मरकुस 10
10
तलाक रै बारै मे सीख
(मती 19:1–12; लूका 16:18)
1यीसु पछै उठै ऊं उठनै यहूदिया देस मे अर यरदन नदी रै पार गिया अर भीड़ उणरै खनै पाछी भेळी होयगी अर वो आपरी रीति ऊं वळै सिखावण लागा।
2फरीसी उणरै खनै आयनै उणनै फसावण वास्तै उण ऊं पूछयौ, “कांई व्यवस्था आदमी नै आपरी लुगाई नै तलाक देवण री छूट दैवै?”
3यीसु उणौनै पूछयौ, “मूसा थांनै कांई हुकम दियौ है?”
4 #
मत 5:31
फरीसी कयौ, “मूसा आदमी नै तलाक रौ कागद लिखनै तलाक री छूट दी है।”
5यीसु कयौ के, “थौरे मन री कठोरता रै कारण मूसा थौरे वास्तै आ आग्या लिखी है। 6पण दुनिया री सरुआत ऊं परमेसर उणौनै नर अर नारी बणाया। 7इण वजै ऊं मिनख आपरै मां-बाप ऊं अलग होने आपरी लुगाई रै साथै रैवैला, 8अर वे दोनूं एक सरीर होवैला। वे दो नीं एक सरीर है। 9इण वास्तै जिनै परमेसर जोड़िया है उणौनै मिनख अलग नीं करै।”
10जद यीसु पाछा घर में आया तो चेलौ यीसु ऊं इण बारै में पूछयौ। 11#मत 5:32; 1 कुरि 7:10,11वे जबाब दियौ, “जिकौ कोई आपरी लुगाई नै तलाक देने दूजी ऊं ब्याव करै तो ओ पैली लुगाई रै सांमै पराई लुगाई रै साथै गळत कांम करनै जैड़ौ पाप है। 12जिकौ कोई लुगाई आपरा बींद नै तलाक देने दूजा ऊं ब्याव करै तो आपरा पैला बींद रै सांमै पराया मिनख रै साथै गळत कांम करनै जैड़ौ पाप है।”
यीसु रौ टाबरां ऊं लाड करणौ
(मती 19:13–15; लूका 18:15–17)
13लोग टाबरां नै यीसु खनै लावण लागा के, वो टाबरां रा माथै हाथ राख नै आसीस दे, पण चेला लोगां नै हाका करिया। 14तो यीसु ओ देखन नाराज होयनै कयौ, “टाबरां नै म्हारै खनै आवण दो, इणौनै मना मती करौ। क्यूंकै परमेसर रौ राज ऐड़ा रौ ही है। 15#मत 18:3म्हैं थौरे ऊं साची कहूं, की जिकौ कोई परमेसर रा राज नै टाबरां रै ज्यूं नीं मांनै, वो उण मे कदैई परवेस नीं कर पावैला।” 16अर यीसु टाबरां नै खोळा मे लिया अर उण माथै हाथ राखनै उणौनै आसीस दी।
पैसा वाळौ मिनख
(मती 19:16–30; लूका 18:18–30)
17जद यीसु उठै ऊं निकळनै मारग मे जावता हा, तो एक मिनख यीसु खनै दौड़तो आयौ अर उणौरै आगै गोडा टेकनै उण ऊं पूछयौ, “हे चौखा गुरु, अनत जीवन पावण वास्तै म्हैं कांई करूं?”
