Luka 19
19
Yesu a mbədə Zaka nzə-luu taa shemtə
1Yesu a koɗə dɨ vor Jeriko ɓa pɨrə. 2Ama nee a vor Jeriko mya wa atɨ Zaka, ndi makpanə da ji-luu taa shemti nzə-gɨnəti mgban. 3Ite Yesu nee dɨ pɨri, Zaka a ɓərə gə nda nan, ɓwaare a furo kɨr-kɨr, gə-angɨn ndaa mba naatə naa Yesu, gəkɨlə ndi ma gbɨlɨmə. 4Gəkɨlə nda dɨ mwa nda naa Yesu, nda giɓə a muɗə humwa, a nggɨrə kada sɨkɨlike a tɨfa Yesu ɓa koɗə sə, gə nda nan.
5Ite Yesu a tɨlə mgba sɨkɨlikəngɨn, nda maddə nəngɨn a pwa a waha, “Zaka janga tan-tan. A hwodəw na janga supo.” 6Də nda janga tan-tan a wayadə Yesu, a zəkan a hwodan ka hanɨngtə.
7Myee mbiɗi kat ɓe naa ləngɨn, təna tiya nggwonshe, tən ta sa atɨ, “Namə nzə-ɗa səhasa, sɨnə Yesu ɓa zɨmshe a hwodan.”
8Zaka a maɗə a kangə humwa ɓwaare, nda sa Yesu atɨ, “Həmɨmiye! Zə niyi gətɨnə ɓəgəng hɨn taka gɨnətɨ de kpe. Hɨnə ɓa və ji-poritə gbɨlə gɨnətɨngɨn. Anda mgban hɨn tɨmbɨr ama lugən asə, hɨn ɓa mɨnə mangɨn dən a laka fwat.”
9Yesu a san, “Supo mbətə pɨra a vor hwodəw, gəkɨlə hye mgban hyenə nze da Ibɨraim. 10Gə hɨn Nze da Ɓwaara na shi gəkɨlə na ɨl myee kyepi, na mbədərən mgban.”
Byelə səɗe a nə kɨsee nggala ka pamtə
(Matta 25.14-30)
11Ɓwaare nee a vor kɨl la Yesu a dɨ boyo, təna shi gbyel ka Urshelima, təne niyi ɓətɨgə həmne da Həmɨnpwa ɓa nza a dɨma kaarən ɗəng. Gə-angɨn nda tiya ta ɗarən byelə səɗe. 12Nda sarən atɨ, “A nzomo a muɗə a njiya ɓong-ɓong gəkɨlə nda luwa həmne a mɨna. 13Ite ndi ɓa muɗə nda waga kɨse dan bəw a ɓyanarən pamtə hyeɗə-hyeɗə. Nda sarən atɨ, ‘Nggalam ka taa nə, baa zə fəra na mɨna də.’
14“Mi vɨrasən a lyen imi dɨ vorsərən ka lyenshe a vɨrate nda muɗə ɓa luwa həmne gəkɨlə mya boyə kabee dɨ və həmnəngɨn atɨ, ‘Hin kat hinaa mworən, hinaa mwo atɨ nda genə həmə.’
15“Kat ka angɨn nda luwa həmne a mɨna a hwoɗye. Nda waga kɨse dan 'ye nda ɓyanarən taa, gəkɨlə nda lee sa təna ɗɨmə ka taangɨn a təna nggala kan.
16“Kɨsa kwamətə a shi a san, ‘Həmɨ-hwoɗye, pamte hiɗə hye vi hɨn nggala kaarə ɗɨma pamtə bəw a nəngrən.’
17“Həmɨ-hwodan a luwa a san, ‘Usəkə kwe kɨsa twaye de. Gə twaite hye bɨldə a nə sa ɓyeləng, zə gəə kpana a nə vɨre bəw.’
18“Kpeyə kɨsa dan a shi a san, ‘Həmɨ-hwoɗye, pamte hye vi hɨn nggala kaarə ɗɨma pamtə tuf a nəngrə.’
19“Həmɨ-hwodan a san, ‘Gəkɨlə twaitə dəw zə gəə kpana a nə vɨre tuf.’
20“A kɨsa a mɨna shi, a sa həmɨ-hwodan atɨ, ‘Həmɨ-hwoɗye, pamtə dəw nə. Taa ɗɨma asə a nəngrə, taa nggurgə asə gə nəngrə mgban. Na ngguro a vutə vor sɨbaashe a ɓodə a haa taa asə də ɓa gərə. 21Kalanga a dɨ gi, gəkɨlə hye ma oti. Hye dɨ nggur se a haa tee ɗɨkdən də, hye dɨ ɗawshe a haa tee laga də.’
22“Həmɨ-hwodan a luwa a san, ‘Hye kɨsa ɓaye! Ka ləməgyee dɨma dɨ kwaamɨnga mya ɓashiyu. Hye sa atɨ hɨn ma oti, na dɨ nggur se a haa taa ɗɨkdən də, na dɨ ɗawshe mgban a haa taa laga də. 23Ɓə mɨnə ɗa tee ɗɨkdə taa de a bonggə taa a haa mye ɓa nggala kan də? Gəkɨlə hɨn kana mɨna na luwo ka moone a nəngɨn.’
24“Həmɨ-hwodan a sa mye kangə hangɨn atɨ, ‘Luwomgən pamte a tɨfəngɨn, hwuna və ma ka bəw.’
25“Myee a hangɨn a san, ‘Kək! Həmɨ-hwoɗye a sɨnə ka pamtə bəw! Mya mɨnə a ɗɨkən da?’
