KECHENG 11
11
Bebilon Ahemchardon
1Kechengsi, pirthe adang kedo-an arat atum alam-aki isinat lapen isinat alamthe-heihei si ningjepet-lo. 2Latum nihang anat dam bomsi, latum Bebilon athoi along nanglelo lapen hadak dodamlo. 3Latum lahin lahin chepulo, “Vangnon! Eli ita selam lonang lapen lahei pherang-pame lonang.” Lasonsi latum kekimji aphan ita dolo lapen lahei kerakji aphan ingchin arrita dolo. 4Latum pulo, “Non eli isi sining-inghun kelerok ahemchardon arongsopi kimlonang, anke etum emethang amen pado thekpo lapen pirthe adang bithe-bitha pratsei nangnelo.”
5Anke rongsopi kelangjisi Hemphu nanghirlo lapen halahei amonit atum kekim ahemchardon langsi, 6Alangli pulo, “Non lahei arat kedo-an latum isinat alam si ningjelo; lake latum keklemji akam kechengsi lo. Latum keklemji aning kehang aling pachun-dapprangpo. 7Eli damra latum alam paprek et-lonang, anke latum lahin lahin charju thekthe detpo.” 8Lasonsi latum aphan Hemphu pirthe adang bithe papratseilo, lapen latum rongsopi kekim sangkok-lo. 9Laso arongsopi Bebilon#Ibri penke “kechingvui” pulo, pima hadaksi Hemphu arat kedo-an alam paprekjam lo, lapen hadak pensi Alangli latum aphan pirthe adang bithe papratseilo.
Shem Aso-asu
(1 Phur 1.24-27)
10Shem aso-asu atum lahei helo. Langthepi ningkan hini aphi Shem ningkan 100 kepleng ahut, alangli inut asopo dolo, lake Arpakhshad. 11Laso aphi alangli ningkan 500 reng-lo, lapen akaprek asomar dolo.
12Arpakhshad ningkan 35 arta ahut, alangli inut asopo do lo, la Shelah; 13laso aphi alangli 403 aningkan reng-lo lapen asomar dolo.
14Shelah arta ningkan 30 ahut, alangli sopo inut Eber dolo: 15laso aphi alangli ta ningkan 403 reng-lo lapen asomar dolo.
16Eber arta ningkan 35 ahut alangli sopo inut Peleg dolo; 17laso aphi alangli ningkan 430 reng-lo lapen asomar dolo.
18Peleg arta ningkan 30 ahut, alangli sopo inut Reu dolo, 19laso aphi alangli 209 reng-lo lapen asomar dolo.
20Reu arta ningkan 30 ahut, alangli inut asopo dolo, la Serug lo; 21laso aphi alangli ningkan 207 reng-lo lapen asomar dolo.
22Serug arta ningkan 30 ahut, alangli sopo inut. Nahor dolo, 23laso aphi alangli ningkan 200 reng-lo lapen asomar dolo.
24Nahor arta ningkan 29 ahut alangli sopo inut Terah dolo, 25laso aphi alangli ningkan 119 reng-lo lapen asomar dolo. 26Terah arta ningkan 70 aphi, alangli Abram, Nahor lapen Haran apo plang-lo.
Terah Aso-asu
27Terah aso-asu lahei helo, alangli Abram, Nahor lapen Haran apolo. Haran ke Lot apolo, 28lapen Haran arongsopi methang Ur along si amek chilo, la Bebilon adet, halaso ahut apo reng-et-lang. 29Abram ke Sarai aphan pangrilo, lapen Nahor ta Milkah, la Haran asopi aphan enlo, Haran ke Iskah apolo. 30Sarai ke aso chepado un-e det-lo.
31Terah ke asopo Abram aphan, asupo Lot lake Haran asopo, lapen amunpi Sarai lake Abram apiso aphan cheponsi Kanaan adet kedamjisi Bebilon adet Ur arongsopi otekangbub-lo. Latum un an ha Haran an damsi hadak latum dodamlo. 32Terah arta ningkan 205 ahut alangli thi-lo.
Zvasarudzwa nguva ino
KECHENG 11: KARBIBSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Karbi Holy Bible © Bible Society of India, 2010.
Used by permission. All rights reserved worldwide.