Luka 20
20
Ndəle a nə gəta Yesu
(Matta 21.23-27; Markus 11.27-33)
1A fərə ɓə, Yesu nee dɨ kənə ɓwaare lə feme da Həmɨnpwa a Kwa-Shafe, kɨsehəmi kpan-kpanye ka ji-lee kəndə ɓashita Musa ka mi kpan-kpanye da Yawude a shi hakan. 2Təna ɗiyən, “Boyenə pee, ka ndo gəti hye dɨ ɗa shee hye dɨ ɗa, wonə dɨ ɓoyu mgba hye ɓə dɨ ɗa shingɨn?”
3Nda sarən, “Hɨn mgban hɨnə ɓa ɗiyəwnə le. Boyi mi, 4ɓətɨ gəte Yohana a dɨ ɗa batisɨmatə kaarə ɓwa, dɨ pwa nda ɗɨma, naasə mgban dɨ haka ɓwaare ganə a vɨratə nda ɗɨma?”
5Təna nidə ləngɨn a wakasərən, a boyəsə atɨ, “Hɨm kana san atɨ, ‘Dɨ pwa,’ ndi ɓa ɗiyəm atɨ, ‘Ɓə mɨnə ɗa hɨm aa ɓə mwakan?’ 6Hɨm kana san atɨ, ‘Dɨ haka ɓwaare ganə a vɨratə,’ ɓwaare kat ɓa kalarəm ka fare, gəkɨlə ɓwaarengɨn mwa atɨ Yohana kpalə diyalə.” 7Gə-angɨn təna sa Yesu atɨ, “Hinaa lee ma ɓoyo Yohana mgba nda ɓə dɨ ɗa batisɨmatə.”
8Yesu a sarən, “Hɨn mgban taa dɨ boyownə ma vi gəte na dɨ ɗa lyentɨnə kaarə.”
Byelə səɗe a nə ji-nidə gaashe
(Matta 21.33-46; Markus 12.1-12)
9Nda pɨrə humwa a boyə ɓwaare byelə səɗa nə atɨ, “Ama a ka kaanda, a nggub kade zɨmtə a vor kaandangɨn. Nda shea və i ji-hawti gə tən ta niyən dərən. Nda muɗə a haa a dɨ ɓwanga də. 10Ite kade a mbwo a kən zɨmti, həmɨ gaashingɨn a lyen kɨsa dan gə mya vən mbwotɨ kadengɨn. Təna kɨt kɨsangɨn a mya lyentən a lyebə a kərən, nda muɗə ka tyefingɨn dɨ payya tənaa vən asə. 11Də həmɨ gaashingɨn a mɨna lyen ama dɨ vor kɨse dan. Təna mɨna kɨt mangɨn a lyebə, a vən sopye a omrən nda muɗə dɨ payya ɓə. 12Də nda mɨna lyen ma mwaakɨnətə ɓə. Təna mɨna lyebə a ɗəkən ɓokye, a ɗongdən a beetɨ kaanda.
13“Də həmɨ gaashingɨn a ɗiyə nəngɨn atɨ, ‘Ɓə mɨnə mbiɗi na ɗa gəngna? Mbam ɗəng, hɨn lee sa na ɗa, hɨn ɓa lyen nze de hiɗə kal-kal a na dɨ mworən, ndəng ta kwa naa fukasən.’
14“Ite ji-hawtɨngɨn a naa nze da həmɨ gaashingɨn a ɓa mɨnə shee sɨne dɨ shi, təna shalasə le a nəngɨn, təna sa atɨ, ‘Sɨnə ɓaga mɨnə gaashinə. A mya ɓɨləmrən gələ gaashinə a gəə hɨnggəm nə.’ 15Təna ɗongdən a beetɨ kaanda a ɓɨltən.”
Yesu a ɗiyə, “Ɓə mɨnə hwuna dɨ niyə həmɨ gaashingɨn ɓa ɗa ka mingɨn? 16Ndi ɓa shi a ɓəl mingɨn kat, nda və imi somi gaashingɨn.”