26“Həmɨ-hwoɗingɨn a sa, ‘Na dɨ səwnə hwun kat ma ka se kan sɨnə mye ɓa ɗɨkən də. Ma mgban tam ka asə, nagi nzɨ a nda gə kan ɓyeləng nə, mye ɓa kpawan a lugən. 27Hɨnggə ji-nyaagi a myee aa mwo atɨ na gəə həmə a nəngrən, dɨmam kaarən, ɓələmtɨrən ganə a humwashi.’ ”
Mi Urshelima a wayadə Yesu
(Matta 21.1-11; Markus 11.1-11; Yohana 12.12-19)
28Ite Yesu ɓe bwe ləməgingɨn kat mbəə, nda luu humwa təna kɨt tɨfe a jip Urshelima. 29Yesu a tɨla gbyel ka i ji-vɨre kpe, Betafaji ka Betani, gbyel ka Motɨ Kade Zetun, nda lyen kpe dɨ vor lagbe dan. 30Nda sarən, “Wudəmə vor nzɨ-vɨrate a humwasəwnə. Hwun kana pɨrə, a kwatɨfə i hwoɗi hwun ɓa pa nzə-mbɨrse kangə gbale, ama aa ndaga liyən. Hwuna para a shike kan ganə. 31Ama ka ɗiyəwnə atɨ, ‘Bə ya hwuna dɨ para nzə-mbɨrse?’, hwuna sa mangɨn atɨ, ‘Həmɨmiye nə dɨ mwi.’ ”
32Tən myee mya lyentɨrən a muɗə a dɨ pa nzə-mbɨrsəngɨn nee kanyi ɓətɨ mya boyərən. 33Ite təna kopo a dɨ para, yə həməngɨn a ɗiyərən le, “Ɓə yadiya hwuna dɨ parenəgə nzə-mbɨrse?”
34Təna luwa a sarən, “Həmɨmiye nə dɨ mwi.”
35Təna shi ka nzə-mbɨrsəngɨn a haka Yesu. Təna pyala rokotye darən a beetɨ nzə-mbɨrsəngɨn, a nggɨrdə Yesu a nəngɨn. 36Ite Yesu nggur tɨfe dɨ muɗi, ɓwaare a luu kwamətə a pɨrgən a humwa, ta saɗagə rokotye a pyalarən a nə tɨfe.
37Ite təna tɨla gbyel ka Urshelima a dɨ janga gə Motɨ Kade Zetun, lagbe dan kat ka təkə-təkətɨ ɓwaaree dɨ koɗən a tiya gəə gawe ta ɓondi Həmɨnpwa ka dyemshe ka hanɨngtə gəkɨlə zərgi səkushipa təna naa Yesu a ɗa. 38Tən ta sa atɨ,
“Həmɨnpwa wula ka Həma
dɨ shi a vor kwakɨngɨn!”#19.38 Naasə: Dyemshe 118.26.
“Ɗoltə ka fukatə hɨnggə Həmɨnpwa nə.”
39Farise a vor təkə-təkətɨ ɓwaarengɨn a sa Yesu atɨ, “Nzə-kəndəshe, gɨra lagbe dəw gə wule ləməgyee təna dɨ boyo.”
40Yesu a sarən, “Hɨnə dɨ səwnə, nagi təna gbə kwaamɨngrən kping, fare nə kat a nə tɨfe ɓa pɨrə humwa ka gawe ka ɓondiha.”
41Ite Yesu a shi gbyel ka Urshelima, nda tuwo nəngrə, 42nda sa, “Hye Urshelima langa ori. Hɨn nda hɨma atɨ hwuna nda lee sa ɓa nda shikəwnə ka ɗoltə ka piyatə supo. Shezə tee leyi, gə ləngɨn nee a haa ɓotə, tee nan ka diinga. 43Fəre nə ɓa shi aa dɨ ɓongə, ji-nyaagu ɓa shikəw ka pa-kawatə, a takada a peyə kat. 44Tən ɓa ɓəl jinga kat, təna byengda a njiya a fəl-sɨbonggye, haa a bə həlkəkət, gəkɨlə tee lee fəra Həmɨnpwa ɓa shi a mbəda də.”
Yesu a kəndəshe a Kwa-Shafe
(Matta 21.12-17; Markus 11.15-19; Yohana 2.13-22)
45Yesu a tɨla a vor Urshelima, nda zə a pɨrə Kwa-Shafe, a dɨ tiya om myee ɗa lumotə, dɨ ɗərdə shee a hangɨn. 46Nda sarən, “Mye doro vor Malɨmtɨ Ɗəmɗəmtə atɨ, ‘Hwode ɓa gəə hwoɗi hiwti,’#19.46 Naasə: Ishaya 56.7. shezə ɓəgəng hwuna mɨndərən ‘haa ɓota mahəryi.’#19.46 Naasə: Jerimaya 7.11.”
47Fərə-fərə, Yesu nee a Shafe dɨ kənə ɓwaare shee. Kɨsehəmi kpan-kpanye ka ji-lee kəndə ɓashita Musa, kat ka mi kpan-kpanye da Yawude mgban nee a vor ɓwaare dɨ ɓəri gə təna kɨttən a ɓɨlə. 48Kat ka angɨn tənaa mban a kɨsə, gə hubo ɓwaare mɨnə hakan dɨ kɨl ləməgyee nda dɨ boyo.
Zvasarudzwa nguva ino
Luka 19: bcy
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.