18यीसु उणनै कयौ, “थूं म्हनै चौखौ क्यूं कैवै? परमेसर नै छोड़ नै कोई चौखौ कोनीं। 19थूं आग्या तो जांणै है के, ‘हत्या नीं करणी, व्यभिचार नीं करणौ, चोरी नीं करणी, झूठी गवाई नीं देवणी, छळ नीं करणौ, आपरै मां-बाप रौ आदर करणौ।’ ”
20मिनख यीसु ऊं कयौ, “हे गुरु, इण सगळौ नै तो मे बाळपणाऊ मानतो आयौ हूं।”
21यीसु उणनै परैम ऊं देखनै कयौ, “थनै एक कांम करणै री जरुत है। थूं जा, जिकौ थारौ है, उणनै बेचनै उण रा पैसा गरीबो नै दे दे। इण रौ फळ थनै सरग मे मिळेला। पछै म्हारै लारै चाल।”
22इण बात ऊं उण मिनख रौ मूंडा उतरगो अर वो दुखी होयनै जातौ रियौ, क्यूंकै वो घणौ ही धनवान हो।
23यीसु च्यांरूमेर देखनै आपरै चेलौ नै कयौ, “पैसा वाळौ रौ परमेसर रा राज मे परवेस करणौ घणौ मुसकिल है।”
24चेला उणरी बात माथै अचूम्बो करयौ। इण वास्तै यीसु पाछौ चेला नै कयौ, “भाई, परमेसर रै राज मे परवेस करणौ घणौ मुसकिल है। 25ज्यूं ऊंट सूई रै नाका में ऊं नीं निकळ सकै। यूं ही धनवानो रौ परमेसर रै राज मे जावणौ दोरो है।”
26उणौनै घणौ ही अचूम्बो होयौ अर आपस मे कैवण लागा, “तो पछै किणरौ उद्धार होवैला?”#10:26 उद्धार रौ मतलब पाप री सजा माफ होणी अर परमेसर रा राज में जावणौ है।
27यीसु चेलौ रै सांमै देखनै कयौ, “मिनख खुद रौ उदार नीं कर सकै, पण परमेसर सगळौ कर सकै।”
28पतरस यीसु ऊं कैवण लागौ, “देख, म्हैं तो सगळौ छोड़नै थारै लारै हो गिया हा।”
29यीसु कयौ, “म्हैं थौरे ऊं हाची कैवूं के जिकौ कोई, म्हारै वास्तै अर म्हारै सुभ संदेस वास्तै आपरौ घर, भाई बेन, मां बाप, बाल बच्चा अर खेतो नै छोड़ दिया है, 30तो वो इण जुग मे सौ गुणा पावैला। वो इण जुग मे सौ गुणा आपरौ घर, भाई बेन, मां, बाल बच्चा अर खेतो री आसीस पावैला, पण उणनै इण जुग मे दुनिया ऊं दुख मिळेला। इतौ ही कोनीं पण सरग मे उण वास्तै अनत जीवन है। 31#मत 20:16; लूक 13:30पण जिकौ पैला हा, लारै होवैला, अर जिकौ लारै है, वे आगै होवैला।”
यीसु तीजी बार आपरी मौत रै बारै मे बतायो
(मती 20:17–19; लूका 18:31–34)
32यीसु अर उणरा चेला यरुसलेम जावता। यीसु उणौरै आगै चाल रिया हा। चेला अचूम्बे में अर दूजा लोग डरयोड़ा हा। तो यीसु उण बारैह चेलौ नै न्यारा लेजान पाछी वे बातां बतावण लागा, जिकौ यीसु रै साथै होवणवाळी ही। 33यीसु उणौनै कयौ, “अपां यरुसलेम नै जाओ अर म्हैं, मिनख रौ बेटौ विसवासघात ऊं परधान याजकौ अर सास्तरियों रै हाथ मे पकड़ा देवेला अर वे म्हनै मौत री सजा देने, जिकौ यहूदी नीं है उणौरै हाथ मे सौंप दैला। 34वे म्हारी मजाक उडावेला, म्हारै माथै थूकेला, म्हनै कोड़ा ठोकेला अर म्हनै मार दैला, पण म्हैं तीजै दिन पाछौ जीवतौ हो जाऊंला।”
याकूब और यूहन्ना री विनती
(मती 20:20–28)
35तो जबदी रौ बेटौ याकूब अर यूहन्ना यीसु खनै आने विनती करी, “हे गुरु, म्हैं चावौ हो के जिकौ कीं म्हौ थांरै ऊं मांगो, वो थै म्हौरै वास्तै करौ।”
36वो कयौ, “थै कांई चावौ की म्हैं थौरे वास्तै करूं?”
