WINEWEUDO TINENA 10
10
I Peturu ka i Koroneliusu
10:1-48
1I Kaisarea hinao asa mia anu meneeako i Koroneliusu, aasa petewawa sorodadu anu nineeako sorodadu Italia. 2Onae moleo aroano, onae saru luwuno pe'asa rahano doitoako Ira Ue Ala ka hadio ipompowee petulungi a nto Yahudi ka wela mekakai ndi Ondae Ue Ala. 3A laro aasa pongkita, bara'ura langku otolu owowa oleo, manasa ikitao aasa mala'eka-Do Ue Ala mewinso a rahano ka ipotaeakono, ”Koroneliusu!” 4Ikokontoo mala'eka atuu ka a laro doitono ipotae, ”Hinao hapa, Ue?” Sumangki mala'eka atuu, ”Luwuno pekakaimu ka pontulungimu mewuatakoomo i aro-Do Ue Ala ka Ondae Ue Ala mewowoloko. 5Ka kanandio-andio, pontenamo ba te'opia mia lumako i Yope moboio asa mia anu meneeako i Simo ka anu nineeako i Peturu. 6Onae merato a rahano asa mia puu mpo'angga kuli anu meneeako i Simo, anu mo'ia i wiwi ntahi.” 7Mansano bintao mala'eka anu mepauakono atuu, ipoboi iramo atano orua ira saru asa sorodadu anu mesomba ntu'u ndi Ondae i Ue inso a luwuno mia anu wela perongano. 8Ka umarino mokomanasaako ira luwuakoano, itena ira melako i Yope.
9Tisomono tempono mia otolu ira atuu a laro pelempaa ka me'umpeda iramo i kota Yope, bara'ura langku hopulu ka orua ntonga oleo, mewuatakoomo i Peturu a dunsi ta mekakai. 10Onae mokoninggo ka mingki mongkaa, sine kontongaano pinatinda kaanga, borono penaano ipabawaio pabawa-Do anu pabawa. 11Ikitao langi te'ungkahi ka metiiomo aasa anu kana sawu molue anu mendoe a opaa siuno, anu pinotii a wita. 12I larono hinao mperupa-rupa kondehora mekaru opaa, kondehora melele ka manu-manu. 13Irongeomo aasa suara anu mepau, ”Pewangumo, hei Peturu, ponsumbelemo ka pongkaamo!” 14Sine sumangki i Peturu, ”Naahi, Ue, naahi, hangano napi kuhori mongkaa anu upali ka anu mokoburu.” 15Teronge mbo'u anu kompenduano suara atuu mepau ndi onae, ”Hapa anu Dopauo Ue Ala komba upali, si potae upali.” 16Hawe pentolu igagi kanandio ka umarino atuu rongaomo tetande anu kana sawu atuu i langi.
17I Peturu mesisikeno i laro aroano, ba hapa pengkonaano anu umari kinitano atuu. Kontongaano atuu mehawe iramo a mpuu pewowa mia anu tinenano i Koroneliusu ka mpesikenoakono ba isua rahano i Simo. 18Domempoboio asa mia ka dompensikeno, ba a raha atuu iperato i Simo anu nineeako i Peturu. 19Ka tempono i Peturu kontongaano mewowoloo mongkona pongkitano atuu, mepauomo Penaa, ”Hinao otolu ira mia umungkeko. 20Pentademo, petiimo i totono ka pelungkamo merongaako ira, si nanta-nanta, hangano Ongkue anu tumena ira me'aiwa ramai.” 21Ka i'amba i Peturu metiiomo i totono ka ipotaeako ira mia atuu, ”Ongkuemo anu inungkemiu; hapake tinoomiu me'aiwa?” 22Mesangki ira, ”I Koroneliusu, aasa petewawa sorodadu anu moleo aroa ka doitoako Ira Ue Ala, ka anu teto'ori moiko i olodo luwuno to Yahudi, montarimaomo pepokomengkaa-Do Ue Ala a mala'eka-Do anu mempori, ka ipoboi komiu lumako i rahano ka rumongeo hapa anu komiu pauo.” 23I'oluako ira ka domperato i tu'ai.
