laa, taa, mi lé éé fɛblele sié ’té éé dan a nya bɛ, ’bɛ ɛ ke mi blɛn nyaa? Tablézizan kaan loo? Naa, maa a ka méléna bélé mi lé éé fɛblele sian ’té éé dan a nya, a zo. 28Ka a munu lé wo yara pa we ta an va an gidanlenu gi, wo nya; 29amalé maa fuatɛrɛ bɛ pa ka lee, bélé fɛan zo lé an Ti a bɛ pa an lee, a zo, 30yé ka dan fɛ ble lɛ anlé tablé ta anlé fuatɛrɛ la, yé ka dan nyana lɛ webleblinnu ta Izraɛl lé bɛn vu ta fié lé we blele we ma.
Jézu Piɛri lé sɔnvɔle é ma fale vɔ
(Mt 26:31–35; Mk 14:27–31; Jn 13:36–38)
31Mizan léma: Simɔn, Simɔn, é sɔ Satan lɛ léé, ’é i wuo bo bélé ’sawɔlɛ wuobole zo. 32Naa, an bazoro ilé we ma, léé, té i blipale ta é zana lo; yé bii, dé i bli nɔla yian ma, ’i i bwenu dɔ gligli ma. 33Piɛri lé a lɛ léé: Mizan, an ma a é ’lɛrɛle, dé i go bokɔn gioo, dé i gan‐oo, ko ɛ ke i nya. 34Yé Jézu léé: Piɛri, kyɔ, dé manegɔné ’ka tan we lɛ lo, i dan a fe lɛ gɔnɔ yaa léé, ’é ’ka an dɔɔa lo. Maa fe i lɛ.
Gɔɔlipabala — pulu — sawala — wolé we
35Jézu lé wo lɛ é ziin léé: Dé maa ka nwunvɔ, ’té gɔɔlipabala koo, pulu koo, sawala koo, ’té wo ’ka aan wo ka lee lo, fɛ do vuru ka maa? Wo léé: Gba. 36É lé wo lɛ léé: Naa, sin, mi lé gɔɔlipabala ke a lee, ’é a si ma, mi lé pulu ke a lee, ’é a si é ziin ma, yé mi lé gwɔun ’ka a lee lo, ’élé sɔ dan yé é gwɔun lɔ ma. 37Naa, maa lé ka lɛ léé, dére ’ko lé wa gyɛ sɛbɛ gi é a lé a lɛ é sɔɔ an nya; é léé: Wa nɔnɔ wenyanékɛlɛzannu va. An ma we lé wa gyɛ sɛbɛ gi, é vo sɛné yé a faa kɛlɛle lɛ é sɔɔ. 38Wo léé: Mizan, gwɔun fié lo. É lé wo lɛ léé: ’Bɛ a é yi.
Jézu bazoro Jɛtsémané
(Mt 26:36–46; Mk 14:32–42)
39É bɔra aan wo yé é go Ɔlivi gɔ nwiin a kɛlɛbɛ kyɛn zo. ’Té a zuomunu a a va.
40Wo bɔ aan wo fɛkona yé é lé wo lɛ léé: ’Ka bazoro, té wo ka gi dan lo we ma. 41Dé mi gɔlɛ vuli éé diaan fɛana, a zo lé Jézu si wo ma, yé é powuo zun yé é bazoro yé é léé: 42An Ti, dé é sɔ i lɛ, ’i ’yiminikana ’ko si an lee. Naa, té é kɛlɛ an sɔlɛwe nya lo, ’é kɛlɛ i sɔlɛwe nya ma. 43Yé lanje do si la gi yé ’bɛ da a va a dɔle plɛplɛ we ma. 44É a nyané blena kaii, yé é bazoro plɛplɛ taa nya yé kyɛyee nyi bɔra a ma nyɛ nya yé é zana tɛrɛ va. 45É nyaa bazorole nya faa yé é nwa yé é go é zuomunu va yé é bɔ wo ma yigyɛna bli kyɛ nya. 46Yé é lé wo lɛ léé: Mɛmalé ka a yigyɛnaa? ’Ka nwa yé ’ka bazoro, té wo ka gi dan lo we ma.
Wo Jézu kun
(Mt 26:47–56; Mk 14:43–50; Jn 18:2–11)
47É a tan wefena aan wo, tɔɔn, mi gu bɔra wo ma yé mi lé wa laama Judas, ’té é ke mi vu ta fié va mi do nya bɛ, ’té é a wo ’lɛ. É bié Jézu ma a tuu gyɛle we gi. 48Yé Jézu lé a lɛ léé: Judas, i maa blami Be paan munu lee an tuu gyɛle nyaa?