Myee kanyi dɨ kɨl la Yesu a dɨ boyo a sa atɨ, “Naa Həmɨnpwa a nggurgə angɨn.”
17Yesu a nidərən kat a goyi diingrən a sa, “Ɓə naarə la mya doro vor Malɨmtɨ Ɗəmɗəmtə nee a shiya?
“ ‘Faraa ji-nwoshe a kworən,
sɨnə mya shea kwak mgba-vɨne kan#20.17 Mi Israila tən ka fare təna dɨ nwo hwodarən, gə fare mya dɨ kwak mgba-vɨne kaarən a dɨ nyerədə nwoshe.’#20.17 Naasə: Dyemshe 118.22.?
18Ma fukə nə faratɨnə, mangɨn ɓa ɓeyə nyatak-nyatak, ma mgban faratɨngɨn a fukə nəngɨn, mangɨn ɓa myana ɓətɨ humboti.”
19Kɨsehəmi kpan-kpanye ka ji-lee kəndə ɓashita Musa ɓe kɨl ləngɨn, təna ɓərə ɓa kɨttən a hangɨn gə tən leyə atɨ a nəngrən nda ɗa zərgi ləngɨn. Shezə kala nee gərən, gə tən kana pan mbiɗitɨ ɓwaare ɓa nya gə le dan.
Mbwa Kaisar taa shemtə
(Matta 22.15-22; Markus 12.13-17)
20Təna kpəkən dye ta kəsən kaake, təna lyen imi a hakan. Tən mgban myee mya lyenə, təna ɗa ɓətɨ tən mi twayi. Gələ təna koɗən ka kuta a ngaarən ka byele a kɨttən a nə la kat nda boyo, gə təna ɗɨmə a vədən a haka nggwamnatɨ Roma. 21Mingɨn 'ye dɨ kəsən kaake a ɗiyən le ka kuta atɨ, “Nzə-kəndəshe, hin leyə atɨ ka diyale hye dɨ bwe sa kana. Hye dɨ kəndə sa kana mgban, teewa bɨldə mwonəha mgban. Hye dɨ kənə ɓwaare təna nzaa-nzate kana a humwa Həmɨnpwa ka diyale. 22Gə-angɨn, ɓashitɨ dam sa atɨ ɓə kana hina mbwa Kaisar hama kpanə Roma taa shemtə ma? Anda aa sə mgban hye boyenə.”
23Ɓə leyə atɨ ngaati təna ngaarən. Nda ɓə sarən, 24“Bɨlimi taa da mi Roma pe. Ɓə fyemi wonə ka kwakɨ wonə a nə taangɨn?”
Təna san atɨ, “Fyemi Kaisar nə ka kwakɨngɨn.”
25Nda sarən mgban atɨ, “Gə-angɨn vəmə Kaisar sa hɨnggə Kaisar nə, hwuna və Həmɨnpwa mgban sa hɨnggə Həmɨnpwa nə.” 26Tənaa mban a kɨsə vor la nda boyo a furo ɓwaare. Le a ɓwarən ka la nda mɨnərəndən, təna kangə kping.
Ɗi le a nə mattə gə taane ka nzaa hwoɗye
(Matta 22.23-33; Markus 12.18-27)
27Beetɨ angɨn imi dɨ vor Saduke mgban, a myee sa atɨ taayə mɨni matti də gə we ka myentə, a shi haka Yesu a ɗiyən le. 28Təna san, “Nzə-kəndəshe, Musa a dorenə a vor ɓashitɨ dan atɨ jibiyə ma kana mbɨrə a ɗaka mesən taa nzə də, ɓə nza mbak-mbak mufəngɨn a ɗɨm metɨngɨn a nza kaarə gəkɨlə nda mwasa jibiyəngɨn je. 29Ɓə ya lanə ɓa gə, i ji-moryi nə də tukolukpe a kwaɗasətɨ darən. Ma kwamətə a mbɨrə a ɗaka mesən ndaa mwasa je kaarə. 30Kpeyə mufe mgban a mɨnə metɨngɨn, ndi mgban ndaa mɨna mwasa kaarə. 31Mwaakɨnə mufe a mɨnərə ɓə, tənaa mwasa. She tən kat tukolukpe təna nza kaarə, a mbərə kat tənaa mwasa kaarə. 32A kpawtə kat metɨngɨn asɨ mbɨrə. 33Ɓə gəte tən kana maggə we a kpawtɨ fəre kat ka metɨngɨn, wonə a vorsərən ɓa ɗɨmtɨrə ngga gəə mesən na, giɓə tən kat nza kaarə?”