Tisomono mewangu ka ipelungka merongaako ira, ka ba opia ira pepaekompo inso i kota Yope tumondao. 24Ka a oleo tudano mehawe iramo i Kaisarea. I Koroneliusu kontongaano sumikori ira ka ipoboi iramo pe'etuno ka sambe-sambe'eno mpepumpu. 25Mansano mewinso i Peturu, aiwaomo i Koroneliusu tumotowoo, ka kontongaano menggolontu a mpuu karuno, i pesombaio i Peturu. 26Sine ipontadeo i Peturu, ipotae, ”Pentademo, ongkue mia aku koa.” 27Ka kontongaano mpepau-pauakono, onae mewinso ka ihawe ira mia hadio kontongaado mpepumpu. 28Ipotaeako ira, ”Imento'orio, nine tedoa inonto aasa to Yahudi mewali-waliako mia anu komba to Yahudi ke mewinso a rahado. Sine Dotisoakunemo Ue Ala, nine nahi moiko kupotaeakono mia mokoburu ke nahi morina. 29Onaemo pu'uno ka ku'aiwa ramai tempono kupinoboi. Kanandio-andio aku mingki tumo'orio, hapa pu'uno ka imempoboi aku.” 30Sumangki i Koroneliusu, ”Opaa oleo anu telalo bara'ura a tempo anu mengkena kanandio-andio, onaemo langku otolu owowa oleo, kontongaaku mekakai i raha. Borono hinao asa mia mentade i aroku, sangkano tesosangkilo 31ka ipotae: Koroneliusu, pekakaimu Dorongeomo Ue Ala ka pontulungimu mia mongkokolaro Doto'oriomo. 32Pontenamo mia lumako i kota Yope moboio i Simo anu nineeako i Peturu; onae kontongaano merato a rahano i Simo, asa mia puu mpo'angga kuli, anu mo'ia i wiwi ntahi. 33Onaemo pu'uno ka kuronga montena mia aiwa ndi omiu, ka mawongko aroaku hawe komiumo. Kanandio-andio mendio kamimo i ndi'ai i aro-Do Ue Ala ka kimerongeo hapa anu Dotenaakomiu Ue Ala.”
34 #
Win. 10:17
Ka i'amba mompu'uomo i Peturu mepau, ipotae, ”Menteeano kupokonto'oriomo, nine Ondae Ue Ala nahi Dopobibiniki mia. 35Sompo mia maupo inso a tongku i sua anu doitoako Ira ka moweweu anu mentee Dopemoikoo. 36Onaemo atuu pau Dopetenaako mohaweo a nto Isaraeli, onaemo pau anu mompalele rodoa hangano Ondae i Yesu Kerisituu, anu Ondaemo Uedo luwuno mia. 37Imento'orio mongkona luwuakoano anu gagi i asa wawo wita Yudea, mompu'u inso i Galilea, umarino pebahoa anu pinaleleno i Yohane, 38onaemo mongkona Ondae i Yesu inso i Nasare: ba kana'umpe Do'urapiako Ira Penaa Mempori ka rosono pabawa, Ondae, anu melempa sumompoo wita moweweu anu moiko ka mokotompa ira luwuno mia anu pinabawaino i Mosa'o, hangano Ondae Ue Ala kumongkomi Ira. 39Ka omamimo sakosii a luwuakoano anu wineweu-Do i wita Yudea maupo i Yerusale; ka dompepate Iramo ka domendoe Ira a ngkeu pinotamba. 40Ondae i Yesu atuu Dowangu Iramo Ue Ala a oleo anu ko'otolu, ka Dopemoikoo Ue Ala Dopepopokita, 41komba a luwuno tongku, sine a luwuno sakosii, anu se'eluno Dotiso iramo Ue Ala, onaemo omami anu mpongkaa ka mpo'inu merongaako Ira, umari-Do mewangu inso i olodo mia mate. 42Ka Dotena kamimo mempaleleo a luwuno tongku ka mensakosiio, nine Ondaemo anu pinakosi-Do Ue Ala gagi Puu Mpobitarado mia mentuwu ka mia mate. 43Mongkonamo Ondae sinakosiido luwuno nabi, nine ba isema me'ala-ala Ira, ta inampuniako halano hangano nee-Do.”
44Tempono kontongaano mepau kanatuu i Peturu, metiiomo Penaa Mempori a luwuno mia anu merongeo pompalele atuu. 45Ka luwuno mia mpompe'ala-ala inso anu mentondao gau mpetindi anu mentondao i Peturu, mengkohali-hali, hangano mengkitao, nine Penaa Mempori pinotii koa mbo'u a tongku susua, 46hangano domeronge ira mia atuudo mpepauako pau-Do penaa ka me'unde-unde Ira Ue Ala. Ka i'amba motae i Peturu, 47”Moiko koake ipepo'onto mia ba domebinahoako uwoi mia andiodo, kahinaano ondae mpotarima iramo Penaa Mempori mengkena kana ontae?” 48Ka i'amba tumena ira mebinaho a nee-Do i Yesu Kerisituu. Ka do'amba me'emao i Peturu, ka ipo'ia ba te'opia oleo mbo'u merongaako ira.
Zvasarudzwa nguva ino
WINEWEUDO TINENA 10: XMZ
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda