Yezhanq 10
10
Yezsuz Zawh Puj dawzmbej Ndae
1 Yezsuz daeuq hax: "Gux haxdoq su swhlit, gawz mwz langh dij mbej, mboq zawh daeq baegdu mwz, zawh benz dihndai mwz, goanz naeh zoq zawh puj laek. 2Gawz daeq baegdu ndonj mwz, gawz zux zawh puj dawz dij mbej. 3Goanz dawz du naeh aj du hawj dix, dij mbej goj ruxnyinz hiang dix. Dix rongx minxzwh dij mbej hoakri, rongx hoak do hoak do, lingz paenqdix og daeuj. 4Dix lingz dij mbej hoakri og daeuj yaq, dix zoq daeq daekgoanq dij mbej. Dij mbej ruxndeq zawh hiang dix, baenzzaqnaeh dij mbej goj nowngzlaeng dix. 5Dij mbej mboq rux biak hiang puj mawq, baenzzaqnaeh dij mbej mboq rux nowngzlaeng puj mawq, mizgaj luq lenh ni." 6Yezsuz aeu aen bixliq naeh koanx dwk paenqdix, gaj paenqdix mboq ruxndeq gaenq dix hax naeh zawh hax gaeng.
7Baenzzaqnaeh Yezsuz daeuq daj paenqdix hax: "Gux haxdoq su swhlit, gux zoq zawh baegdu dij mbej. 8Gawz maz daekgoanq gux, gawz zoq zawh puj laek, gaj dij mbej mboq biak paenqdix. 9Gux zoq zawh baegdu, nanghgaj gawz zawh ndonj gux mwz, gawz zoq ndaej jeuq mboqyaq, yaq bae'dauh vangqdangh, ndaej yuq dih miz nyaj zax. 10Pujlaek maz, toj zawh maz laek, maz kaj, maz vaih. Gaenqgux maz, zawh hawj dij mbej ndaej aen mingh, hawj aen mingh paenqdix daem'dw. 11Gux zawh puj dawzmbej ndae, puj dawzmbej ndae venq cholaeng dij mbej viangh aen mingh. 12Sowh puj mboq zawh puj dawzmbej, gaj zawh lugriangz naeh, dij mbej goj mboq zawh gaenq hoakri dix, dix leztaen ma'naez daeuj, dix zoq jizzaz dij mbej, lenh gowx. Ma'naez goangz dij mbej, hawj dij mbej daengzle dungzbyaeg nauq. 13Dix zawh lugriangz, dix mboq aeu dij mbej nyaengxzaw, baenzzaqnaeh dix zoq lenh gowx. 14Gux zawh puj dawzmbej ndae, gux ruxndeq zaw dij mbej gux, dij mbej gux goj ruxndeq zaw gux, 15daj Dez ruxndeq zaw gux, gux goj ruxndeq zaw dix dungzlumj. Yaq gux naengz rux cholaeng dij mbej viangh aen mingh. 16Gux naengz miz dij mbej ndai tem, mboq zawh dij mbej langh naeh. Gux baenz lingz paenqdix daeuj, paenqdix goj rux biak hiang gux mboqyaq. Yaq dij mbej gux daengzle hoak boangx ndeu, daengzle zux miz goanz dawzmbej doag. 17Zawh gux haeggaj viangh aen mingh, baenzzaqnaeh Dez ngaiq gux; gux haeggaj viangh aen mingh, zawh cholaeng daeuq aeu dauh maz. 18Mboq miz gawz aeu aen mingh gux ndaej, zawh gux haeggaj viangh. Gaenqnaeh zawh Dez gux yaix gux hoak. Gux miz qenhliq viangh, gux goj miz qenhliq aeu dauh maz." 19Puj Yaeuhtaiq cholaeng suq kauq naeh daeuq dungzjinj. 20Paenqdix miz goanz lai taeuq hax: "Dix zoah dij pi mwz ndang yah, dix baenzbaeg yah. Baenzzaqrawz biak dix mux?" 21Goj miz dij goanz hax: "Suq kauq dix hax naeh mboq zawh sowh puj zoah dij pi mwz ndang naeh hax. Dij pi hoakrawz rux hawj puj ta'mbud leztaen mux?"