34Yesu a sarən, “Ɓəgəng a vor vɨratə, ɓwaare a dɨ ɗɨmsə a nzaa hwoɗye. 35A nzate ɓaga shi, myee kana təna pɨrə nzatɨrə kana maggə taane, tənaa dɨ ɗɨmsə, gəkɨlə gaarə taa nzaa hwoɗi də, 36mingɨn aa diyə mbərə. Tənə ɓa gə ɓətɨ malyenye da Həmɨnpwa, gəkɨlə tənə je da Həmɨnpwa 'ye ka myentə kaaru-kaaru. 37Ɓə a shiya hwun ɓa sa? Aɓə Musa boyo bwang atɨ wogye nee dɨ maɗi. Gə a vor Malɨmtə, a ite Həmɨnpwa a byelə kan dɨ vor kaaka nzɨ-kadatə a ləwo ka ɗiye də, nda sa Musa atɨ, ‘Hɨnə Həmɨnpwata Ibɨraim, Həmɨnpwata Ishaku, Həmɨnpwata Yakubu.’#20.37 Naasə: Dɨmatə 3.6. 38Həmɨnpwatɨngɨn, aa hɨnggə wogi, ndi hɨnggə myee ka myentə nə. Gə a hakan, mingɨn kat təne ka myentə.”
39Imi dɨ vor ji-lee kəndə ɓashita Musa a luwa a san atɨ, “Nzə-kəndəshe, la hye boyo nee pepe, sə gən.” 40Ama mgban aa yə mɨna mwamdiya a shi hakan a ɗiyən a lə ɗɨm.
Ɓə Ma Həmɨnpwa a Yaɓwarən nə nze da wona?
(Matta 22.41-46; Markus 12.35-37)
41Yesu a sarən, “Ɓə gə mɨnə ɓwaare a dɨ sa atɨ Ma Həmɨnpwa a Yaɓwarən Nze da Dawuda nə ya? 42Aɓə ndi Dawuda ka nəngɨn nda sa a vor Malɨmtɨ Dyemshe atɨ,
“ ‘Həmɨmiye Baatə a sa Həmɨmiye de atɨ,
“Zə nza tɨfə zɨməngi
43baa na ɗɨkdə ji-nyaagu
təna fokə njiya
hye mwagərən ka mbwayinga.” ’#20.43 Naasə: Dyemshe 110.1.
44Aɓə həmɨn Dawuda a warən atɨ sɨnə ‘Həmɨmiye,’ ɓə ya ndi ɓa mɨna gəə sɨnə nze da Dawuda ɓə?”
Yesu a gbaliyadə ji-lee kəndə ɓashita Musa
(Matta 23.1-36; Markus 12.38-40; Luka 11.37-54)
45Ite ɓwaare kat nee a vor kɨl la Yesu a dɨ boyo, nda sa lagbe dan atɨ, 46“Bəmdə myensəwnə ka ji-lee kəndə ɓashita Musa. Tənə myee dɨ mwo wetə a vor rokoti kpan-kpanye, a vor lumotə təna dɨ mwo atɨ ɓwaare a gyerə a wunakarən. A vəni kəndəshe mgban təna dɨ mwo nzatə a humwa ɓwaare, ka hee nzatɨ fukatə a haa mya peyə də gə sɨlangsətə. 47Tənə myee dɨ tɨmbɨr nggamse mandye, mbɨrtɨrən lugərən shee. Təna shea kangə ta ɗa hiwtə gɨrə-gɨrə gə təna gbiyadə səhase darən. Wule myee, Həmɨnpwa ɓa ɗarən sə otə kɨr-kɨr.”
Zvasarudzwa nguva ino
Luka 20: bcy
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.