SAN JUAN 3
3
Jesús jare Nicodemo
1Oiko metei fariseo Nicodemo jee vae. Jae ko judío reta ipɨte pe tuichagüe yae vae. 2Kuae kuimbae ou Jesús oïa pe pɨ̈tu yave jare jei chupe:
—Oporomboe vae, roikuaa ko Tumpa ndembou reporomboe vaerä. Echa mbaetɨ kia ipuere oyapo kuae mɨakañɨ reta reyapo vae Tumpa mbaetɨ oï yave jae ndive.
3Jesús jei Nicodemo pe:
—Añetete che jae ndeve, mbaetɨ kia oa pɨau ye vae, ngaraa ipuere oecha Tumpa iporookuaía.
4Nicodemo jei:
—¿Këraita pa ipuere metei kuimbae indechi vae oa pɨau ye? ¿Ipuere yera oike ye ichɨ jɨe pe oa ye vaerä?
5Jesús jei chupe:
—Añetete che jae ndeve, mbaetɨ kia oa pɨau ye ɨ rupi jare Espíritu rupi vae ngaraa oike Tumpa iporookuaía pe. 6Yandesɨ güi yaa yave, ñanoi tekove ɨvɨ peguaño. Ërei Espíritu Santo rupi yaa yave omee yandeve tekove Espíritu pegua. 7Agüɨye nepɨakañɨ kuae jae ndeve vae re: “Opaete vae oa pɨau ye tai ko.”#1 P 1.3,23. 8Ɨvɨtu oyepeyu oipota rupi güi jare reendu jɨapu. Ërei mbaetɨ reikuaa ketɨ güi ra ou jare ketɨ ra ojo vae. Jökorai ko oa Espíritu Santo rupi vae.#Ec 11.5.
9Nicodemo jekuae oparandu ye:
—¿Këraita pa ko oyeapo kuae?
10Jesús oparandu Nicodemo pe:
—¿Mbaetɨ pa reikuaa kuae nde Israel pegua reta omboe vae? 11Añetete che jae ndeve, oremiari ko roikuaa vae re jare romombeu ko roecha vae. Ërei mbaetɨ perovia romombeu peve vae. 12Chemiari ma peve mbaembae ɨvɨ pegua re, ërei mbaetɨ chererovia, jayave ¿këraita pa pepuere chererovia mbaembae ara pegua re chemiari peve yave? 13Mbaetɨ kia ave ojo ara pe, jaeño ara güi ogüeyɨ vae, jae ko che Kuimbaerä ayeapo vae. 14Moisés arakae oupi mboi iä ɨvɨra re ñuu pe rami,#Nm 21.9. jökoraitai ko ïru vae reta chereupi,#Is 52.13; Jn 8.28; 12.32-34; 18.32. 15oipotagüe güɨrovia cheré vae güɨnoi vaerä tekove opambae vae, ngaraa ojo kañɨtei pe.
Tumpa oaɨu yae ɨvɨ pegua reta
16Echa Tumpa oaɨu yae ɨvɨ pegua reta. Jáeramo omee Taɨ jaevaeño vae, oipotagüe güɨrovia jese vae güɨnoi vaerä tekove opambae vae, ngaraa ojo kañɨtei pe. 17Tumpa mbaetɨ ko ombou Taɨ ojäa vaerä ɨvɨ pegua reta, ombou ko ɨvɨ pegua reta oyemboasauka vaerä.
18Güɨrovia jese vae, ngaraa oñejäauka. Ërei mbaetɨ güɨrovia jese vae oñejäauka ma ko. Echa mbaetɨ güɨrovia Tumpa Taɨ jaevaeño vae re. 19Tembipe ou ma ɨvɨ pe, ërei ɨvɨ pegua reta oaɨu yae iyeupe pɨtumimbiño, tembipe güi, echa jembiapo reta ikavimbae vaeño. Jáeramo oñejäauka reta ma ko. 20Oipotagüe ikavimbae vae oyapo vae omotareɨ tembipe. Mbaetɨ ou tembipe pe, agüɨye vaerä ïru vae reta oikuaa chugüi jembiapo reta ikavimbae.#Job 24.13-17. 21Ërei añete pegua rupi oiko vae ou tembipe pe, ïru vae reta oikuaa vaerä jembiapo reta oyapo ko Tumpa jemimbota rupi kavi.
Omendata vae ivɨa-ïru
22Kuae jaɨkue rupi Jesús jare jemimboe reta yogüɨraja ɨvɨ Judea pe. Joko pe opɨta reta jare jae oporombobautisauka oï. 23Juan vi oporombobautisa oï Enón pe. Enón köiño oï Salim güi. Echa joko pe jeta ɨ. Jare amogüe vae yogüeru jare Juan ombobautisa reta. 24Echa ndeiño oñoña reta Juan tembipɨɨrɨru pe.#Mt 14.3; Mc 6.17; Lc 3.19-20.
25Jayave Juan jemimboe reta oyoaka ñogüɨnoi judío reta ndive, kërai ipuere oyetɨo reta Tumpa peguarä vae re. 26Jayave yogüeru Juan oïa pe jare jei reta chupe:
—Oporomboe vae, ɨ̈aka Jordán jovaicho pe oiko nde ndive vae, jókuae nemiari jese vae, oporombobautisa oï, jare opaete vae yogüɨraja ñogüɨnoi jae oïa pe.
27Jayave Juan jei chupe reta:
—Tumpa omee yandeve vaeño yandepuere ñanoi. 28Che jae ma peve: “Che jaeä ko Cristo. Jaeño Tumpa chembou jae jenonde.”#Jn 1.20. Pe reta etei peikuaa körai ko che jae peve vae. 29Jae ko metei kuimbae omendata vae rami. Che ko omendata vae ivɨa-ïru rami. Echa omendata vae ivɨa-ïru opɨta omendata vae ndive jare oyeapɨsaka jese jare oyerovia iñee oendu yave. Jökoraiño vi ko che añave ayerovia yae. 30Jupi ko jeta vae yogüɨraja vaerä ikotɨ, jare mbovɨño yogüeruta chekotɨ.
Ara güi ou vae
31Ara güi ou vae güɨnoi mbaepuere opaete re; ɨvɨ pegua reta ɨvɨ peguaño ko jare oyemongeta mbaembae ɨvɨ pe oï vae reño. Ara güi ou vae güɨnoi mbaepuere opaete re. 32Jae omoërakua oecha jare oendu vae, ërei mbaetɨ kia güɨrovia jae omoërakua vae re. 33Jae omombeu vae güɨrovia vae, oikuaauka ïru vae reta pe güɨrovia ko Tumpa iñee añete ko. 34Jókuae Tumpa ombou vae imiari Tumpa iñee, echa Tumpa omee chupe iEspíritu. 35Tu oaɨu Taɨ, jare oñono opaete mbaembae ipo pe.#Mt 11.27; Lc 10.22. 36Tumpa Taɨ re güɨrovia vae güɨnoi ma tekove opambae vae, ërei Tumpa Taɨ re mbaetɨ güɨrovia vae ngaraa güɨnoi tekove. Tumpa iyarasɨ oata jese.
Zvasarudzwa nguva ino
SAN JUAN 3: GUABD
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Biblia DC Guaraní Bolivia © Bolivian Bible Society, 2001.