Matthieu 23
23
Jésu ndeje dooge kade ndaji nyanra njékɔr non Juipge lé
(An-in Marc 12.38-39; Luc 11.43,46; 20.45-46 tɔ)
1Jésu ede kosdoo-bulege se njékuwe-girnge tà ede nè:
2– Njékɔrgir gute-nduge se Pharisienge ndii ɔje dè kɔrgir gute-ndu Nube ke Moise ndang. 3Nyan malang ke à edi sei nga, i rai se ngang’n lêr -lêr . Nè i ndaji nyanra de lé, tede tami tà tà de’t karè anje ra nyan’n. 4Ei tɔi nyankotoge ke wɔi undei bage dooge’t, nè ei ɓaa ngaw ji de géa ndigi kulei kɔdi lêm lé. 5Nyan ra de malang è tede kunde’n ra de kum dooge’t karè. Gir’n ke nè á ei tɔri gute-nduge ke nange ei têti lanyange ke laa pe-pe tɔi kil ji de’t se nat-non de’t. Taɓai ei rai ji kubuge le de ade laai ber-ber a tɔ. 6Ke nè á dé ɓar de loo ra nan’t ɓaa, dé ndigi ndi loo ndi dooge ke bò’t kété. Kêm kei kebe nan’t géa, dé ra titeke bè a tɔ. 7Dé ndigi le kade dooge rai de lapya ndá-looge’t a, le kade dooge ɓari de njé nyangerge a tɔ. 8Nè sei ɓaa, adi dooge ɓari sei titeke bè lé, tede sei nga njè ndó sei nyan kuwe è karé bere. Gute si malang ɓaa, sei ngakon nange. 9I ɓari doo karé bè géa Bɔ si dè nang nè lé, tede è ke ndi danrán kuwe karé bere á è Bɔ si. 10Taɓai adi doo ɓar sei njékɔr non dege lé, tede njèkɔr non si kuwe è Krist karé bere. 11E ke ndige k’ee doo ke bò dann si’t ɓaa, maje kade tel ra’n ke ngonn njèkule le si. 12Nanan ke unde dè’n dɔ ɓaa, d’a d’ade dè’n à è nang ɓai. Nanan ke ule dè’n ɓaa, d’a d’ade à unde dè’n dɔ mbeng ɓai.
Jésu in se njékɔrgir gute-nduge dè ra ngang’t le de
13Sei njékɔrgir gute-nduge se sei Pharisienge ke njékede gosge, a an-in ɓai! Tede sei ilei dooge kage ɔgi de loo kile nja de kêm Konɓee ke danrán’t. Njé ke ndigi kilei nja de tutu nga, sei ɔgi de rebe’n. Bè ɓaa, sei géa a ilei nja si tutu ndan lé tɔ.
[ 14Sei njékɔrgir gute-nduge se sei Pharisienge ke njékede gosge nga, a an-in ɓai! Sei tosoi kêm kei le njékei-kingege, i kotoi nyange le de malang awi i tuji. Taɓai sei ndai ke loon’t nè ɔji tà se Nube adi kur si heb ɗak tede libe’n kum de. Gir’n ke né á tà ke d’a gang dè si’t ndɔ gangtà’t nga, a tur ngain dum le njé ke rang malang.]
15Sei njékɔrgir gute-nduge se sei Pharisienge ke njékede gosge, a an-in ɓai! Sei asi loo nák-nák dann ba-bò’t se dè nang nè, tede kinge doo karé ke njè ger Nube tite si. Nè loo ke è tel è njè ger Nube ɓá ɓaa, sei telii ke doo ke aw dann loo ke tur’t dum sei nja joo ɓai.
16Sei njékɔr non dooge nè sei njékumtɔge, a an-in ɓai! Kerɔte kuwe, sei tami edi nè: «Ke nè á doo ubu ra’n se ri loo ke tò se ninn’n gai ɓaa, sei tami edi nè: E nyan ke get lé ɓai. Nè ke nè á doo ubu ra’n se ri nar-ɔr le loo ke tò se ninn’n gai ɓaa, sei tami edi nè: Kure nain dènn’t ɓai.» 17Sei njé kêm tɔ kuju tà lége ke njékumtɔge, ké ri á è nyan ke bòi dum dè made’n wa? 18Ké nar-ɔr éké loo ke tò se ninn’n gai kêm kei’t le Nube ke tel nar-ɔr ke nyan ke tò se ninn’n gai nga wa? 19Sei njékumtɔge, ké ri á è nyan ke bòi dum dè made’n wa? Ké è nyan kade noje éké loo ró nyankuje-mese ke unde nyan kade noje se ninn’n gai nga wa? 20Nanan ke ubu ra’n se ri loo ró nyankuje-mese ɓaa, è ubu ra’n se ri nyan malang ke tò tutu. 21Nanan ke ubu ra’n se ri gile kei ke tò se ninn’n le Nube nga ɓaa, è ubu ra’n se ri Nube ke njè ndi tutu nga a tɔ. 22Nanan ke ubu ra’n se ri danran ɓaa, ubu ra’n se ri kutu-ngar le Nube ke njè ndi dè’t nga a tɔ.
23Sei njékɔr gir gute-nduge se sei Pharisienge, a an-in ɓai! Sei ugei dime mbi targe ke ri de nè menthe se fenouil, se cumin a tɔ. Nè nyan ke bò ngain ke gute-ndu ɔje ke tite nyanra ke se dè naje’n, se kêmkanm se kundekêm a tɔ nga ɓaa, sei dannii undeii ngangé karè. Dége nè nga, dé nyange ke né gar-gar a i rai de kété anje kin bal dè gute dege ke rang. 24Sei njékɔr non dooge nè sei njékumtɔge! Sei ndeein mann ɔgi ngann mann kaw kêm si’t, nè sei uri lugman kêm si’t mban.
25Sei njékɔrgir gute-nduge se sei Pharisienge ke njékede gosge a an-in ɓai! Sei togoi gide nyankain mannge se nyankuse nyange le si adi d’unju nyan-nyang. Nè ngur banm dooge se kêmkein rusu kêm si njin-njin. 26I Pharisien ke njèkumtɔ: I togo kêm nyankain mann se nyankuse nyan ade unju kété ɓita i togo gide de ade unju ɓai.
27Sei njékɔrgir gute-nduge se sei Pharisienge ke njékede gosge a an-in ɓai! Sei tooi asinan se dè ɓadege ke dé ra ponron gidé nata d’ade ndai káng-káng. Nè kinge ninnge se nyange ke mine ke se ri de-ri de rusi kêm de ke kei njin-njin. 28Sei géa, è titeke bè tɔ. Sei rai ra si ke njé ra nyan se dè najennge tàkum dooge’t, nè kede gos se nyan ra bann-bann rusu kêm si njin-njin.
29Sei njékɔrgir gute-nduge se sei Pharisienge ke njékede gosge a an-in ɓai! Sei undei dè ɓade njéribe-dè-tàge ke tà Nube’t adi maje ndêi a, sei gɔli dè ɓade njé ra nyan se dè najennge adi tel maje pêt-pêt a tɔ. 30Ɓaa sei tami edi nè: «Kêm ndɔnge’t le kà jége nga, ke nè á ndɔ ke jè se de nan’t ɓaa, j’à j’um nan’t se de dè tɔl ke dé tɔl njéribe-dè-tàge ke tà Nube’t nga lé.» 31Ra ke sei rai titeke bè nga, sei kuwe ɔri gir si titeke sei sei ngann le njé tɔl njéribe-dè-tàge ke tà Nube’t nga kerɔte. 32Nyan ke kà sige ɔji rai kété nga, sei tɔli tà’n mbas ɓá ta. 33Sei i tooi asinan se li jênênnge, tà ke d’a gang dè si’t dann loo ke tur’t nga, ké à nal sei titeke bain wa? 34Gir’n ke nè á an-in! m’a m’ule se njéribe-dè-tàge ke tà Nube’t se njékumkunjuge a, se njéndang magtubge a tɔ ra si’t. Nè sei a tɔli njé ke karége a, a i ɓeri njé ke nange kàde kage-ke-dese’t a, a i tundei njé ke nange se ndêin maru kêm kei kebe nan’t le si a, a ɔri njé ke nange kororoi se kêm ɓee-ɓee a tɔ. 35E titeke bè tede le mese njé ra nyan se dè najennge malang ke an-in ule nang nè, unn gir dè Abel njè ra nyan se dè naje’n sár tee’n dè Zakarie ngonn le Baraki, ke sei tɔli nin dadann gile kei’t le Nube se ɗinger loo nyankuje-mese’t nga, tà yo de à uwe dè si. 36Kerɔte kuwe, man m’ede sei tà nyange nè nga à uwe dè girkoje dooge ke ndii dè nang nè ɗarinè nga.
Jésu tam tà le ɓee-bò ke Jérusalem ke à tuju
(An-in Luc 13.34-35 tɔ)
37Sei dooge ke i ndii kêm ɓee-bò ke Jérusalem, sei ke njé tile dooge ke Nube ule de ra si’t se kuberi her tɔl de. Dɔ-dɔ, m’ndige kɔse nja si nan’t titeke kon kunje kebe’n ngann’n gir bagenn’t, nè sei ndigi kinyei man kade m’ra titeke bè lé. 38An-in! ɗarinè Nube asekum kan-in ngang si lé ta. 39Ma m’ede sei ndàt, loo naje’n goto, sei a teli kan-in man gugu ndan lé sár kade i tami edi nè: «E ke ree se ri Kuwe-ɓee nga, maje kade dè’n mong kang-kang.»
Zvasarudzwa nguva ino
Matthieu 23: GUL04
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Magtub Mann-ra ke Kige ©Alliance Biblique du Tchad, 2004