37वे उण ऊं कयौ, “म्हौ नै ओ हक दे की थारी महिमा रा राज मे थारा सिहासण रै एक थारै जिमणा हाथ अर एक डावै हाथ बिठाईजै।”
38 #
लूक 12:50
यीसु उणौ नै कयौ, “थै नीं जांणौ की थै कांई मांग रिया हो? जिकौ दुख भरियो कटोरो म्हैं पीवण माथै हूं कांई थै पी सकौ? अर जिकौ बतिस्मो म्हैं लेवण माथै ऊं, कांई थै ले सकौ?”
39वे उण ऊं कयौ, “म्हौ वैड़ौ कर सकौ हो।”
यीसु उणौ ऊं कयौ, “हा, जिकौ दुख भरियो कटोरो म्हैं पीवण माथै हूं, थै पीओला। अर जिकौ बतिस्मो म्हैं लेवण वाळौ हूं, उणनै लो ला। 40पण परमेसर जिणरै वास्तै जगा तैयार करी है, उणनै छोड़नै ओर कोई भी म्हारै डावै अर आपरै जीमणै नीं बैठ सकै।”
41ओ सुणनै बाकी रा दस चेलौ नै याकूब अर यूहन्ना माथै रीस बळने लागा। 42#लूक 22:25,26तो यीसु उणौनै खनै बुलानै कयौ, “थै जांणौ की जिकौ यहूदी कोनीं वे राजा, आपरा लोगां माथै डरा धमका नै राज करै अर उणौरा सता-धारी लोगां माथै जोर जमावे। 43#मत 23:11; मरकु 9:35; लूक 22:26पण थांरै में ऐड़ौ नीं है अर जिकौ कोई थांरै मे ऊं मोटो बणणौ चावै वो पैला थौरो सेवक बणै। 44अर जिकौ कोई थांरै मे परधान बणणौ चावै वो सगळौ रौ दास बणै। 45क्यूंकै म्हैं, मिनख रौ बेटौ भी इण वास्तै कोनीं आयौ के म्हारी सेवा होवै, पण इण वास्तै आयौ म्हैं खुद सेवा करूं, घणा नै छुड़ानै वास्तै उणौरी जगा म्हैं म्हारौ प्रांण दे दूं।”
आंधे भिखारी नै आंख्यां दी
(मती 20:29–34; लूका 18:35–43)
46यीसु अर उणरा चेला यरीहो मे आया। जद एक मोटी भीड़ रै साथै वे यरीहो ऊं निकळ रिया हा, तो तिमाई रौ बेटौ बरतिमाई जिकौ आंधौ भिखारी हो, सड़क रै कांठै बैठौ हो। 47वो ओ सुणनै के ऐ नासरत नगर रा यीसु जा रिया है, तो हाका करनै कैवण लागौ, “हे यीसु! दाऊद री औळाद, म्हारै माथै दया कर।”
48घणा जणा उणनै हाका करिया के चुप रैह, पण वो ओर हाका करन लाग्यो, “हे दाऊद री औळाद म्हारै माथै दया कर।”
49तो यीसु रुकनै कयौ, “उणनै बुलाओ।”
अर मिनख उण आंधा नै बुलायनै उण ऊं कयौ, “हीमत राख! उठ जा! वो थनै बुलावै है।” 50वो आपरी कांम्बल फेंकनै ऊभौ हो गियौ यीसु रै खनै आयौ।
51इण माथै यीसु उण ऊं कयौ, “थूं कांई चावै है की म्हैं थारै वास्तै करूं?”
आंधौ उण ऊं कयौ, “हे गुरु, ओ के म्हैं पाछौ देखण लागू।”
52यीसु उण ऊं कयौ, “जा थारै विसवास थनै सावळ करयौ है।” वो हाथोहाथ देखण लागौ अर मारग मे उणरै लारै वहीर हो गियो।
Zvasarudzwa nguva ino
मरकुस 10: RWR
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© NLCI CC BY-NC-ND 4.0