Puj Yaeuhtaiq Viangh Yezsuz
22Yuq ndaw Yezluqsaxlaengx, taeng jeng rongx hoak Jeng Zoih rownz dij Sen naeh,#10:22 Jeng Zoih Rownz dij Sen zawh jeng long puj Yaeuhtaiq jeng ux, jin jeng naeh paenqdix gaj rownz gaj diamj daeng biad vaenz dungzdam. zwz naeh zawh zwzgoangj. 23Yezsuz yuq gumhhongh rownz dij Sen daeq, dix gvaq aen yauj rongx hoak aen yauj Soaxloahmaenh naeh. 24Puj saeq puj Yaeuhtaiq homx maz haenz dix, daj dix hax: "Mawz daz hawj piu am mawz taeng zwzrawz mux? Jixzawh mawz zawh Jizduz, mawz zoq haxdoq piu swhlit." 25Yezsuz daj paenqdix hax: "Gux haeuz haxdoq su, gaj su mboq sinq. Sowh saeh Dez gux nemz gux hoak naeh haxdoq daenh gux zawh gawz. 26Gaj gaenqsu mboq zawh boangx mbej gux, baenzzaqnaeh gaenqsu zoq mboq sinq. 27Dij mbej gux biak hiang gux, gux goj ruxndeq zaw paenqdix, paenqdix goj nowngz gux. 28Gux aeu aen mingh daengznauq naeh hawj paenqdix, paenqdix mboq rux lown, taengdiak daengznauq, gawz goj longx paenqdix daeq ndaw mungz gux bae mboq baenz. 29Dez aeu dij mbej hawj gux naeh dwx nyeuz daengzle nauq, goj mboq miz gawz longx paenqdix daeq ndaw mungz dez gux bae baenz. 30Gux daj Dez bwnz zawh goanz ndeu."
31Puj saeq puj Yaeuhtaiq daeuq zaep tin daz saeuh dix. 32Yezsuz daj paenqdix hax: "Gux hoak sowh saeh ndae Dez nemz gux hoak naeh hawj su lez lai baenzzaqnaeh, gaenqsu cho yowngh rawz aeu tin saeuh gux mux?" 33Puj saeq puj Yaeuhtaiq daj dix hax: "Gaenqpiu mboq zawh cholaeng saeh ndae aeu tin saeuh mawz, zawh cholaeng mawz hoak loang dij Sen, mawz gaenqyumq aeu hoakri hoak dij Sen. Mawz goj zawh dij goanz naeujmax, gaj mawz aeu hoakri hoak dij Sen." 34Yezsuz hax: "Su goj ruxndeq Sw Dij Sen hoakzaqnaeh laiz: ‘Dij Sen ndaej hax, gaenqsu zawh boangx sen ux.’#10:34 Gaemz kauq naeh yuq Sw Lownx 82:6. 35Gaenqsu goj ruxndeq sowh kauq ndaw Sw Dij Sen hax naeh mboq rux byenq daengznauq. Daengzgaj sowh dij goanz ruxnyinz kauq dix hax naeh, dij Sen naengz rongx paenqdix hoak boangx sen ux. 36Jixzawh dij Sen rongx paenq goanz naeh hoak boangx sen ux mboq zawh hoak loang, haenx, gux zawh goanz dij Sen lowg naeh, goanz dij Sen nemz daeuj dihndin naeh, gux haeggaj rongx hoakri hoak lug zaiz dij Sen, gaenqsu naengz hax gux zawh hoak loang dij Sen maj? 37Jixzawh gux mboq hoak sowh saeh Dez nemz gux hoak naeh, gaenqsu zoq laek sinq gux. 38Jixzawh gux hoak sowh saeh Dez nemz gux hoak naeh, daengz gaenqsu mboq sinq gux, su goj baenz sinq sowh gaenq gux hoak naeh. Hoakzaqnaeh hawj su nwh taeng, hawj su ruxndeq Dez gux yuq ndaw gux, gux goj yuq ndaw Dez gux." 39Paenqdix daeuq daz gaep dix, gaj dix daeq mungz paenqdix gowx ni. 40Yezsuz daeuq bae ka dah Yezdanq baih gaengnaeh, bae dih koax daekgoanq Yezhanq saeh daenh hoak diauq zauh soiq naeh, yuq dihnaeh ndowj. 41Miz goanz lai taeuq bae dih dix naeh, paenqdix hax: "Hax le hax Yezhanq mboq sanz hoak sowh saeh ndaw fax naeh yowngh rawz, gaj sowh gaenq Yezhanq hax goanz naeh, gaemz rawz goj zawh zaeh mbezleh." 42Yuq dih gaengnaeh, zoq miz goanz lai taeuq sinq Yezsuz.
Zvasarudzwa nguva ino
Yezhanq 10: ZHN
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Peace Publishing Co. All rights reserved.