49We lé é dan bɔ lɛ Jézu ma, a vamunu a ye aan wo yé wo léé: Mizan, ko wo gyɛ gwɔun nyaa? 50Yé wo va mi do Balebanmunu ’lɛzan wuozan bɛyila tɔné bɔi gwɔun nya. 51Naa, Jézu léé: ’I dɔ do, ’bɛ sɔ. Yé é bɛ mane ’bɛ tɔné ma yé ’bɛ béli.
52A zuo Balebanmunu segelenu koo, Balebangikɔn tabin sunya ’lɛzannu koo, mi segelenu koo, wo lé wo da Jézu kun lɛ bɛ, Jézu lé wo lɛ léé: Ka da gwɔunnu valé yilinu nya ka lee, bélé fɛan zo lé ka da kyeenwozan kun lɛ, a zoo? 53Maa a ka va yifaama Balebangikɔn gi yé ka ’ka an kun lɛ lo. Naa, bléyi ’ko a ka valé gunutinu lé plɛplɛ bléyi nya.
Piɛri sɔn vɔ Jézu ma
(Mt 26:57, 69–75; Mk 14:53, 66–72; Jn 18:12–18, 25–27)
54Wo Jézu kun aan wo, wo go a nya Balebanmunu ’lɛzan lé kɔn gi. Piɛri vo dana a zuo baa, sɛné sɛné.
55Munu kyɛ sɔn gɔrɔ méléna yé wo nyana a zi. Piɛri nyana wo va. 56Wuole do a ye é nyanale kyɛ zi, yé é a nagini téiin yé é léé: Mi ’ko a a va é ziin. 57Naa, Piɛri léé, gba, yé é léé: Lezan, maa ’ka a dɔɔa lo. 58’Bɛ zuo sɛ, mi bɛ a ye yé ’bɛ léé: Bii é ziin, i a wo va mi do nya. Yé Piɛri léé: Béé, maa kaan lo. 59’Bɛ zuo, dé lɛrɛ do giéle zuo léé? mi bɛ yee duo fe yé ’bɛ léé: Webozen nya, mi ’ko a a va; é a Galilé tɛrɛ la mi nya. 60Piɛri a zi pa léé: Béé, we lé bé fé bɛ, maa ’ka ’bɛ maan lo. A bléyi duo nya, dé é a tan wefena, manegɔné we. 61Mizan nɔla yé é Piɛri nagini. Yé dére lé Mizan a fe a lɛ léé: Kyɔ, dé manegɔné ’ka tan we lɛ lo, i dan a fe lɛ gɔnɔ yaa léé, ’é ’ka an dɔɔa lo, a sele dɔ Piɛri gi. 62É bɔra béera yé é vo wuvɔna kaii.
Wo we nana Jézu ma yé wa bla
(Mt 26:67–68; Mk 14:65)
63Munu lé wo ke Jézu tabinna wo we nana a ma, ’té wa blaan. 64Wo sɔ vuru a yuɛ la yé wo we laa a lee léé: ’I balelawe fe. De ɛ fɛ duun i lɛɛ? 65Yé wa sɔnɔ bɛ kiɛre ma é ziin.
Wo go Jézu nya webolikinimunu va
(Mt 26:59–66; Mk 14:55–64; Jn 18:19–24)
66Tu kini aan wo, mi segelenu koo, Balebanmunu segelenu koo, sɛbɛgifemunu koo, wo zén ékeva yé wo da Jézu nya wolé webolikinimunu va. 67Wo léé: Dé bii a Krist nya, bé fe ko lɛ. Jézu lé wo lɛ léé: Dé maa fe ka lɛ, ka ’ka dan pa lɛ a ta lo; 68yé dé maa we laa ka lee, ka ’ka dan a zi pa lɛ an lɛ lo. 69É sia bléyi ’ko va, maa blami Be, an dan nyana lɛ Plɛplɛfaazan bɛyilazia. 70Wo faa léé: ’Té i a Kazambale Be nyaa? É lé wo lɛ léé: Yee lé ka a fe bɛ, maa ɛ ke a nya. 71Yé wo léé: Ko mawe a wenayezan bɛnu gii? Kobozen, ko a ’léé dére ’ma.
Zvasarudzwa nguva ino
Luk 22: GOURU
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Alliance Biblique de Cote d'Ivoire 1979