मर्कुस 3
3
हात सुक्या मान्स निको पाणियो
(मत्ति १२:९-१४; लुका ६:६-११)
1इसु सभाघरमि गया। ताँ एक जनो हात सुक्या मान्स थ्यो। 2काँइ इसुले तइलाइ बिस्राम दिनमि निको पाड्डाहान् कि भनिबर उनुलाइ दोस लाउनाइलाइ मान्स उनरो चियो अद्दाथ्या। 3तबइ उनुले हात सुक्या मान्सलाइ भुन्यो, “उठ, याँ आ।” 4इसुले तिनुलाइ भुन्यो, “बिस्राम दिनमि भलाइ अद्दु कि खराब अद्दु, परान बचाउन कि नास अद्दु, क्या उच्चित छ?” तर तिनु चुप लाग्या।
5तिनरा ह्रिदयको कठोरतामि दुःखि भइ भउतइ रिसाइबर उनुले तिनुलाइ हेर्यो, रे तइ मान्सलाइ भुन्यो, “तेरो हात पसार” तइले हात पसार्यो रे तइको हात निको भयो। 6तबइ फरिसि दलका मान्स सभाघरबटहइ निकल्बर गया रे हेरोद राजाका मान्सलाइ भेटिबर इसुलाइ कसेरि माद्या भनि सल्ला अद्द लाग्या।
मान्सको भिड इसुका पाछा लाग्यो
7तइपाछा इसु आफना सिस्यासित समुन्दरतिर गया, रे मान्सको ठुलो भिड गालिल रे यहुदियाबटहइ उनरा पाछा लाग्यो। 8इसुले अर्या अचम्मका कामका बिसयमि सुनिबर मान्स गालिल, यरुसलेम, इदुमिआ, यर्दन नदिपारि, टुरोस रे सिदोन सहरका वरिपरिबटहइ लइ भिड इसुका वा आयो। 9इसुले यो धेकिबर मान्सका भिडले आफुलाइ जनकुचलउ भनि सिस्यालाइ एक नाउ ल्याउन लायो। 10इसुले भउतइ मान्सलाइ निको पाण्याहुनाले, रोग लाग्या सप्पइले उनुलाइ छुनाकि निउति ठेलाठेल अद्दलाग्या। 11जबइ असुद्द आत्मा लाग्या मान्स इसुलाइ धेकन्थ्या, तबइ उनरा अगाडि घोप्टापणिबर यसो भन्नइ चिच्च्याउथ्या, “तमु परमेस्वरका चेला हउ”
12तर इसुले “मु को हुँ भन्न्या कुरा मान्सलाइ थाँ जनदिया” भनिबर तिनुलाइ उनुले कडा आग्या दियो।
बार जना सिस्याको छनउट
(मत्ति १०:१-४; लुका ६:१२-१६)
13तइपाछा इसु डाँणातिर उकल्या, रे उनुले आफुलाइ चाइयाजति सिस्यालाइ बोलायो। तिनु उनरा वाँ आया। 14आफुसित रनाइलाइ रे प्रचार अद्दाइलाइ इसुले बार जानालाइ छान्यो, रे तिनरो प्रेरित भन्न्या नाउँ राख्यो। 15पइ तिनुलाइ भुत निकाल्या अधिकार लइ दियो।
16तिनु बार प्रेरित इनुइ हुन सिमोन जइको नाउँ इसुले पत्रुस राख्यो, 17जब्दियाका दुइ भाइ चेला याकुब रे युहन्ना, यिनरो नाउँ उनुले “बोअनरगेरस” राख्यो, जइको अर्थ गर्जनको सन्तान हो। 18रे अन्द्रियास, फिलिप, बारथोलोमाइ, मत्ति, थोमा, अल्फायसको चेलो याकुब, थेदियस रे देसभक्त दलको सिमोन, 19रे इसुलाइ पक्राइदिन्या यहुदा इस्करियोत।
इसु रे बालजिबुल
(मत्ति १२:२२-३२; लुका ११:१४-२३; १२:१०)
20तइपाछा इसु घर गया। अज ताँ यति मान्स जम्मा भया कि इसु रे उनरा सिस्याले खाना खान्या फुर्सदलइ पाएइन्। 21जबइ इसुका मउकपिलाले यो कुरा सुन्यो, तबइ तिनु इसुलाइ आफुसित ल्याउनाइलाइ आया, क्यालाइकि मान्स इसुको समज ठेकानमि आथिन् भनिबर भनन्थ्या।
22यरुसलेमबटहइ आया धर्म-गुरुले भुन्यो, “तइमि बालजिबुल भुत छ! रे भुतका मालिकका सक्तिबटहइ तइले भुत निकालन्छ।”
23तर इसुले तन धर्म-गुरुलाइ बेलाइबर यइ कुराका बारेमि एक उखान भुन्यो, “सइतानले सइतानलाइ कसेरि निकाल्ल सकन्छ? 24कसइ राज्यको आपसमि फुट भयो भन्या त्यो राज्य टिक्द सक्दइन। 25कसइ घरको आपसमि फुट भयो भन्या त्यो घर टिक्द सक्दइन। 26तसेरि सइतानका राज्यमिलइ फाटो आया भन्या, त्यो टिक्द सक्दइन रे आफुइ नास होइबर जान्छ।
27“कसइले बलिया मान्सका घरमि पसिबर उइको धनमाल लुट्ट सक्दइन। जबसम्म तइले तइ बलिया मान्सलाइ पइल्लि बादिबर राख्दइन तन्ज्यासम्म तइले तइ मान्सको घर लुट्ट सक्दइन्।
28“साँच्चि, मु तमुखि भुन्नउ, मान्सका सप्पइ पाप रे परमेस्वरलाइ निन्दा अद्द्या पाप छिमा अरिन्या छन्। 29तर पबित्तर आत्माका बिरुद्दमि निन्दा अद्दालाइ कइलइ छिमा हुन्या आथिन्, रे त्यो कइलइ नमेटिन्या पापको दोसि ठरिन्या छ।” 30इसुले यो बचन भुन्यो, क्यालाइकि “उनुमि असुद्द आत्मा छ” भनिबर तिनुले भनन्थ्या।
इसुका इजा रे भाइ
(मत्ति १२:४६-५०; लुका ८:१९-२१)
31तबइ इसुका इजा रे भाइ आया। तिनुले बाइरइबटहइ इसुलाइ बोलाउन लायो। 32इसुका वरिपरि मान्सको भिड बसिरइथ्यो कसइले उनुलाइ भुन्यो, “गुरु जि, तमरा इजा रे भाइ बाइर तमलाइ बोलाउन्ना छन्।”
33इसुले तिनुलाइ भुन्यो, “मेरा इजा रे भाइ को हुन्?” 34रे उनुले आफना चारइतिर बस्या मान्सलाइ हेरिबर भुन्यो, “हेर, यिनुइ हुन मेरा इजा रे भाइ। 35क्यालाइकि जो परमेस्वरको इछ्या पालन अद्दाछन् तिनुइ मेरा बइनि, इजा रे भाइ हुन्।”
Zvasarudzwa nguva ino
मर्कुस 3: DOTY
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Mother Tongue Translators Society and Wycliffe Bible Translators, Inc. All rights reserved.